You Know?
Which kind chariot carry the Ethiopia man when Philip meet-am?
THE Greek word wey we translate as “chariot” for New World Translation fit mean different-different kind of chariot. (Acts 8:28, 29, 38) But e be like say the chariot wey the Ethiopia man use travel, big pass the one wey them de use fight war or do race that time. Make we see some reasons why we talk like that.
The Ethiopia man get high position and e travel for far distance. Bible tell us say: “The man get authority under Candace wey be queen of Ethiopia people, and e de control all the things wey get value wey the queen get.” (Acts 8:27) Before-before, Sudan and south part of Egypt, dey part of Ethiopia. Even though the man fit no use one chariot for all the journey, e go don carry plenty things wey e need for the long journey. One of the chariot wey them de use carry people wey de travel that time, get one place for back wey them dey use carry load and e get four tyre. One book wey talk about the book of Acts talk say: “The space wey this kind chariot de get, de allow passenger fit travel with plenty load. E de make them fit travel far and make the journey dey easy.”
The Ethiopia man de read when Philip meet-am. Bible talk say: “Philip run follow-am for the side and hear-am de read loud from the book of Isaiah the prophet.” (Acts 8:30) The chariot wey them de use travel that time no de run fast. This one make-am possible for the Ethiopia man to de read as the chariot de move and e still make-am possible for Philip to fit meet the chariot even though say Philip de waka with leg.
The Ethiopia man “tell Philip to enter and sitdown with-am.” (Acts 8:31) If the chariot na the type wey them take de do race, the person wey de ride-am go need to stand. But for the chariot wey them de use travel, space go dey for the Ethiopia man and Philip to sitdown.
Because of wetin Acts chapter 8 talk and wetin other people don write about the kind chariot wey the Ethiopia man use travel, na im make our book them now de show say na big chariot the Ethiopia man use travel, no be the one wey them de use fight war or do race, that time.
