1. Which things fit affect the way man de treat e wife and children?

WETIN you think say e mean to be “head”? Some men de allow their tradition, culture, or the way they train them to affect the way them de treat their wife and children. One sister for Europe wey e name na Yanita talk say, “For my area, people get strong belief say men better pass women by far, and they suppose de see women as slave.” And one brother for America wey e name na Luke talk say, “Some papa de teach their boys say nothing wey women talk dey important, and so men no need to listen to anything wey women talk.” But Jehovah no want make men de treat their wife like that. (Compare Mark 7:13.) So how man go learn to be good family head?

2. Wetin family head suppose know, and why?

² For man to be good family head, e must first understand wetin Jehovah want make e do. E still need to know why Jehovah give some people the right to be family head. And how e fit copy the example of Jehovah and Jesus. Why e dey important make man know this things? Na because Jehovah don give family head the right to do some things, and e expect them to use am-well.​—Luke 12:48b.

3. Wetin we learn about authority from the thing wey Bible talk for 1 Corinthians 11:3?

³ Read 1 Corinthians 11:3. This verse de talk about the way Jehovah don arrange e family for heaven and earth. Since Jehovah na the head, na e authority high pass. Jehovah arrange-am make angels and people get authority or right to do some things. But they go answer Jehovah for the way they use the right wey e give them. (Rom. 14:10; Eph. 3:​14, 15) Jehovah don make Jesus to be head for congregation,  but Jesus go give answer to Jehovah for the way e treat us. (1 Cor. 15:27) For the same way, Jehovah don make husband the head of e wife and children, but the husband go give answer to Jehovah and Jesus for the way e treat e family.​—1 Pet. 3:7.

4. Which right Jehovah and Jesus get?

⁴ Since na Jehovah be the Head of e family for heaven and earth, e get the right to make laws about how e children suppose behave, and to make sure say they obey the laws. (Isa. 33:22) Since Jesus Christ na the head of the Christian congregation, e still get the right to make laws and to make sure say we obey the laws.​—Gal. 6:2; Col. 1:​18-20.

5. Which right family head get, but wetin be some things wey e no get right to do?

⁵ Just like Jehovah and Jesus, family head get the right to make decision for e family. (Rom. 7:2; Eph. 6:4) But e get some things wey e no get right to do. For example, the laws wey e give suppose agree with wetin Bible talk. (Prov. 3:5, 6) And family head no get right to make law for people if they no be part of e family. (Rom. 14:4) Apart from that one, when e children don grow and comot for house, they go still de respect-am but e no be their head again.​—Matt. 19:5.

6. Why Jehovah arrange make head dey?

⁶ Jehovah arrange make some people be head because e love e family. Na gift from God. Because say Jehovah arrange make some people be head for e family, peace dey and things arrange well. (1 Cor. 14:​33, 40) If to say e no dey clear who be the head for Jehovah family, the family go scatter and peace no go dey. For example, nobody for know who go de make final decision, and who suppose make sure say the decision happen.

7. As e dey for Ephesians 5:25, 28, Jehovah want make men control women?

⁷ If the arrangement wey God make for man to be head of e family na good thing, then why many women today de feel say their husband no de treat them well and e de control them? Na so because many men no de follow the laws wey Jehovah give for family. Instead, they decide to follow tradition. They fit still de treat their wife for bad way to make theirself dey happy. For example, the husband fit de control e wife to make e self feel say e dey more important. Or, to make other people see say e no dey weak. E fit de feel say e no fit force e wife to love-am, but e fit make-am fear-am. And the man fit use that fear de control e wife. * This kind way wey some men de think and de do things no good at all. They no de respect women as them suppose respect them. And this thing wey them de do no agree with wetin Jehovah want.​—Read Ephesians 5:​25, 28.

8. How man fit learn to be better family head?

⁸ Man fit learn to be better family head when e de copy the way Jehovah and Jesus de use their authority. Make we talk about only two character wey Jehovah and Jesus show, and we go see how family head fit show this character them for the way e de treat e wife and children.

9. How Jehovah de show say e dey humble?

 ⁹ To dey humble. Na Jehovah get sense pass for heaven and earth. Even with that one, e de listen to e servants when them de talk their mind. (Gen. 18:​23, 24, 32) Jehovah get authority but e allow the angels talk wetin dey their mind about one matter. (1 Ki. 22:​19-22) Jehovah dey perfect, but e no expect say we go dey perfect now. Instead, e de help us succeed even as we no dey perfect. (Ps. 113:​6, 7) Bible even talk about Jehovah as person wey de “help.” (Ps. 27:9; Heb. 13:6) King David talk say e fit do the big work wey Jehovah give-am to do only because Jehovah dey humble and e help-am.​—2 Sam. 22:36.

10. How Jesus show say e dey humble?

¹⁰ Make we talk about the example wey Jesus show. Even though say Jesus na Lord and Master of e disciples, e still wash their leg. Wetin be one reason why Jehovah make sure say this story dey for Bible? Na to show everybody better example to follow, even people wey be family head. Jesus talk say: “I don show wuna example, so that wuna go do just as I do for wuna.” (John 13:​12-17) Even though say Jesus get high authority, e no expect make people do things for-am. Instead, e do things for people.​—Matt. 20:28.

11. Wetin family head fit learn about to dey humble from the example wey Jehovah and Jesus show?

¹¹ Wetin we learn? Family head fit show say e dey humble for different-different way. For example, e no go expect say e wife and children no go make mistake. E de listen to wetin e wife and children think about any matter, even when the things wey they think dey different from e own. One sister for America wey e name na Marley, talk say: “Sometimes, me and my husband no de think the same way for some things. But I know say my husband value me, and say e de respect me because e de ask me wetin I think about any matter and e de sofri think about wetin I talk before e decide.” Apart from that one, husband wey dey humble go ready to do housework, even though say for e community people de see this kind thing as woman work. This one fit no easy.  Why? One sister wey e name na Rachel talk say: “From the place wey I come from, if husband help e wife wash plate or clean house, e neighbor and e family people go talk say e dey weak. They go think say e no fit control e wife.” If plenty people de think like that for your area, remember say Jesus wash the leg of e disciples, even though say people that time de see-am as work wey slave suppose do. Better family head no de worry whether people de think say e dey weak, but wetin dey e mind na to make e wife and children happy. Apart from say better family head go dey humble, which other fine character dey important?

12. Wetin love move Jehovah and Jesus to do?

¹² Love. Na love de move Jehovah to do everything wey e de do. (1 John 4:7, 8) God give us Bible and e organization to show say e love us and e want make we be e friend. E de make us know say e love us, to show say e really care about the way we de feel. And what about the things wey we need to survive? Jehovah “de give us all the things wey we de enjoy.” (1 Tim. 6:17) When we make mistake e de correct us, but e no de stop to love us. Because Jehovah love us, e give us e Son to die for us. And Jesus really love us sotey e come die for us. (John 3:16; 15:13) Nothing fit make Jehovah and Jesus make they stop to love people wey hold them tight.​—John 13:1; Rom. 8:35, 38, 39.

13. Why e dey important for family head to show say e love e family? (Still check the box “ How Man Wey Just Marry Fit Do Wetin Go Make E Wife Respect-am?”)

¹³ Wetin we learn? Na love suppose de move family head to do everything wey e de do. Why that one really dey important? Apostle John tell us say: “The person wey no love e brother [or family], wey e don see, no fit love God, wey e never see.” (1 John 4:11, 20) If man love e family and e want do like Jehovah and Jesus, e go help e family dey tight with Jehovah, e go  make them dey happy, and provide wetin they need to survive. (1 Tim. 5:8) E go de teach and de correct e children. And e go continue to learn how to decide wetin go honor Jehovah and benefit e family. So make we talk about each of this things and see how family head fit do like Jehovah and Jesus.

14. How family head de help e family dey tight with Jehovah?

¹⁴ E go help e family dey tight with Jehovah. Jesus show say e de do like e Papa as e try to help e disciples to get strong faith. (Matt. 5:3, 6; Mark 6:34) For the same way, the number one important thing for family head na to help e family dey tight with Jehovah. (Deut. 6:6-9) E de do this one when e make sure say e de read and study Bible together with e family. They go de go meeting, de preach the good news, become Jehovah friend and continue to be e tight friend.

15. Wetin be one way wey family head fit show say e care about the way e family de feel?

¹⁵ E go show e family say e care about the way them de feel. For front of people, Jehovah talk say e love Jesus. (Matt. 3:17) Jesus de always show say e love e disciples for the things wey e talk and do. The disciples still show Jesus say they love-am. (John 15:9, 12, 13; 21:16) Family head fit show e wife and children say e love them for the things wey e de do, like to study Bible with them. Make e still tell them say e love them and they really dey important to-am. If nothing spoil, make the family head praise them for front of people.​—Prov. 31:28, 29.

16. Which other thing family head go do, and wetin e no go allow to happen?

¹⁶ E go provide wetin e family need to survive. Jehovah make sure say, Israel people get the things wey they need to survive, even when them de face punishment because of the bad things wey they do. (Deut. 2:7; 29:5) For the same way, Jehovah de give us the things wey we need today. (Matt. 6:31-33; 7:11) Jesus still provide food for people wey follow-am. (Matt. 14:17-20) E still cure plenty sick people. (Matt. 4:24) If family head want make Jehovah happy, e must provide the things wey e family need to survive. But something dey wey e no go allow to happen. Make e no spend too much time for work sotey e no de help e family well to dey tight with Jehovah and dey happy.

17. Which example Jehovah and Jesus show for the way them de teach and correct us?

¹⁷ E go teach e family. Jehovah de teach and correct us because e want help us. (Heb. 12:​7-9) Like Jehovah, Jesus de use love teach people wey dey under e  authority. (John 15:14, 15) Jesus dey kind but e de give strong correction. (Matt. 20:24-28) E understand say we get sin for body and we de make mistake many times.​—Matt. 26:41.

18. Wetin better family head go remember?

¹⁸ If family head de do like Jehovah and Jesus, e go remember say e wife and children de make mistake. E no go “over vex [for] them.” (Col. 3:19) Instead, e go follow wetin dey Galatians 6:1 and e go try correct them “sofri-sofri” as e de remember say e de make mistake too. Like Jesus, e know say the best way to teach person, na to show the person good example.​—1 Pet. 2:21.

19-20. When family head de make decision, how e fit do like Jehovah and Jesus?

¹⁹ E go think about e family before e decide. Jehovah make decision wey de benefit other people. For example, e no decide to make life because of wetin e want gain, but na because e want make we enjoy life. Nobody force Jehovah make e send e Son to come die for our sin. E do-am because e want help us. Jesus make decision wey benefit other people too. (Rom. 15:3) For example, instead of Jesus to rest one time wey e really tire, e use the time teach plenty people.​—Mark 6:31-34.

²⁰ Better family head know say one thing wey no dey easy wey e must do na to make better decision for e family, and e no de play with this work. E no de try make decision wey no get better reason or because of say e body just push-am. Instead, e de allow Jehovah to teach-am how to make better decision. * (Prov. 2:6, 7) If e do like that, the thing wey go dey e mind na how to benefit other people, instead of e self.​—Phil. 2:4.

21. Wetin we go talk about for the next topic?

²¹ The work wey Jehovah give family head no easy, and e expect them to do their work well. But if husband try to follow the example wey Jehovah and Jesus show us, e go be better family head. And if the wife do e own work well, their marriage go sweet. How wife suppose see the right wey the husband get as head of the family, and which things de make this one hard for the wife? The next topic go answer this questions.