1. Wetin de come your mind when you think about Jehovah?

 YOU don ever imagine how Jehovah be? When you de pray to-am, wetin de come your mind? Even though say we no de see Jehovah, Bible use different-different things describe Jehovah. E call Jehovah “sun and shield and fire wey de burn something finish.” (Ps. 84:11; Heb. 12:29) Prophet Ezekiel describe Jehovah as iron wey dey shine well-well, and say e sitdown ontop throne wey be like fine stone wey them de call sapphire, and rainbow surround-am. (Ezek. 1:​26-28) The different-different way wey Bible describe Jehovah fit make us respect-am more or even fear-am.

2. Wetin fit make-am hard for some people to believe say Jehovah love them?

² Because we no de see Jehovah, e fit hard us to believe say e love us. Some people think say Jehovah no go ever fit love them because of the bad things wey don happen for their life. E fit be say them no get papa wey show them love. Jehovah understand how them de feel and how e de affect them. Na im make Jehovah tell us for Bible the kind God wey e be, say e get deep love for us.

3. Why e dey important make we study about Jehovah love?

³ The best word wey we fit ever use describe Jehovah, na love. (1 John 4:8) Na im make Bible talk say “God na love.” Na love de move-am to do everything wey e de do. Jehovah love deep well-well, na im make-am de show love even to people wey no love-am. (Matt. 5:​44, 45) For this article, we go talk about Jehovah and the love wey e de show. The more we de learn about our God, the more we go de love-am.

JEHOVAH GET DEEP LOVE FOR US

4. How you de feel when you think about the deep love wey Jehovah get? (Still check the picture.)

⁴ “The love wey Jehovah get really deep.” (Jas. 5:11) For Bible,  Jehovah compare imself to better mama wey love im pikin well-well. (Isa. 66:​12, 13) Just imagine one woman wey de care for im pikin. E carry the pikin ontop im leg, de shake-am small-small and de talk to-am with sweet voice. When the pikin de cry or de feel pain, im mama go make sure say e give-am wetin e need. For the same way, when we de face problem, make we get-am for mind say Jehovah go care for us. The person wey write Psalm 94:​19, talk about Jehovah say: “When things de worry me for heart, you comfort me and you make me get joy.”

5. Wetin e mean when we say Jehovah love for us no de fail?

⁵ Jehovah love for us no de fail. (Ps. 103:8) When we do wetin no good, Jehovah no de stop to love us. Plenty times, Israel people sin against Jehovah, but when them repent, e show them love and tell them say: “[Una] dey special to me, I don honor [una] and love [una].” (Isa. 43:​4, 5) Jehovah still get this kind love for us today. So, we go fit trust say e go always love us. Even if we make serious mistake, Jehovah no de troway us or abandon us. If we repent and come back to Jehovah, we go see say e still love us. Jehovah don promise us say “e go open hand to forgive.” (Isa. 55:7) Bible talk say when Jehovah forgive us, we go get peace of mind again.—Acts 3:19.

6. Wetin Zechariah 2:8 teach us about Jehovah?

⁶ Read Zechariah 2:8. Because Jehovah love us, e de quick understand how we de feel and e want protect us. E no de happy when we de face problem. So, we fit dey sure say e go answer us when we pray say: “Guard me the way you de guard your own eye, protect me under your wings.” (Ps. 17:8) Eye no be wetin person take de play because na important part of our body. So, when Jehovah talk say we be like im eyeball, e just be like say e de talk say, ‘Anybody wey touch una, de touch something wey dey special to me.’

7. Sometimes, wetin fit make-am hard for us to believe say Jehovah really love us?

⁷ Jehovah want make you know and dey sure say e love you. But e know say because of some bad things wey don happen for our life, we fit de doubt if e fit ever love us. Or we  fit de face serious problem now, wey fit de make us ask ourself if Jehovah really love us. Wetin fit help us dey sure say Jehovah love us? Na when we learn how Jehovah show say e love Jesus, the anointed Christians, and all of us.

HOW JEHOVAH DE SHOW IM LOVE

8. Wetin make Jesus dey sure say im Papa love-am?

⁸ Jehovah and Jesus don dey together for billions of years. This one make them get deep love for each other. For Matthew 17:​5, Jehovah talk say e love Jesus. Jehovah for fit just talk say, ‘This na the Person wey de make me happy.’ But because e want make we know say e love Jesus well-well, e talk say, “This na my Son wey I love.” Jehovah really happy for the kind Person wey Jesus be, and say e ready to sacrifice im life. (Eph. 1:7) And Jesus dey sure say im Papa love-am. Nothing ever make-am doubt say im Papa love-am. Jesus talk plenty times with all im heart say im Papa love-am.—John 3:35; 10:17; 17:24.

9. Wetin Bible talk wey help us understand the kind love wey Jehovah get for anointed Christians? Explain. (Romans 5:5)

⁹ Jehovah show say e love anointed Christians. (Read Romans 5:5.) Bible show this one when e talk about anointed Christians say, “God don pour im love” for their heart. One book compare the love wey Jehovah get for anointed Christians, to the water wey dey inside river. E just be like say them pour all the water wey dey inside river for their heart. This example show say Jehovah really love anointed Christians. And them know say Jehovah love them. (Jude 1) Apostle John talk how anointed Christians de feel when e write say: “See the kind big love wey the Papa don show us, as e gree say make them call us children of God!” (1 John 3:1) Na only anointed Christians Jehovah love? No, Jehovah don show say e love all of us.

10. Wetin be the biggest thing wey Jehovah don do wey show say e really love us?

¹⁰ Wetin be the biggest thing wey Jehovah don do wey show say e really love us? Na Jesus sacrifice. No love pass this one! (John 3:16; Rom. 5:8) Jehovah allow im special Son die for us, so that E go fit forgive our sin and we go fit be Im friends. (1 John 4:10) The more we think deep about how Jesus suffer and how e pain Jehovah to see as im Son de suffer and die, the more e go help us fit understand the deep love wey them get for each of us. (Gal. 2:20) Jesus no die just because Jehovah want make them do the right thing or say e no want do partial, but e die because Jehovah love us. Jehovah don show say e love us as e sacrifice im special Son, Jesus. E allow im Son to suffer and die for us.

11. Wetin we fit learn from Jeremiah 31:3?

¹¹ As we don see, when Jehovah love person, e no de keep-am to imself, e de show-am say e love the person. (Read Jeremiah 31:3.) Jehovah don make us im friend because e love us. (Compare Deuteronomy 7:​7, 8.) Nothing and nobody fit make Jehovah no love us. (Rom. 8:​38, 39) How the love wey Jehovah get for you de make you feel? Read Psalm 23, and see how David feel because Jehovah show-am deep love and care for-am, and how e fit affect all of us.

HOW THE LOVE WEY JEHOVAH DE SHOW DE MAKE YOU FEEL?

12. Wetin Psalm 23 de talk about?

¹² Read Psalm 23:​1-6. Psalm 23 na song wey David use show say e trust say Jehovah love-am and e de care for-am. David use-am describe the strong friendship between  e and Jehovah wey be im shepherd. David no fear to allow Jehovah direct-am, and e trust Jehovah with all im heart. David know say Jehovah go love-am everyday of im life. Wetin make David dey sure say Jehovah love-am?

13. Wetin make David dey sure say Jehovah go care for-am?

¹³ “I no go lack anything.” David no ever feel say e lack wetin e need. Why? Na because Jehovah always give-am the things wey e need. Another thing be say, David enjoy better friendship with Jehovah and e know say Jehovah happy with-am. Na this one make David dey sure say no matter wetin happen to-am for future, Jehovah go continue to care for-am and give-am wetin e need. So, because David trust say Jehovah love-am and say e go care for-am, this one make-am de happy for wetin e get, instead to de worry.—Ps. 16:11.

14. Give example wey show how Jehovah fit show say e de care for us.

¹⁴ Jehovah de care for us especially when bad thing happen for our life. Sister Clara, a wey don work for Bethel pass 20 years really feel bad when im family face different-different problem. Im papa suffer serious stroke, them disfellowship one of im sister, their family business fall and them no come get house again. How Jehovah show them love and care for them? Sister Clara talk say: “Jehovah make sure say my family get wetin them need everyday. Plenty times, wetin Jehovah give us pass wetin I even expect. I de always take time to think about the way Jehovah care for us, and I no de ever forget them.  This one don help me continue to worship Jehovah and de happy even when I de face problems.”

15. Wetin help David get the power to continue to worship Jehovah? (Still check the picture.)

¹⁵ “E de make me strong again.” Sometimes, the plenty problem wey David face make-am worry well-well. (Ps. 18:​4-6) Even with this one, the love wey Jehovah show-am and the way Jehovah care for-am, make im mind come down. Na im make David talk say Jehovah lead-am go where “plenty grass dey,” and where “water dey” so that e go fit rest. This one make David get power to fit continue to happy as e de worship Jehovah.—Ps. 18:​28-32.

16. How you don gain from Jehovah love wey no de fail?

¹⁶ For the same way, even with all the problem wey we de face for Satan world, “na because of Jehovah love wey no de fail we still dey alive.” (Lam. 3:22; Col. 1:11) Make we talk about the example of Sister Rachel. For coronavirus time, im husband leave-am and comot from Jehovah organization. This one really pain Sister Rachel, no be small. How Jehovah help-am? E talk say: “Jehovah help me make I no dey alone. E give me plenty friends wey spend time with me, bring food for me, use their phone send message to me wey really encourage me. When we meet, them go smile with me, and them de always tell me say Jehovah love me and de care for me. I de always thank Jehovah say e give me this kind big family.”

17. Why David talk say, “I no de fear any danger”?

¹⁷ “I no de fear any danger, because you dey with me.” Plenty time, David life dey for danger, and the people wey be im enemy really get power. But because e know say Jehovah love-am, and go protect-am, this one make-am no fear. E dey clear to David say Jehovah dey with-am all the time wey e de face problem, and that one make im mind come down. Na this one make David sing say: “[Jehovah] save me from all my fear.” (Ps. 34:4) Sometimes, David face problem wey really make-am fear, but because e know say Jehovah love-am, this one help-am fit stop to de fear.

18. When you know say Jehovah love you, how that one fit help you when you de fear?

¹⁸ As we know say Jehovah love us, how that one de help us when we de face serious problem?  One pioneer wey im na me na Susan talk how e and im husband feel when their son kill imself. E talk say: “When serious problem wey person no expect happen, e de cause serious pain and confusion. E go make the person de feel say e no get hope again and say more bad things go happen. The love wey Jehovah de show us, de make our mind come down and help us see say e de protect us.” Sister Rachel wey we don talk about before, talk say: “One night, when I remember wetin happen to me, e pain me well-well, e come de make me worry and fear. So I use the pain wey dey my heart cry to Jehovah. At once, I feel-am say Jehovah calm me down the way mama de calm im pikin down. Na so sleep take me. I no go ever forget that night.” One elder wey im name na Titus spend four years for prison because e no gree join army. How e take see say Jehovah love-am and say e de care for-am? Brother Titus talk say: “Wetin Jehovah give me pass wetin I need. This one make me see say I suppose trust-am with all my heart. Another thing be say, Jehovah use im holy spirit help me make I fit de happy even though say I dey prison. This one make-am clear to me say, the more I de work with Jehovah, the more e go show say e love me. So I start to pioneer when I still dey prison.”

NEAR JEHOVAH MORE-MORE

19. (a) When we know say Jehovah love us, how e go affect our prayer? (b) Wetin you like pass about the love wey Jehovah de show us one by one? (Still check the box wey the title na, “ Some Words Wey De Help Us Know the Kind Love Wey Jehovah Get for Us.”)

¹⁹ The story of our brothers and sisters wey we don talk about show say Jehovah wey be “the God of love,” dey with us. (2 Cor. 13:11) E care about all of us one by one. We know and dey sure say Jehovah love wey no de fail surround us. (Ps. 32:10) The more we de think deep about the love wey e de show us, the more we go de see-am as real Person and we go de near-am more-more. We fit pray to-am anytime and tell-am say we really need im love. We fit tell-am all our problem wey de worry us for mind, because e really understand how we de feel and e ready to help us.—Ps. 145:​18, 19.

20. How the love wey Jehovah de show us de make us near-am?

²⁰ Just as the heat from fire de sweet for body when cold dey, na so the love wey Jehovah get for us de make our mind come down when we de face problem. So make you accept Jehovah love because e go comfort you and make you get peace of mind. If we do like this, we go fit use all our mind talk say: “I love Jehovah”!—Ps. 116:1.