1. Give example wey show why we need to follow direction from Jehovah.

 JUST think-am say you lost for forest. Danger full everywhere around you because wicked animals, insects and plants wey fit give person sickness dey the forest. And e no easy to waka for the road because big-big stone full everywhere. You go really happy if you see person wey know where all the danger dey for the forest, to direct you. This wicked world be like that forest. Plenty danger dey this world wey fit spoil our friendship with Jehovah. But Jehovah wey de direct us know all the danger wey dey this wicked world. E de lead us comot from where danger dey, and e de lead us go the new world where we go enjoy life wey no go end.

2. How Jehovah take de direct us?

² How Jehovah take de direct us? The main thing wey e de use, na im Word the Bible. But e still de use people direct us. For example, e de use “faithful and discreet slave” teach us wetin go help us fit make better decisions. (Matt. 24:45) Jehovah still de use some brothers to direct us. For example, circuit overseers and elders de help us see how we fit handle our problems. We really happy say Jehovah de direct us for this last days wey things really hard! This one de help us fit continue to hold Jehovah tight and enjoy life now and forever.

3. Wetin we go talk about for this article?

³ Sometimes, e fit hard us to follow direction from Jehovah, especially as e de use people wey no dey perfect de direct us. Why? Because we fit no like wetin them say make we do. Or  wetin them tell us fit no make sense to us. This one fit make us feel say wetin them talk no be wetin Jehovah want. When this kind thing happen, we need to trust Jehovah say na im de lead im people and say e go always bless us when we follow the directions from-am. For this article we go talk about three things wey go help us trust say na Jehovah de direct us. We go talk about (1) how Jehovah direct im people for Bible time, (2) how e de direct us today, and (3) how we de gain when we follow direction from Jehovah.

HOW JEHOVAH TAKE DIRECT ISRAEL PEOPLE?

4-5. How Jehovah take show say na Moses e de use direct Israel people? (Check picture for front cover.)

⁴ Jehovah choose Moses to lead Israel people comot from Egypt. And e make-am dey clear to Israel people say e de use Moses direct them. For example, e give them pillar of cloud for day time, and pillar of fire for night as e de direct them. (Ex. 13:21) Moses follow the pillar and e lead them to the Red Sea. But Egypt people start to pursue them. So, Israel people begin fear say Egypt people go catch them and kill them. This one make them think say Moses don make mistake as e follow the road wey carry them go the Red Sea. But no be mistake, na Jehovah use Moses lead them go there. (Ex. 14:2) And God save them from Egypt people hand.—Ex. 14:​26-28.

⁵ For 40 years, Moses continue to follow the pillar of cloud as e de direct Jehovah people for wilderness. a Jehovah make the pillar of cloud to dey ontop Moses tent for some time. This one make everybody for Israel see say na Moses Jehovah de use lead them. (Ex. 33:7, 9, 10) When Jehovah talk to Moses from the pillar of cloud, Moses go carry the message go give Israel people. (Ps. 99:7) So them get plenty reason to believe say na Moses Jehovah de use direct them.

6. Wetin some Israel people do as Jehovah use Moses direct them? (Numbers 14:2, 10, 11)

⁶ Even though say e dey clear say na Moses Jehovah de use direct im people, plenty of them no gree accept-am. (Read Numbers 14:2, 10, 11.) Plenty time, them no accept say na Moses Jehovah de use lead them. And because of this one, Jehovah no allow this Israel people enter the Promise Land.—Num. 14:30.

7. Give example of people wey follow direction from Jehovah. (Numbers 14:24) (Still check the picture.)

⁷ Some Israel people follow Jehovah direction. For example, Jehovah talk say: “Caleb . . . continue to follow me with all im heart.” (Read Numbers 14:24.) Jehovah bless Caleb and even allow-am choose the place wey e like to live for the Promise Land. (Josh. 14:​12-14) Israel people wey enter the Promise Land, show good example as them follow direction from Jehovah. When Joshua take over from Moses to de lead Israel people, “them respect-am well-well for the rest of im life.” (Josh. 4:14) Na this one make Jehovah bless them and allow them enter the Promise Land.—Josh. 21:​43, 44.

8. Explain how Jehovah direct im people for the time of the kings for Israel. (Still check the picture.)

⁸ After many years, Jehovah use judges direct im people. Later, for the time of the kings, Jehovah use prophets direct im people. And the kings wey love Jehovah follow the prophets advice. For example, King David show say e carry body down as e accept correction from prophet Nathan. (2 Sam.  12:7, 13; 1 Chron. 17:3, 4) King Jehoshaphat follow direction from prophet Jahaziel, and tell Judah people say make them put “faith for [God] prophets.” (2 Chron. 20:​14, 15, 20) When King Hezekiah dey for serious problem, e meet prophet Isaiah make e advice-am. (Isa. 37:​1-6) Any time wey the kings follow direction from Jehovah prophet, Jehovah bless them and protect them. (2 Chron. 20:​29, 30; 32:22) E suppose dey clear to everybody for Israel say Jehovah de use im prophets direct im people. But plenty king for Israel and the people no gree follow advice and direction from Jehovah prophets.—Jer. 35:​12-15.

HOW JEHOVAH DIRECT CHRISTIANS FOR APOSTLES TIME?

9. Who Jehovah use direct the congregation for apostles time? (Still check the picture.)

⁹ Jehovah form the Christian congregation for the time of the apostles. How Jehovah take direct Christians that time? Jehovah choose Jesus to be the head of the congregation. (Eph. 5:23) But Jesus no talk to each person for congregation direct. E use the apostles and elders for Jerusalem to direct Jehovah people. (Acts 15:1, 2) Another thing be say them choose elders to care for the congregation.—1 Thess. 5:12; Titus 1:5.

10. (a) How plenty Christians for apostles time, see the directions from Jehovah and wetin them do? (Acts 15:​30, 31) (b) Why some people for Bible time no follow direction from the people wey Jehovah de use direct im people? (Check the box “ Why Them Reject the People Wey Jehovah De Use?”)

¹⁰ Christians for apostles time follow direction from Jehovah? Many of them happy for the direction wey them receive, and ready to follow-am. In fact, “them really happy because wetin them hear encourage them.” (Read Acts 15:​30, 31.) But how Jehovah take de direct im people today?

HOW JEHOVAH DE DIRECT US FOR THIS OUR TIME?

11. How Jehovah direct some people after the year 1870, to fit care for im servants?

¹¹ Jehovah still de direct im people for this our time. Jehovah de use im Word the Bible and Jesus wey be the head of the congregation, to do this one. You don see anything wey show say Jehovah de use some people for this  our time to direct im people? The answer na yes. For example, think about wetin happen after the year 1870. Charles Taze Russell and some people wey them de study Bible together start to understand say 1914 go be the year wey God Kingdom go start to rule for heaven. (Dan. 4:​25, 26) Them know this one because them use Bible do research and trust say wetin Bible talk must happen. You think say Jehovah direct them as them de do research for Bible? Yes, e direct them. Wetin happen for 1914 show say God Kingdom start to rule that year. World War I start and other serious things wey Bible talk about, follow-am. Food no come too dey again, earthquake come de happen, and disease come plenty. (Luke 21:​10, 11) True-true, Jehovah use those men help im people.

12-13. Wetin Jehovah organization do for the time of World War II wey help us fit de preach for the whole world?

¹² Make we talk about wetin happen for the time of World War II. After some brothers for our headquarter study Revelation 17:8, them come see say no be the war go bring Armageddon. But say after the war, peace go dey and that one go give Jehovah people the chance to fit preach to people for the whole world. This one move them to form Watchtower Bible College (School) of Gilead. This school na to teach missionary them how to preach and teach for the whole world. But to many people, this kind thing no make sense since na time of war. Them train missionary and send them go where them go preach even when the war still de happen. Another thing wey Jehovah organization do, na to form one school wey them call Course in Theocratic Ministry. b The school na to train everybody for congregation to sabi preach and teach. This school them, help Jehovah people to fit ready for the work wey de wait for them.

¹³ When we think about all this things, e dey clear say Jehovah really direct im people that time. Since the time of World War II, Jehovah people de preach for different-different country wey people no de disturb them. In fact, Jehovah people de preach for everywhere for this earth and this one don help plenty people to fit learn about Jehovah.

14. Why we fit trust direction wey we de get from faithful slave and elders for our congregation? (Revelation 2:1) (Still check the picture.)

 ¹⁴ For this our time, Governing Body continue to allow Jesus direct them. Them want make wetin them tell brothers and sisters for congregation be the way Jehovah and Jesus de see things. And them de use circuit overseers and elders to give direction to brothers and sisters for congregation. c Anointed elders and even elders wey no be anointed, dey for Jesus “right hand.” (Read Revelation 2:1.) This elders fit make mistake because them no dey perfect. Moses, Joshua and even the apostle them make mistake sometimes. (Num. 20:12; Josh. 9:​14, 15; Rom. 3:23) Even with this one, Jesus still de use the faithful slave and the elders for congregation to direct us. And e go continue to use them “all the days go reach the last days of the world.” (Matt. 28:20) So we get every reason to trust the directions wey Jesus de use the faithful slave and the elders give us.

HOW WE DE GAIN WHEN WE FOLLOW DIRECTIONS FROM JEHOVAH?

15-16. Wetin you learn from people wey follow direction from Jehovah?

¹⁵ When we follow directions from Jehovah, we go enjoy many blessings even now. For example Brother Andy and im wife Rose d follow the advice from faithful slave say make we live simple life. (Check study note for Matthew 6:22. For English.) This one help them fit join de build for our organization. Sister Rose talk say: “We don live for different-different house wey small well-well, and sometimes them no even get kitchen. I like to de snap things well-well, so this one make me get plenty camera and other things wey them de use take picture. But because where we de stay too small, e make me sell many of them. And I really cry when I de sell them. But like Sarah for Bible, I ready to leave them and continue to do my best for Jehovah.” (Heb. 11:15) Wetin Brother Andy and im wife Rose gain? Sister Rose talk say: “We really happy because we know say we de give Jehovah everything wey we get. When we de do the work wey Jehovah give us, e de help us get idea about how life go be for Paradise.” Brother Andy gree with wetin im wife talk, e say: “We de happy because we de use all our time and power do the work wey Jehovah give us.”

 ¹⁶ Which other way we de gain when we continue to follow direction from Jehovah? Make we use one example explain-am. After Sister Mercy finish secondary school, wetin dey im mind na to follow the advice wey them give-am, to pioneer. (Matt. 6:33; Rom. 12:11) E talk say: “Them allow me to study for university for four years for free. But I want give Jehovah my best. So I decide to go learn handwork wey go fit help me when I de pioneer. This na one of the best decision wey I don ever make. I de enjoy my pioneer work now, and because my work de give me time, I de join brothers and sisters for Bethel work some days every week, and I don enjoy other special work for Jehovah organization.”

17. Which other blessing we de get when we continue to follow direction from Jehovah? (Isaiah 48:​17, 18)

¹⁷ Sometimes, Jehovah de use im organization give us directions. For example, e don use im organization warn us say make we no love money and property, and make we run from things wey fit make us sin against Jehovah. We de gain well-well when we follow that direction. How? We no go fall for trouble, and we go get clean conscience. (1 Tim. 6:9, 10) All this one de help us fit worship Jehovah with all our heart. Nothing de make us happy pass this one and e de give us peace of mind.—Read Isaiah 48:​17, 18.

18. Why you don make up your mind to continue to follow direction from Jehovah?

¹⁸ The truth be say, Jehovah go continue to use people for this earth direct us for the time of great tribulation and for the One Thousand Years Wey Jesus Go Rule. (Ps. 45:16) You go continue to obey wetin them tell us, even when wetin you like to do different from wetin them tell us? If you de obey wetin Jehovah organization and elders talk now, e go easy for you to obey when that time come. So, make we de always follow direction from elders for congregation, because e go show say we de follow direction from Jehovah. (Isa. 32:1, 2; Heb. 13:17) We fit trust Jehovah with all our heart and follow all the direction from-am. Why? Because e de lead us comot from things wey go spoil our friendship with-am, and lead us to Paradise, where we go get life wey no go end.