1-2. (a) Why e no de surprise us say we de face problem? (b) Wetin we go talk about for this article?

 SERVANTS of Jehovah de face many problem today and this one no de surprise us. We don learn from Bible say: “We must face plenty problem before we enter the Kingdom of God.” (Acts 14:22) And we know say some problem wey we de face now no go end until God Kingdom come. Because for God Kingdom, people “no go die again, people no go de cry again, [and] pain no go dey again.”—Rev. 21:4.

² Jehovah no de stop problem make e no come. But e de help us make we fit endure them. See wetin apostle Paul write to the congregation for Rome. When e write to them, e first mention the problems wey e and some brothers de face before e tell them say: “We don win finish because of the one wey love us.” (Rom. 8:35-37) This one mean say Jehovah de help and support us even when we de endure the problem. Make we see how Jehovah help Joseph and how e fit help you.

3. Wetin happen to Joseph wey e no expect?

³ Jacob make-am clear say e love Joseph pass e other sons. (Gen. 37:3, 4) Because of this one, Joseph senior brothers start to jealous-am. One day when them dey alone with Joseph, them sell Joseph to some business men  wey come from Midian. The business men carry Joseph go Egypt, wey far from where Joseph family de stay. For there, them still sell Joseph to Potiphar wey be the oga of Pharaoh security guard. Joseph life change quick-quick! Before na e be the person wey e papa like pass for their family, but now e don become slave for Egypt.—Gen. 39:1.

4. Which kind problem we fit get?

⁴ Bible talk say ‘bad things de happen to everybody.’ (Eccl. 9:11, Holy Bible—Easy-to-Read Version) Many of the problem wey we de face na wetin dey common to people. This one mean say no be only us de face that kind problem. (1 Cor. 10:13) E fit still be say the problem wey we de face na because we de worship Jehovah. Because of this one, people fit laugh us, dey against us, or even suffer us. (2 Tim. 3:12) No matter the problem wey we de face, Jehovah go fit help us endure-am. How Jehovah help Joseph.

5. Wetin Potiphar feel about Joseph? (Genesis 39:2-6)

⁵ Read Genesis 39:2-6. As Joseph de work for Potiphar house, Potiphar see say Joseph really sabi e work and e de use all e heart work. And Potiphar still see say “Jehovah de make everything wey Joseph de do succeed.” b As time de go, Potiphar make Joseph e personal servant and still put-am in charge of everything wey e get. Because of this one, things come de go well for Potiphar.

6. How you think say Joseph go de feel as e dey Potiphar house?

⁶ Just think about how Joseph go de feel when this things de happen. Wetin you think say Joseph go de pray for? You think say na for Potiphar to see-am as good boy or dash-am plenty gift? The only thing wey go dey e mind na make them free-am so that e go go back to e papa house. Because even with all the position wey e get for Potiphar house, na slave e still be, and e master no de worship Jehovah. Another thing be say Jehovah no touch Potiphar heart make e free Joseph. Even self, Joseph condition go soon turn up-side-down.

7. How Joseph condition bad pass as e be before? (Genesis 39:14, 15)

⁷ Genesis chapter 39 tell us say Potiphar wife start to get feeling for Joseph sotey e want make Joseph sleep with-am. But anytime wey e tell Joseph wetin e want, Joseph no de gree for-am. This one make Potiphar wife vex sotey e lie against Joseph say e want try to rape-am. (Read Genesis 39:14, 15.) When Potiphar hear wetin e wife talk, e no waste time to put Joseph for prison. And Joseph stay for the prison for many years. (Gen. 39:19, 20) How the prison be? The Hebrew word wey Joseph use describe the prison fit still mean “well,” or “pit.” This one show say the place dark and make-am no get hope. (Gen. 40:15, ftn.) Bible show say for some time, them chain Joseph for leg and neck. (Ps. 105:17, 18) So things just de bad for Joseph more-more. Before, Joseph na slave wey e master trust but now, e don become slave wey them put for prison.

8. Even when your condition de bad more-more, wetin you fit dey sure of?

⁸ You don ever dey for any condition wey come de bad more-more even with all your prayers? E de be like that sometimes. Jehovah no de stop problem make them no happen to us for this wicked world wey Satan de control. (1 John 5:19) But one thing wey we dey sure of be say: Jehovah de see all the problem wey you de face and e care about you. (Matt. 10:29-31; 1 Pet. 5:6, 7) And e don talk say “I no go ever leave you, and I no go ever abandon you,” this na better promise. (Heb. 13:5) Even when your problem make-am be like say you no get hope again, Jehovah go fit help you endure-am. Make we see how Jehovah help Joseph when e be like say hope no dey for-am again.

9. Wetin show say Jehovah dey with Joseph even for prison? (Genesis 39:21-23)

⁹ Read Genesis 39:21-23. Even with the hard prison life wey Joseph de face, Jehovah still show say e dey with Joseph and help-am endure. How? As time de go, the prison guard trust and respect Joseph, just the way Potiphar be trust-am. And small time, the prison guard put Joseph in charge of other prisoners. Bible even talk say: “The chief officer of the prison no worry at all about everything wey Joseph de control.” Now for inside prison, Joseph don get better work wey go make-am dey busy. This na big change wey e no expect! But how they go give this kind position to person wey them talk say e try to rape the wife of one big oga for Pharaoh palace? The only answer wey we get for that question dey Genesis 39:23. E talk say: “Because Jehovah dey with Joseph and Jehovah make everything wey Joseph put hand to succeed.”

10. Why Joseph fit no feel say Jehovah dey with-am for everything wey e de do?

¹⁰ Just try think again about how Joseph go de feel as e dey prison. You think say Joseph go de feel say Jehovah dey with-am for everything wey e de do as they lie against-am and put-am for prison? Wetin you think say Joseph go de pray for? You think say e prayer na for the prison guard to like-am? Wetin Joseph want na make the truth come out so that them go release-am from prison. E even tell one prisoner wey they want release, say make e tell Pharaoh about-am so that them go release-am from  prison. (Gen. 40:14) But as they release the man, e no tell Pharaoh anything about Joseph at once. This one make Joseph spend another two years inside the prison. (Gen. 40:23; 41:1, 14) Even with this one, Jehovah continue to dey with Joseph and help-am endure. How?

11. Wetin Jehovah help Joseph to fit do, and how this one affect the family wey Messiah come from?

¹¹ When Joseph still dey prison, Jehovah make Pharaoh wey be the king of Egypt, dream two dreams wey make-am fear. So Pharaoh really want know wetin the dream mean. When Pharaoh hear say Joseph de fit talk the meaning of dream, e tell them say make them go bring Joseph. Jehovah help Joseph fit tell Pharaoh the meaning of the dream. And the advice wey Joseph give Pharaoh, really make Pharaoh happy. When Pharaoh see say Jehovah dey with Joseph, e put Joseph in charge of all the food for the whole Egypt. (Gen. 41:38, 41-44) After some years, serious hunger affect Egypt and even for Canaan where Joseph family de stay. This one make Joseph fit save e family, and this one help to protect the family wey the Messiah come from.

12. How Jehovah make Joseph succeed?

¹² Think about the good things wey happen to Joseph even with all the problem wey e face. Who make Potiphar favor Joseph wey be ordinary slave? Who make the prison guard put Joseph in charge of other prisoners? Who make Pharaoh dream two dreams wey make-am fear? Who help Joseph fit know the meaning of the dream? Who make Pharaoh choose Joseph make e dey in charge of all the food for Egypt? (Gen. 45:5) E dey clear say na Jehovah make everything wey Joseph do, succeed. Na true say Joseph brothers be want kill Joseph, but Jehovah change their wicked plan, and use-am make wetin e want happen.

13. Jehovah de always comot the problem wey we de face? Explain.

¹³ So wetin we learn from Joseph story? Jehovah de always comot the problem wey  we de face? Jehovah de always put hand for everything for our life, so that all the bad thing wey happen to us go bring good result? No, no be wetin Bible de teach be that. (Eccl. 8:9; 9:11) But we know say when we de face problem, Jehovah de see-am and e de hear our prayer. (Ps. 34:15; 55:22; Isa. 59:1) And Jehovah de even do pass that one. E de help us fit endure our problems and still de worship-am well. How?

14. How Jehovah de help us when we de face problem?

¹⁴ Jehovah de comfort and encourage us for the correct time, and this na one way e de help us fit endure. (2 Cor. 1:3, 4) This na exactly wetin happen to one brother for Turkmenistan wey e name na Eziz. Them put Brother Eziz for prison for two years because e de worship Jehovah. E talk say: “In the morning for the day wey them want judge my case, one brother read Isaiah 30:15 to me, wey say: ‘Wuna go dey strong if wuna dey calm and show say wuna trust me.’ This verse help me dey calm and trust Jehovah for everything. As I de think about this verse, e help me fit endure the two years wey I spend for prison.” You fit remember the time for your life when you get the comfort and encouragement wey you need, just the time wey you need-am pass?

15-16. Wetin you learn from Sister Tori example?

¹⁵ Many times, we no dey know how Jehovah de help us fit endure problem, until the problem don finish. This na exactly wetin happen to one sister wey e name na Tori. E son wey e name na Mason struggle with cancer for six years before e die. As we know, this one go cause serious pain for e mama. Sister Tori talk say: “I no sure say anything fit pain me pass the death of my pikin. I know say other papa and mama go agree  with me say to see their pikin de suffer de pain them pass if na them de suffer.”

¹⁶ As Sister Tori condition pain-am reach, anytime wey e think about-am, e de always see how Jehovah help-am endure. E talk say: “When I think about that time, I see say Jehovah really help me when my pikin de sick. For example, even when Mason condition really serious and they no allow people visit-am, brothers and sister de drive their motor for two hours to fit reach the hospital. Brothers and sisters always dey where visitor de wait and them ready to help anytime. Them still de bring the things wey we need. Even when things really hard for us, we always get wetin we need.” Jehovah give Sister Tori wetin e need to fit endure and na the same thing e do for e pikin.—Check the box wey the topic na “ Na Wetin We Need Jehovah Give Us.”

17-18. Wetin go help us see say Jehovah de support us when we de face problem and de thank-am? (Psalm 40:5)

¹⁷ Read Psalm 40:5. When person want build house, e plan na to complete-am and pack enter. But when e de build the house, plenty stage dey where e fit stop and think about the progress wey e don make. Na so e still be as we de worship Jehovah. E dey important make we de always stop and take time think about how Jehovah de help us fit endure our problem and still de worship-am well. At the end of everyday, ask yourself say: ‘How Jehovah don bless me today? How Jehovah de help me fit endure even when I still dey inside problem?’ Check if you go fit see one or more blessing from Jehovah wey show say e de help you fit endure your problem and still hold-am tight.

¹⁸ Na true say you fit de pray say make your problem end. Na wetin anybody go pray for and no be bad thing. (Phil. 4:6) But abeg, make you always remember how Jehovah de bless you even when you de face problem. Remember say, Jehovah promise say e go give us power and help us to fit endure. So de always thank Jehovah for the things wey e de do for you so that you go fit endure your problems. This one go help you see say Jehovah de really help you to fit endure and still continue to worship-am even when you dey inside the problem, just as e help Joseph.—Gen. 41:51, 52.