FOR the Law wey Jehovah give Israel people, e accept turtledoves and pigeons as sacrifice. Bible always mention this two birds together for the Laws about sacrifice, and they fit use one if the other one no dey. (Lev. 1:14; 12:8; 14:30) Why this one dey fine? One reason na say, no be everytime turtledoves go dey to use. Why e be like that?

Turtledoves de live for the land of Israel for months wey the weather dey warm. Every October, they go fly go countries wey dey warm for South. And when the weather wey them de call Spring reach, they go come back to Israel. (Song of Sol. 2:11, 12; Jer. 8:7) For Bible time, this one mean say e go dey hard for Israel people to give turtledoves as sacrifice for wintertime.

But pigeons no de normally fly go another country, so them de always dey for Israel the whole year. Another thing be say, them de train pigeons around where people de live. (Compare John 2:14, 16.) One book wey the name na Bible Plants and Animals talk say, “All the village and town them for Palestine get pigeons wey de live around people. Each person wey get house, get e pigeon house, or hole for wall, where the birds fit live.”—Compare Isaiah 60:8.

Since Jehovah de accept birds wey Israel people fit see around them for the whole year as sacrifice, this one show say Jehovah get love and e no de feel say e own idea must stand.