1-2. (a) Which time especially we de remember person wey we love wey don die? (b) Wetin Jesus start for the night before e die?

NO MATTER how long e don be from the time wey people wey we love die, we still de remember them. Anytime wey e reach the date wey they die, we de especially remember them.

² Every year, we dey among millions of people for the whole world wey de gather together for the date wey Jesus die to remember e death. We really love Jesus Christ no be small. (1 Pet. 1:8) We de gather together to remember the person wey die to save us from sin and death. (Matt. 20:28) The truth be say, Jesus want make e followers de remember e death. For the night before Jesus die, e start one special meeting and e command say: “Make wuna de do this one to remember me.”—Luke 22:19.

3. Wetin we go discuss for this article?

³ Among the people wey de attend Memorial, na only small number of them get the hope to live for heaven. But millions of people wey get the hope to live for earth still de attend. For this article, we go talk about the reasons why this two group de always want attend Memorial every year. We go still discuss wetin we de gain if we attend. Make we first talk about some reasons why anointed Christians de attend.

4. Why anointed Christians de chop the bread and drink the wine for Memorial?

⁴ Every year, anointed Christians wey attend Memorial de chop the bread and drink the wine. Why them  de chop the bread and drink the wine? To answer that question, make we talk about wetin happen for the night before Jesus die. After the Passover, Jesus start wetin them de call the Lord’s Evening Meal. E pass the bread and the wine to the 11 faithful apostles make they chop and drink. Jesus tell them about two covenants, or agreements, wey be the new covenant and the Kingdom covenant. * (Luke 22:19, 20, 28-30) This agreements make-am possible for the apostles and other small number of people to fit be kings and priests for heaven. (Rev. 5:10; 14:1) Na only anointed ones wey still remain for earth, and wey dey this two agreement, go fit chop the bread and drink the wine for Memorial.

5. Wetin anointed Christians know about the hope wey God don give them?

⁵ See another reason why anointed ones really want attend Memorial: This occasion de give them the opportunity to think about their hope. Jehovah don give them better hope. Wetin be this hope? Na to get spirit life for heaven wey no de end, with body wey no de rotten; to rule with Jesus Christ the King and the other 144,000; and the one wey dey important pass, na to see Jehovah for heaven! (1 Cor. 15:51-53; 1 John 3:2) Anointed Christians know say God don call them to enjoy this kind better things for heaven. But before Jehovah go allow them enter heaven, they must dey faithful till they die. (2 Tim. 4:7, 8) Anytime anointed Christians remember their hope to live for heaven, this one de really give them joy. (Titus 2:13) What about the “other sheep”? (John 10:16) Wetin be some reasons why them de attend Memorial?

6. Why the other sheep de attend Memorial every year?

⁶ The other sheep wey de attend Memorial no de chop the bread and drink the wine, but they still dey happy to attend. Na for 1938 they first invite the people wey get the hope to live for earth to attend Memorial. Watchtower of March 1, 1938, talk say: “E go good and e make sense for the [other sheep] to dey this kind meeting and see wetin de happen for there. . . . This one suppose be time for them to over glad too, and na so e be.” The other sheep dey happy to attend the Memorial, even though say they no de chop the bread and drink the wine, just like person wey they invite come wedding.

7. Why e de hungry the other sheep to listen to the Memorial talk?

⁷ The other sheep too, de think about their hope. E de hungry them to listen to the Memorial talk. The talk na especially about the blessings wey faithful people go enjoy for the one thousand years wey Jesus and the 144,000 go rule this earth. As King, Jesus Christ go direct the 144,000 make they help to change this earth to paradise and help people to dey perfect. E de really sweet the millions of people wey no de chop the bread and drink the wine for Memorial, to think about how the things wey Bible don talk  about the future go happen. Some of this things dey for Isaiah 35:5, 6; 65:21-23 and Revelation 21:3, 4. As them de see theirself and people wey they love, for that new world, this one de make their hope about the future de strong, and e de give them strong-heart make they no leave Jehovah.—Matt. 24:13; Gal. 6:9.

8. Wetin be another reason why the other sheep de attend Memorial?

⁸ Make we see another reason why the other sheep de attend Memorial. They want show their love and support for the anointed ones. Bible be don talk-am say the anointed ones and people wey their hope na to live for earth, go work together well. How that one go happen? Make we talk about some examples.

9. Wetin the prophecy for Zechariah 8:23 show about the way the other sheep de feel about anointed Christians?

⁹ Read Zechariah 8:23. This prophecy explain for fine way how the other sheep de feel about their anointed brothers and sisters. The “one Jew” and “wuna” wey Bible talk about na the same group, and na the anointed ones wey still dey this earth. (Rom. 2:28, 29) The “ten men from all the language wey the nations get” na the other sheep. They “hold” the anointed ones “tight” and join them de serve God for the correct way. So for the night of the Memorial, as the other sheep de attend, this one de show their strong love and support for anointed Christians.

10. Wetin Jehovah don do to make wetin dey Ezekiel 37:15-19, 24, 25 happen?

¹⁰ Read Ezekiel 37:15-19, 24, 25. For this prophecy to happen, Jehovah don make-am possible for anointed Christians and the other sheep to work well together as one. This prophecy talk about two sticks. The people wey go live for heaven be like the stick “for Judah” (the tribe wey the kings of Israel come from), and the people wey go live for this earth be like the stick “of Ephraim.” * Jehovah go join the two groups make they be “one stick.” This one mean say they go serve God together under their King wey be Jesus Christ. Every year, anointed Christians and the other sheep de attend Memorial together as “one group of sheep” under “one shepherd,” and no be as two separate group.—John 10:16.

11. Which main way “the sheep” for Matthew 25:31-36, 40 de show say them de support Christ brothers?

¹¹ Read Matthew 25:31-36, 40. “The sheep” wey Jesus talk about na the righteous people for the time of the end wey their hope na to live for this earth, and they be the other sheep wey dey alive today. They really de support the brothers of Christ wey remain. One main way wey them de do this one na to help them do one important work, wey be to preach and make disciples for the whole world.—Matt. 24:14; 28:19, 20.

12-13. Which other ways the other sheep de show say them de support Christ brothers?

¹² Some weeks before Memorial every year, the other sheep de do their best to invite people for the whole world come Memorial. Them de do this one to show say them de support Christ brothers.  (Check the box “ You De Plan for Memorial Time Now?”) They still de make sure say everything dey ready for the Memorial, even though say plenty congregations no get anointed ones. The other sheep really de enjoy to support Christ brothers for this ways. This other sheep know say Jesus de see the support wey them de give e brothers like say them de do-am for-am wey be Jesus.—Matt. 25:37-40.

¹³ Wetin be some other reasons why all of us de attend Memorial, whether we get the hope to live for heaven or for this earth?

14. How Jehovah and Jesus don really show us big love?

¹⁴We thank Jehovah and Jesus for the love wey they show us. Jehovah don show e love for us for many ways, but na one way big pass all of them. Our God show this kind love when e allow e Son wey e really love, to suffer and die for us. (John 3:16) And we know say Jesus show us big love as e ready to come sacrifice e life for us. (John 15:13) We no go fit pay Jehovah and Jesus back for the love wey they don show us. But the way we de live our life everyday go show say we de really thank them for this thing wey they do for us. (Col. 3:15) And we de attend Memorial so that we go fit think about the love wey they don show us, and to show our love for them.

15. Wetin make anointed Christians and the other sheep really value the sacrifice of Jesus?

¹⁵We really value the sacrifice wey Jehovah and Jesus give us as gift. (Matt. 20:28) Anointed Christians no de play with the sacrifice of Jesus at all, because na this sacrifice make their wonderful hope dey possible. As they show faith for Jesus sacrifice, Jehovah don talk say them dey righteous and e don take them as e children. (Rom. 5:1; 8:15-17, 23) The other sheep still value the sacrifice of Jesus. Because of their faith for Jesus sacrifice, them dey clean for God eye, they fit worship God well, and they get hope to survive “great tribulation.” (Rev. 7:13-15) One way wey anointed ones and the other sheep de show say they really like the sacrifice of Jesus, na to attend Memorial every year.

16. Wetin be another reason why we de attend Memorial?

¹⁶ Another reason why we de attend Memorial na because we want obey Jesus. Whether our hope na to live for heaven or to live for earth, all of us want obey the command wey Jesus give for the night wey e start the Memorial, when e talk say: “Make wuna continue to do-am to remember me.”—1 Cor. 11:23, 24.

17. How Memorial de help us de near Jehovah more?

¹⁷We go near Jehovah more. (Jas. 4:8) As we don learn, the Memorial de give us the chance to think about the hope wey Jehovah don give us, and to think deep about the better love wey e don show us. (Jer. 29:11; 1 John 4:8-10) When we think about our hope for the future and God love for us wey no de ever fail, this one go make our love and friendship with Jehovah de strong more.—Rom. 8:38, 39.

18. As we de think deep about the example wey Jesus show, wetin this one de move us to do?

 ¹⁸We go want follow Jesus example. (1 Pet. 2:21) For the days before the Memorial, we de take time de think about the final week wey Jesus spend for this earth, e death, and e resurrection. For Memorial day, the Memorial talk de remind us about the love wey Jesus get for us. (Eph. 5:2; 1 John 3:16) Na fine example Jesus show us as e no think about e self. When we de read and de think deep about this one, e go move us to “do the same thing wey that one do.”—1 John 2:6.

19. How we fit continue to be friend of God?

¹⁹We go dey ready more to make our friendship with God continue to dey strong. (Jude 20, 21) God go continue to love us when we de do wetin e talk, de make e name dey holy, and de make e heart glad. (Prov. 27:11; Matt. 6:9; 1 John 5:3) As we de do Memorial, this one go really encourage us more to live our life everyday for way wey go be like say we de tell Jehovah say, ‘I want be your friend forever!’

20. Which better reasons we get to attend Memorial?

²⁰ Whether our hope na to live forever for heaven or for earth, we get better reasons to attend Memorial. Every year, when we gather together that day, we de remember the death of person wey we love, wey be Jesus Christ. And the one wey dey important pass na say, we de remember the love wey big pass. And this love na the love wey Jehovah show us as e send e Son to die for our sin. We go do Memorial this year for the evening of Friday, April 15, 2022. We love Jehovah and e Son. So every year, for the day wey Jesus die, nothing suppose dey more important pass to attend Memorial.