Apostle Paul write to Timothy wey be elder say: “For front of God and Christ Jesus and [the angels wey God don choose], I de give you this serious command to follow this direction wey I don give. When you de do this one, make you no use wetin you don get for mind before to judge people, and make you no do partial.”—1 Tim. 5:21ftn.

To help us know who this angels be, we go first talk about the angels wey no fit be part of this group of angels. E dey clear say this angels no be part of the 144,000. Why we talk like that? When Paul write to Timothy, the resurrection of anointed Christians to go heaven never start. The apostles and other anointed Christians never go heaven that time, so “the angels wey God don choose” no fit be the anointed Christians.—1 Cor. 15:​50-54; 1 Thess. 4:​13-17; 1 John 3:2.

Another thing be say, “the angels wey God don choose” no fit be the angels wey no obey God for Noah time. The angels wey no obey God support Satan and become demons, and because of this one, them become Jesus enemy. (Gen. 6:2; Luke 8:​30, 31; 2 Pet. 2:4) For future, Jesus go put them for abyss for 1,000 years, and after, e go destroy them together with Satan.—Jude 6; Rev. 20:​1-3, 10.

So e dey clear say “the angels wey God don choose” na angels for heaven wey de work with “God and Christ Jesus.”

Plenty faithful angels dey for heaven. (Heb. 12:​22, 23) Them de do different-different work wey Jehovah give them. (Rev. 14:​17, 18) For example, Jehovah give one angel work to kill 185,000 Assyria soldiers. (2 Ki. 19:35) But e fit be say na plenty angels Jehovah give the work to “gather from [Jesus] Kingdom all the things wey de make people sin, and all the people wey de do wicked things.” (Matt. 13:​39-41) E still give other angels the work to “gather the people wey e don choose” go heaven. (Matt. 24:31) And other angels de protect us.—Ps. 91:11; Matt. 18:10; compare Matthew 4:11; Luke 22:43.

So e fit be say, “the angels wey God don choose” wey Paul talk about for 1 Timothy 5:​21, na angels wey Jehovah give the work to help care for the congregation. If you check the verses wey surround this verse, you go see say Paul de give advice to elders about how them go care for congregation, and e still advice people for congregation to respect the elders. Paul tell the elders say: ‘Make them no use wetin them don get for mind before to judge people, and make them no do partial.’ And e still tell them say make them no rush make any decision. Then e tell them better reason why them need to follow this advice. E talk say the work way them de do na “for front of God and Christ Jesus and [the angels wey God don choose].” So e dey clear say some angels get the work to help care for congregation. Some of the work na to protect Jehovah people, help them for the preaching work, and tell Jehovah the things wey them de see.—Matt. 18:10; Rev. 14:6.