1. Which thing Jehovah talk say e go happen for our time?

JEHOVAH talk something about our time, e say: “Ten men from all the language wey the nations get, go hold the cloth of one Jew, they go hold-am tight and talk say: ‘We want follow wuna because we don hear say God dey with wuna.’” (Zech. 8:23) The “Jew” wey this verse talk about na the people wey God don anoint with holy spirit. Bible still call them “the Israel of God.” (Gal. 6:16) The “ten men” na people wey their hope na to live forever for this earth. They know say na Jehovah choose this anointed Christians, and they feel say to worship God with this anointed Christians na special thing from God.

2. How the “ten men” de “follow” the anointed?

² Today, e no dey possible to know the name of each anointed Christian for earth. * But, people wey their hope na to live for this earth go fit “follow” this anointed ones. How? Bible talk say the “ten men” go “hold the cloth of one Jew, they go hold-am tight and talk say: ‘We want follow wuna because we don hear say God dey with wuna.’” The first part of this Bible verse talk about one Jew. But the verse still talk about “wuna.” This one show say the Jew no be just one person but na the whole group of anointed Christians. Some people no be anointed but them de serve Jehovah together with the anointed. Even with that one, they no de see the anointed Christians as their leaders, because they know say na Jesus be their Leader.​—Matt. 23:10.

3. Which questions we go answer for this topic?

³ Since anointed Christians still dey among us today, some of us fit de think about this questions: (1) How  anointed Christians suppose de see theirself? (2) How we suppose de treat people wey we know say them de chop the bread and drink the wine for Memorial? (3) E go worry us say their number de add? This topic go answer this questions.

4. Which warning for 1 Corinthians 11:27-29 anointed Christians no suppose to play with, and why?

⁴ Make anointed Christians really think about the warning for 1 Corinthians 11:27-29. (Read-am.) How anointed Christian fit chop the bread or drink the wine for Memorial “when e no suppose to”? The person fit do like that if e chop the bread and drink the wine when e no de do wetin Jehovah talk. (Heb. 6:4-6; 10:26-29) Anointed Christians know say they must dey faithful if they want receive “the prize. That prize na life for heaven wey God go give people wey e call through Christ Jesus.”​—Phil. 3:13-16.

5. How anointed Christians suppose de feel about theirself?

⁵ Jehovah de give e holy spirit to e servants to help them dey humble, no be to  dey proud. (Eph. 4:1-3; Col. 3:10, 12) So anointed ones no de feel say they better pass other people. They no de expect to receive holy spirit pass other servants of Jehovah. They no de feel say they understand Bible pass other people. And they no go ever tell another person say e be anointed and make e start to chop the bread and drink the wine for Memorial. Instead, because them dey humble, they know say na only Jehovah de choose people to go heaven.

6. According to 1 Corinthians 4:7, 8, how anointed Christians suppose de behave?

⁶ Even as anointed Christians feel say na special thing for them to go heaven, they no expect people to treat them for special way. (Phil. 2:2, 3) They still know say when Jehovah anoint them, e no announce-am to other people say e don anoint them. So make anointed Christian no surprise if some people no first believe say e don be anointed. The person know say Bible tell us make we no de quick believe person if e talk say e don receive special work from God. (Rev. 2:2) Anointed Christian no go want de show e self say e be anointed. So e no go de tell people wey e meet say e be anointed. And e go make sure say e no de boast about-am.​—Read 1 Corinthians 4:7, 8.

7. Wetin anointed Christians no go do, and why?

⁷ Anointed Christians no de feel say they need to spend time with only anointed ones, like say all of them dey one kind club. They no go try to look for other anointed Christians so that them go de talk about how they become anointed or form their own Bible study group. (Gal. 1:15-17) Congregations no go dey as one if anointed ones de behave like that. This one go make them dey against the holy spirit, and na this spirit de help servants of Jehovah get peace and dey as one.​—Rom. 16:17, 18.

8. Why you need to dey careful about the way you de treat people wey you know say them de chop the bread and drink the wine for Memorial? (Still check footnote.)

⁸ How we suppose de treat anointed brothers and sisters? E go dey wrong to give person special respect, even if e be anointed brother of Christ. (Matt. 23:8-12) When Bible talk about the elders, Bible encourage us make we “copy their faith,” but e no tell us say we fit  make any person for this earth our leader. (Heb. 13:7) Na true say Bible talk say we suppose de give some elders “double respect.” But that one na because them de “do their work for fine way” and “de work hard for their talk and de teach,” no be because they be anointed. (1 Tim. 5:17) If we over praise and over respect anointed ones, we fit make them shame or de feel somehow. * And the worse thing be say, we fit make them dey proud. (Rom. 12:3) Anointed person fit enter this kind big problem because of us, but we no want make that kind thing happen!​—Luke 17:2.

9. How we fit show say we de respect anointed Christians?

⁹ How we fit show say we de respect the people wey Jehovah don choose to go heaven? We no go ask them how they become anointed. That one na their own matter and we no get the right to know. (1 Thess. 4:11; 2 Thess. 3:11) And make we no think say their husband or wife, papa and mama, or their other family members na still anointed. To be anointed no be like property or cargo wey person de inherit from e family. Na God de give person. (1 Thess. 2:12) And make we no de ask question if the question go make other people vex. For example, we no go ask the wife of anointed person how e de feel as e no go live forever for earth with e husband. After all, we dey very sure say for paradise, Jehovah go make everybody dey happy.​—Ps. 145:16.

10. When we no “de give people special respect because of who they be,” how that one de protect us?

¹⁰ And if we no de treat anointed Christians like say them dey important pass other people, we de protect ourself. How? Bible tell us say some anointed Christians fit no continue to serve God well. (Matt. 25:10-12; 2 Pet. 2:20, 21) But if we no “de give people special respect because of who they be,” we no go ever follow them, even if they be anointed or them dey popular or don de serve Jehovah for long time. (Jude 16, ftn.) Then, if they stop to serve God or they comot for congregation, our faith no go weak or we no go stop to serve Jehovah.

11. Today, wetin don de happen to the number of people wey de chop the bread and drink the wine for Memorial?

¹¹ Before-before, the number of people wey de chop the bread and drink the wine for Memorial de go down. But for our time, their number don de go up every year. We need to worry about this one? No. Make we talk about some important reasons why we no need to worry.

12. Why we no need to worry if the number of people wey de chop the bread and drink the wine for Memorial de add?

¹² “Jehovah know who be e own.” (2 Tim. 2:19) People de chop the bread and drink the wine for Memorial and some brothers de count them. But this brothers no know whether this people na anointed or they no be anointed. Na Jehovah know who really be anointed. So part of the number na people wey, for their mind, them de think say they be anointed. For example, some people de chop the bread and drink the wine before, but after, they stop. Other people fit no well, or they get problem and e de affect the way them de  think. This one fit de make them think say they go rule with Jesus for heaven. The truth na say, we no really know how many anointed Christians still remain for earth.

13. Bible tell us how many anointed ones go remain for this earth when great tribulation go start?

¹³ Anointed Christians go dey different-different corner for this earth when Jesus go come take them go heaven. (Matt. 24:31) Bible talk say for last days, na only small number of anointed ones go remain for earth. (Rev. 12:17) But e no tell us how many of them go remain when great tribulation go start.

14. As e dey for Romans 9:11, 16, wetin we learn about the way Jehovah de choose anointed ones?

¹⁴ Na Jehovah de decide when e go choose anointed ones. (Rom. 8:28-30) Jehovah start to choose anointed Christians after e don resurrect Jesus. E fit be say for the time of the apostles, all true Christian na anointed. Plenty years after that time, plenty people no really follow Christ even as they claim say they be Christians. Even with that one, Jehovah still anoint some Christians that time wey their worship dey correct. They be like the good seeds wey Jesus talk about, e say this seeds go grow among grass. (Matt. 13:24-30) For this last days, Jehovah never stop to choose people to be part of the 144,000. * So if God decide to choose some of them just before the end of this wicked world, we no go doubt the  sense wey e get at all. (Read Romans 9:11, 16.) * We must dey careful make we no be like some workers wey Jesus talk about for one story. The workers complain about the way their master treat the other workers wey e take to work for just the last hour.​—Matt. 20:8-15.

15. Na all anointed Christians dey among “the faithful and discreet slave,” wey Matthew 24:45-47 talk about? Explain.

¹⁵ No be everybody wey their hope na to live for heaven dey among “the faithful and discreet slave.” (Read Matthew 24:45-47.) Just as e be for time of the apostles, today, Jehovah and Jesus de use some brothers to teach all of us. Na only small number of anointed Christians for time of the apostles Jehovah use to write the Greek part for Bible. Today too, na only small number of anointed Christians Jehovah don give the work to teach e people wetin they need “for the correct time.”

16. Wetin you don learn from this article?

¹⁶ Wetin we don learn from this article? Jehovah don decide to give plenty people everlasting life for this earth, and give life for heaven to small number of people wey e don choose to rule with Jesus. Jehovah go bless all e servants, whether they be “Jew” or the “ten men” wey Bible talk about. And e want make all of them obey the same laws and dey faithful. All of them must dey humble. All of them must serve God together and dey as one. And all of us must work hard to make sure say peace dey for congregation. As we de near the end of this wicked world, make all of us continue to serve Jehovah and de follow Christ as “one group of sheep.”​—John 10:16.