1. Why we de thank Jehovah as e give us Bible?

 WE REALLY thank Jehovah as e give us Bible! Jehovah de use Bible give us better advice wey fit help us manage our problem today. And e don still give us hope say our tomorrow go better. The one wey dey important pass be say Jehovah don use Bible tell us about e character. E de touch our heart and de make us near Jehovah more as we de think about the kind better-better character wey e get. And this one de make us be e tight friend.—Ps. 25:14.

2. For Bible time, how Jehovah tell people about e self?

² Jehovah want make people know-am. For Bible time, Jehovah use dreams, visions, and even angels tell people about e self. (Num. 12:6; Acts 10:3, 4) But we no go fit study the dreams, visions, or message from angels, if they no write them down. Na e make Jehovah choose some people make them “write all the things” wey e want make we know “for inside book.” (Jer. 30:2) We dey sure say as Jehovah say make them write wetin e want make we know for inside book, na the best way to help us and teach us, because ‘the way the true God de do things dey perfect.’—Ps. 18:30.

3. Wetin Jehovah do to make sure say Bible stay reach our time? (Isaiah 40:8)

³ Read Isaiah 40:8. For thousands of years now, Bible don de give Jehovah people better advice. How e take dey possible? After all, e don tey wey them write Bible and things wey them use write-am de quick spoil. Even self, all of them don  spoil before this our time. But Jehovah make sure say people copy the things wey them write, so that them no go lost when the things wey them write-am ontop spoil. Na true say the people wey copy-am no perfect, but they sofri copy the Bible. One professor talk about the part wey them use Hebrew language write say: “We dey sure say the way people sofri copy Bible so that mistake no go enter, they no copy any other book like that.” So even though say e don tey wey them write Bible ontop things wey de quick spoil and people wey copy Bible no dey perfect, we dey sure say na wetin Jehovah say make them write that time, we still de read now.

4. Wetin we go talk about for this article?

⁴ “Every good gift and every gift wey complete” come from Jehovah. (Jas. 1:17) Bible na one of the best gift wey Jehovah don give us. When person give us gift, the gift de help us know if the person really know us and wetin we need. Na the same thing with Bible wey God give us. As God give us Bible, e tell us plenty things about Jehovah. E help us see say Jehovah really know us and wetin we need. For this article, we go learn three things about Jehovah as e give us Bible. (1) The kind sense wey e get, (2) e no de do partial, and (3) the kind love wey e get. Make we first talk about how Bible show the kind sense wey Jehovah get.

5. Wetin be one way wey Bible show say God really get sense?

⁵ Jehovah know say we need e advice. And better-better advice dey inside Bible wey e give us. Advice from Bible de help people get better life. In fact, Bible de change people life. When Moses de write the first book them for Bible, e tell Israel people say: “This word no be wetin no get value but e go give you life.” (Deut. 32:47) People wey follow advice from Bible go succeed and live happy life. (Ps. 1:2, 3) Even though say e don tey wey they write Bible, e still get power to change people life. For example, if you go jw.org for, “Bible De Help People Change Their Life” you go see many story of our brothers and sisters wey show say Bible advice still “de work for [people] life.”—1 Thess. 2:13.

6. Why we fit dey sure say Bible no be like other book?

⁶ No other book be like Bible. Why e be like that? Na because Jehovah wey be the God wey get the Bible, na the God wey get power pass, e no de die, and e get sense pass everybody. People de continue to read many other book even after the person wey write-am don die. And as time de go, the advice wey dey the book them no de work again. But the advice wey dey Bible always de work. E don help people for Bible time and e still dey help people for this our time. When we read this holy book and think about wetin we learn, God go use e holy spirit help us see how we fit use the advice for our life. (Ps. 119:27; Mal. 3:16; Heb. 4:12) God wey get the Bible no de die, and e ready to help you. This one na good reason to always read Bible.

7. How the Word of God help Israel people and Christians for apostle time worship Jehovah together?

⁷ Another thing about Bible wey show say God really get sense be say the Word of God de bring servants of God together. When Israel people take over the Promise Land, them start to live for different-different place. Some of them become fishermen, some start to train cow, and some  become farmers. E go dey easy for them to forget about the people wey no de stay near them. But Jehovah give them law say make them de gather together from time to time so that the priest go read and explain the Word of God to them. (Deut. 31:10-13; Neh. 8:2, 8, 18) Just think about how Israel people wey hold Jehovah tight go don feel when them reach Jerusalem and see millions of their brothers from other part of their country! With this one, Jehovah help e people continue to worship-am together. And plenty years later for the time of the apostles, na men and women wey de speak different-different language dey the congregation. Them come from different-different culture, and some get money and some dey poor. But because they love the Word of God, they worship Jehovah together as one. The only way people wey just become Christian fit understand the Word of God na when the brothers help them and when them attend meeting.—Acts 2:42; 8:30, 31.

8. How Bible de help us worship Jehovah as one today?

⁸ Jehovah still de use Bible teach e people and bring them together as one. Everything wey we need to know about Jehovah dey inside Bible. We de always attend meeting, go assembly and convention. For there, we de read Bible and hear talks wey them de use explain and teach us about wetin dey inside Bible. Bible de help us fit “serve [Jehovah]  as one,” and this na wetin Jehovah want.—Zeph. 3:9.

9. Which character person need to fit really understand Bible? (Luke 10:21)

⁹ Think about another thing about Bible wey show say Jehovah get sense well-well. E make sure say the way them write many part of the Bible, na only people wey carry body down go fit understand-am. (Read Luke 10:21.) People for everywhere de read Bible. One professor talk say: “No be only say na Bible be the book wey people read pass, but na Bible people sofri read pass for the whole world.” And na only people wey de carry body down de really understand Bible and do wetin e talk.—2 Cor. 3:15, 16.

10. Which other thing about Bible show say Jehovah really get sense?

¹⁰ We see another thing about Bible wey show say Jehovah really get sense. No be only say Jehovah de use Bible teach all e servants together, but e still de use-am teach and comfort us one by one. When we read Bible, we fit see-am say Jehovah de care for us one by one. (Isa. 30:21) When you get problem, you don ever read Bible and feel say na you them write the Bible verse for? The truth be say Bible na for everybody. But how e be say when you read Bible, e go just be like say na you them write-am for? This one dey possible because na the God wey get the Bible wise pass for heaven and earth.—2 Tim. 3:16, 17.

11. When them de write Bible, how Jehovah show say e no de do partial?

¹¹ Another thing wey we know about Jehovah be say e no de do partial. (Deut. 32:4) Person wey no de do partial, de judge well and Jehovah no de do partial. (Acts 10:34, 35; Rom. 2:11) The language wey them use write Bible still make-am clear say Jehovah no de do partial. Na Hebrew language they use write the first 39 books of the Bible, and na that language God people de understand that time. But for the time of the apostles, na Greek language plenty people de speak and na that language them use write the remaining 27 books of the Bible. Jehovah no talk say na only Hebrew language e go use write Bible. Today, the number of people wey dey this world don near eight billion, and them de speak plenty different-different language. So which language all this people go use learn about Jehovah?

12. Wetin be one way wey wetin dey Daniel 12:4 don happen for this our time?

¹² Jehovah use prophet Daniel talk say for the time of the end, the correct teaching from Bible, go plenty. And plenty people go understand-am. (Read Daniel 12:4.) One way wey correct teaching from Bible don take plenty be say, plenty people de fit understand wetin Bible de teach now because we de translate, print and give them Bible and books wey de explain Bible for their language. Na Bible be the book wey people translate pass and wey we fit see anywhere. But when business people produce Bible sometimes, e de cost well-well. But Jehovah people don translate some part or the whole Bible for more than 240 language, and we no de sell am. Because of this one, people for the whole world fit hear the good news about the Kingdom before this Satan world end. (Matt. 24:14) Our God wey no de do partial want make plenty people fit read Bible and know the kind God wey e be. Because e really love all of us no be small.

13. Why we fit talk say Bible show say Jehovah love us? (John 21:25)

¹³ As God give us Bible, e show say Jehovah number one character, na love. (1 John 4:8) Think about the things wey Jehovah say make them write for inside Bible and the things wey e no allow them write inside. For inside Bible, Jehovah give us just the things wey we need to fit be e friend, help us fit live happy life now, and get life wey no go end for future. But because Jehovah love us, e no give us information wey pass wetin we need to worship-am.—Read John 21:25.

14. Wetin be another thing about Bible wey show say Jehovah love us?

¹⁴ Another thing about Bible wey show say Jehovah love us be say, the way Jehovah say make them write Bible show respect for us. Jehovah no give us too much law for Bible and use-am control everything wey we de do for life. Instead, e say make them write people story, things wey go happen for future, and better-better advice for inside Bible. And this one de help us fit make better decision. Na like this Bible de move us to love and obey Jehovah with all our heart.

15. (a) How Bible show say Jehovah really care about us? (b) For the picture, which person for Bible the small girl, the young brother, and the old sister de think about? (Gen. 39:1, 10-12; 2 Ki. 5:1-3; Luke 2:25-38)

¹⁵ Bible show say Jehovah really care about us. How? For inside Bible, you go see story of people wey don face the kind problem wey we de face now. Their story de  touch us because them ‘get feeling like us.’ (Jas. 5:17) The one wey sweet us pass be say, when we read about how Jehovah treat people wey face the kind things wey we de face, e de help us understand say “the love wey Jehovah get really deep and e get pity.”—Jas. 5:11.

16. When we read about people wey sin for Bible, wetin e de teach us about Jehovah? (Isaiah 55:7)

¹⁶ We see another thing for Bible wey show say Jehovah love us. We learn for Bible say Jehovah no go leave us when we sin. Israel people sin against Jehovah plenty times, but when them repent and beg Jehovah, e de forgive them. (Read Isaiah 55:7.) Christians for apostle time still know say Jehovah love them. Jehovah use e holy spirit make Paul write to the Christians that time say when person sin and repent, make they “forgive with all [their] heart and comfort” the person. (2 Cor. 2:6, 7; 1 Cor. 5:1-5) E de make our mind come down to know say Jehovah no de troway e servants because they sin against-am! Instead, e de show them love as e de help them, correct them and allow them be e friend again when them repent. And e don promise say e go do the same thing for anybody wey sin and repent.—Jas. 4:8-10.

17. Why Bible really dey important?

¹⁷ Jehovah don give us better gift. Why Bible really dey important? We don learn say as God give us Bible, e show say Jehovah really get sense, e no de do partial, and e love us. As e give us Bible, e show say Jehovah want make people know the kind God wey e be and become e friend.

18. How you fit show say you value this “good gift” wey Jehovah don give us?

¹⁸ Make you value Bible and treat-am like the “good gift” wey e really be. (Jas. 1:17) So continue to show say you value-am. How? Na to de read-am and think about how you fit follow the advice wey dey inside. When you do this one, make you know say Jehovah wey be the God wey get the Bible, go bless you and help you understand wetin Bible de teach.—Prov. 2:5.