1. Wetin show say God Word really dey important to Jesus?

 YOU don ever think about the way Jesus teach people? Plenty times e de quote God Word from e head! In fact, the first thing wey Jesus talk after e baptize and some things wey e talk before e die, na wetin e quote from God Word. b (Deut. 8:3; Ps. 31:5; Luke 4:4; 23:46) From when Jesus baptize till the time wey them kill-am, na three and half years. And for the three and half years, Jesus de read and quote God Word for front of plenty people and explain-am to them.—Matt. 5:17, 18, 21, 22, 27, 28; Luke 4:16-20.

2. Wetin help Jesus really sabi God Word as e de grow? (Check picture for front cover.)

² Many years before Jesus start e preaching work for this earth, e don read God Word plenty times and don hear when people read-am. And e fit still don hear when e papa and mama de quote from God Word for house. c (Deut. 6:6, 7) We dey sure say Jesus and e family people de go synagogue every Sabbath day. And when e dey synagogue, e de sofri listen as them de read God Word. As time de go, Jesus learn how to read, and start to read God Word by e self. This one make Jesus really sabi God Word, love-am, and use wetin e de learn for e life. For example, think about wetin happen for temple when Jesus dey 12 years. All the teachers for Jew people religion wey dey there really “surprise for the way e de understand [them] and de answer question.”—Luke 2:46, 47, 52.

3. Wetin we go learn for this article?

 ³ Today, we go fit sabi and love God Word if we de read Bible every time. So wetin we go do so that we go gain well-well when we read Bible? We go fit learn wetin we go do from wetin Jesus tell people for e time wey really sabi the Law. Them be Pharisee people, Sadducee people and people wey de copy God Word (scribes) for Jesus time. Even though say na this people de lead for their different-different religion that time and them de read God Word well-well, they no de really gain from wetin them read. Jesus talk three things wey them suppose do so that them go fit gain from God Word. Wetin Jesus tell them go teach us (1) how to understand wetin we read, (2) how to get the lesson wey dey where we read, and (3) how to allow wetin we read for Bible touch our life.

4. Wetin Luke 10:25-29 teach us about how to read Bible?

⁴ When we read Bible, we want understand the meaning of wetin we read. Because if we no understand wetin we read, we no go fit really gain from-am. For example, think about wetin Jesus tell one man wey sabi the Law well-well. (Read Luke 10:25-29.) When the man ask Jesus about wetin e go do so that e go get life wey no go end, Jesus help-am see the answer for God Word. E ask the man say: “The things wey them write for the Law, wetin e talk?” The man quote from God Word say na to love God and e neighbor. And the answer correct. (Lev. 19:18; Deut. 6:5) But see the next question wey the man ask, e say: “Who really be my neighbor?” This question wey this man ask show say e no really understand the meaning of wetin e read. So, e no know the correct way to do wetin e learn.

5. When you pray and sofri read Bible, how e fit help you gain more from Bible?

⁵ We go gain and understand Bible more if we put the correct thing for mind as we want read Bible. See some things wey go fit help you. Pray before you start to read Bible. We need Jehovah help to fit understand Bible, so we need to beg-am for holy spirit so that we go fit put our mind for wetin we de read. Then, sofri read-am. This one go help you understand wetin you de read. You fit enjoy-am more if you read-am come out or read follow audio Bible. This one go make you put mind more for wetin you de read. And e go really make wetin you de read touch you more. (Josh. 1:8) When you don read finish, make you pray to Jehovah again and thank-am for the Bible wey e give us as gift. E still dey important to beg-am say make e help you fit use wetin you learn.

6. When you de ask yourself some question and write somethings down as you de read Bible, how e fit help you? (Still check the picture.)

⁶ See another two things wey go fit help you understand Bible more when you de read-am. Ask yourself questions about wetin you de read. As you de read about wetin happen for Bible time, ask yourself say: ‘Which people be the main people for this matter?’ Which person de talk for here? Who e de talk to, and why e de talk to-am? Where the thing happen and when e happen?’ This kind questions go help you think about the story and understand wetin you de read well. Another thing be say, you fit still write some things wey you learn down. When you write wetin you don read, you go fit think  about-am more and e go help you understand-am well. And e go still help you remember wetin you don read. You fit write questions wey you want know more about, wetin you learn from the research wey you do, the main points from wetin you learn, how you fit use wetin you don read or how you feel about wetin you read. When you de read Bible and write things down like this, e go help you see Bible as letter wey God send to you.

7. Which character we need to fit understand wetin we read from Bible, and why we need-am? (Matthew 24:15)

⁷ Jesus help us know one important character wey we need to fit understand Bible. The character na deep sense. (Read Matthew 24:15.) Wetin be deep sense? Deep sense na the character wey de help person fit understand how one thing connect to another one and how e dey different from another one. E still de help person understand something well even if they no talk-am direct. Wetin Jesus talk show say we need deep sense to fit know say the things wey de happen na wetin Bible talk say go happen. We need this character so that we go fit gain well from all the things wey we de read from Bible.

8. Wetin go show say you de read Bible with deep sense?

⁸ Jehovah de give e servants deep sense. So make you beg-am say make e help you get deep sense. (Prov. 2:6) When you pray for deep sense, wetin you go do so that you go get-am? When you read Bible, take time sofri think about how wetin you read connect to other things wey you know. Our book them fit help you do this one, and one of them na Research Guide for Jehovah’s Witnesses. This our book them go help you really understand wetin you read for Bible and know how you fit use wetin you learn for your life. (Heb. 5:14) When you read Bible and try see how the different-different message connect, e go help you fit de understand Bible more-more.

9. Which important truth Sadducee people no accept?

⁹ Sadducee people really know the first five books for the part of the Bible wey them use Hebrew language write. But them no put mind for the important truth wey dey inside the five books. For example, think about wetin Jesus tell them when them come try prove to-am say God no go bring people wey don die back to life. E ask them say: “Wuna never read-am for the book of Moses, for the story about the chukwu-chukwu bush, when God tell Moses say: ‘I be God of Abraham, God of Isaac and God of Jacob’?” (Mark 12:18, 26) Even though say Sadducee people don read-am plenty times, this question wey Jesus ask them show say they no accept this important lesson wey Bible de teach—say God go bring people wey don die back to life.—Mark 12:27; Luke 20:38. d

10. Wetin we go put for mind as we de read Bible?

¹⁰ Wetin this one de teach us? When we read any verse or story for Bible, make we put mind to learn everything wey we fit learn from the verse or story. When we read Bible, no be only lesson wey dey easy to get we want learn but we still want learn the ones wey hide for inside the story or verse wey we read.

11. How we fit use wetin dey 2 Timothy 3:16, 17, gain plenty things from Bible?

¹¹ Wetin go help you fit see lesson wey hide for inside the verse or story wey you read for inside Bible? Think about wetin 2 Timothy 3:16, 17 talk. (Read-am.) The verse talk say we fit use everything wey dey inside Bible (1) teach, (2) correct, (3) make things straight, and (4) train person to do the correct thing. You go fit gain this four things from any Bible verse wey you read, even from the ones wey you no de too read. Sofri think about wetin the verse wey you read de teach you about Jehovah, wetin e get for mind to do, or any advice wey dey the verse. Think about how e de help person fit correct e mistake. When you read any verse, try use-am check yourself to see any character wey you need to correct, and do your best to correct-am so that you go continue to worship Jehovah well. Try see how the verse fit correct or make some belief straight, e fit be the bad belief of some people wey you meet for preaching. And try see how the verse fit train you to do the correct thing, this one go help you de see things the way Jehovah de see-am. When you de read Bible with all this things for mind, you go gain plenty things from Bible.

12. Why Jesus ask Pharisee people say “Una never read-am?”

¹² One time wey Pharisee people come find Jesus trouble, Jesus ask them say “Una never read-am?” This one show say Pharisee people  no de use better mind read God Word. (Matt. 12:1-7) e That day, Pharisee people talk say Jesus disciples don sin as them pluck some food chop for Sabbath day, when them de pass one farm. When Jesus want answer them, e use two example from God Word, and quote one verse from the book of Hosea to show say Pharisee people no know the correct thing about the Sabbath law, and say them no get pity. Even though say this men de read God Word, why e no de affect their life? Na because them de read-am to see people mistake and to show say na them sabi pass. Na this bad character de make them no de understand wetin them de read.—Matt. 23:23; John 5:39, 40.

13. Which character we need when we de read Bible, and why?

¹³ From wetin Jesus talk, we learn say we need to read Bible with better mind. We no want be like Pharisee people but we must bring ourself down and ready to learn. So we must “dey humble and allow God to plant e word . . . for [our] heart.” (Jas. 1:21) If we dey humble, we go allow God Word affect our life. If we want make Bible help us get pity, good heart and de show love, we no go read Bible to find people mistake or to show say na we sabi pass, just the way Pharisee people de do that time.

14. How we fit know if we de allow wetin we de read for Bible affect our life? (Still check pictures.)

¹⁴ The way we de treat people fit help us know if we de allow wetin we read for Bible affect our life. Pharisee people no allow God Word change their bad character, na e make them de ‘condemn people wey no do bad.’ (Matt. 12:7) Na so e still be for us, the way we de treat and see other people de show if we de allow wetin we read for Bible affect our life. For example, na the good thing about people de first come our mind  to talk about or na their mistake? We de show pity and we de forgive? Or when person make us vex, na so-so complain we de complain and we no de want forgive them? When we de check ourself like this, e go help us see if wetin we de read for Bible de affect the way we de think, feel, and do things.—1 Tim. 4:12, 15; Heb. 4:12.

15. How Jesus feel about the Word of God?

¹⁵ Jesus love to read God Word. Psalm 40:8 talk about how Jesus feel about God Word, e talk say: “O my God, e de sweet me to do wetin you want, and your law dey deep inside my heart.” The love wey Jesus get for God Word make-am happy to worship Jehovah and e still help-am fit worship Jehovah well. Na so e still be for us, if we love to read God Word and allow wetin we read enter our heart, e go help us happy to worship Jehovah and fit worship-am well to the end.—Ps. 1:1-3.

16. Wetin you go do so that you go fit gain well-well when you read Bible? (Check the box “ Wetin Jesus Talk Fit Help Us Understand Bible More.”)

¹⁶ Make we learn from Jesus example and from wetin e tell Pharisee and Sadducee people. This one go help us do our best to gain more from wetin we read from Bible. Some things wey go help us gain and understand Bible more na, (1) to pray before we start to read Bible and when we read-am finish, (2) to sofri read-am, (3) ask yourself some questions as you de read, and (4) de write wetin you learn down. We still need to use deep sense when we de read Bible. This deep sense go help us use wetin we learn from our book them fit connect wetin we read together so that we go understand-am well. We still fit learn to use Bible verse wey we read pass the way we de use-am before, even verse them wey we no de too read. To fit do this one, we need to find lesson wey dey the story or verse wey we read, no be only the lesson wey easy to get. And we go fit allow wetin we read for Bible affect our life if we de bring body down when we de read, no be to show say na we sabi pass. When we put all this things for mind, we go gain well-well from wetin we read from Bible and e go help us be Jehovah tight friend.—Ps. 119:17, 18; Jas. 4:8.