TWO young women de waka together for one business area wey dey one city for Philippines wey them de call Baguio City. They notice our magazine-stand but they no near-am. One sister wey dey near the magazine-stand wey e name na Helen, come smile for them from e heart. The women continue to waka their own de go, but they no forget that smile from Helen.

After, as the women enter bus de go house, they see one big jw.org sign for one Kingdom Hall. They remember say they see the same sign for our magazine-stand wey they first see. The two of them come down from the bus and check the meeting time for the different-different congregation, wey they write for the gate of the Kingdom Hall.

The two women attend the next meeting. And who you think say they see as they waka enter the Kingdom Hall? Na Helen! Quick-quick, they remember say na the sister be the person wey smile for them that time. Sister Helen talk say: “As they waka come meet me, I fear small because I no know why they waka come meet me.” But the women explain to Sister Helen wetin happen.

The young women enjoy the meeting and the brothers and sisters. They no feel like say they be strangers for there. When they see people de clean the Kingdom Hall after the meeting, they ask them whether they fit join. One of the women no de live for that country again. But the other woman begin go meeting and e start to study Bible. Why this fine thing happen? Na just because of smile!