YOMARA and e two brothers wey their name na Marcelo and Hiver, de live for one small village for Guatemala. Yomara start to study Bible with Jehovah Witness People, and as time de go, e two brothers still join de study Bible with Jehovah Witness People. But one serious problem dey. The three of them blind and them no sabi read and write braille wey be blind people book. Because of this one, na the brother wey de study Bible with them go read the paragraph and Bible verse for them wey dey the lesson wey them de study.

Another thing be say, because of their condition, e really hard for them to go meeting. As them no de see, them no fit trek for 40 minute go the Kingdom Hall wey near them pass. So the brothers for the congregation arrange say them go de carry Sister Yomara and e brothers go meeting. And when the three of them start to handle student part for meeting, na the brothers for congregation de help them fit cram their part so that them go fit do-am well.

For May 2019, brothers start to do congregation meeting for the small village. By that time, one husband and wife wey be regular pioneer don de stay for the village. When them reach there, them decide say them go teach Sister Yomara and e two brothers how to read and write braille, but the husband and wife never sabi how to read and write braille. So them collect some book from one library wey them fit use learn how to teach blind people how to read and write braille.

After some months, Sister Yomara and e brothers don sabi read and write braille. This one make their friendship with Jehovah strong more-more. a Now, Sister Yomara and e two brothers, Marcelo, and Hiver na regular pioneer. Even self, Brother Marcelo don become ministerial servant. Them de put body for Jehovah work every week and this one de make brothers and sisters copy their example.

The three of them really happy for the way brothers for congregation show them love. Them talk say: “From the first time wey we meet Jehovah Witness People, them don show say them love us. And the love wey them show us show say them be true Christians.” Brother Marcelo still talk say: “We don get better friends for our congregation and we don get brothers and sisters for the whole world.” Sister Yomara and e brothers de use all their heart wait for the time wey them go see the earth wey don become paradise.—Ps. 37:10, 11; Isa. 35:5.