1. Which hard condition David face?

THEY want kill David, so e start to run make e no die. Saul wey be powerful king for Israel that time, don tell e self say e must kill David. When David need food, e stop for one city wey them de call Nob. For there, e ask for only five pieces of bread. (1 Sam. 21:1, 3) After, David and e men see place to stay and na for inside one cave. (1 Sam. 22:1) Why David dey for this kind situation?

2. How Saul use e hand put e self for trouble? (1 Samuel 23:16, 17)

² Saul really jealous David because David dey popular and e win many war. Saul still know say Jehovah don reject-am as king because e no obey Jehovah. Apart from that one, e know say Jehovah don choose David to be the next king. (Read 1 Samuel 23:16, 17.) But as king of Israel, Saul get plenty army and plenty people dey e side. So because of this one, David need to run make e no die. But God don already get-am for mind to make David king. Saul think say e go fit clean the thing wey God don stamp? (Isa. 55:11) Bible no talk like that. But we dey sure of this one: Saul de use e hand put e self for trouble, because nobody fit fight God and win!

3. How David feel even with e condition?

³ David na humble man. No be David choose e self to be king for Israel. Na Jehovah choose David. (1 Sam. 16:1, 12, 13) Saul really hate David no be small. But David no  blame Jehovah for the trouble wey e face. And David no complain when e no too get food to chop and when e hide for cave. Instead, maybe na when e de hide for that cave, e write fine song to praise God. And the Bible verse wey we take this topic from, na part of that song wey talk say: “When people de serve Jehovah, they no go stop to get good thing.”—Ps. 34:10.

4. Which questions we go talk about, and why them dey important?

⁴ Today, plenty servants of Jehovah no de get enough food sometimes, or other things wey they need to survive. * This one na true, especially for COVID-19 period. And things go de hard more-more as we de near “great tribulation.” (Matt. 24:21) With this one for mind, make we answer four questions: How David no “stop to get good thing”? Why we need to learn to dey okay with the things wey we get? Why we need to trust say Jehovah go care for us? And how we fit prepare now for future?

5-6. How Psalm 23:1-6 help us understand wetin David mean when e talk say servants of God “no go stop to get good thing”?

⁵ Wetin David mean when e talk say servants of Jehovah “no go stop to get good thing”? When David write Psalm 23, e talk something like that too. So that psalm go fit help us understand wetin David mean. (Read Psalm 23:1-6.) David start that psalm with: “Jehovah na my Shepherd.” But e still talk for that verse say e no go stop to get wetin e need. For the rest of the psalm, David mention things wey really dey important, like the things wey Jehovah de use bless-am because e accept Jehovah as e Shepherd. Jehovah lead David “for the right way.” And e no fail to support David when things good and when things bad. David agree say even as e de enjoy better things  from Jehovah, this one no mean say e no go face problems for e life. Sometimes, David fit be like person wey no get hope, like say e de waka for “valley wey over dark,” and e go still get enemies. But because David get Jehovah as e Shepherd, e no go “fear any danger.”

⁶ So, wetin be the answer to our question wey be: How e be say David “no stop to get good thing”? David get everything wey e need to dey tight with Jehovah. E no need to get plenty property to dey happy. David dey okay with the things wey Jehovah provide. The things wey dey important to David pass, na the blessing and protection wey e de get from e God.

7. As e dey for Luke 21:20-24, which hard situation Christians for Judea face?

⁷ From the thing wey David talk, we see say na really important thing make property no too dey important for us. The truth be say we fit enjoy any property wey we get, but make we no make-am the number one thing for our life. That one na one important truth wey some Christians wey de live for Judea, for apostles their time, come really understand. (Read Luke 21:20-24.) Jesus don warn them say time de come when ‘army go surround Jerusalem.’ When that one happen, they need to begin “run go the mountains.” If they comot for the city they go dey alive, but they go leave plenty things for back. Some years ago, Watchtower talk say: “They leave their farms and their house them. They no even gather their property from their house. They trust say Jehovah go protect and support them, and they put e worship as the number one important thing for their life.”

8. Which important lesson we fit learn from wetin happen to Christians wey de live for Judea for apostles their time?

⁸ Which important lesson we fit learn from wetin happen to the Christians wey de live for Judea for apostles their time? The Watchtower wey we just talk about talk say: “For future, we fit face some tests and this one go show whether na our property dey important to us pass any other thing. Na our property be the number one important thing, or the number one important thing na say God go save us because we dey e side? When the end come, we fit face hard time and leave some things. We go need to dey ready to do anything wey we need to do, just like the Christians for apostles their time wey run from Judea.” *

9. How the advice wey Paul give Hebrew Christians encourage you?

⁹ You fit think of how e go don hard those Christians to leave almost everything wey they get and start life again for new place? They need to get faith so that they go fit trust say Jehovah go provide the things wey they need. But they get help. Five years before Rome people surround Jerusalem, apostle Paul give Hebrew Christians better advice. E talk say: “Make wuna no love money for wuna life, and make wuna dey okay with wetin wuna get now. Because e don talk say: ‘I no go ever leave you, and I no go ever abandon you.’ So that we fit get strong heart and talk say: ‘Na Jehovah de help me, I no go fear. Wetin person fit do to me?’ ” (Heb. 13:5, 6) E go don dey more easy for people wey listen to the advice from Paul before Rome people attack, to dey okay  with the small property wey they get for their new place. Them dey sure say Jehovah go provide the things wey they need. The thing wey Paul talk make us dey sure say, we fit trust Jehovah too say e go provide the things wey we need.

10. Which “secret” Paul tell us?

¹⁰ Paul give Timothy the same advice, and that advice still concern us too. E talk say: “So, if we get food to chop and cloth to wear, this things go dey enough for us.” (1 Tim. 6:8) So, that one mean say we no go fit enjoy better food, get correct house to live, or buy new clothes sometimes? No be the thing wey Paul de talk be that. Paul de talk say make the things wey we get dey okay for us. (Phil. 4:12) Na that one be the “secret” of Paul. The number one important thing for us na the friendship wey we get with our God, no be any property wey we get.—Hab. 3:17, 18.

11. From the things wey Moses tell Israel people, wetin we learn about to dey okay with wetin we get?

¹¹ The thing wey we need fit dey different from the thing wey Jehovah know say we need. Think about wetin Moses tell Israel people after they don spend 40 years for wilderness. E talk say: “Jehovah your God don bless you for everything wey you don do. E really know how wuna waka for this great wilderness. Jehovah your God don dey with you for this 40 years, and you no stop to get wetin you need.” (Deut. 2:7) For the 40 years, Jehovah provide manna for Israel people to chop. Jehovah make sure say their clothes no spoil. So they fit still use the clothes wey they get when they comot for Egypt. (Deut. 8:3, 4) Even though say some of them fit don think say this things wey Jehovah provide no dey enough, Moses remind them say they get everything wey they need. Jehovah go dey happy if we learn to dey okay with the things wey we get. E want make we value even the simple things wey e de give us, and make we see this things as blessing and thank God for them.

12. Wetin show say David trust Jehovah instead of e self?

¹² David know say Jehovah no de leave e servants and Jehovah de really care for people wey love-am. Even though say e life dey for danger when e write Psalm 34, e faith for Jehovah dey strong sotey e really dey sure say “the angel of Jehovah” position e self ‘around-am.’ (Ps. 34:7) Maybe David de compare Jehovah angel to soldier wey position e self, and de always watch to see the enemy. Even as David na strong soldier and Jehovah don promise say e go be king, David no put trust for e self as e know how to shoot stone with catapult, or to use sword fight the enemy and win. (1 Sam. 16:13; 24:12) David put e trust for God, and e get strong belief say the angel of Jehovah de ‘save people wey de fear God.’ Na true say we no de expect miracle from Jehovah to protect us today. But, we know say everybody wey put their trust for Jehovah go get everlasting life even if they die now.

13. When Gog of Magog go attack, why e go be like say we no get protection, but why we no suppose fear? (Check picture for front cover.)

¹³ The test wey we go face small time for future, go show whether we really trust say Jehovah go fit protect us. When Gog of Magog, wey be different-different nations wey come together, go attack servants of God, our life go be like say e dey for danger. We go need to really believe say Jehovah fit save us and say e go save us. The nations go see us like sheep wey no fit defend e self and wey nobody de protect. (Ezek. 38:10-12) We no go get weapon to fight and we no go get any training to fight. The nations go think say to finish us go dey easy. They no know say the angels of Jehovah dey ready to defend us. But we know this one because we get faith. How the nations go see them, when e be say the nations no get faith for God? They go really surprise when the army for heaven go come fight for us!—Rev. 19:11, 14, 15.

14. Which things we fit do now to prepare for future?

¹⁴ Wetin we fit do now to prepare for future? Number one, make we no de see property as something wey too dey important, because one day we go leave this things wey we get. Apart from that one, we need to dey okay with wetin we get. And the thing wey suppose make us really dey happy, na our friendship with Jehovah. The more we de know our God, the more we go really believe say e go fit protect us when Gog of Magog attack.

15. Which things don first happen to David wey teach David say Jehovah no go ever fail-am?

 ¹⁵ Make we see another thing wey help David and wey fit help us to prepare for test. David talk say: ‘Taste and see say Jehovah good; person wey trust God go happy.’ (Ps. 34:8) The thing wey that Bible verse talk show why David know say e go fit trust say e go get support from Jehovah. David de always trust Jehovah, and e God never ever fail-am. When David dey young, e fight the Philistine giant wey e name na Goliath. And e tell that powerful warrior say: “Today Jehovah go [make me win you].” (1 Sam. 17:46) After, when David begin work for King Saul, Saul try plenty times to kill David. But, “Jehovah dey with” David. (1 Sam. 18:12) Jehovah don help David before. So David trust say, true-true, Jehovah go help-am with the problems wey e de face.

16. Which ways we fit “taste” and see say Jehovah dey good?

¹⁶ The more we trust Jehovah say e go guide us now, the more we go de trust say e go fit save us for future. Faith for Jehovah go help us dey ready to tell the person wey we de work for, to give us time make we fit go assembly or convention, or so that our work arrangement go fit change small, make we fit de go all our meeting and de spend more time for the preaching work. Make we talk say the person wey we de work for no gree do wetin we ask for and e sack us. We get faith say Jehovah no go ever leave us or abandon us, and say e go always give us the things wey we need? (Heb. 13:5) Plenty people for full-time service fit tell you story wey show how Jehovah don help them for time wey they really need Jehovah to help them. Jehovah no de ever fail.

17. Wetin be the yeartext for 2022, and why this one make sense?

¹⁷ Because Jehovah dey our side, we no get any reason to fear wetin go happen for future. Our God no go ever abandon us, as long as we put e Kingdom as number one thing for our life. To remind us say we need to prepare now for the hard time wey de come for future, and to trust say Jehovah no go ever abandon us, Governing Body don choose Psalm 34:10 as our yeartext for 2022 wey be: “When people de serve Jehovah, they no go stop to get good thing.”