How synagogue start?

THE word “synagogue” come from Greek word, and e mean “assembly” or to “gather together.” This name correct because synagogue na place wey people de gather to worship and to learn. Jew people don de use this kind place since olden days. No place for Hebrew Scriptures talk about synagogues for clear way. But for Christian Greek Scriptures, e dey clear say since the time of the apostles, people don already de gather for this kind places.

Almost all scholars believe say synagogues start when Babylon people come carry Jew people go Babylon. The Encyclopædia Judaica talk say Jew people no get Temple for Babylon, them dey for different land and they need comfort from all their trouble. So “sometimes, they go come together, maybe for Sabbath [days], and read the Scriptures.” When Jew people come dey free, they continue to meet to pray and to read the Scriptures. They still form synagogue for any place wey them settle down.

So for the time of apostles, Jew people don already de use synagogues for worship and e don become part of their life for any place wey they get community around Mediterranean, for everywhere for Middle East, and for Israel. Professor Lee Levine of Hebrew University of Jerusalem talk say: “Them de use [synagogue] as place for study, to eat together for some special days, to handle court matter, to keep money wey people contribute, to hold meeting about politics, and other meetings for community.” E talk again say: “The main thing be say na place for worship.” So e no surprise us say Jesus de always go synagogue. (Mark 1:21; 6:2; Luke 4:16) For there, e de teach and encourage the people wey e see. After they form the Christian congregation, apostle Paul preach well-well for synagogues too. People wey they want be friend of God de go synagogue. So any town wey apostle Paul enter, e go first go synagogue go preach.​—Acts 17:1, 2; 18:4.