STUDY ARTICLE 3
SONG 124 No Leave Jehovah
Jehovah Go Help You When You De Face Serious Problem
“[Jehovah] go make [you] really stand well.”—1 PET. 5:10.
WETIN WE GO LEARN?
We go learn wetin we fit do when we de face serious problem, so that Jehovah go help us.
1-2. Which kind problems servants of Jehovah fit face?
IF BAD thing happen to us, our life fit no be the same again. For example, doctor tell one brother wey im name na Luis a say e get cancer. The doctor tell-am say na only some months remain before e go die. Sister Monika and im husband dey busy for Jehovah service. But one day, Sister Monika hear say im husband wey be elder hide sleep with another woman for plenty years. For the area wey one sister wey im name na Olivia de stay, them tell them say make them comot because heavy breeze and rain de come. When e come back, e see say the heavy breeze and rain don scatter im house. Before the brother and the two sisters ‘close their eye and open-am,’ their life don change. This kind thing don happen to you before? You don face some serious problem wey change your life kpatakpata?
2 Even though say we de serve Jehovah, we de face problem wey other people de face, like sickness or other serious problems. And because we de serve Jehovah, people fit still suffer us or dey against us. Even though say Jehovah no de stop-am make bad things no happen to us, e promise say e go help us. (Isa. 41:10) So, Jehovah fit help us continue to happy, make better decision, and continue to hold-am tight even when we de face serious problems. For this article, we go talk about four ways wey Jehovah fit use help us when e be like say our own don finish. We go still talk about wetin we need to do so that we go gain from the help wey Jehovah de give us.
JEHOVAH GO PROTECT YOU
3. When we de face serious problem, how e fit affect us?
3 The problem. E fit hard us to think well and make better decision, when bad thing happen to us. Why? Because wetin happen fit de pain us well-well. E fit de worry us and our mind fit no settle. We fit confuse and we no go know wetin to do again. See how the two sisters wey we talk about before feel, when them de face their problem. Sister Olivia talk say: “After the heavy breeze and rain scatter my house, I confuse sotey I come feel like say everything don finish.” Sister Monika wey im husband go de sleep with another woman, talk say: “E shock me well-well. Wetin e do really break my heart. I just weak, and I no fit do the small-small things wey I de do everyday. I no ever believe say this kind thing fit happen to me.” Wetin Jehovah promise say e go do to help us when we de face serious problem?
4. As e dey for Philippians 4:6, 7, wetin Jehovah promise us?
4 Wetin Jehovah promise say e go do for us? Jehovah promise us say e go give us wetin Bible call “the peace wey God de give.” (Read Philippians 4:6, 7.) This na the peace of mind wey person de get because e be Jehovah friend. This peace “pass anything wey person fit understand.” E dey wonderful pass anything wey we fit ever think about. For example, you don ever pray to Jehovah well-well when you de face problem and you come see say your mind calm down after you pray finish? That na “the peace wey God de give.”
5. How the peace wey God de give de protect our heart and mind?
5 Philippians 4:7 still talk say the peace wey God de give ‘go protect your heart and the way you de think.’ The Greek word wey them translate as “protect” de describe soldiers wey de protect city make enemy no attack-am. People wey de stay for this kind city, no de fear when them de sleep because them know say soldiers de protect them. For the same way, when the peace wey God de give de protect our heart and mind, we no go de worry-worry again because we know say Jehovah de protect us. (Ps. 4:8) Just like Hannah, our problem fit no go at once when we pray, but we go still get peace of mind. (1 Sam. 1:16-18) And when our mind dey calm, we go fit think well and make better decision.
Pray until you feel-am say “the peace wey God de give” de protect your heart and mind (Check paragraph 4-6)
6. Wetin we need to do to fit get the peace wey God de give? (Still check the picture.)
6 Wetin we need to do? When you de face serious problem, you need to beg Jehovah make e protect you. How you fit do-am? Pray until you feel-am say you don get the peace wey God de give. (Luke 11:9; 1 Thess. 5:17) Brother Luis, wey we don talk about before, explain wetin help e and im wife Ana, endure when doctor tell them say na only some months e get to live. E talk say: “When this kind thing happen, e de really hard to fit make better decision about the kind treatment wey you go take and about other things. But prayer don really help us get peace of mind as we de face this problem.” Brother Luis and im wife talk say them pray well-well and plenty times say make Jehovah give them peace of mind, make their mind come down, and give them sense to fit make good decisions. And them see say Jehovah really help them. If you de face serious problem, continue to de pray, and you go see say Jehovah go give you the peace wey go protect your heart and mind.—Rom. 12:12.
JEHOVAH GO MAKE YOU STAND WELL
7. How serious problem wey we de face fit make us feel?
7 The problem. We fit no de feel, think, and do things like before, when bad thing happen to us. The way we de feel fit just de change anyhow just as wave for sea fit make ship no balance. Sister Ana wey we don talk about before, talk say after im husband die, the way e de feel just de change anyhow. E talk say: “Sometimes, I de feel alone, and I go start to pity for myself and de vex say Luis don die.” Another thing be say, e de make Sister Ana vex and confuse when e need to make decisions wey im husband de make before. Sometimes e go feel say e no get hope again. How Jehovah de help us when our problem de make us feel like this?
8. As 1 Peter 5:10 talk, wetin Jehovah promise us?
8 Wetin Jehovah promise say e go do for us? E promise us say e go help us fit stand well. (Read 1 Peter 5:10.) When heavy breeze start to blow for sea, e fit make ship start to shake. To fit make the ship balance, e get something wey long, wey de come out for the two side of the ship, for the part of the ship wey dey inside water. E de really help ship fit balance when heavy breeze de disturb-am. This one de help the people wey de travel for the ship stop to de fear and fit enjoy their travel. But for-am to work well and help the ship well, the ship need to de move. For the same way, Jehovah go help us stand well, if we continue to worship-am even if we de face serious problem.
Use the things wey Jehovah organization don give us to do research, so that you go fit stand well (Check paragraph 8-9)
9. How the things wey we de use do research, fit help you until your mind come down? (Still check the picture.)
9 Wetin we need to do? When problem de really worry you for mind, try your best to continue de pray, attend meeting, and de preach. Na true say you fit no do as you de do before, but remember say Jehovah no de expect say make you do pass wetin you fit do now. (Compare Luke 21:1-4.) Another thing be say make you try get time wey you de use study Bible and to think deep about wetin you study. Why? Because Jehovah don use im organization give us books, videos and other things wey fit help us stand well when we de face problem. To get the things wey fit help you, you fit use JW Library® app, Watch Tower Publications Index, and Research Guide for Jehovah’s Witnesses, do research. Sister Monika wey we talk about before, talk say e use this things do research when e see say im problem want start to worry-am again. For example, when e think about im problem and e make-am vex, e go do research about how person fit control im anger. And other time, e do research about when person wey you trust disappoint you or about wetin e mean to hold person tight. When e start to read the topic wey e choose, e go read-am until im mind come down. E talk say: “When I start to do the research, I go de worry well-well, but as I continue to read, e go just be like say Jehovah de calm me down. As I de read, I see say Jehovah understand all the different-different way, wey I de feel, and say e de help me.” That kind help from Jehovah fit help you control the way you de feel until your mind come down.—Ps. 119:143, 144.
JEHOVAH GO SUPPORT YOU
10. How we fit feel after something wey serious happen to us?
10 The problem. If something wey serious happen to us, e go get somedays wey we go dey weak, and we no go fit think well. We fit even become like person wey de run well-well before, but now, e de struggle to waka because e don injure im leg. E fit hard us to fit do things wey dey easy for us to do before. Or, e fit no de sweet us to do the things wey we de enjoy to do before. As prophet Elijah feel when e get problem, e fit de do us say make we just de sleep de go. (1 Ki. 19:5-7) Wetin Jehovah promise say e go do for us when we dey weak?
11. Which other way Jehovah take de support us? (Psalm 94:18)
11 Wetin Jehovah promise say e go do for us? Jehovah promise say e go support us. (Read Psalm 94:18.) When person wey sabi run well-well injure im leg, e go need help to fit de waka. So, when we de face serious problem, we go need help to fit continue to worship Jehovah well. When we dey this kind condition, Jehovah promise us say: “Me, Jehovah your God, I de hold your right hand. I de tell you say, ‘Make you no fear. I go help you.’” (Isa. 41:13) E clear to King David say Jehovah help-am like this. When e de face plenty problem and im enemy them want kill-am, e tell Jehovah say: “Your right hand de support me.” (Ps. 18:35) But how Jehovah de support us?
Allow your family members, friends and elders help and support you (Check paragraph 11-13)
12. Who Jehovah fit use help us when we de face serious problem?
12 One way Jehovah de support us na to move other people to help us. For example, one time wey David de face problem wey make-am worry and no happy, im friend wey be Jonathan visit-am and encourage-am. (1 Sam. 23:16, 17) For the same way, Jehovah use Elisha to help and support Elijah. (1 Ki. 19:16, 21; 2 Ki. 2:2) And for this our time, Jehovah fit use our family members, our friends, or elders, to help and support us. But, many times when we de face problem, we fit no want make anybody near us, we fit just want dey alone. E dey normal to feel like that. But wetin we fit do to get help from Jehovah?
13. Wetin we need to do to fit get help and support from Jehovah? (Still check the picture.)
13 Wetin we need to do? No allow yourself to dey alone even though say na so e dey your mind. When you de always dey alone, e go make you de always think about only yourself and your problems. And this one go make you no fit make better decision. (Prov. 18:1) Na true say sometimes, we need time to dey alone when bad thing happen to us. But if we continue to push people comot from our side, e fit make us no get the support wey Jehovah fit use them give us. So, no matter how e hard you reach when you de face serious problem, make you allow your family members, friends and elders help you. Make you see-am say Jehovah de use them help and support you.—Prov. 17:17; Isa. 32:1, 2.
JEHOVAH GO COMFORT YOU
14. Which kind things fit make us fear?
14 The problem. When bad thing happen to us, e fit really make us fear. For Bible, we get plenty servants of Jehovah wey talk about how their enemy them or other things make them fear. (Ps. 18:4; 55:1, 5) For this our time, people fit dey against us for school, where we de work, for our family, or government fit de suffer us because we de worship Jehovah. We fit de fear say we go die because we de sick. When this kind things de happen to us, we fit feel like small pikin wey no know how to help imself. How Jehovah de help us when we de face this kind problem?
15. Wetin Psalm 94:19 talk say Jehovah go do for us when we de fear?
15 Wetin Jehovah promise say e go do for us? Jehovah go comfort us and make our mind come down. (Read Psalm 94:19.) This verse fit make us think about small girl wey de fear and e no fit sleep for night because of loud thunder. Imagine say im papa go meet-am and carry-am. After small time, the pikin sleep. Even though say the thunder never stop, the small girl no fear again as e dey im papa hand. When we de face condition wey de make us fear, we need this kind help from Jehovah until our mind come down. But how we fit get this kind help from Jehovah?
Allow Jehovah to use Bible comfort you (Check paragraph 15-16)
16. Wetin we need to do so that we go get comfort from Jehovah? (Still check the picture.)
16 Wetin we need to do? Always spend time with Jehovah. How? Always pray to-am and read Bible. (Ps. 77:1, 12-14) If na so you de do, na Jehovah go be the first Person wey you go run to when you get problem. Tell Jehovah wetin de make you fear and wetin de worry your mind. Make you de read Bible to show say you de listen to-am as e de talk to you and you go see how e de comfort you. (Ps. 119:28) Some place them dey for Bible wey you fit read wey go really make your mind come down when you de fear. For example, the book of Job, Psalms, and Proverbs fit really encourage you. Another place wey fit encourage you na wetin Jesus talk for Matthew chapter 6. When you de pray to Jehovah and de read Bible, you go see say Jehovah go make your mind come down.
17. Wetin we fit dey sure say Jehovah go do for us?
17 We fit trust Jehovah with all our heart say e go help us when we get serious problem. Jehovah no go leave us make we face our problem alone. (Ps. 23:4; 94:14) Jehovah promise us say e go protect us, help us stand well, support us and comfort us. See wetin Isaiah 26:3 talk about Jehovah, e say: “You go protect people wey trust you finish; you go give them peace wey no go end, because na you them trust.” So, make you trust Jehovah and do everything wey you fit do to gain from the help wey e de give. This one go help you get the power wey you need when you de face problem.
WETIN BE YOUR ANSWER?
-
Which time we fit really need Jehovah help pass?
-
Which four ways Jehovah de help us when we de face serious problem?
-
Wetin we fit do so that Jehovah go help us?
SONG 12 Great God, Jehovah
a We change some names.