1. Wetin be one reason why servants of Jehovah dey as one?

WE HAPPY say we dey among Jehovah family. Why we dey as one and get peace for the family? One reason na say, all of us de do our best to respect the right wey Jehovah don give some people to do some things. The truth be say, the more we understand the arrangement of authority for congregation, the more we go dey as one.

2. Which questions we go answer for this article?

² For this topic we go talk about the people wey get authority for congregation. Among other things wey we go talk about, we go answer this questions: Wetin be the work of sisters? Na true say, na all brothers be the head of all sisters? Na the same right elders and family heads get? Make we first talk about how we suppose de see and treat our sisters.

3. Wetin fit help us to value more the work wey our sisters de do?

³ We de value our sisters wey de work hard to care for their family, to preach the good news, and to support the congregation. We fit value them more when we think about the way Jehovah and Jesus de see them. We go still learn how we suppose treat women when we think about the way apostle Paul treat them.

4. How Bible show-am clear say, Jehovah value women the same way e value men?

 ⁴ Bible show say, Jehovah value women the same way e value men. For example, for apostle their time, Jehovah give holy spirit to women and men so that they go fit do wonderful things, like to speak for different-different language. (Acts 2:1-4, 15-18) Jehovah don use e spirit anoint women and men and they go rule with Christ. (Gal. 3:26-29) Both women and men go live forever for this earth. (Rev. 7:9, 10, 13-15) And na women and men get the work to preach and teach the good news. (Matt. 28:19, 20) For example, the book of Acts talk about one sister wey e name na Priscilla. This sister work with e husband wey e name na Aquila to explain the truth for correct way to one man wey really go school. The man name na Apollos.​—Acts 18:24-26.

5. How Luke 10:38, 39, 42 show say Jesus respect women?

⁵ Jesus respect and honor women. Jesus no do like the Pharisees. This people no de see women as anything. They no de talk to them for public, talkless of to even discuss Bible with them. But Jesus discuss deep Bible truth with women the same way e discuss-am with e other disciples wey be men. * (Read Luke 10:​38, 39, 42.) And e still allow women to follow-am as e de travel go preach for different-different place. (Luke 8:1-3) And Jesus give women the chance and the honor to tell e apostles say e don resurrect.​—John 20:16-18.

6. How apostle Paul show say e respect women?

⁶ Apostle Paul remind Timothy say make e honor women. Paul tell Timothy say, make e treat “old women as mama” and make e treat “young women as sisters.” (1 Tim. 5:1, 2) Even though say Paul try e best to help Timothy get strong faith, e still talk-am say na Timothy mama and e grandmama first teach Timothy about God. (2 Tim. 1:5; 3:14, 15) Paul make sure say, e greet sisters and call their names for the letter wey e send to Christians for Rome. Paul no only notice the work wey this sisters do, but e still show-am from the way e thank them for their work as Christians.​—Rom. 16:​1-4, 6, 12; Phil. 4:3.

7. Which questions we go talk about?

⁷ As we don talk for the paragraphs before this one, we don see-am say Bible no talk say, brothers dey important pass sisters. Our dear sisters wey get love and open-hand really dey important for congregation. And the elders trust this our dear sisters because this sisters de make peace dey for congregation and de help everybody dey as one. But some question dey wey we need to answer. Questions like: Why Jehovah want make sisters cover their head sometimes? As e be say, na only brothers de be elder or ministerial servant, this one mean say na all brothers be the head of all sisters for congregation?

8. As e dey for Ephesians 5:23, na all brothers be the head of all sisters? Explain.

⁸ The answer na no! No be brother be the head of all the sisters for congregation. Na Jesus Christ be the head. (Read Ephesians 5:23.) For family, na husband be the head of e wife. Even though say pikin don baptize and na boy, that one no make-am be head of e mama.  (Eph. 6:1, 2) Na only some authority elders get for congregation. (1 Thess. 5:12; Heb. 13:17) Single sisters wey no de live with their papa and mama again de continue to respect their papa and mama and the elders. Just like brothers for congregation, single sisters too get one head, and na Jesus.

9. Why sisters need to wear headtie sometimes?

⁹ The truth be say, Jehovah don give men the right to teach and organize our worship for congregation, and e no give women that same right. (1 Tim. 2:12) Why? Na the same reason wey make Jehovah choose Jesus to be the head of man, so that everything go arrange well for congregation. So, if because of some reason sister need to do some kind work wey brothers de do, then the sister go need to cover e head just as Jehovah want-am. * (1 Cor. 11:4-7) Jehovah say make sisters de do like that because e want make them de show respect for the arrangement of the authority wey e make for congregation, no be because e want make they feel like say they no reach anything. Now make we talk about the right wey family heads and elders get.

10. Wetin fit make elder want start to make rule for brothers and sisters for congregation?

¹⁰ Elders love Christ, and they love the brothers and sisters wey be like “sheep” wey Jehovah and Jesus don put for their hand to care for. (John 21:15-17) Sometimes, because of the way one elder fit de care for the brothers and sisters for congregation, this one fit make-am de feel like  their papa. E fit de feel say, if family head get the right to make law to protect e family, elder fit still make law wey e think say go protect the sheep of God wey e de care for. And some brothers and sisters fit encourage elders to be like head for them, and help them decide some things. But elders for congregation and family heads get the same authority?

11. How the authority wey family heads get and the authority wey elders get take resemble?

¹¹ The thing wey apostle Paul talk show say the authority wey family heads get resemble the one wey elders get for some ways. (1 Tim. 3:4, 5) For example, Jehovah want make family members obey the head of the family. (Col. 3:20) And e want make brothers and sisters for congregation obey the elders. Jehovah expect both family heads and elders to make sure say they help the people wey them de care for, to love God. Both family heads and elders go still make sure say they care about the way their family de feel. Just like better family head de help e family for time of problem, na so elders go make sure say the people wey them de care for receive help when they get problem. (Jas. 2:15-17) Another thing be say, Jehovah want make elders and family heads help people wey  them de care for to obey e laws. E still warn them say make they no “do anything pass wetin” dey for Bible.​—1 Cor. 4:6.

12-13. As e dey for Romans 7:2, how the authority wey family heads get dey different from the one wey elders get?

¹² But the authority wey family heads get and the one wey elders get still really dey different. For example, Jehovah don choose elders to serve as judge. And e don give them the right to remove any sinner wey no gree repent from congregation. Family heads no get this kind right.​—1 Cor. 5:11-13.

¹³ But Jehovah give family heads some authority wey e no give elders. For example, Jehovah don give family head the right to make rules for e family, and to make sure say e family members follow the rule. (Read Romans 7:2.) For example, family head get the right to decide when e children suppose come back house for night. And e still get the right to correct e children if they no obey the rule. (Eph. 6:1) But before family head wey get love go make rule for e family, e go first discuss-am with e wife because two of them na “one flesh.” *​—Matt. 19:6.

14. (a) As e dey for Mark 10:45, why e make sense say Jehovah choose Jesus to be the head of the congregation? (b) Wetin be the work of Governing Body? (Check the box wey the topic na “ The Work Wey Governing Body De Do.”)

¹⁴ Jehovah use the death of e Son Jesus Christ to buy each person for congregation and any other person wey put faith  for Jesus. (Read Mark 10:45; Acts 20:28; 1 Cor. 15:21, 22) So e really make sense say Jehovah choose Jesus Christ wey die for us so that we go fit live, to be the head of the congregation. And as Jesus na our head, e get the authority to make rules about wetin each of us, families, and the whole congregation suppose do. And e still get the right to make sure say we obey the rules. (Gal. 6:2) But Jesus no de only tell us wetin we go do. E de take care of each of us well, and e really love each of us.​—Eph. 5:29.

15-16. Wetin you learn from the things wey Sister Marley and Brother Benjamin talk?

¹⁵ Sisters de show say them de obey Christ when them de obey the men wey e don choose to take care of them. Many sisters go agree with wetin Sister Marley for America talk. E say: “I really value the work wey I de do as wife and as sister for congregation. I de try my best to always respect the authority wey Jehovah don give my husband and the elders. But my husband and the brothers for congregation don make this one easy for me, because them de respect me and de show say they value the work wey I de do.”

¹⁶ Brothers de show say they understand the arrangement of authority wey Jehovah make when they respect and honor sisters. One brother for England wey e name na Benjamin talk say: “I don learn many things from the comment wey our sisters de make for meeting, their fine idea about how to study and how to make the way I de preach and teach de better. To me, the work wey them de do really dey important.”

17. Why we need to respect the arrangement wey Jehovah don make to give some people authority?

¹⁷ When men, women, family heads, and the elders, understand and respect the arrangement of authority wey Jehovah don make, the whole congregation go get peace. And the number one important thing be say, we go praise Jehovah wey be our Papa for heaven.​—Ps. 150:6.