1. How our life dey important reach to Jehovah?

 THINK-AM say your friend dash you one house for better area. The color of the house don de fade and some place for the roof de leak. Even with all this one, na plenty money them go sell the house if them want sell-am. True-true, you go really value the house. Na so e still be with the life wey Jehovah give us, na important gift wey we need to value. In fact, Jehovah show say e value our life well-well as e send e Son make e die for us.—John 3:16.

2. With wetin 2 Corinthians 7:1 talk, wetin Jehovah want make we do?

² Na Jehovah give us life. (Ps. 36:9) Wetin apostle Paul talk show say e agree with this one, e talk say: “Because of [Jehovah] we get life and de move and de live.” (Acts 17:25, 28) So we fit talk say our life na gift from God. Because e love us, e don give us things wey we need to fit continue to de live. (Acts 14:15-17) Jehovah no de use miracle protect our life now. Instead, e want make we do our best to care for ourself so that we no go sick and make we fit continue to worship-am. (Read 2 Corinthians 7:1.) Why e dey important make we do our best to continue to live and make we no sick? And wetin go help us fit do this one?

3. Why we need to do our best make we no sick?

³ One reason why we de do our best make we no sick na because, when we de strong we go fit serve Jehovah with all our power the way e dey our mind. (Mark 12:30) We want “give [our] body and life to God as sacrifice wey dey holy and wey God go accept.” So we de run from things wey  fit make us sick. (Rom. 12:1) Na true say no matter how we try reach sickness fit still come. But we still de do our best make we no sick because we want make Jehovah see-am say we value the life wey e give us.

4. Wetin King David want even when e don near the time wey e go die?

⁴ King David tell us why e value the gift of life when e write say: “Wetin you go gain if I die, and if I enter grave? Person wey don turn to sand go fit praise you? E go fit tell people about the good things wey you don do?” (Ps. 30:9) E be like say David write this word when e don de near the time wey e go die. But e still want do e best to dey alive and dey strong so that e go fit continue to worship Jehovah. And we dey sure say na the same thing all of us want.

5. Even if we de sick or we don old, wetin we fit still do?

⁵ When person de sick or when e don old, e no go fit do the things wey e de do before. This one fit make-am no happy or make life tire-am. When this kind thing happen to us, make we no let-am make us no care for ourself again. Why? Because no matter how we don old reach or how the sickness bad reach, we go fit still continue to worship Jehovah well, like King David. E de make us happy say our God value us even when we don old or when we de sick. (Matt. 10:29-31) Even if we die, we know say e de hungry Jehovah to bring us back to life. (Job 14:14, 15) Now wey we dey alive, make we do our best to protect our life and care for ourself make we no sick.

6. Wetin Jehovah want make we do for food and drink matter?

⁶ Even though say Bible no be book wey doctor de use treat people, but e tell us how Jehovah want make we care for ourself. For example, Jehovah use Bible advice us say: “Remove from your body things wey fit cause problem for you.” (Eccl. 11:10) To de over chop and over drink de cause problem for person life and Bible condemn-am. (Prov. 23:20) Jehovah want make we de control ourself when we want choose wetin we go chop and drink and how them go plenty reach.—1 Cor. 6:12; 9:25.

7. How the advice wey dey Proverbs 2:11 fit help us care for ourself make we no sick?

⁷ We need to use our sense well to make decision wey go show say we value the life wey Jehovah give us. (Ps. 119:99, 100; read Proverbs 2:11.) For example, we need to dey careful about wetin we de chop. If the food wey we like well-well fit make us sick, we go show say we get sense if we run from-am. We still de show say we get sense when we sleep well, de always do exercise, dey neat, and always make our house clean.

8. Wetin we learn from Bible about wetin Jehovah no want make we do?

⁸ For the Law wey Jehovah give Israel people, e tell them things wey they go do so that they no go put their life or other people own for danger, whether na for house or for work. (Ex. 21:28, 29; Deut. 22:8) If person kill another person by mistake, e go still need to pay for e mistake. (Deut. 19:4, 5) The Law talk say if person do something by mistake wey affect pikin wey dey inside e mama belle, the person no go go free. (Ex. 21:22, 23) Bible make-am clear say Jehovah no want make we do wetin go put us or other people for danger, even if na by mistake.

9. Which things we fit do so that we no go put ourself or other people for danger? (Still check the pictures.)

 ⁹ When we do our best to protect ourself and other people for house and for work, we de show say we value life. For example, anything wey we no de use again, like wetin fit injure person, chemicals, or medicine, we go troway them for where them no go affect people. And if we still de use them, we go put them for where children no go fit reach. We must dey careful with fire, hot water or hot oil, and anything wey them de plug for light, like blender. And when we de use them or don use them finish, we no go leave them for where we use them and waka comot. Make we no drive motor when the medicine wey we take de affect us, when we don drink or when we no sleep well. And we no go de drive with one hand and de use the other hand do another thing wey go comot our mind for the road.

10. Wetin we fit do before and when wetin we no expect de happen?

¹⁰ Sometimes, we no go fit stop somethings  wey fit put our life for danger, make them no happen. For example, we no go fit stop-am make disaster, sickness wey de spread, or riot no happen for our area. And when this kind thing happen, we fit do our best to hide ourself from danger and do wetin go make us fit survive-am. How? We go need to obey government people if them give us time to de come out or say make we pack comot from the area. (Rom. 13:1, 5-7) E dey possible to prepare for wetin we no expect before e happen. So make we put ear for wetin government for our area talk and do wetin them talk, this one go help us prepare well. For example, we fit keep some water wey we fit use for some time, food wey no de quick spoil, and some medicine.

11. When sickness de spread for our area, wetin we go ready to do?

¹¹ Wetin we go do if sickness de spread for our area? Make we obey wetin government talk, like to de wash our hand, no de too near people, wear facemask, and quarantine. When we do this one, e go show say we really value life.

12. How the advice for Proverbs 14:15 fit help us choose which kind news we go listen to when wetin we no expect de happen?

¹² When wetin we no expect de happen, people go de talk different-different things wey fit no correct. Them fit be our friends, neighbors, and even news people. Instead make we “believe everything” wey we hear, e better make we listen to news from government and other people wey we de sure say their news correct. (Read Proverbs 14:15.) Governing Body and branch office them, de do their best to make sure say them get correct information before them tell us wetin we go do about our meeting and preaching work. (Heb. 13:17) When we obey their advice, we go protect ourself and other people from danger. And e fit make people for our area respect Jehovah organization more.—1 Pet. 2:12.

13. How we de show say we value life even when doctor talk say we need blood?

¹³ Many people know say Jehovah Witness People believe say blood dey holy. Even when doctor talk say blood don de finish for our body, we de obey Jehovah law wey talk say make we no take blood. (Acts 15:28, 29) But this one no mean say we want die. We know say life na gift from God, so we value-am. Na only doctor wey fit treat us well and wey go gree treat us without blood we go gree make e treat us.

14. Wetin we fit do make we no de go hospital for serious treatment every time?

¹⁴ If we do the things wey we don first talk about for this article and take care of ourself, e fit help us no quick sick sotey we go need operation or serious treatment for hospital. If we manage our body well, e go help us fit quick well if them carry us go hospital to go do operation. We fit avoid things wey we no expect wey fit carry us go hospital, when we dey careful and remove things wey fit put us for danger for house or work place. And when we no de drive rough and over speed.

15. (a) Why e dey important make the information wey dey our no blood card, dey correct? (Still check the picture.) (b) As we see for the video, how we fit make better decision about blood matter?

¹⁵ To show say we value life, we need to fill our durable power of attorney (no blood  card) and always take-am go anywhere wey we de go. b Na this card we de use tell doctor the kind treatment wey we want when e reach blood matter. Wetin you write inside your no blood card still correct? If you never get or you need to fill another one, abeg make you no waste time to do-am. If we fill our no blood card, e go help us get the treatment wey we need quick-quick. Because e go help us no waste time de explain to doctor the kind treatment wey we want. E go still help the doctor make them no give us treatment or medicine wey fit cause problem for us because them no understand wetin we tell them. c

16. Wetin we go do if we no sabi fill no blood card?

¹⁶ Anybody fit get accident or sick anytime no matter how e young reach or how e strong reach. (Eccl. 9:11) So e really dey important make we fill our no blood card. If you no sabi fill-am, abeg tell elders for your congregation make them show you how to fill-am. Because them sabi fill-am, but them no go decide for you wetin  you want, that one na your own to decide. (Gal. 6:4, 5) But they go fit help you understand the best way to fill the no blood card.

17. When e reach treatment matter, how we fit show say we de use our sense well?

¹⁷ Na wetin we learn from Bible de help us decide the kind treatment wey we de receive. (Acts 24:16; 1 Tim. 3:9) When we de tell people about the kind treatment wey we don choose to take, make we follow the advice wey dey Philippians 4:5, e talk say: “Make everybody know say wuna de do things with sense.” When we de use our sense well, we no de worry sotey we want do anything to cure our sickness, and we no go try force people to choose the same kind of treatment wey we de take. We love our brothers and sisters and we de respect them even when their decision different from our own.—Rom. 14:10-12.

18. How we fit show say we value the life wey Jehovah give us?

¹⁸ When we do our best to protect our life and worship Jehovah well, e de show say we value the life wey e give us. (Rev. 4:11) But for this Satan world, we must continue to face sickness and other problem. But this one no be the kind life wey Jehovah want for us. E go soon give us life wey no go end, where pain and death no go dey again. (Rev. 21:4) But for now e de make us happy say we dey alive and de worship Jehovah wey be our Papa for heaven.