1. Wetin many people de think about to live forever?

 PLENTY people de try chop good food and do exercise so that them go fit live long. But them know say this one no go fit make them live forever. In fact, many people feel say e no dey possible to live forever. But for Bible, Jesus talk say e dey possible for us to “get life wey no go end.” For example, e talk this one for John 3:16 and John 5:24.

2. Wetin John chapter 6 talk about life wey no go end? (John 6:​39, 40)

² One day, Jesus use miracle give plenty people bread and fish to chop. a This na wonderful thing, but wetin e tell the people wey go meet-am for Capernaum the next day near the sea of Galilee, na im dey wonderful pass. E tell them say e go bring people wey don die back to life and give them life wey no go end. (Read John 6:​39, 40.) Think about your friends and your family members wey don die. Wetin Jesus talk show say many people wey don die go come back to life. You and people wey you love fit enjoy life wey no go end! But wetin Jesus talk next for John chapter 6 hard many people that time to understand and e still de hard plenty people  for this our time too. Wetin Jesus talk?

3. Wetin Jesus talk about imself for John 6:51?

³ After Jesus don use miracle provide food for the people, them start to think about the manna wey Jehovah use feed their papa-papa them for wilderness. The people know say the Bible call that manna “bread from heaven.” (Ps. 105:40; John 6:31) Jesus come use some things wey the people don already know about the manna to teach them important things. Even though say na Jehovah provide the manna, the people wey chop-am later die. (John 6:49) But Jesus call imself “the real bread wey come from heaven,” “the bread of God,” and “the bread of life.” (John 6:​32, 33, 35) Jesus talk about how e dey different from the manna. E talk say: “Na me be the living bread wey come from heaven. If anybody chop this bread, e go live forever.” (Read John 6:51.) This one really shock the people. Them no understand why Jesus talk say e be “bread” wey come from heaven and say this bread better pass the manna wey God give their papa-papa them. Then Jesus tell them say: “The bread wey I go give na my body.” Wetin e mean? E dey important for us to understand wetin Jesus mean because, this one go help us know how we and the people wey we love fit get life wey no go end. Make we talk about wetin Jesus mean.

THE BREAD OF LIFE AND IM BODY

4. Why some people shock when them hear wetin Jesus talk?

⁴ Some of the people really shock when Jesus talk say the bread wey them suppose chop na im ‘body, so that them go get life.’ E fit be say them de think say Jesus go give them im real body to chop. (John 6:52) But the next thing wey Jesus tell them go shock them pass that one. E talk say: “Unless say una chop the body of the Son of man and drink im blood, una no get life inside unaself.”—John 6:53.

5. Why we fit dey sure say Jesus no mean say people go need to drink im real blood?

⁵ For Noah time, Jehovah give law say make people no chop blood. (Gen. 9:3, 4) Later, Jehovah still tell Israel people say make them no ever chop blood. And say them go kill anybody wey chop blood. (Lev. 7:​27, ftn.) Jesus teach Jew people say make them obey all the laws wey Jehovah use Moses give them. (Matt. 5:​17-19) So, e no go make sense say Jesus go want make this people chop im real body or drink im real blood. But wetin e talk na to teach them how them fit get “life wey no go end.”—John 6:54.

6. Why we fit talk say wetin Jesus talk for John 6:53 na example to teach the people?

⁶ E dey clear say, Jesus de try use example teach the people for Capernaum. E don use this kind example before to teach one woman from Samaria, when e tell the woman say: “Anybody wey drink the water wey I go give-am no go ever hungry for water again. Instead, the water wey I go give-am go turn to spring of water inside-am, wey de bring out water wey go give-am life wey no go end.” (John 4:7, 14) b Jesus no mean say the woman go need to drink water from one particular well before e go fit get life wey no go end. Na so e still be for the people wey Jesus talk to for Capernaum. Jesus no mean say them go need to chop im real body and drink  im real blood before them go fit get life wey no go end.

WETIN JESUS TALK FOR JOHN 6:53 GET DIFFERENT MEANING FROM WETIN E TALK FOR THE LORD EVENING MEAL

7. Wetin some people don talk about wetin Jesus talk for John 6:53?

⁷ Some people talk say, for John 6:​53, Jesus de explain wetin people go do when them come the Lord Evening Meal because na almost the same thing e talk when e do the Lord Evening Meal with im apostles. (Matt. 26:​26-28) Them talk say everybody wey come the Lord Evening Meal or Memorial, suppose chop the bread and drink the wine wey them de pass around. This one correct? E dey important for us to know whether wetin them talk correct because plenty people for the whole world de come join us for Memorial wey we de do every year. We go talk about some things wey dey different between wetin Jesus talk for John 6:53 and wetin e talk when e de do the Lord Evening Meal with im apostles.

8. Wetin dey different for the two times wey Jesus use this example? (Still check the picture.)

⁸ Make we see two difference between the two times wey Jesus talk say people go chop im body. Number one, which time and for which place Jesus talk wetin dey John 6:​53-56? E talk-am for Galilee for the year 32 C.E., and na one year before e start  the Lord Evening Meal for Jerusalem. Number two, which people Jesus de talk to? E de talk to Jew people for Galilee wey put their mind for only the food wey them want chop instead of to learn about Jehovah. (John 6:26) In fact, when Jesus talk something wey hard them to understand, them stop to listen to-am. Even some of im disciples stop to follow-am. (John 6:​14, 36, 42, 60, 64, 66) This people dey different from Jesus 11 faithful apostles wey dey with-am around one year later for 33 C.E. when e start the Lord Evening Meal. Them no gree leave-am even though say them no really understand wetin e de teach. Jesus apostles believe say Jesus na the son of God wey come from heaven. Them no be like the people for Galilee wey no get faith for Jesus. (Matt. 16:16) E praise them as e tell them say: “Na una be the people wey no leave me with all the problems wey I face.” (Luke 22:28) This two reasons wey we don talk about make-am clear say, for John 6:​53, Jesus no de talk about wetin go happen for the Lord Evening Meal. But other reasons still dey.

WETIN JESUS TALK STILL CONCERN YOU

9. Which group of people Jesus talk to for the Lord Evening Meal?

⁹ For the Lord Evening Meal, Jesus give im apostles bread wey no get yeast and e tell them say the bread mean im body. Jesus still give them wine and e talk say the wine stand for the “blood of the agreement.” (Mark 14:​22-25; Luke 22:20; 1 Cor. 11:24) This thing wey Jesus talk really dey important. Jesus call this agreement “new agreement” and na between Jehovah and the people wey go rule with Jesus for heaven. No be for everybody. (Heb. 8:6, 10; 9:15) The apostles no understand everything about this agreement that time, but holy spirit go soon anoint them and them go be part of the new agreement to fit rule with Jesus for heaven.—John 14:2, 3. 

10. Wetin be another thing wey dey different for wetin Jesus talk for Galilee and wetin e talk for the Lord Evening Meal? (Still check the picture.)

¹⁰ Wetin Jesus talk for the Lord Evening Meal concern only the group of people wey Bible call “small group of sheep.” The first people wey be part of this small group, na Jesus apostles wey dey with-am that evening. (Luke 12:32) Na the apostles and the other people wey go later be part of this group, suppose chop the bread and drink the wine for the Lord Evening Meal. Na them go rule with Jesus Christ for heaven. Wetin Jesus tell im apostles for the Lord Evening Meal only concern small group of people, and e dey different from wetin e talk for Galilee. Wetin e talk for Galilee concern plenty people.

11. Wetin Jesus talk for Galilee wey show say e no just de talk to small group of people?

¹¹ The people wey Jesus talk to for Galilee for 32 C.E., de follow Jesus because them want make e continue to give them food. But Jesus try to help them understand say e get something wey dey important pass food and that one fit give them life wey no go end. Jesus still talk say, people wey die go fit come back to life for the last day and live forever. For this place, Jesus no de talk about blessing wey only small group of people go get, like wetin e talk when e de do the Lord Evening Meal with im apostles. Instead, e de talk about blessing wey everybody fit get. In fact, Jesus talk say: “If anybody chop this bread,  e go live forever . . . The bread wey I go give na my body, so that people for the world go get life.”—John 6:51. c

12. Wetin we need to do to fit get life wey no go end?

¹² Jesus no tell Jew people for Galilee say na everybody go enjoy this blessing. Na only people wey ‘chop the bread,’ or people wey show say them get faith for Jesus, go enjoy this blessing. Plenty people for this our time, wey claim say them be Christian believe say them go get life just because them believe in Jesus and them de call-am their personal lord and savior. (John 6:29) But wetin dey important no be just to talk say we believe in Jesus. Many of the Jew people for Galilee first believe in Jesus, but them later stop to follow-am. Why?

13. Wetin we need to do to be Jesus true disciple?

¹³ Many of the people ready to follow Jesus so far e continue to give them wetin them want. Wetin them want na for Jesus to de cure them, give them free food, and tell them things wey them go like to hear. But Jesus show say e no come this earth to tell people wetin them go like to hear, instead e come show them wetin them need to do, to fit be im true disciples. Them need to accept and obey everything wey Jesus teach them. When them do this one, e go show say them de obey Jesus when e tell them say make them ‘come meet-am.’—John 5:40; 6:44.

14. Wetin we need to do for us to gain from Jesus body and blood?

¹⁴ Jesus teach the people say im body and  blood wey e go sacrifice for them, go help them fit live forever. The people need to get faith for this sacrifice. E really dey important for the Jew people to get this faith, and e still dey important for us today. (John 6:40) True-true, for us to gain from wetin Jesus talk for John 6:​53, we need to get faith for Jesus sacrifice. Plenty people get the chance to gain from this blessing today.—Eph. 1:7.

15-16. Which important things we learn from John chapter 6?

¹⁵ For John chapter 6, we learn many things wey dey important and wey fit encourage all of us. E teach us say Jesus really care for people. For Galilee, Jesus cure sick people, e teach people about the Kingdom of God, and e make sure say them get food to chop. (Luke 9:11; John 6:2, 11, 12) The one wey dey important pass be say, e teach people say na im be “the bread of life.”—John 6:​35, 48.

¹⁶ People wey Jesus call “other sheep,” no de chop the bread and drink the wine for Memorial and na so e suppose be. (John 10:16) Even with this one, them still de gain from the body and blood of Jesus wey e sacrifice. Them fit gain if them show say them get faith for Jesus sacrifice and the better things wey go happen for future because of the sacrifice. (John 6:53) But people wey de chop the bread and drink the wine, de show say them dey part of the new agreement to rule with Jesus for heaven. So, whether we be part of the other sheep or we be anointed Christian, e dey important for all of us to study wetin Jesus talk for John chapter 6. E teach us say we need to get strong faith for Jesus sacrifice to fit live forever.