1. Wetin many people de do today?

 YOU don notice say today, plenty people de think only about theirself? For example, some people de use Internet do notice me to show wetin them get and wetin them de do. But people wey de praise Jehovah today no plenty. For this article, we go talk about wetin e mean to praise Jehovah and why we suppose praise Jehovah. We go still talk about how we fit give God the praise wey e suppose get, and how Jehovah go honor im name for future.

WETIN E MEAN TO PRAISE JEHOVAH?

 2. How Jehovah show the kind power wey e get for Mount Sinai? (Still check the picture.)

² Bible show say Jehovah na great and wonderful God. For example, small time after Jehovah free Israel people from Egypt, e show them the kind power wey e get. Think about wetin happen: Plenty Israel people gather near Mount Sinai to hear wetin Jehovah want tell them. Then thick cloud cover the mountain. Small time, ground start to shake well-well and smoke cover the whole mountain. Then, them see lightning, hear sound of thunder, and hear sound of horn wey loud  well-well. (Ex. 19:​16-18; 24:17; Ps. 68:8) Just think how Israel people go don feel when them see all this things wey Jehovah do. E go don surprise them to see the kind power wey Jehovah get.

 3. Wetin e mean to praise Jehovah?

³ Jehovah really dey wonderful and we fit help other people understand the kind God wey e be when we praise-am. We fit praise Jehovah when we de tell other people about the better-better things wey e don do and the fine-fine character wey e get. We fit still show say we de honor Jehovah when we de praise-am for everything wey e help us do. (Isa. 26:12) King David na better example of person wey praise Jehovah. For one prayer wey e pray for front of Israel people, e talk say: ‘O Jehovah, you really big and get power, and you get glory and majesty, because everything for the heavens and earth na your own.’ After David finish the prayer, “all the people come praise Jehovah.”—1 Chron. 29:​11, 20.

 4. How Jesus give praise to Jehovah?

⁴ When Jesus dey this earth, e praise im Papa for the miracles wey e do when e tell people say na Jehovah give-am the power to fit do them. (Mark 5:​18-20) Another way Jesus praise im Papa na for the better way wey e talk about Jehovah and the better way wey e treat other people. One time, Jesus de teach for synagogue. One woman wey demon dey im body for 18 years dey among the people wey de listen to-am. The demon don make the woman body bend sotey e no fit waka straight again. This one go don make the woman suffer no be small. So Jesus pity the woman and e go meet-am and talk to-am for kind way. E tell-am say: “Woman, I don free you from your sickness.” And Jesus put im hand ontop the woman and the woman stand straight at once. Then, the woman “start to praise God.” The woman really happy say Jehovah don make-am well. (Luke 13:​10-13) The woman get better reason to praise Jehovah and na so e be for us too.

WHY WE DE PRAISE JEHOVAH?

 5. Which reasons we get to respect Jehovah?

⁵ We de praise Jehovah because we really respect-am. We get plenty reasons to respect Jehovah. Jehovah na almighty and e get power to do anything wey e want. (Ps. 96:​4-7) We fit see the kind sense wey e get from the things wey e don make. Na im give us life and everything wey we need to fit dey alive. (Rev. 4:11) E no de ever leave im people. (Rev. 15:4) E de succeed for everything wey e do and e de always do wetin e promise. (Josh. 23:14) Na im make prophet Jeremiah talk about Jehovah say: “Among all the people wey get sense for the nations and among all their kings, no one be like you at all”! (Jer. 10:6, 7) True-true, we get plenty reasons why we suppose respect our Papa for heaven. But we no de only respect Jehovah, we still love-am.

 6. Why we love Jehovah?

⁶ We de praise Jehovah because we really love-am. The fine-fine character wey Jehovah get de make us love-am. E dey kind and e de show pity. (Ps. 103:13; Isa. 49:15) E de really feel for us when we de feel pain. (Zech. 2:8) E help us to know-am so that we go fit be im friend. (Ps. 25:14; Acts 17:27) And e dey humble; ‘e de bend down to look heaven and earth, e de raise humble person from dust.’ (Ps. 113:6, 7) All this reasons de make us want praise Jehovah.—Ps. 86:12.

 7. Which big honor we get?

 ⁷ We de praise Jehovah because we want other people to know about-am. Many people no know the truth about Jehovah. Why? Because Satan don talk plenty wicked lie about Jehovah and people believe-am. (2 Cor. 4:4) Satan don make people believe say Jehovah de quick vex, e no de care about us and say na im de cause the plenty problem wey we de face for the world today. But we know the truth about our God! And na big honor we get to tell other people the truth about the kind God wey e really be. (Isa. 43:10) The person wey write Psalm 96 praise Jehovah. We go learn from this psalm how we fit give Jehovah the praise wey e suppose get.

HOW WE FIT GIVE JEHOVAH THE PRAISE WEY E SUPPOSE GET?

 8. Wetin be one way wey we fit praise Jehovah? (Psalm 96:​1-3)

⁸ Read Psalm 96:​1-3. We fit praise Jehovah with the things wey we de talk about-am. This verses tell us to “sing to Jehovah,” to “praise im name,” to “tell people the good news about how e de save people,” and to “praise-am among the nations.” This na different-different ways wey we fit use praise Jehovah. Jehovah servant for Bible time really happy to tell other people about the kind God wey Jehovah be. (Dan. 3:​16-18; Acts 4:29) How we fit do like them?

9-10. Wetin you learn from Sister Angelena story? (Still check the picture.)

⁹ Make we see the example of Sister Angelena, a wey de live for United States. The sister no fear to talk about Jehovah for the place wey e de work. Because e just start to work for the company, them invite-am come one meeting with other people wey just join the company. For the meeting, everybody wey just join the company go talk something about imself. Sister Angelena plan to show them pictures wey show how e de happy as e be Jehovah Witness. But before the time reach for Sister Angelena to talk, one man wey grow for family wey im papa and mama na Jehovah Witness, talk bad things about Jehovah people and wetin them believe. Sister Angelena talk say: “Fear first catch me. But I ask myself say: ‘I go allow somebody to talk lie about Jehovah? Or I go talk to defend-am?’”

 ¹⁰ When the man talk finish, Sister Angelena pray for im heart. Then, e use soft mind tell the man say: “Just like you, I grow for family wey be Jehovah Witness, but I still be Jehovah Witness till today.” Even though say e no easy, Sister Angelena continue to dey calm. E show them the pictures wey im and im friends take as them de happy to serve Jehovah. And e still use respect explain wetin e believe. (1 Pet. 3:15) Wetin come happen? By the time Sister Angelena finish, the man don calm down. The man even talk about the good things wey e enjoy with Jehovah Witness people when e dey young. Sister Angelena talk say: “We suppose tell people the truth about Jehovah. Na big honor we get to tell people the truth about the kind God wey Jehovah be.” We too fit praise Jehovah when other people no respect-am. When we do this one, we de show say we value the honor wey we get to praise Jehovah.

11. How Jehovah servants don show say them de follow the advice for Psalm 96:8?

¹¹ Read Psalm 96:8. We fit use our things wey we value well-well to praise Jehovah. This na wetin Jehovah servants de always do. (Prov. 3:9) For example, Israel people contribute money and other things wey them get to build the temple and to care for-am. (2 Ki. 12:4, 5; 1 Chron. 29:​3-9) Some of Jesus disciples “use their things” support Jesus and im apostles. (Luke 8:​1-3) And for the apostles time, brothers and sisters contribute money to help other brothers and sisters wey de suffer because them no get food for their area. (Acts 11:​27-29) For this our time, we too fit praise Jehovah when we contribute money or other things wey we value well-well to support Jehovah work.

12. How the things wey we de contribute fit help to praise Jehovah? (Still check the picture.)

¹² See one example wey show how we de use the things wey we de contribute praise Jehovah. For 2020, rain no fall for long time for Zimbabwe. This condition nearly kill Sister Prisca and plenty other people for there. Even with this one, Sister Prisca continue to preach every Wednesday and Friday as e de do before, even for time wey them de prepare ground to plant. People de laugh-am because e de preach instead of-am to go farm and them de tell-am say, “Hunger go kill you.” Sister Prisca dey sure say Jehovah go care for-am, so e de always tell them say:  “Jehovah no go ever leave im servants.” After sometime, our organization give brothers and sisters food and them share give Sister Prisca too. Sister Prisca get food and other things wey e need because of the things wey we contribute. This one really touch the people wey laugh-am before and them tell-am say, “Your God no disappoint you, so we want learn about-am.” Seven of them start to attend meeting.

13. How our character fit praise Jehovah? (Psalm 96:9)

¹³ Read Psalm 96:9. We fit praise Jehovah with our good character. The priests wey de work for temple need to de wash and make their body clean. (Ex. 40:​30-32) We too need to dey clean, but no be only for our body, we still need to run from the things wey Jehovah hate. (Ps. 24:3, 4; 1 Pet. 1:​15, 16) Bible talk say we need to remove “the old character” and wear “the new character.” This one mean say we need to de do our best make we no de think or do wetin Jehovah no like. Instead, we need to learn to de think and do things wey go show say we de copy Jehovah example and im better-better character. (Col. 3:9, 10) Jehovah fit help even people wey de do things wey bad well-well to fit wear the new character.

14. Wetin you learn from Jack example? (Still check the picture.)

¹⁴ Make we see the example of one man wey im name na Jack. The man wicked sotey them de call-am Demon. Because of the bad things wey e do, court judge-am say them go kill-am. But as Jack de wait for the time wey them go kill-am, e agree to study Bible with one brother wey visit the prison wey e dey. Even though say Jack don do plenty bad things, e change im life and after some time, e baptize as Jehovah Witness. Jack change im life sotey for the day wey them go kill-am, some of the people wey de guard the prison de cry as them de tell-am bye-bye. One man wey de work for the prison talk say: “Before, Jack na the worst prisoner for this place, but now e be one of the best.” The week after them kill Jack, some brothers wey go the prison to do midweek meeting see one prisoner wey come the meeting for the first time. Wetin make the man attend? E really touch the man to see how Jack change im life and e want learn about Jehovah to fit  worship-am. E clear say our good character fit praise Jehovah!—1 Pet. 2:12.

HOW JEHOVAH GO SHOW FOR FUTURE SAY NA IM THEM SUPPOSE PRAISE?

15. How Jehovah go make-am clear to everybody say na im them suppose praise? (Psalm 96:​10-13)

¹⁵ Read Psalm 96:​10-13. The last verses for Psalm 96 describe Jehovah as King and Judge wey de always do wetin correct. How Jehovah go show for future say na im them suppose praise? E go do this one when e de judge. Small time, Jehovah go destroy all lie-lie religion because them de spoil im name. (Rev. 17:5, 16; 19:1, 2) Some people fit come worship Jehovah with us when them see how Jehovah destroy all lie-lie religion. For the end, Jehovah go destroy this wicked world wey Satan de rule and all the people wey de support Satan and de talk lie-lie things about Im name for Armageddon. But Jehovah go save all the people wey love-am and de praise im name. (Mark 8:38; 2 Thess. 1:​6-10) After the final test wey go happen after the end of the One Thousand Year Wey Jesus Go Rule, Jehovah go don make-am clear to everybody say na im them suppose praise. (Rev. 20:​7-10) That time, “knowledge about the glory of Jehovah go full the earth just as water de cover the sea.”—Hab. 2:14.

16. Wetin you don make up your mind to do? (Still check the picture.)

¹⁶ We go really happy when everybody wey dey alive de give Jehovah the praise wey e suppose get! But until that time, we fit do our best now to use any chance wey we get to praise Jehovah name. To help us put mind for this important work wey we get to praise Jehovah name, Governing Body don choose Psalm 96:8 as our yeartext for 2025, wey talk say: “Give Jehovah the praise wey e suppose get because of im name.”