1-2. Wetin fit make us cry?

 NOBODY fit talk say e never cry before. Sometimes we fit happy sotey we start to cry. For example, e fit be say you cry when some special thing happen to you like when you born pikin, or when you remember something wey really make you happy, or when you see your friend wey e don tey wey una see each other.

² But many times, we de cry because we dey sad and we de suffer. For example, we fit cry when person wey we trust well-well disappoint us. We fit cry when we de sick and we get serious pain for long time or when person wey we love die. For this kind time, the way we de feel fit be like the way Jeremiah feel when Babylon people destroy Jerusalem. Jeremiah talk say: “Plenty water de flow from my eyes like river. . . Tears continue to flow from my eyes, I no stop to cry.”—Lam. 3:​48, 49.

3. How Jehovah de feel when e see as im servants de suffer? (Isaiah 63:9)

³ Jehovah know how many times we don cry for our life because of pain. Bible tell us say e know each time wey we de suffer, and e de hear our prayer when we beg-am make e help  us. (Ps. 34:15) But Jehovah no de only see us or hear us when we beg-am. Jehovah na our Papa and e really love us. So when e see say we de cry, e de feel for us and want help us quick-quick.—Read Isaiah 63:9.

4. Which Bible examples we go talk about, and wetin we go learn about Jehovah?

⁴ Jehovah tell us for Bible how e feel when im servants cry, and wetin e do to help them. For this article, we go learn from the example of Hannah, David, and King Hezekiah. Wetin make them cry? How Jehovah help them? Then we go see how their example fit comfort us when we de cry because of our problem or because person wey we love die, or when person disappoint us, or when our situation be like say hope no dey.

WHEN WE DE CRY BECAUSE OF OUR PROBLEM OR WHEN PERSON WEY WE LOVE DIE

5. How Hannah situation make-am feel?

⁵ Hannah face plenty problems wey make-am cry because of the pain wey e de feel. One of the problems be say, Hannah husband marry another wife. This other wife name na Peninnah, and e de treat Hannah for bad way. Another problem be say, Hannah no get pikin, but Peninnah born plenty children. (1 Sam. 1:1, 2) Peninnah continue to take Hannah do yeye because Hannah no get pikin. If to say you dey Hannah situation, how you go feel? E really pain Hannah sotey “e go de cry and e no go chop.” And e “really feel sad reach bone.”—1 Sam. 1:6, 7, 10.

6. Wetin Hannah do to make im mind come down?

⁶ Wetin Hannah do to make im mind come down? One thing wey e do na to go worship Jehovah for the tabernacle. E fit be say Hannah dey for place wey dey near the door for the compound of the tabernacle, and ‘e begin pray to Jehovah and just de cry.’ E beg Jehovah say: “look the suffer wey your servant de suffer and remember me.” (1 Sam. 1:10b, 11) Hannah tell Jehovah how e de feel for im prayer. E go don really touch Jehovah when e see as im pikin wey e really love de cry!

7. How Hannah feel after e pray to Jehovah and tell-am im problem?

⁷ After Hannah tell Jehovah how e de feel, High Priest Eli tell Hannah say Jehovah go answer im prayer. How Hannah feel after? Bible talk say: “The woman comot and e go chop, and e face show say e no dey sad again.” (1 Sam. 1:​17, 18) Even though say Hannah situation never change, im mind come down. E trust say Jehovah understand im problem and how e de feel, and say Jehovah go help-am. And na wetin Jehovah do be that. Jehovah understand how Hannah de feel, listen to im prayer, and later bless-am with children.—1 Sam. 1:​19, 20; 2:21.

8-9. As e dey for Hebrews 10:​24, 25, why e dey important make we de attend Christian meetings? (Still check the picture.)

 ⁸ Wetin we learn. You de face any problem wey de make you cry? E fit be say you de feel pain because person wey you love die. When this kind thing happen, you fit want dey alone, and e dey normal to feel like that. But remember the example of Hannah. E go tabernacle and na for there Jehovah comfort-am. For the same way, Jehovah go comfort and encourage you if you go meeting, even though say you fit de feel sad because of your problem. (Read Hebrews 10:​24, 25.) For meeting, we fit hear different-different Bible verse wey go encourage us. This na one way wey Jehovah de use to help us stop to de think about wetin de make us sad. And e fit make our mind come down even if our situation never change.

⁹ For our meetings, Jehovah de use our brothers and sisters to encourage us and show us love. And when we dey with them, we de feel better. (1 Thess. 5:​11, 14) Make we see the example of one special pioneer wey im wife die. The brother talk say: “Till now, I still de cry. Sometimes, I go sitdown for one corner and just de cry. But for our meeting, I de get the encouragement wey I need. The better-better words wey my brothers and sisters de tell me, and their comments for meeting, de comfort me. No matter how I worry reach before I go meeting, I de always feel better when I reach there.” So when we dey meeting, Jehovah fit use our brothers and sisters to encourage us.

10. How you fit copy Hannah example when you de really feel sad?

¹⁰ Hannah feel better after e pray to Jehovah and tell-am how e de feel. You too fit “throw everything wey de worry” you give Jehovah, and trust say e go listen to your prayer and help you. (1 Pet. 5:7) Make we see the example of one sister wey thief kill im husband. The sister talk say: “I really feel sad sotey I think say I no go ever dey happy again. But anytime I pray to my Papa, Jehovah, wey really love me, I de feel better. Sometimes, I no know how to explain how I de feel, but e understand me. When I really dey sad and de worry, I go beg-am make e give me peace of mind. After I pray, my mind go just come down and I go get the power wey I need.” So when you cry to Jehovah and tell-am wetin de make you feel sad, get-am for mind say Jehovah de feel your pain, and e understand exactly how you de feel. Even if the problem no comot, Jehovah fit comfort you and help make your mind come down. (Ps. 94:19; Phil. 4:6, 7) E de see all the things wey you de do to remain faithful to-am and e go bless you.—Heb. 11:6.

WHEN WE DE CRY BECAUSE PERSON WEY WE TRUST DISAPPOINT US

11. How David feel when people treat-am for bad way?

¹¹ David endure plenty problems for im life wey make-am cry. People hate-am, some of im friends and im family betray-am, and even try to kill-am. (1 Sam. 19:​10, 11; 2 Sam. 15:​10-14, 30) One time, as e de face serious trouble, e write say: “I don cry tire. I de soak my bed with tears every night. And na so-so cry I de cry ontop my chair.” Why David feel like this? Na ‘because of all the people wey de attack-am.’ (Ps. 6:6, 7) The pain wey David feel because people treat-am for bad way, make-am cry well-well.

12. As e dey Psalm 56:8, wetin David dey sure of?

¹² Even though life hard for David, e dey  sure say Jehovah love-am. E write say: “Jehovah go hear my voice as I de cry.” (Ps. 6:8) Another time, e write the sweet words wey dey Psalm 56:8. (Read-am.) The words wey David use for that verse help us understand say Jehovah really love us and e de care about how we de feel. David talk say e just be like say Jehovah de collect im tears put inside bottle or e de write-am inside book. David dey sure say Jehovah know im pains and e de remember them. David no doubt say Jehovah know im problems and how the problems de make-am feel.

13. When person disappoint or betray you, wetin you need to remember? (Still check the picture.)

¹³ Wetin we learn. You de feel sad because person wey you love and trust disappoint or betray you? E fit be say you de feel pain because person wey you plan to marry disappoint you, or your husband or wife abandon you, or person wey you love stop to serve Jehovah. One brother wey im wife go sleep with another person talk say: “I no believe say this kind thing fit happen to me. I feel like say I dey useless, I no happy at all, and I vex well-well.” If person wey you trust don disappoint or betray you, remember say Jehovah no go ever leave you. The brother talk say: “I don see say people fit leave us, but Jehovah no go ever leave us. No matter wetin happen, Jehovah go always dey with us. E no go leave people wey continue to hold-am tight.” (Ps. 37:28) Still remember say Jehovah love you pass the way any other person go fit love you. When person wey you love betray you or disappoint you, e fit really pain you. But this one no mean say the way Jehovah de feel about you don change. E still love and value you. (Rom. 8:​38, 39) The point be say, no matter how person treat you, Jehovah, your Papa for heaven love you.

14. How Psalm 34:18 fit comfort us?

¹⁴ When we de feel bad because person wey we love betray or disappoint us, wetin David write fit comfort us. We fit see-am for Psalm 34:18. (Read-am.) One book wey explain this Psalm talk say “people wey life don tire” fit de feel say them no get any reason to live again. How Jehovah de help people wey de feel like that? Bible talk say Jehovah “dey near” them. E be like papa or mama wey de hold and comfort im pikin wey de cry. When we de suffer because person betray us or disappoint us, Jehovah de feel our pain and e go quick help us. E really want comfort us when life don tire us and when we feel say we dey useless. And e don promise us  many better things for future wey go fit help us endure the things wey we de suffer now.—Isa. 65:17.

WHEN WE DE CRY BECAUSE OUR SITUATION BE LIKE SAY HOPE NO DEY

15. Which problem Hezekiah face wey make-am cry?

¹⁵ When King Hezekiah dey 39 years, e get one serious sickness. Prophet Isaiah come tell King Hezekiah wetin Jehovah talk. E talk say e go die from the sickness. (2 Ki. 20:1) When Hezekiah hear this one, e just be like say im own don finish, and e cry well-well. So, e beg Jehovah make e help-am.—2 Ki. 20:2, 3.

16. Wetin Jehovah do for Hezekiah?

¹⁶ When Jehovah hear Hezekiah prayer and see im tears, e feel pity for-am and tell-am say: “I don hear your prayer. I don see your tears. See, I de heal you.” Jehovah use prophet Isaiah promise-am say e go add more years to im life and e go save Jerusalem from the hand of Assyria people.—2 Ki. 20:​4-6.

17. How Jehovah de help us when we get serious sickness? (Psalm 41:3) (Still check the picture.)

¹⁷ Wetin we learn. Wetin we fit do if we get sickness wey no get cure? Tell Jehovah how you de feel. E go listen to you even if you de cry when you de pray to-am. Bible tell us say: “The Papa wey de really show pity and the God wey de give all kind of comfort” go comfort us when we de face any kind of problem. (2 Cor. 1:3, 4) Today, we no de expect say Jehovah go remove all our problems, but we dey sure say e go always help us. (Read Psalm 41:3.) Jehovah de use im holy spirit give us power, sense, and peace of mind to fit cope with our sickness. (Prov. 18:14; Phil. 4:13) E still de comfort us with the hope say for future, nobody go sick again.—Isa. 33:24.

18. Which Bible verse you get for mind wey de help you when you de face serious problem? (Check the box “ Words Wey Fit Comfort Us When We De Cry.”)

¹⁸ Wetin Jehovah tell Hezekiah comfort-am. We too fit get comfort if we de listen to wetin Jehovah de tell us for Bible. Jehovah don put better words for Bible wey fit comfort us when we de face serious problem. (Rom. 15:4) When them tell one sister for Africa say e get cancer, e make-am always de cry. The sister talk say: “One Bible verse wey really comfort me na Isaiah 26:3. Even though say many times we no fit remove our problem, this verse promise us say Jehovah go help us dey calm and help us fit endure any kind of problem.” You get any Bible verse wey de help you dey calm when you de face serious problem wey be like say no get solution?

19. Wetin Jehovah go do for us for future?

 ¹⁹ The end of this system don really near and we know say the things wey go make us cry go de plenty more-more. But as we don see for the example of Hannah, David, and King Hezekiah, Jehovah de see us when we de cry and this one no de make-am happy. E love us because we continue to serve-am even though say we de face problems and e de remember our tears. So when we de face serious problem, make we tell Jehovah how we de feel for prayer. Make we continue to dey close to our brothers and sisters for congregation. And when we de read Bible, we go get comfort from Jehovah. We fit dey sure say if we continue to endure, Jehovah go bless us. Part of the blessing wey e go give us for future be say, e “go clean all the tears” wey we de cry because of pain. (Rev. 21:4) That time, if we cry, e go be because we de happy.