1. How bread dey important reach for Bible time?

 BREAD na food wey really dey important for Bible time. (Gen. 14:18; Luke 4:4) In fact, e dey important sotey sometimes Bible de call all food bread. (Matt. 6:11) Bible talk about two times wey Jesus use bread do miracle to feed people. (Matt. 16:9, 10) One of the miracle dey John chapter 6. As we de study this miracle, we go learn better-better things wey we fit use for our life.

2. Wetin happen wey make plenty people need food?

² One day, after Jesus apostles don preach finish, Jesus say make them enter boat together go the other side of the Sea of Galilee, make them fit rest. (Mark 6:7, 30-32; Luke 9:10) Them go one quiet place near Bethsaida. Small time, people hear say Jesus dey there and plenty people go there to see-am. Jesus no drive them. E sofri teach them about the Kingdom and cure sick people. Because time don go, Jesus disciples de think about how this people go get something to chop. E fit be say some of the people get small food, but plenty of them go need to go inside the village them to buy something to chop. (Matt. 14:15; John 6:4, 5) Wetin Jesus go do?

 JESUS USE MIRACLE PROVIDE BREAD

3. Wetin Jesus tell im apostles make them do? (Still check picture for front cover.)

³ Jesus tell im apostles say: “Them no need to go, make una give them wetin them go chop.” (Matt. 14:16) This one go hard because the number of men wey dey there reach 5,000. If them add women and children wey dey there, the number go reach 15,000 people. (Matt. 14:21) Andrew tell Jesus say: “One small boy dey here wey get five barley bread and two small fish, but wetin this one go fit do for this plenty people?” (John 6:9) Barley bread na food wey many people de chop, and them fit don put salt for the fish and dry-am. Even with this one, the bread and the fish wey the boy get no go reach to feed this plenty people.

4. Wetin we fit learn from John 6:​11-13? (Still check the picture.)

⁴ Jesus want dey kind to the people, so e tell them say make them sitdown ontop grass group by group. (Mark 6:​39, 40; read John 6:​11-13.) Then, Jesus pray to im Papa for heaven and thank-am for the bread and the fish. This one show say na God provide the food and Jesus really value-am. E really dey important make we copy Jesus example to de pray before we chop no matter where we dey. Jesus come tell im disciples say make them share the food to the people, and all of them chop belleful. The food plenty sotey the people no fit finish-am and Jesus no want waste the one wey remain. So Jesus tell im disciples say make them gather the one wey remain so that them go fit chop-am later. Jesus no allow anything to waste, and this one na better example  for us to copy. Papa and mama fit use this story teach their children and show them why e dey important to de pray before them chop, to dey kind to people, and to get open hand like Jesus.

5. Because of the miracle wey Jesus do, wetin people want do and wetin Jesus do?

⁵ The people really surprise as them see the way Jesus de teach them and the miracles wey e do. Them know say Moses don talk say God go send special prophet, so them fit de wonder if Jesus na the prophet. (Deut. 18:​15-18) If na so e be, them fit don think say Jesus go be great king wey go fit provide food for all Israel people. Because of this one, the people want “make-am king.” (John 6:​14, 15) If Jesus allow this one to happen, e mean say e de put hand for Jew people politics, and Jew people dey under Rome government that time. So wetin e do? Bible tell us say Jesus “comot from there go mountain alone.” Upon everything wey the people do, Jesus no gree put hand for politics matter. Wetin this one teach us?

6. How we fit copy Jesus example? (Still check the picture.)

⁶ We know say people no go tell us say make we do miracle to make small food plenty, to cure people wey de sick, or try to make us king. But them fit want make we put hand for politics matter. For example, them fit want make we vote or support person wey them think say go make things better for them. Jesus example dey clear. E no gree put hand for  politics matter and e later talk say: “My Kingdom no be part of this world.” (John 17:14; 18:36) Christians for this our time need to copy the way Jesus think, and do wetin e do. Like Jesus, we de use all our heart support God Kingdom. We de preach about-am to people and de pray make e come. (Matt. 6:10) Make we talk about other things wey we fit learn from the miracle wey Jesus do when e use small bread and fish provide food for plenty people.

‘WETIN THE BREAD MEAN’

7. Wetin Jesus do and how im apostles feel about wetin e do? (John 6:​16-20)

⁷ After Jesus give the people food, im apostles use boat go back to Capernaum but because Jesus no want make them make-am king, e comot from there go mountain. (Read John 6:​16-20.) As the apostles de cross the sea, strong breeze begin de blow and this one make the sea no settle. Then, them see Jesus de waka ontop water come meet them. And e tell Peter say make e waka ontop the water too. (Matt. 14:​22-31) As Jesus enter the boat, the heavy breeze stop to de blow. This one really surprise the disciples and them talk say: “True-true, you be the Son of God.” a (Matt. 14:33) E surprise us say the disciples no talk like this when Jesus use miracle provide food for plenty people. See wetin Mark write about this miracle wey Jesus do for the sea. E talk say: “This one come really surprise [the apostles] because them never understand wetin the bread wey e share mean, but e still de hard them to understand for their heart.” (Mark 6:​50-52) True-true, them never understand the kind power wey Jehovah don give Jesus to do miracle. But after, Jesus talk about the miracle wey e do to provide bread for plenty people and e use-am teach us another lesson.

8-9. Why the people de look for Jesus? (John 6:​26, 27)

⁸ The people wey Jesus give bread only de put mind for wetin them go chop. Why we talk like that? The next day, the people go the place wey Jesus be don give them bread and them see say Jesus and im apostles don comot for there. So the people enter boats wey come from Tiberias go Capernaum go look for Jesus. (John 6:​22-24) Them de look for Jesus because them want learn more about the Kingdom? No. Them only want make Jesus give them more bread. How we take know this one?

⁹ See wetin happen when the people see Jesus near Capernaum. Jesus tell them say them de look for-am because of food. Jesus tell the people say them “chop the bread and belleful,” but that one na ‘food wey fit spoil.’ So e advice them say, make them work for “food wey no go ever spoil and wey go give life wey no go end.” (Read John 6:​26, 27.) Jesus talk say im Papa go give them that kind food. E go don surprise the people to hear say one food dey wey fit give them life wey no go end! Which kind food be this one, and how the people wey de listen to Jesus fit get-am?

10. Wetin the people need to do to fit get life wey no go end?

¹⁰ This Jew people want know wetin them go do to fit get that food. Them fit don de think about the things wey Jehovah talk say make them de do for the law wey Jehovah give Moses. But Jesus tell them say: “Na the work of God be this, say make una put faith for the person wey e send.” (John 6:​28, 29) People must put faith for the person wey God send to fit “get life wey no go  end.” In fact, Jesus don talk this one before. (John 3:​16-18, 36) And Jesus later talk more things about how we fit get life wey no go end.—John 17:3.

11. How the Jew people show say na only food wey them want chop dey their mind? (Psalm 78:​24, 25)

¹¹ This Jew people no believe say them go need to get faith for Jesus. Them ask-am say: “Which miracle you go do so that we go see-am and believe you?” (John 6:30) Them talk say Israel people for Moses time see manna chop, and na im them de chop everyday. (Neh. 9:15; read Psalm 78:​24, 25.) E dey clear say their mind just dey for food wey them want chop. Even when Jesus talk about “the real bread wey come from heaven,” wey better pass manna because e fit give them life wey no go end, the people no ask-am question to know wetin Jesus get for mind. (John 6:32) Them no want hear the things wey Jesus de try teach them about life wey no go end, because na food wey them want chop just dey their mind. Wetin we fit learn from this one?

WETIN SUPPOSE BE NUMBER ONE THING FOR OUR LIFE

12. Wetin Jesus talk say suppose dey important pass for our life?

¹² Make we talk about one important lesson for John chapter 6. To obey God and to get better friendship with-am, suppose be number one thing for our life. Jesus still make this one clear when Satan tempt-am, e talk say: “No be only bread go make person dey alive, but na every word wey come from Jehovah mouth.” (Matt. 4:3, 4) And for the Things Wey Jesus Teach Ontop Mountain, e teach us say e dey important to get better friendship with Jehovah. (Matt. 5:3) So we suppose ask ourself say, ‘The way I de live my life show say the number one thing for my life na to get better friendship with Jehovah, or e de show say na wetin my body want dey my mind?’

13. (a) Why e no bad to enjoy food? (b) Wetin we need to dey careful about? (1 Corinthians 10:6, 7, 11)

¹³ E no bad to pray for the things wey we need and to enjoy them. (Luke 11:3) Bible talk say person suppose “chop and drink” and “enjoy the work wey e de do” and say this one na “from the hand of the true God.” (Eccl. 2:24; 8:15; Jas. 1:17) But we still need to dey careful make the things wey we need no be the number one thing for our life. We see this one from wetin apostle Paul write to Christians for im time. E talk about the bad things wey Israel people do for past and even the one wey them do near Mount Sinai. E warn them make ‘bad things no de hungry them just as e hungry Israel people.’ (Read 1 Corinthians 10:6, 7, 11.) Jehovah use miracle provide food for Israel people, but because them get long throat, them turn-am to “bad” thing. (Num. 11:​4-6, 31-34) When Israel people worship one image wey them make with gold, them show say them value to chop, to drink, and to enjoy theirself pass to obey Jehovah. (Ex. 32:​4-6) Apostle Paul use this example to warn the Christians wey de live near the time wey them go destroy Jerusalem and the temple for 70 C.E. We too de live for the time wey Jehovah go soon destroy this Satan world, so we no suppose make the same mistake wey Israel people make.

14. Wetin Bible talk about food for Paradise?

¹⁴ When Jesus tell us say make we pray make Jehovah “give us our bread for today,” e still tell us make we pray “make wetin [God] want happen for this earth as e dey for heaven.” (Matt. 6:​9-11) How you think say the earth go be that time? Bible show say Jehovah want  make the earth produce better food for people. Isaiah 25:​6-8 tell us say we go get better-better food wey we go enjoy for this earth. And Psalm 72:16 talk say: “Food go plenty for everywhere for the earth, e go plenty sotey e go de troway for ontop mountain.” E de hungry you to cook and chop the kind food wey you like pass, or to try new food for Paradise? You go still enjoy to plant things for your own garden and chop wetin you plant. (Isa. 65:​21, 22) And everybody for the earth go enjoy this wonderful blessings.

15. Wetin people wey go come back to life for Paradise go learn? (John 6:35)

¹⁵ Read John 6:35. Think about wetin go happen to the people wey chop the bread and fish wey Jesus provide. For future, Jehovah fit bring some of this people back to life, even though say them no put faith for Jesus. (John 5:​28, 29) But them go need to learn wetin Jesus mean when e talk say: “Na me be the bread of life. Anybody wey come meet me no go ever hungry.” Them go need to get faith say Jesus die for them. For Paradise, them go need to teach this kind people and the children wey them born for there the truth about Jehovah. To help people for Paradise to get better friendship with Jehovah go really sweet us pass to chop food.

16. Wetin we go talk about for the next article?

¹⁶ We don see wetin Jesus talk for John chapter 6, but Jesus still talk plenty other things for that same chapter about “life wey no go end.” The Jew people wey Jesus de talk to, need to listen well-well to understand wetin e de talk and we self need to do like that. We go continue to talk about John chapter 6 for the next article.