You don take time read this year Watchtower them? Try whether you go fit answer this questions:

Which example Jehovah show us about how to treat women?

E no de treat them with partial, e no de show say man better pass woman. Jehovah de listen to women, de care about how them de feel and things wey de disturb them for mind. And e trust them say them fit do im work.—w24.01, pp. 15-16.

How we fit follow the advice for Ephesians 5:7, wey talk say: “Make una no join them”?

Apostle Paul de warn us say make we no make friends with people wey no go make-am easy for us to obey Jehovah. This kind people fit be people wey we de talk to face-to-face, or people wey we de spend time with for Internet.—w24.03, pp. 22-23.

Which kind lie-lie story we need to run from?

We need to run from story wey we hear from our brothers and sisters wey them never check if na true, email wey we receive from people wey we no know, and lie-lie story from people wey don comot from Jehovah organization but de pretend say them want study Bible.—w24.04, p. 12.

Wetin we know and wetin we no know about how Jehovah go judge King Solomon and all the people wey die for Sodom and Gomorrah and people wey die for Noah time?

We no know if Jehovah don destroy each of them forever, and if e no go bring any of them back to life. But we know say Jehovah know everything and say e de show pity well-well.—w24.05, pp. 3-4.

Wetin we dey sure of as Jehovah na our “Rock”? (Deut. 32:4)

We fit run to Jehovah make e protect us. We fit trust say e no go ever leave us and e go always dey alive to do wetin e promise. Just as big rock no de shift comot from where e dey, Jehovah no de ever change. Im character and wetin e get for mind to do no go ever change.—w24.06, pp. 26-28.

Wetin fit help you adjust when you change congregation?

Trust Jehovah say e go help you as e help im servants for past. No compare your new congregation with the congregation wey you dey before. Try do things with brothers and sisters for your new congregation, and make new friends.—w24.07, pp. 26-28.

Wetin we learn from the three story wey Jesus talk for Matthew chapter 25?

The story of the sheep and the goats teach us say e dey important for us to continue to worship Jehovah and hold-am tight. The story of the virgins wey get sense and the ones wey no get sense show say e dey important to always ready and de watch. And the story of the talents show say e dey important to de work hard.—w24.09, pp. 20-24.

How the porch for Solomon temple high reach?

For 2 Chronicles 3:4, some old copies of Bible manuscripts talk say na “120 cubits,” this one mean say e high reach 53 meters (175 ft). But other manuscripts and some translations talk say na “20 cubits,” wey mean say e high reach nine meters (30 ft). E dey possible say the height na 20 cubits because the wall of the temple no too thick.—w24.10, p. 31.

Wetin e mean for ministerial servant to be “husband of one wife”? (1 Tim. 3:12)

E mean say if na brother wey don marry, e suppose marry only one woman and e no go be person wey de put hand for sex wey no clean. Another thing be say, e no go de put eye for other women.—w24.11, p. 19.

Why we fit talk say wetin Jesus talk for John 6:53 no mean say everybody suppose chop the bread and drink the wine for the Lord Evening Meal?

Jesus talk for John 6:53 say we must chop im body and drink im blood to get life wey no go end. Jesus talk this one for Galilee for 32 C.E. to Jew people wey never get faith for-am. But Jesus start the Lord Evening Meal one year later for Jerusalem. And for there, e de talk to people wey go rule with-am for heaven.—w24.12, pp. 10-11.