1-2. Why and how Jehovah make-am dey possible for us to dey part of e family?

JEHOVAH don invite us make we join e worshippers as one family. This thing wey Jehovah do for us na really big thing! For inside this our family, people don give their life to God and they get faith for the sacrifice of Jesus. This our family na happy family. We glad say our life don get direction and say we go live forever for heaven or for this earth.

² Jehovah make-am dey possible for us to dey part of e family because of the strong love wey e get for us. But before this one happen, e really cost Jehovah something. (John 3:16) Bible talk say God “buy” us with something. (1 Cor. 6:20) Jehovah pay with the life of e Son so that we fit be E tight friend. Na big honor for us to call the number one Person for heaven and earth our Papa. And, as we don talk for the article before this one, Jehovah na the best Papa.

3. Which questions we fit ask? (Still check the box “ Jehovah De Notice Me?”)

³ Like one Bible writer, we fit ask say: “Wetin I go use pay Jehovah back for all the good things wey e don do for me?” (Ps. 116:12) The answer na say, we no go fit ever pay Jehovah back. But even with that one, our heart de move us to love Jehovah. Apostle John write say: “We de show love because na God first love us.” (1 John 4:19) Which ways we fit show Jehovah our Papa for heaven say we love him?

4. According to James 4:8, why we need to try so that we fit be friend of Jehovah?

⁴ Make we stay near Jehovah and de talk with him because na the thing wey e want be that. (Read James 4:8.) God tell us say make we “no tire to de pray,” and e de always listen to us. (Rom. 12:12) God no de over busy or tire to listen to us. And we de listen to God when we read Bible and our books. This books de help us understand Bible. We still de listen to God when we de listen fine for congregation meeting. When pikin de always talk with e papa and mama, them de dey tight. For the same way, when we de always talk with Jehovah, this one go help us be e tight friend.

5. How we fit make our prayer de better?

⁵ E good make you think about how your prayer be to Jehovah. When we de pray to Jehovah, e want make we talk everything wey we get for inside our heart. (Ps. 62:8) Make we ask ourself this question: ‘My prayer be like letter wey I copy from somewhere, or e be like letter wey I write from my heart?’ The truth na say, you want make your love for Jehovah strong more, and you want make wuna friendship strong more. For that one to happen, you must talk with God everytime. Tell Jehovah how you de feel. Talk to Jehovah about wetin de give you joy and wetin de make you sad. Make you know say, you fit beg God to help you anytime.

6. Wetin we must do if we want stay near our Papa Jehovah?

⁶ For us to stay near our Papa Jehovah, we must always thank him. We agree with wetin one Bible writer talk for book of Psalms, e say: “You don really do plenty things, O Jehovah my God. The things wey you de do and wey you get for mind for us, really dey wonderful. You no get equal. If I want try to tell people and talk about this things, they go over plenty sotey person no go fit count them!” (Ps. 40:5) We no go only like the things wey Jehovah de do. But, when we de talk and do things, make we still show Jehovah say we like wetin e de do. This one show say we dey different from plenty people today. For the world wey we dey today, plenty people no de thank God for the things wey e de do for them. True-true, one thing wey Bible talk about to make us know say we de live for the “the last days,” na say people no go de thank person. (2 Tim. 3:1, 2) We no suppose be like that at all!

7. Wetin Jehovah want make we do, and why?

⁷ Papa and mama no want make their children de fight each other, but they want make they be friends. For the same way, Jehovah want make all e worshippers be friends. The truth na say, the love wey we get for each other show say we be true Christians. (John 13:35) We agree with wetin Bible talk, when e say: “E really good and e really sweet when brothers dey together as one!” (Ps. 133:1) When we love our brothers and sisters, we de show Jehovah say we love him. (1 John 4:20) Brothers and sisters for congregation “dey kind to each other” and “de pity for each other.” Na really wonderful thing to dey among this kind brothers and sisters!—Eph. 4:32.

8. According to 1 John 5:3, wetin be the number one reason why we de obey Jehovah?

⁸ Jehovah want make children do wetin their papa and mama talk, and e still want  make we do wetin e talk. (Eph. 6:1) Na Jehovah we suppose to obey because e give us life, e de care for our life, and e get sense pass any other papa. But, the number one reason why we de obey Jehovah na because we love him. (Read 1 John 5:3.) Even though say plenty reason dey why we suppose to obey Jehovah, e no de force us. Jehovah make us for way wey we fit choose the thing wey we want do. So if our love for God make us choose to do wetin e talk, e de like-am.

9-10. Why e dey important make we know the things wey God want make we do and obey them?

⁹ No papa and mama want make bad thing happen to their pikin. Because of that one, them de give their children laws to protect them. When children do wetin their papa and mama tell them, them de show say they trust and respect their papa and mama. So e dey more important make we de obey the laws wey our Papa Jehovah don give us. When we do like that, we de show God say we love and respect him, and na we go still gain. (Isa. 48:17, 18) But, when people no gree listen to Jehovah and follow e law, them de enter trouble.—Gal. 6:7, 8.

¹⁰ Some things wey we choose to do fit spoil our body, they fit make us feel bad, and make us no be friend of God. But we fit protect ourself from this things when we live our life for way wey go make Jehovah glad. Jehovah know wetin go better  for us. One sister for America wey e name na Aurora talk say, “I know say when we de obey Jehovah our life go always better.” Na true this sister talk. As you de obey the things wey Jehovah talk, you no de see the gain?

11. How prayer de help us?

¹¹ Prayer de help us to obey, even when e no easy. Sometimes, we de struggle to obey Jehovah, but we need to always try hard make we no sin. One writer for book of Psalms beg God say: “Make you make my heart dey ready to obey you.” (Ps. 51:12) One regular pioneer wey e name na Denise talk say, “If e hard me to obey anything wey Jehovah command, I de pray make God give me power to do the correct thing.” We fit dey sure say Jehovah go always answer that kind prayer.—Luke 11:9-13.

12. According to Ephesians 5:1, wetin we suppose do?

¹² Read Ephesians 5:1. We de do our best to obey God because we be “children wey e really love.” We de copy the kind person wey God be when we de show love, we dey kind, and we de forgive people. Some people no know God but when they see our fine character, this one go make them learn more about God. (1 Pet. 2:12) As servants of Jehovah, make papa and mama de try to treat their children the  way Jehovah de treat us. When papa and mama de do like Jehovah, their children go want be friend of God.

13. Wetin we suppose do to get strong heart?

¹³ Na normal thing for pikin to really like e papa and de tell people about e papa. For the same way, we dey happy to get Jehovah as our Papa, and we want make other people know who e be. For our heart, we de feel like King David. E write for Bible say: “I go boast about Jehovah.” (Ps. 34:2) But, what if we de shame to talk about Jehovah? Wetin fit give us strong heart? We go get strong heart when we put our mind for how we fit really make Jehovah happy, and how people go benefit if they learn about him. Jehovah go give us the strong heart wey we need. God help the Christians for Bible time make they get strong heart, and e go still help us today.—1 Thess. 2:2.

14. Wetin be some reasons why e dey important to make disciples?

¹⁴ Jehovah no de do partial. So e de glad when e see us de show love to people, no matter the place wey they come from. (Acts 10:34, 35) One of the best ways wey we fit show people say we love them, na when we de preach to them. (Matt. 28:19, 20) Wetin this work fit do? If people listen to us, they go fit get better life now and get the hope to live forever for Paradise.—1 Tim. 4:16.

15-16. Which reasons we get to make us dey happy?

¹⁵ Jehovah de show love as Papa, so e want make e family dey happy. (Isa. 65:14) We get many reasons why we fit dey happy today, even if we de face problems. For example, we dey sure say our Papa Jehovah really love us. The way we understand Bible dey correct. (Jer. 15:16) We be special family and everybody for the family love Jehovah, they love e laws, and they love each other.—Ps. 106:4, 5.

¹⁶ We fit de glad everytime because we know say life go better for future. We know say small time, Jehovah go destroy wicked people and use e Kingdom to make the whole earth Paradise. We still get the wonderful hope say our people for inside grave go come back to life and dey with us again. (John 5:28, 29) That one go really make us happy! And the number one important thing be say, we dey sure say small time everybody for heaven and earth go give Jehovah our Papa wey love us the honor, praise, and worship wey e suppose get.