1. Wetin jealousy cause for the family of Joseph?

JACOB for Bible love all e pikin, but e get special love for one of e pikin. The pikin name na Joseph, and that time e dey 17 years. So wetin brothers of Joseph do? They start to jealous Joseph sotey they hate Joseph. They even sell Joseph as slave and lie to their papa say bush animal don kill e pikin wey e really love. No be say Joseph do them anything o! But na jealousy make them scatter the peace wey they get for their family, and make their papa really sad.—Gen. 37:3, 4, 27-34.

2. According to Galatians 5:19-21, why jealousy na really wicked thing?

² Jealousy * dey among the bad things wey our “body want.” This character really dey wicked sotey, e fit make person no enter the Kingdom of God. (Read Galatians 5:19-21.) Many times, na jealousy de make people hate each other, cause trouble among theirself, and vex anyhow.

3. Wetin we go talk about for this article?

³ The example of the brothers of Joseph show say jealousy fit scatter family and comot the peace wey the family members de enjoy. We fit no ever do the kind thing wey the brothers of Joseph do. But the truth be say we no dey perfect and our heart fit deceive us. (Jer. 17:9) That na why we de struggle with jealousy sometimes. Make we talk about some examples for Bible and this examples go help us see why jealousy fit begin grow for our heart. And we go still talk about some things wey we go do to kill jealousy, and to make peace continue to grow.

4. Why the people of Philistine jealous Isaac?

⁴ Money and property. For Bible, some people for Philistine jealous Isaac because e be rich man. (Gen. 26:12-14) They even block all the well wey Isaac dig so that e no go de get water to give e animals. (Gen. 26:15, 16, 27) Just like the people of Philistine, today too, some people de jealous other people because they get money and property pass them. They no only want the things wey other people get. But, they still want make other people lose the things wey they get.

5. Why leaders for religion jealous Jesus?

⁵ When many people like person. For Bible, leaders for religion jealous Jesus because many people really like Jesus. (Matt. 7:28, 29) Na God send Jesus come this earth and na the truth e come teach. Even with that one, leaders for religion spread wicked lie about Jesus to spoil e good name. (Mark 15:10; John 11:47, 48; 12:12, 13, 19) Wetin this example teach us? We learn say, we must try so that we no go begin jealous other people because people for congregation like them for their fine character. Instead make we try to copy their fine character.—1 Cor. 11:1; 3 John 11.

6. Wetin Diotrephes do to show say e de jealous?

⁶ When other people get work or assignment for congregation. For apostles their time, Diotrephes jealous the people wey de direct the work for congregation. E want be number one, so e spread wicked lie about apostle John and other brothers for congregation to spoil their name. (3 John 9, 10) Today, we fit no do reach Diotrephes, but we fit begin jealous our brothers and sisters when they get work or assignment wey we don de expect since. This one fit happen especially when we feel say we reach to get-am or we even better pass the person wey get-am.

7. How jealousy fit affect us?

⁷ Jealousy be like bad plant or grass. Once e don start to grow for inside our heart, e fit dey hard to kill-am. Other bad character de make jealousy de grow. For example, when person dey proud and de think about only e self, e go de jealous more-more. The way bad plant fit make fine flower make e no grow, na so jealousy fit make us no get fine-fine character, like to show love, to feel for people, and to dey kind. If we see say jealousy don begin grow for inside our heart, make we no waste time to remove-am. How we fit kill jealousy?

8. Which fine-fine character fit help us kill jealousy?

⁸ We fit kill jealousy when we dey humble and allow wetin we get de reach us. When we get this fine character, space no go dey for jealousy to grow for inside our heart. If we dey humble, we no go feel say we better pass other people. Humble person no de feel say e suppose to get things pass other people. (Gal. 6:3, 4) When we dey okay with the things wey we get, we no go begin compare ourself with people. (1 Tim. 6:7, 8) If person dey humble and dey okay with the things wey e get, e go dey happy with person when good thing happen to the person.

9. According to Galatians 5:16 and Philippians 2:3, 4, wetin holy spirit go help us do?

⁹ If we want dey humble and allow the things wey we get de reach us, we go need God to help us with e spirit. (Read Galatians 5:16; Philippians 2:3, 4.) Jehovah  fit use holy spirit to help us check the things wey we get deep inside our mind and heart. If God help us, we fit remove bad things from our mind and stop to feel bad about people, instead we go begin think about how to encourage them. (Ps. 26:2; 51:10) Make we see the example of Moses and Paul. The two of them succeed to kill jealousy.

10. Which situation fit don test Moses? (Check picture for front cover.)

¹⁰ God give Moses the work to lead E people. But Moses no try to stop other people make that same work no reach their hand. For example, one time dey wey Jehovah take some of e spirit from Moses and give-am to some elders for Israel. That time, this group of elders stand near the tent of meeting. After small time, Moses hear say two elders still receive holy spirit and they don begin do like prophets; but the two elders no go the tent of meeting. Wetin Moses do when Joshua talk say make Moses stop the two elders? Moses no start to jealous this two men as Jehovah choose to use them. Instead, Moses humble e self and e glad with the men for the thing wey Jehovah give them. (Num. 11:24-29) Wetin we fit learn from Moses?

11. How elders fit de do like Moses?

¹¹ If you be elder, they don tell you before say make you train another person to do the work wey you really de enjoy for congregation? For example, you fit de enjoy to conduct Watchtower Study every week. But if you dey humble like Moses, you no go feel say they want push you go corner if they tell you to train another brother so that, as time de go, the brother go fit do the work well. Instead, you go dey happy to help your brother.

12. How plenty Christians today de show say wetin they get reach them, and say them dey humble?

¹² See another situation wey plenty old people dey. For many years, many of our old brothers don serve as the coordinator of the body of elders. But when they reach 80 years, them dey ready to stop the work or assignment. When circuit overseers don reach 70 years, them de leave the assignment and accept another one because them dey humble. And for some time now, many Bethelites for the whole world don start their new assignment to go help for the preaching work. This our dear brothers and sisters really get faith, and they no de vex say they comot them, or vex for the people wey de do the work wey them de do before.

13. Which reason for make Paul jealous the 12 apostles of Jesus?

¹³ Apostle Paul na another correct example. E dey humble, and e show say e dey okay with the things wey e get. Paul no allow jealousy to grow for e heart. E do e best for preaching work. But even with all this one, e talk say: “Na me small pass among the apostles, and I no reach person wey people go call apostle.” (1 Cor. 15:9, 10) The 12 apostles follow Jesus when e dey for this earth de preach, but Paul never be Christian that time. Paul become Christian after Jesus don die and come back to life. But after, Paul become “apostle to the nations.” Even with that one, Paul no dey part of the 12 apostles. (Rom. 11:13; Acts 1:21-26) Instead of Paul to jealous the 12 apostles say they don enjoy better time with Jesus, e continue to dey humble and dey okay with wetin e get.

14. Wetin we go do if we dey okay with the thing wey we get and dey humble?

¹⁴ If we dey okay with the things wey we get and dey humble, we go be like Paul and  we go respect people wey God don give authority. (Acts 21:20-26) God don arrange make some brothers de direct the work for congregation. Even though say they no dey perfect, God see this “men as gift.” (Eph. 4:8, 11) When we respect this men wey God don choose and use all our heart follow their direction, we go dey close to Jehovah and enjoy peace with our brothers and sisters.

15. Wetin we need to do?

¹⁵ Peace go die if we allow jealousy to grow. We need to uproot jealousy comot from our heart, and make we no ever plant the seed of jealousy for the heart of other people. We must do this one if we want obey wetin Jehovah talk when e say: “Make we de try our best to do the things wey go bring peace, and the things wey go encourage each other.” (Rom. 14:19) Which things we fit do to help other people kill jealousy, and wetin we fit do to make peace continue to grow?

16. How we fit help other people kill jealousy?

¹⁶ The way we de behave and do things fit really affect other people. This world want make we “de show the things wey we get.” (1 John 2:16) But that kind character de cause jealousy. We fit help other people kill jealousy if we no de always talk about the things wey we get or the things wey we plan to buy. Another thing wey we fit do na to check how we de behave because of the  work or assignment wey we get for congregation. If we de talk about our assignment too much, we de clear ground for jealousy, and na to grow remain. But, when we de care about people from our heart and talk about the good things wey them de do, this one go help them know and feel say they get value. And this one go make congregation dey as one and peace go dey.

17. Wetin the brothers of Joseph do after, and why?

¹⁷ We fit kill jealousy! Make we talk about the example of the brothers of Joseph again. Many years after they don do Joseph bad, they meet Joseph for Egypt. Before Joseph let e brothers know who e be, e test them to know whether they don change. Joseph arrange make e chop together with e brothers. But e show Benjamin, their smallest brother special care pass the other brothers. (Gen. 43:33, 34) But, no place for Bible talk say the brothers of Joseph jealous Benjamin. Instead, they show say they really care for their brother and their papa, Jacob. (Gen. 44:30-34) Because the brothers of Joseph stop to jealous, they bring peace back to their family. (Gen. 45:4, 15) For the same way, if we uproot any feeling of jealousy from our heart, we go help to keep the peace for our family and our congregation.

18. According to James 3:17, 18, wetin go happen when we de do our best for peace to grow?

¹⁸ Jehovah want make we kill jealousy and de do things wey go de make peace grow. We must try our best to do this two things. As we don talk-am for this article, we de struggle with jealousy some times. (Jas. 4:5) And jealousy full everywhere for this world wey we de live. But if we try our best to dey humble, let the things wey we get reach us, and always de show say we value the good things wey people do, we no go give jealousy any space to grow for our heart. Instead, we de make peace dey so that we fit get other fine-fine character.—Read James 3:17, 18.