1. Why you think say Abraham suppose believe say wetin e de hope for go happen?

 ABRAHAM na Jehovah friend, na im make Jehovah promise-am say e go born pikin wey be boy, and all nations for this earth go get blessing because of the pikin. (Gen. 15:5; 22:18) Because Abraham get strong faith, e believe say wetin Jehovah promise-am go happen. But even when Abraham dey 100 years and im wife Sarah dey 90 years, them never still get the pikin. (Gen. 21:1-7) Even with this one, Bible talk say: “Because of [im] hope, e get faith say e go be papa of many nations as God don promise.” (Rom. 4:18) We know say wetin Abraham hope for, happen. E born Isaac, wey be the pikin wey e don de hope for. Why Abraham dey sure say Jehovah go do wetin e promise?

2. Wetin make Abraham really dey sure say wetin Jehovah promise-am go happen?

² Because Abraham get better friendship with Jehovah, this one make-am “really dey sure say God” go do wetin e don promise-am. (Rom. 4:21) Jehovah happy with Abraham because of im faith and call-am righteous person. (Jas. 2:23) As e dey for Romans 4:18, Abraham get faith and hope. Now, make we see wetin apostle Paul talk about hope for Romans chapter 5.

3. Wetin apostle Paul talk about hope?

 ³ Apostle Paul explain why we fit dey sure say our ‘hope no go fail’ us. (Rom. 5:5) E still help us understand how we fit make our hope continue to de strong more-more. As we de discuss wetin Paul talk for Romans 5:1-5, think about how your hope for wetin Jehovah promise about our future, de grow as time de go. We go still talk about how you fit make your hope strong pass as e be now. But make we first talk about the wonderful hope wey apostle Paul talk say no de fail.

4. Wetin Romans 5:1, 2 de talk about?

⁴ Read Romans 5:1, 2. Apostle Paul write wetin dey this Bible verse to the congregation for Rome. The brothers and sisters for that congregation don learn about Jehovah and Jesus, don show say them get faith, and them don become Christians. So this one make ‘God talk say them dey righteous because of faith,’ and e anoint them with im holy spirit. This one give them better hope.

5. Which hope anointed Christians get?

⁵ Later, apostle Paul write to anointed Christians for Ephesus about the hope wey them get. Their hope be say them go receive the things “wey [God] don promise to give the holy ones.” (Eph. 1:18) Apostle Paul still tell the brothers for Colossae where their hope dey. E call-am “the hope wey God keep for [them] for heaven.” (Col. 1:4, 5) So, the hope wey anointed Christians get be say God go bring them back to life and take them go heaven, so that them go rule with Jesus Christ.—1 Thess. 4:13-17; Rev. 20:6.

6. Wetin one anointed brother talk about im hope?

⁶ Anointed Christians value their hope. Brother Frederick Franz wey be one of them, talk with all im heart say: “We dey sure say wetin we hope for, must happen. And all the 144,000 anointed Christians go get  wetin Jehovah promise us, even pass wetin we fit ever think of.” After e don serve Jehovah well for plenty years, Brother Franz talk for 1991 say: “Our hope still strong for our heart well-well. . . . The more we de wait for-am, the more we de value-am. We ready to wait for-am even if we need to wait for one million years. I value our hope now even pass before.”

7-8. Which hope most of us wey de serve Jehovah today, get? (Romans 8:20, 21)

⁷ The hope wey almost all of us wey de worship Jehovah today get, no be to rule with Jesus for heaven. But na the same hope wey Abraham get, wey be to live forever for Paradise for this earth. (Heb. 11:8-10, 13) Apostle Paul write about the wonderful things wey people wey get this hope, go enjoy. (Read Romans 8:20, 21.) When you first learn about wetin God talk say go happen for Paradise, which one sweet you pass? Na when them teach you say one day, you go dey perfect and your body no go de push you to sin again? Or na when you learn say people wey you love wey don die go come back to life? Because of the hope wey God give us, you get plenty things wey you de wait for when the Kingdom come.

⁸ Whether your hope na to live forever for heaven or for this earth, all of us get wonderful hope wey de make us happy. And we fit make our hope strong more-more as time de go. Apostle Paul explain how we fit do this one. Make we see wetin e talk about our hope. This one go make our hope strong more-more say wetin we de wait for go happen.

9-10. As we see for apostle Paul example, wetin we fit expect as we de worship Jehovah? (Romans 5:3) (Still check the pictures.)

⁹ Read Romans 5:3. When we de suffer e fit make our hope strong pass as e be before. This one fit surprise you. The truth be say all of us wey de worship Jehovah  know say we go face problems. Make we talk about apostle Paul example. E tell the Christians for Thessalonica say: “When we dey with una, we de tell una before e happen say we go suffer, and na so e happen.” (1 Thess. 3:4) And e tell the brothers for Corinth say: “My brothers, we want make una know about the suffer wey we face . . . and we no even dey sure about our life at all.”—2 Cor. 1:8; 11:23-27.

¹⁰ We wey de serve Jehovah today suppose get-am for mind say we go face problems. (2 Tim. 3:12) You de face problem because you de worship Jehovah? E fit be say your friends and family people de laugh you or treat you the way them no suppose, because you de serve Jehovah. Or, e fit be say your oga for work or your workmate de treat you anyhow because you no want join them for the bad things wey them de do. (Heb. 13:18) Or, e fit be say government people de suffer you because you de preach about the hope wey you get. No matter the kind problem wey you de face, apostle Paul talk say make we de happy. Why e talk like that?

11. Why we need to make-up our mind say we go endure any problem wey we fit face?

¹¹ Even when we de face problem, we fit still de happy because this one fit make us learn better character. Romans 5:3 talk say, ‘suffer de make us endure.’ All of us wey de worship Jehovah go face problem. So, all of us go need to endure any problem wey we fit get. If we continue to endure, we go get wetin we de hope for. We no want be like the people wey Jesus talk say them be like seed wey fall for area wey rock dey. Them first happy to accept the message but them stop to do wetin them learn because of suffer and problem. (Matt. 13:5, 6, 20, 21) Na true say problem no de sweet for body, but when we continue to endure, we go gain. Why we talk like that?

12. Wetin we de gain when we endure problem?

¹² James talk about wetin we go gain when we endure problem. E talk say: “Allow endurance finish im work so that una go dey complete and do well for everything. Una no go lack anything.” (Jas. 1:2-4) James talk say when we endure, we get plenty things wey we de gain. E fit help you get more faith, dey patient more-more and trust Jehovah more. But we get another important way wey we de gain when we endure.

13-14. How Jehovah de feel when we endure, and how e de affect our hope? (Romans 5:4)

¹³ Read Romans 5:4. Apostle Paul talk say when we endure, “God go gree say we do well.” So, to de endure de make Jehovah happy. This one no mean say Jehovah de happy because you de face problem. Na you Jehovah de happy with. E de happy with you because you de endure. This one na better blessing!—Ps. 5:12.

¹⁴ Remember say Abraham endure plenty problem, and that one make Jehovah happy with-am. Jehovah call-am im friend, and see-am as righteous person. (Gen. 15:6; Rom. 4:13, 22) Jehovah fit see you as righteous person and call you im friend, just like Abraham. No be the work wey we de do for Jehovah organization or where we de serve, de make-am happy with us. But na when e see say we continue to hold-am tight even when we de face problem. Whether we dey young or we don old, and no matter our condition, all of us fit endure when we de face problem. E get any problem wey you de endure now? If your answer na yes, remember  say you de make Jehovah happy. When we know say we de make Jehovah happy, e de make our hope for the things wey Jehovah promise us, strong more-more.

15. Wetin Paul talk next, and why this one fit surprise some people?

¹⁵ Jehovah de happy with us when we continue to hold-am tight and endure problems. See the next thing wey apostle Paul talk. E say: “When God don gree say we do well, we go get hope; and the hope no de fail.” (Rom. 5:4, 5) This one fit surprise some people. Why? Because for Romans 5:2, Paul talk say the Christians for Rome already get hope, wey be “to receive the glory of God.” So some person fit ask say, ‘if the Christians for Rome already get hope, why Paul talk about hope again?’

16. Wetin fit help person start to get hope and make the hope strong? (Still check the pictures.)

¹⁶ We fit understand wetin Paul mean if we remember say we fit make our hope strong more-more. For example, you remember how you feel when you first hear about the hope say God go bring Paradise? E fit be say that time, you tell yourself say, ‘na really better thing o, but I no sure say e fit happen.’ But as you continue to learn more about Jehovah and the promise wey e make for Bible, you come dey sure more-more say wetin we de hope for, go happen.

17. How your hope fit continue to de strong even after you don baptize?

¹⁷ Even after you baptize, you continue to learn about Jehovah and this one make you love-am more. And e make you trust Jehovah more say e go do the things wey e promise. (Heb. 5:13–6:1) Wetin apostle Paul talk for Romans 5:2-4, fit don happen to you. You don face plenty problem, but you endure them and the way Jehovah help you show say e de happy with you. Now, you get more reason to trust say Jehovah go do  wetin e promise, because you know say e love you and e de happy with you. Your hope don strong pass before. And you value the hope now, pass before! This hope de help you well-well and e de affect everything for your life, like, how you de treat your family, the decisions wey you de make, and even the way wey you de use your time.

18. Wetin apostle Paul write wey make us trust Jehovah promise?

¹⁸ Apostle Paul talk another important thing about the hope wey you get, after you don endure and make Jehovah happy. E talk say wetin you de hope for, go happen. Why you dey sure say e go happen? See wetin apostle Paul write wey make us trust Jehovah promise. E talk say: “The hope no de fail; because God don pour im love inside our heart through the holy spirit wey e don give us.” (Rom. 5:5) So, you get every reason to believe say wetin Jehovah promise you, go happen.

19. Wetin you fit dey sure of about your hope?

¹⁹ Think about wetin Jehovah promise Abraham and how e show say E happy with-am and call-am Im friend. Wetin Abraham hope for, happen. Bible talk say: “After Abraham don show say e dey patient, e get this promise.” (Heb. 6:15; 11:9, 18; Rom. 4:20-22) So, wetin e hope for no fail-am. You too fit dey sure say if you continue to hold Jehovah tight, you go receive wetin you de hope for. You get plenty reason to de happy because you know say wetin you de hope for go happen, e no go fail. (Rom. 12:12) Apostle Paul write say: “Make the God wey de give hope make una full with complete joy and peace as una de trust-am, so that una go fit get hope more-more with power of holy spirit.”—Rom. 15:13.