1-2. Wetin papa and mama need to do when their pikin ask question about wetin them believe from Bible?

 MANY people go agree say to train pikin no be small work. If you be papa or mama, we know say you de really work hard to fit help your pikin get strong faith, and this one de make Jehovah happy. (Deut. 6:6, 7) As your pikin de grow, e fit start to ask some serious questions about wetin we believe. For example, e fit ask why Jehovah tell us make we no do some things.

² The kind question wey your pikin de ask, fit de make you worry. You fit even de feel say your pikin faith don de weak. But the truth be say, as children de grow, them need to de ask questions to fit understand things well and get strong faith. (1 Cor. 13:11) So you no need to fear. Instead, when them ask question, make you use that chance to help them learn to think deep about wetin them de learn from Bible so that them go fit get strong faith.

3. Wetin we go talk about for this article?

³ For this article we go talk about how papa and mama fit help their pikin or children (1) to get strong faith for God and for Bible, (2) to understand wetin them go gain if them follow Jehovah laws and advice and (3) to fit explain wetin them believe to other people. We go still talk about why e good make children de ask question and we go see some things wey papa and mama fit do with their children wey go give them chance to fit talk about Bible.

HELP YOUR PIKIN GET STRONG FAITH FOR GOD AND FOR BIBLE

4. Which kind question your pikin fit ask, and why?

⁴ Papa and mama wey de serve Jehovah know say their children no go get faith for God just because they themself get faith. Nobody get faith as them just born-am. Just as e take  some time for una to get faith for Jehovah, na so e still be for una children. So una pikin fit start to de ask questions like: ‘God really dey? Wetin Bible talk really correct?’ The truth be say, Bible encourage us say make we “de reason” things well and make we de “check everything well.” (Rom. 12:1; 1 Thess. 5:21) But how you fit help your pikin get strong faith?

5. Wetin papa and mama fit do to help their pikin believe say Bible na Word of God? (Romans 12:2)

⁵ Encourage your children make them prove-am to theirself say wetin Bible talk na true. (Read Romans 12:2.) When your pikin ask question, use that chance to teach-am how e fit use the things wey our organization don make to fit do research. For example, e fit use things like our books and videos to do research. This one go help-am fit prove to imself say, Bible no be ordinary book wey people write, instead na “the word of God.” (1 Thess. 2:13) For example, e fit use our books do research about the city of Nineveh for Bible time. Before-before, some people talk say e no ever get any city wey them de call Nineveh. But around 1850, some people come see some things wey them dig from ground wey show say wetin Bible talk about the city really correct. (Zeph. 2:​13-15) Bible talk say them go destroy the city of Nineveh, and this one really happen. If your pikin want know more about this one, e fit study the article “You Know?” wey dey November 2021 Watchtower. Encourage your pikin to compare wetin e learn from our books and videos with wetin other books like encyclopedia talk. This one go help-am believe say wetin Bible talk na true.

6. How papa and mama fit help their pikin see say wetin Bible talk na true? Give example. (Still check the picture.)

⁶ Help your pikin think about why the things wey Bible talk really make sense. Look for different-different chance to talk with your pikin about God. You fit do this one when you and your pikin go place like museum for our branch office or any other museum wey una fit see things about history, or when una de work for una garden. For example, when una go museum, you fit use wetin una see for there to explain Bible to your pikin. This one go fit help your pikin see say wetin Bible talk na true. You fit teach your pikin about one stone wey don old reach 3,000 years and Jehovah name dey among the things wey them write ontop the stone. Them de call this stone Moabite Stone. This stone dey the Louvre Museum for Paris wey dey France. Or you and your pikin fit look picture of things about history like the Moabite Stone for Internet or inside our book them. For the World Headquarters of Jehovah Witness for Warwick, New York, you fit  see another stone wey we do like the Moabite Stone. Another thing wey them write ontop the Moabite Stone show say King Mesha of Moab go against Israel people. And this one agree with wetin Bible talk. (2 Ki. 3:4, 5) When your pikin see this kind things with im own eye, e go make-am believe say wetin e de learn from Bible na true. This one go make im faith strong.—Compare 2 Chronicles 9:6.

7-8. (a) Wetin we fit learn from the shapes or pattern of the things wey Jehovah make? Give example. (Still check the picture.) (b) Which kind questions you fit ask your pikin wey go make-am really believe say na Jehovah make everything?

⁷ Help your pikin think deep about things wey Jehovah make. If una de waka pass place wey una fit see things like grass and trees or when una de work for una garden, you fit help your pikin put mind for the different-different shapes wey we fit see for the things wey Jehovah make. Why this one dey important? Na because this things de show say the person wey make them really get sense. For example, science people don study things wey Jehovah make wey de curve round-round. One science person wey im name na Nicola Fameli talk about this things wey Jehovah make wey de curve round-round. E talk say, if you count the number of the curves wey dey some of this things, you go see say the numbers of the curve arrange for one particular pattern. Them de call the way this numbers arrange, Fibonacci sequence. For example, we fit see this kind shape for the way many stars arrange together to form wetin them de call galaxy, or for the body of snail and other animals wey be like snail. We fit still see-am for the leaf of some plants and for head of sunflower. a

⁸ For school, your pikin fit learn about shapes wey some things get, and how many things de grow. For example many trees de grow for one particular pattern. As the body of the tree de grow, e de get different-different branch. As each of this branch de grow, them go come get other small-small branch. Na like this the tree de grow until e go produce different-different branch wey no get another branch. This pattern wey tree de take grow, na wetin them de call fractals. We fit still see this kind pattern for other things wey dey this world. But who do-am make tree grow for this pattern? When your pikin think deep about the wonderful things wey Jehovah don make, e fit help-am get strong faith say na Jehovah really make everything. (Heb. 3:4) As your pikin de grow, you go need to help-am understand why e dey important to obey Jehovah law. To fit do this one, you fit ask-am say, “if na Jehovah make us, e no make sense say na im suppose give us laws wey go guide us to make us happy?” Then, you fit explain say  Jehovah give us the laws for Bible to make us happy.

HELP YOUR PIKIN UNDERSTAND WHY E GOOD TO OBEY JEHOVAH

9. Wetin fit make your pikin ask questions about Jehovah laws?

⁹ Sometimes, your pikin fit ask why Bible talk say some things no good. If this one happen, try to know why e de ask the question. E de ask because e no believe wetin Bible talk, or e de ask because e no know how e go fit explain wetin Bible talk to other people? No matter the reason wey make-am ask, you fit use Enjoy Life Now and Forever! book b to help-am understand why e good to follow wetin Jehovah talk.

10. How you fit help your pikin to make Jehovah im best friend?

¹⁰ Help your pikin to make Jehovah im best friend. When you de study Bible with your pikin, use the questions and the pictures for the Enjoy Life Now and Forever! book. This one go help you understand how e de feel about the things wey e de study. (Prov. 20:5) For example, for lesson 8, the book compare Jehovah to better friend wey really love us, wey de tell us things wey fit protect us and wey we fit gain from. After una don discuss 1 John 5:3, you fit ask your pikin say, “As you don know say Jehovah na that kind better friend, how you suppose feel about the things wey e tell us?” This one fit be like simple question, but this kind question fit help-am see Jehovah law as something wey Jehovah give us to show say e love us.—Isa. 48:​17, 18.

11. How you fit help your pikin understand why e good to follow Bible advice? (Proverbs 2:​10, 11)

¹¹ Talk about how we de gain when we obey Jehovah. When una de read Bible or daily text together, talk about how Bible advice don help una family. For example, you fit use this kind time to help your pikin understand say e good for us to de work hard and talk truth. (Heb. 13:18) You fit still explain how Bible advice de help us no get some kind sickness and how e fit help us to de happy. (Prov. 14:​29, 30) If your pikin understand wetin e go gain when e follow wetin Jehovah talk, e fit make-am want follow wetin Bible talk for im life.—Read Proverbs 2:​10, 11.

12. How one brother and im wife help their pikin understand wetin e go gain if e follow Bible advice?

¹² One brother for France wey im name na Steve talk say e and im wife help their pikin to see say Jehovah de give us laws because e love us. The brother talk say: “We de ask our pikin some questions like: ‘Why Jehovah want make we follow the advice wey e de give us? How this one show say Jehovah love us? Wetin fit happen if you no follow this advice?’” This kind question don help their pikin to de follow Jehovah advice. The brother still talk say: “Wetin we de try do, na to help our pikin understand say Bible fit help-am get sense wey pass the kind sense wey people for this world get.”

13. How papa and mama fit help their pikin to follow Bible advice? Give example.

¹³ Train your pikin to de follow Bible advice. For example, e fit be say your pikin must read one particular book for school. The people wey the book talk about fit de do things wey Bible condemn, like sex wey no clean or them fit be people wey de vex anyhow. And them fit write the book for way wey go make the person wey de read-am think say e no really bad if e copy the people for the book. You fit tell your pikin to think about how Jehovah de see people wey de do this kind things. (Prov. 22: 24, 25; 1 Cor. 15:33; Phil. 4:8) This one fit help your pikin see why e good to obey Jehovah. And if im teacher or classmates ask-am question about the book, e go help-am fit explain wetin e believe.

TEACH YOUR PIKIN HOW TO TELL OTHER PEOPLE ABOUT WETIN E BELIEVE

14. Which kind topics fit hard our children to explain, and why?

¹⁴ Sometimes, our children fit de fear to tell other people about wetin them believe. For example, e fit hard them to explain wetin them believe when them de teach them for school say things come by chance. Why e be like that? Their teacher fit don de talk about this matter like say na true. Wetin fit help your children believe say wetin them learn from Bible correct?

15. Wetin fit help your pikin dey sure say wetin e believe na true?

¹⁵ Help your pikin to dey sure say wetin e learn from Bible na true. Your pikin no need to shame because e believe say na Jehovah make everything. (2 Tim. 1:8) Why? The truth be say even many science people no believe say things just come by theirself. From the things wey them de see, many of them understand say na somebody wey really get sense make all this things. Because of this one, many of them no believe say things come by chance as plenty schools for this world de teach. Your pikin fit still dey sure about wetin e believe, if e de think about the reason why other brothers and sisters believe say na Jehovah make everything. c

16. How papa and mama fit help their pikin explain say na Jehovah really make everything? (1 Peter 3:15) (Still check the picture.)

¹⁶ Help your pikin to fit explain why e believe say na Jehovah make everything. (Read 1 Peter 3:15.) You and your pikin fit study some articles for jw.org wey show say things no come by theirself, but na Jehovah make them. Your pikin fit choose the one wey e feel say go help other people understand say things no come by chance. Make una talk about the one wey e choose. Remind-am say, when e de explain to people for im class, e no need to argue with them. Encourage-am to explain wetin e believe for simple way to anybody wey ready to listen to-am. For example, im classmate fit talk say: “Na only wetin I fit see I de believe and I never see God before.” Your pikin  fit tell-am say: “Just think-am say you de waka for inside forest and you come see one fine house, wetin this one go tell you? E clear say na person build the house. Na so e still be for this earth and everything wey dey inside. E must get person wey make them too!”

17. How papa and mama fit help their pikin to fit explain wetin Bible talk? Give example.

¹⁷ Help your pikin to de tell other people about wetin Bible talk. (Rom. 10:10) To fit teach person Bible just be like to learn how to ride bicycle. When person first start to learn how to ride bicycle, e go first learn how to balance imself and e go de ride small-small. After some time, e go dey easy for-am to de ride-am well. Na so e still be for our young children. When them first start to preach, them fit start to explain Bible for simple way. For example, them fit ask their schoolmate say: “You know say many of the things wey science people de make, them de copy things wey them see for this world take make them? Make I show you one video.” After e don show-am one video wey dey Them Make-am or E Just Appear? for our website, e fit talk say: “If we de praise science people for the things wey them make, who we suppose praise for the things wey them see for this world wey help them make other things?” This simple way wey e take explain the matter, fit help the schoolmate want learn more about Jehovah.

CONTINUE TO HELP YOUR PIKIN GET STRONG FAITH

18. How papa and mama fit continue to make the faith of their children strong?

¹⁸ For this our time, plenty people no get faith for Jehovah. (2 Pet. 3:3) So papa and mama, as una de study Bible with una children, make una encourage them to study more topics wey go help them value the Word of God more and follow Bible advice. Help them think deep about the things wey Jehovah don make as una de discuss-am together. This one go make their faith strong. Help them understand some things wey Bible talk wey don already happen. And e really dey important for una to de pray for them and pray with them. If una do all this one, Jehovah go bless the work wey una de do to help una children get strong faith.—2 Chron. 15:7.