1. How we fit spend time with Jehovah?

WE DE like to spend time with people wey we love. Husband and wife de really enjoy to spend time together. Young people de like to spend time with their close friends. And all of us value the time wey we de spend with our brothers and sisters. But the number one thing be say, we de like to spend time with our God. We fit do this one when we de pray to God, de read e Word, and de think deep about the things wey e want do for future and about e fine-fine character. The time wey we de spend with Jehovah no be wetin we need to play with at all!—Ps. 139:17.

2. Which thing fit hard for us to do?

² Even as we de enjoy to spend time with Jehovah, sometimes, this one no de easy. The life wey we de live today really dey busy. And this one fit make-am hard for us to find time do things to worship Jehovah. Our work, our family, and other things wey we need to do, fit take plenty of our time sotey we fit feel say we too dey busy to pray, study, or think deep about wetin we study.

3. Which other thing fit take our time?

³ Another thing dey wey fit use style take our time. If we no dey careful, we fit allow things wey no dey wrong to take the time wey we suppose use do things to near God more-more. For example, make we talk about things wey we de use relax and enjoy ourself. All of us de gain when we take some time to relax and enjoy ourself. The  things wey we choose to do to relax fit no bad. But if we spend too much time de do this things, we fit no get enough time to do things wey we de do to worship Jehovah. We need to remember say this things wey we de do to relax no be the number one important thing.—Prov. 25:27; 1 Tim. 4:8.

4. Wetin we go talk about now?

⁴ For this article, we go talk about why we need to decide wetin dey important pass for our life. We go still talk about how we fit use our time with Jehovah well, and how we fit gain when we use our time like this well.

5. When young person think about the advice for Ephesians 5:15-17, how this one fit help the person choose the best thing to do with e life?

⁵Choose the best life. Young people de always think about the best way to use their life. Their teachers and family members wey no de serve Jehovah fit de encourage them to go university, so that they go fit get better work and make plenty money. That kind life fit take plenty of their time. And papa and mama and friends for congregation fit encourage young people make they use their life to serve Jehovah. Wetin fit help young person wey love Jehovah to make the best decision? E go gain when e read Ephesians 5:15-17 and think deep about-am. (Read-am.) After the young person don read this verse them, e fit ask e self say: ‘Wetin “Jehovah want” make I do? Which decision God go like? Which decision go make me use my time well?’ Remember say, “things don too bad” for this time wey we de live, and this world wey Satan de control, go soon end. We de show say we dey wise when we use our life to do things wey go make us dey tight with Jehovah.

6. Wetin Mary choose, and why this one dey good?

⁶Do the important things. Sometimes, for us to use our time well, we fit need to choose between two things wey no bad. We fit see this one from wetin happen when Jesus visit Mary and Martha. Martha really dey happy to get Jesus as e visitor sotey e prepare plenty better-better food. But e sister wey e name na Mary, sit-down with Jesus and listen to the things wey e de teach. The thing wey Martha do no bad, but Jesus talk say Mary “choose the best portion.” (Luke 10:38-42, ftn.) As time de go, Mary fit forget the kind food wey they serve that day. But, we dey sure say e no ever forget the things wey e learn from Jesus. Just as Mary no play with that small time wey e get with Jesus, we too no go play with the time wey we get with Jehovah. How we fit use that time well?

7. Why e really dey important to pray, study, and think deep?

⁷Understand say to pray, study, and think deep about wetin we learn na part of our worship. When we pray we de talk to our Papa for heaven, and e love us no be small. (Ps. 5:7) When we de study Bible, we de learn about God, and na God be the Person wey get sense pass. (Prov. 2:1-5) When we de think deep about the things wey we learn, we de think about the fine-fine character wey  God get and de remember the wonderful things wey e want do for us and for everybody. This one na really the best way to use your time. But how we fit use the small time wey we get well?

8. Wetin we fit learn from the way Jesus use e time for wilderness?

⁸If e dey possible, choose quiet place. Think about the example of Jesus. Before Jesus start e preaching work for this earth, e spend 40 days for wilderness. (Luke 4:1, 2) For that quiet place, Jesus fit pray to Jehovah and think deep about the things wey e Father want make e do. This one go don help Jesus prepare for the test wey e go soon face. How you fit gain from the example of Jesus? If you get big family, this one fit no make-am dey possible for you to get quiet place for house everytime. If na so, you fit see quiet place for outside. One sister wey e name na Julie, de do this kind thing when e want spend time with Jehovah for prayer. Julie and e husband de live for one small house for France, and for here, e dey hard for person to dey alone make nobody disturb. Julie talk say, “So I de go stroll for the park everyday. Only me fit dey there, I go think deep, and really talk to Jehovah.”

9. Even as Jesus really dey busy, how e show say e friendship with Jehovah really dey important?

⁹ Jesus life really busy when e dey earth. Plenty-plenty people follow Jesus from place to place, and all of them want make e give them e time. One time dey when “everybody for the city gather for front of the door” to see Jesus. Even with that one, Jesus arrange time wey e go use care for e own friendship with Jehovah. Before sun come out, e see “one quiet place” to spend time alone with e Papa.—Mark 1:32-35.

10-11. As e dey for Matthew 26:40, 41, which important thing Jesus tell e disciples for the garden of Gethsemane, but wetin happen?

¹⁰ For the last night wey Jesus spend for earth, as e preaching work don de end, e find quiet place again make e fit think deep and pray. E see quiet place for the garden of Gethsemane. (Matt. 26:36) For that time, Jesus tell e disciples one important thing about prayer.

¹¹ Think about wetin happen. When they reach the garden of Gethsemane, day don really dark, and maybe time don pass midnight. Jesus tell the apostles make they ‘continue to watch,’ and e comot go pray. (Matt. 26:37-39) But as e de pray, they start to sleep. When Jesus  see them de sleep, e tell them again make they “always de watch and continue to pray.” (Read Matthew 26:40, 41.) E know say they don really face stress and they don tire. Jesus feel for them and talk say “body dey weak.” But after that one, Jesus go pray two other times and when e come back, e see say e disciples de sleep, instead of them to pray.—Matt. 26:42-45.

12. Wetin we fit do if sometimes our body don over stress or we don too tire to pray?

¹²Choose the correct time. Sometimes, our body fit don over stress or we don too tire to pray. Make you know say no be only you that one fit don happen to. Wetin you fit do? Some people wey de normally pray to Jehovah for the end of the day, don see say e better to spend time for prayer for evening before the day end when they never too tire. Other people don see say their position when them de pray fit really help them. For example, they fit sit-down or kneel down. But what if something de over worry you or things over tire you sotey you no fit pray? Tell Jehovah how you de feel. Make you know say our Papa for heaven de show mercy and e go understand.—Ps. 139:4.

13. How our phone or things like that fit make our mind go another place when we de pray, de study, or dey meeting?

¹³No allow your mind go another place when you de study. No be prayer be the only way wey we fit use make our friendship with Jehovah dey strong. When we de study Bible and de go meeting, this one fit still help us to near God more-more. Anything dey wey you fit do to use your time well for your study and for meeting? Ask yourself say, ‘Which thing fit make my mind go another place when I dey meeting or when I de try to study?’ E fit be the calls wey you de receive, the emails, or text message for your phone or another thing like computer? Today, plenty-plenty people de use this things. Some science people talk say, when we de try to put our mind for something and phone dey near us, just only this one fit make our mind go another place. One professor wey really sabi this kind matter talk say, “Your mind no go dey that  thing wey you de do. Your mind dey another place.” Before our assemblies and conventions start, them de always tell us say make we set our phones for way wey no go disturb other people. We fit do the same thing when we dey alone, so that our phone and things like that, no go disturb us and the time wey we get with Jehovah?

14. As e dey for Philippians 4:6, 7, how Jehovah go fit help us make our mind no go another place when we de study and when we dey meeting?

¹⁴Tell Jehovah make e help you put mind for the thing. When you notice-am say your mind don start to go another place when you de do your study or for meeting, tell Jehovah make e help you. If something de worry your mind, e fit no dey easy to stop to think about this thing and put your mind for the Bible wey you de study. But, e really dey important make you do-am. Pray for the peace wey go protect your heart and still protect ‘how you de think.’—Read Philippians 4:6, 7.

15. Wetin be one thing wey we go gain when we de spend time with Jehovah?

¹⁵ If you take time talk to, listen to, and think about Jehovah, you go really gain no be small. Why e be like that? Number one, you go de make better decision. Bible tell us say “when person de follow wise people, e go get sense.” (Prov. 13:20) So as you de spend time with Jehovah, the Person wey get sense pass, you go get sense more-more. You go understand more how to make God happy, and you no go de choose things wey go make God vex.

16. If we de spend time with Jehovah, how this one go fit make the way we de teach de better?

¹⁶ Number two, you go sabi teach more. When we de study Bible with person, the number one important thing wey we go get for mind na to help our student make e near Jehovah. The more we de pray and de learn about God, the more our love for God go de grow and the way we de teach our student to love God go de better more-more. Jesus show say this one na true. The fine way wey e talk about Jehovah really dey sweet sotey this one help e disciples to love Jehovah too.—John 17:25, 26.

17. Why prayer and study de help us to make our faith strong more?

¹⁷ Number three, your faith go strong more. Think about wetin de happen when you beg God make e guide you, comfort you, or support you. Anytime  wey Jehovah de answer that prayer, your faith for Jehovah go de strong more-more. (1 John 5:15) Which other thing fit make your faith de strong? Your Bible study. Remember say, “person de get faith after e hear something.” (Rom. 10:17) But if we want make our faith de strong more-more, we go do pass just to learn things. Which other thing we need to do?

18. Wetin show say to think deep really dey important for us?

¹⁸ We need to think deep about the things wey we de learn. Think about wetin the person wey write Psalm 77 face. E really worry because e feel say Jehovah no like wetin e de do, and even wetin other Israel people de do. This thing worry e mind sotey e no fit sleep for night. (Verse 2-8) How e handle the situation? E tell Jehovah say: “I go think deep about all your work, and I go study the things wey you de do.” (Verse 12) Na true say the person wey write this psalm, really know the things wey Jehovah don do for e people for past. But e still worry say: “God don forget to show e favor, or e mercy don stop because e de vex?” (Verse 9) This person wey write this psalm think deep about the things wey Jehovah don do and about the mercy and the deep feeling wey God don show before. (Verse 11) Wetin be the result? E come really dey sure say Jehovah no go leave e people. (Verse 15) For the same way, your faith go de strong more-more as you de think deep about the things wey Jehovah don already do for e people and about the things wey e don do for you.

19. Which other thing we go gain when we de spend time with Jehovah?

¹⁹ Number four, your love for Jehovah go strong more. And na this one dey important pass. Na love dey important pass any other character. Love go move you to obey Jehovah, to leave some things wey you like so that you go make Jehovah happy, and to endure any problem. (Matt. 22:37-39; 1 Cor. 13:4, 7; 1 John 5:3) Nothing dey important reach to enjoy tight friendship with Jehovah!—Ps. 63:1-8.

20. How you plan to protect the time wey you de spend with Jehovah?

²⁰ Remember say to pray, study, and think deep, na part of our worship. Like Jesus, make you look for quiet place to spend time with Jehovah. Remove anything wey go fit make your mind go another place. When you de do things wey concern your worship to Jehovah, beg Jehovah make e help you put your mind for there. If you use your time well now, Jehovah go bless you with everlasting life for Paradise.—Mark 4:24.