1-2. Wetin the angel tell the women for the grave, and wetin Jesus tell the women make they do?

FOR early morning for Nisan 16, 33 C.E., one group of faithful women with pain for their heart de go for grave wey the dead body of Jesus dey. E don de reach two days since the dead body dey for the grave. When they reach the grave, they carry the spices and the oil wey they want use treat the dead body, but they surprise say the dead body no dey for the grave again! Then one angel tell this women say Jesus don come back to life, and the angel still talk say: “E de go Galilee and e go reach there before wuna. Wuna go see him there.”​—Matt. 28:1-7; Luke 23:56; 24:10.

² After the women leave the grave, Jesus meet them and tell them say: “Make wuna go tell my brothers so that they go go Galilee, and they go see me for there.” (Matt. 28:10) Jesus surely get some important thing wey e want tell e disciples. This meeting na the first thing wey Jesus arrange after e come back to life.

3-4. Why we fit talk say the command wey Jesus give for Matthew 28:19, 20 no be only for the apostles? (Check picture for front cover.)

³ Read Matthew 28:16-20. For that meeting wey Jesus arrange, e tell e disciples the important work wey they go do for that time. And na the same work wey we de do today. Jesus talk say: “So make wuna go make disciples of people for the whole world . . . de teach them to do all the things I don command wuna.”

⁴ Jesus want make all e disciples de preach. Jesus no give this command only to the 11 faithful apostles. Why we really  dey sure? Well, na only the apostles dey for that meeting for mountain for Galilee when Jesus give the command to go preach? Remember say the angel tell the women say: “Wuna go see [Jesus for Galilee].” So we fit talk say faithful women dey for that meeting. But no be only this one make us talk so. Apostle Paul talk say Jesus “appear to more than 500 brothers for the same time.” (1 Cor. 15:6) Which place e appear to them?

5. Why we believe say 1 Corinthians 15:6 de talk about the same meeting for Galilee wey Matthew chapter 28 talk about?

⁵ We get good reasons to believe say Paul de talk about the same meeting for Galilee wey Matthew chapter 28 talk about. Wetin be the reasons? Number one, plenty disciples of Jesus come from Galilee. So the best place wey Jesus fit do the meeting with this plenty people go be mountain for Galilee, instead of the house of somebody for Jerusalem. Number two, Jesus don already meet with the 11 apostles for one house for Jerusalem just after e come back to life. If to say Jesus want give the command to preach only to the apostles, e for tell them for Jerusalem. Jesus no for talk say e go dey Galilee de wait for the apostles and the women and other people.​—Luke 24:33, 36.

6. How Matthew 28:20 show say the command to make disciples concern us today, and how people de obey that command now?

⁶ Make we see the number three important reason why we fit talk say Jesus no only give the command to the 11 apostles. Jesus no give the command to go make disciples only to Christians for that time. How we know this one? Jesus end the thing wey e de tell the disciples, say: “I dey with wuna all the days until the ending part of the time.” (Matt. 28:20) Just as Jesus talk, plenty people de preach and make disciples now. Every year, about 300,000 people de baptize as servants of Jehovah and de become disciples of Jesus Christ!

7. Wetin we go talk about, and why?

⁷ Plenty people de study Bible with us until they baptize. But some people wey we de study Bible with, de fear to be disciples. Them de enjoy their study but they no de do wetin go show say them dey ready to baptize. If you de study with person, we dey sure say you want help the person to do wetin e de learn and to be disciple of Christ. This topic go show how we fit help our students make they love Jehovah and grow for their faith. Why we need to talk about this one? Because some time go reach and we go need to decide whether we go continue to study with our Bible student or we stop the study.

8. Why e de hard sometimes to help our Bible students to love Jehovah?

⁸ When people de serve Jehovah because of love, Jehovah like-am. So wetin we go get for mind na to help our Bible students to understand say Jehovah de care for them and say Jehovah really love them. We want help them make them de see Jehovah as “papa for people wey their papa no dey again.” And say “e de protect women wey their husband don die.” (Ps. 68:5) When your Bible students know say Jehovah really love them, they fit start to love Jehovah too. E fit de hard some students to see Jehovah as Papa wey de show love because their own papa no show them love and care. (2 Tim. 3:1, 3) As you de study with them, help them to see the kind  good person wey Jehovah be. Help them understand say Jehovah the God of love want make they get everlasting life. And e dey ready to help them get that life. Which other thing we fit do?

9-10. Which books we go use when we de conduct Bible study, and why this books?

⁹ Use the books “Wetin Bible Fit Teach Us?” and “How to Remain in God’s Love.” They make this books especially to help Bible students to love Jehovah. For example, chapter 1 of the Teach Us book answer questions like: God really love us or e wicked?, How God de feel when people de suffer?, and You and Jehovah fit be friend? What about the book Remain in God’s Love? This book go help your Bible student to understand say if they do the thing wey them de learn from Bible, e fit make their life better and make them near Jehovah more. Even if you don use this books study with other people, always prepare when you want study with each student so that you go use the information help that Bible student.

 ¹⁰ Wetin you go do if your Bible student want know about one topic, but the book wey the topic dey inside no dey for our Teaching Toolbox? You fit ask the student to find time read that book, but you go continue to use the Teach Us or God’s Love book to study with the student.

11. Which time we fit start to pray with our Bible student, and how we fit help our student understand say to pray dey important?

¹¹ Start the study with prayer. When you start Bible study, e good make you start to pray with the student early. No waste time to start to pray with your Bible student after you don start the study. We fit help the student to know say we fit only understand Bible if God give us holy spirit. Some Bible teachers de read James 1:5 to explain why we de pray when we de study. That Bible verse talk say: “If any of wuna need sense, make e continue to beg God.” When e read the verse, e go ask the student say, “How we fit beg God for sense?” The student fit answer say we need to pray to God.

12. How you fit use Psalm 139:2-4 to help your Bible student make e de tell Jehovah everything for e heart?

¹² Teach your Bible student how to pray. Explain to your student say Jehovah de hear prayer when we pray with all our heart. Explain say for our own prayer, we fit tell Jehovah how we de feel and things wey we no want tell any other person. Remember say, Jehovah already know everything wey we de think. (Read Psalm 139:2-4.) We fit help our students make they beg God to help them change the bad things wey them de think and do. For example, your Bible student wey you don de study with for some time fit like one celebration wey Christians no suppose join. E know say the celebration no good, but the truth na say e still de enjoy somethings about the celebration. Encourage the student make e tell Jehovah exactly how e de feel. And make e beg Jehovah for help so that e go love only the things wey God love.​—Ps. 97:10.

13. (a) Why e good make we no waste time to invite our Bible students to come meeting? (b) How we fit make our Bible student feel the love of the brothers for Kingdom Hall?

¹³ No waste time to invite your Bible student make e come meeting. The thing wey your Bible student hear or see for meeting fit touch e heart and help the student make e grow for e faith. Show the student the video Wetin De Happen for Kingdom Hall? and invite the student make e follow you come meeting. If you get wetin you fit do to help the student come meeting, make you do-am. E good to go with different brothers and sisters when you want study with your Bible student. This one go help the student to know other people for congregation. And this one fit make the student feel the love of brothers when e come meeting.

14. Wetin fit make the faith of Bible student grow?

¹⁴ Wetin we go get for mind na to help our Bible student make e faith grow. (Eph. 4:13) When person agree to study Bible with us, the main reason fit be the gain wey e go get from the Bible study. But as e love for Jehovah de grow, the student go start to think about how e fit help other people, even people for congregation. (Matt. 22:37-39) When time reach, make you tell the Bible student say e get the chance to support the Kingdom work with money.

15. How we fit help our Bible student to do the right thing when problem come?

¹⁵ Teach your Bible student wetin e fit do  when problem come. For example, wetin you go do if your Bible student tell you say e de vex for person for congregation because of wetin the person do? No tell the student who dey right or who dey wrong. Instead, explain to the student wetin Bible want make e do. Tell the student say e fit forgive the person and forget about the matter. Or if e no fit forget the matter like that, make e go talk with the person with love and respect, and the reason go be to make peace. (Compare Matthew 18:15.) Help your student prepare the thing wey e go tell the person. Show the student how e fit use JW Library^® app, Research Guide for Jehovah’s Witnesses, and jw.org^® to learn how e fit solve this kind problem. If you de train the student like this before e baptize, when e don baptize e go dey fine with people for congregation.

16. Why e good make you go with other brothers and sisters for your study?

¹⁶ Carry other people for congregation and even circuit overseer to join you when you want study with the student. Why e good to do like that? Apart from the reason wey we don first talk, another reason na say, other people for congregation fit help your student for other ways wey you no fit. For example, e fit be say, the student don de struggle to stop to smoke, but e de hard. If brother or sister dey for congregation and e don struggle to stop to smoke before, and e finally stop-am, go with this brother or sister. This brother or sister fit advice your student how e fit stop to smoke. If you de feel say you no fit conduct the study because the person wey you go with get experience pass you, you fit tell the person make e conduct the study. When you go with other people for the study, your Bible student fit gain from their experience. Remember say, we want help the student make e faith grow.

17-18. Which things you go need to think about when you de decide whether you go stop Bible study?

¹⁷ If your Bible student no de make any change for e life as e de study, then after some time you fit ask yourself say, ‘Make I stop the study?’ Before you make this decision, make you think about the situation of the Bible student. Some people de take long time for their faith to grow and some de take short time. So ask yourself say, ‘My student de make any change for e life for e own situation?’ ‘E don start to do the things wey e de learn?’ (Matt. 28:20) Na true say Bible student fit take long time to become disciple, but e suppose de change some things for e life small-small.

¹⁸ But wetin we go do if we don study with person for long time and e no de do anything to show say the study dey important  for e life? Make we see this example: Imagine say you don study Teach Us book finish with your student and you don even start to study Remain in God’s Love book with the student, but e never ever come meeting, even Memorial! And plenty times, e de give small-small excuse why e no want study. For this kind situation, you need to discuss the matter clear with the student. *

19. Wetin you fit tell your student if e no de show say the study dey important for e life, and how e answer go help you?

¹⁹ If you want talk with the student, you fit start with this question, ‘Which thing go really hard you to do to be Jehovah Witness?’ The student fit answer say, ‘I like to study Bible, but I no go ever be Jehovah Witness!’ If na so your student talk after e don study with you for long time, you think say you go need to continue with the study? But, your student fit tell you for the first time the reason why e faith no de grow. For example, e fit de feel say e no fit preach from house to house. Now, as you don know how e de feel, you go understand how you fit help the student.

20. How Acts 13:48 fit help us make we know whether we go continue to study with person or we go stop the study?

²⁰ The sad thing be say, some Bible students just dey like Israel people for the time of Ezekiel. See the thing wey Jehovah tell Ezekiel about them: “Look! To them, you be like love song wey they sing with better voice and wey they play with string instrument. They go hear wetin you talk, but they no go do wetin you talk.” (Ezek. 33:32) E fit no easy for us to tell person say we want stop e Bible study. But, “time no too dey again.” (1 Cor. 7:29) Instead make we de spend plenty time de study with person and e no de make any change, make we find “people wey the condition of their heart dey good for everlasting life.”​—Read Acts 13:48.

21. Wetin be our yeartext for the year 2020, and wetin e go help us to do?

²¹ Our yeartext for the year 2020 go help us make we think about how we fit de better more-more for the way we de help people to be disciples of Christ. The yeartext get the words wey Jesus talk for that important meeting for mountain for Galilee. The words na: “Make wuna go make disciples. . . . Baptize them.”​—Matt. 28:19.