1. Wetin we fit do to make Jehovah happy?

 JUST think-am say you give somebody one special gift wey fine well-well and na wetin the person go fit use. E go really pain you if you see say the person just put-am for one corner and e no even de think about-am again. But you go really happy if you see say the person de use the gift wey you give-am and e thank you well-well for the gift. Wetin be the point? Jehovah don send im Son Jesus make e come die for us. So e de make Jehovah happy well-well when we show say we value the gift wey e give us and the love wey e show us as e send im Son to die for us.—John 3:16; Rom. 5:7, 8.

 2. Wetin we go talk about for this article?

² As time de go, e dey possible say we fit stop to de see Jesus sacrifice as special gift from Jehovah. E go just be like say we put this gift wey Jehovah give us for one corner and we no de use-am or even think about-am. If we no want make this kind thing happen to us, we need to continue to think about everything wey Jehovah and Jesus don do for us. This article go help us fit do this one. We go talk about how we de gain from Jesus sacrifice now, and wetin we go gain from-am for future. We go still talk about wetin we fit do to show say we value the love wey Jehovah show us, especially for this Memorial time.

HOW WE DE GAIN FROM JESUS SACRIFICE NOW?

 3. Wetin be one way wey we de gain from Jesus sacrifice now?

³ We already de gain from Jesus sacrifice. For example, because Jesus die for us, Jehovah fit forgive our sins. No be must  say Jehovah go forgive us. But e want forgive us. One of the people wey write the book of Psalm show say e de happy because Jehovah de forgive. E talk say: “You, O Jehovah, you good and you ready to forgive.”—Ps. 86:5; 103:3, 10-13.

 4. Which kind people Jehovah send im Son make e die for? (Luke 5:32; 1 Timothy 1:15)

⁴ Some of us fit de feel say we no be the kind person wey Jehovah fit forgive. The truth be say, nobody fit talk say Jehovah suppose forgive-am. Apostle Paul understand this one, and na im make-am talk say: “I no reach make them call me apostle.” But e still talk say: “Na the special favor of God make me be wetin I be.” (1 Cor. 15:9, 10) When we repent, Jehovah de forgive us. Why? No be because e must forgive us, but na because e love us. So if you de think say you no be the kind person wey Jehovah fit forgive, remember say Jehovah send im Son to die, no be for people wey no get sin, but for people wey commit sin and repent.—Read Luke 5:32; 1 Timothy 1:15.

 5. Anybody suppose feel say Jehovah must forgive-am? Explain.

⁵ Nobody suppose feel say Jehovah suppose forgive-am because e don worship Jehovah for many years. The truth be say Jehovah no de forget everything wey we do to worship-am. (Heb. 6:10) E give us the life of im Son for free, no be to use-am pay us for things wey we don do for-am. So, if we de think say because we don do plenty things for Jehovah, e suppose forgive us, then e mean say we de talk say we no need Jesus sacrifice.—Compare Galatians 2:21.

 6. Why apostle Paul do im best for Jehovah worship?

⁶ Apostle Paul know say no matter wetin e do for Jehovah service, that one no go reach for-am to pay for im sin. So why e do im best for Jehovah worship? E do like that to show say e value the special favor wey Jehovah show-am. (Eph. 3:7) Like apostle Paul, we continue to serve Jehovah with all our heart, no be because na im go make Jehovah forgive us, but because we love-am and we value wetin e do for us.

 7. Wetin be another way wey we de gain from Jesus sacrifice now? (Romans 5:1; James 2:23)

⁷ Another way wey we de gain now because Jesus die for us be say, we fit get better friendship with Jehovah. a As we talk for the article before this one, when them born us, we no get any friendship with Jehovah. But because of Jesus sacrifice, we fit enjoy “peace with God” and this one make us fit near-am and be im friend.—Read Romans 5:1; James 2:23.

 8. Why we suppose thank Jehovah as e allow us to pray to-am?

⁸ We fit pray to Jehovah because we get better friendship with-am. Jehovah no de only hear the prayer wey we de pray for meeting or when we gather with other people, but e still de hear the prayer wey each of us de pray. Prayer fit make our mind come down and give us peace of mind. But another gain dey wey better pass this one. Prayer de make our friendship with Jehovah strong more-more. (Ps. 65:2; Jas. 4:8; 1 John 5:14) When Jesus dey this earth, e de always pray because e know say Jehovah go hear im prayer and e go make im friendship with im Papa strong. (Luke 5:16) E de sweet us to know say because of Jesus sacrifice, we fit be Jehovah friend, and even talk to Jehovah for prayer.

 WETIN WE GO GAIN FROM JESUS SACRIFICE FOR FUTURE?

 9. How people wey continue to worship Jehovah go gain for future from Jesus sacrifice?

⁹ How people wey continue to worship Jehovah go gain for future because Jesus die for us? Jehovah go give them life wey no go end. Many people think say e no dey possible for us to live forever because no be today people start to die. But when Jehovah make Adam and Eve, e get-am for mind for them and their children to live forever. So if to say Adam no sin, nobody go de think say e no dey possible for us to live forever. Everybody for de live forever. Even though say e fit no dey easy for us to really understand how person fit live forever, we know say e go happen, because Jehovah pay the price wey high pass wey be the life of im own Son to make-am possible.—Rom. 8:32.

10. Wetin anointed Christians and the other sheep de wait for future?

¹⁰ Even though say na for future we go get life wey no go end, Jehovah still want make we de think about-am now. Anointed Christians de happy to go heaven go rule the earth with Jesus. (Rev. 20:6) The other sheep de wait to live for Paradise for this earth, where pain and suffer-suffer no go dey again. (Rev. 21:3, 4) You be one of the other sheep wey de wait to live forever for this earth? This one no be small reward. Jehovah make us to live forever for this earth. So to live forever for Paradise for this earth go really make us happy.

11-12. Wetin be some blessings wey we de wait for Paradise? (Still check the picture.)

¹¹ Just think about how life go be for you for Paradise for this earth. You no go worry about sickness or death. (Isa. 25:8; 33:24) Jehovah go give you all the good things wey you want. Wetin you go like to learn for Paradise? You go like to learn more about animals, play music instrument, or learn how to draw? The truth be say, we go need people wey know how to draw plan for house, people wey de build house, and people wey go work for  farm. And we go still need people wey go de do other things like to prepare food, to make things wey people go use, plant gardens and care for them. (Isa. 35:1; 65:21) Because you go live forever, you go get time to learn anything wey you want learn.

¹² We go really happy well-well to welcome people wey don come back to life. (Acts 24:15) Just think how you go happy to learn more things about Jehovah from the plenty things wey e don make. (Ps. 104:24; Isa. 11:9) And the one wey sweet pass be say, you go dey perfect and you go fit worship Jehovah without sin. You go like miss this better blessings for Paradise just to get “the enjoyment of sin wey be for short time”? (Heb. 11:25) E no go make sense! The wonderful blessings wey we go enjoy for Paradise better pass anything wey this world fit give us. Remember say, one day, we go stop to wait for Paradise because we go don already de live there. All this things no go dey possible if to say Jehovah no love us and allow Jesus make e die for us.

WETIN YOU FIT DO TO THANK JEHOVAH FOR THE LOVE WEY E SHOW US?

13. How we fit show Jehovah say we value wetin e do for us? (2 Corinthians 6:1)

¹³ How we fit show Jehovah say we value wetin e do for us as e give us im Son as sacrifice? One way wey we fit do this one na to put im worship as number one thing for our life. (Matt. 6:33) The truth be say, Jesus die “so that people wey dey alive no go live for theirself again, but them go live for the person wey die for them and wey come back to life.” (2 Cor. 5:15) Jehovah don show us mercy and e de forgive us. If we use all our heart worship-am, this one go show say we value wetin e don do for us.—Read 2 Corinthians 6:1.

14. How we fit show say we trust the direction wey Jehovah de give?

¹⁴ Another way wey we fit show Jehovah say we value wetin e do for us na to trust Jehovah and follow any direction wey e give us. How we fit do this one? We fit do this one when we de make decision. For example, when we want make decision about the level wey we go go school reach, or the kind work wey we go do, we go check wetin Jehovah want make we do. (1 Cor. 10:31; 2 Cor. 5:7) When we make decisions wey show say we trust Jehovah, this one go make our faith for Jehovah and our friendship with-am strong more-more. And our hope to live forever go dey sure more-more.—Rom. 5:​3-5; Jas. 2:​21, 22.

15. For Memorial time, how we fit show Jehovah say we value wetin e do for us?

¹⁵ Which other way we fit still show Jehovah say we value wetin e do for us? Na to use this time for Memorial to show Jehovah say we value-am as Jesus die for us. We no go only plan to attend Memorial, but we go still invite  other people to join us. (1 Tim. 2:4) Explain wetin go happen for Memorial to the people wey you invite. You fit show them videos like Why Jesus Die? and Remember Jesus as E Die for Everybody, for jw.org. Elders go do their best to make sure say them invite brothers and sisters wey no de come meeting again. Think about the joy wey go dey for heaven and for this earth if person wey no de serve Jehovah again come start to worship-am. (Luke 15:​4-7) When we attend Memorial, make we no only greet our brothers and sisters, but make we do our best to greet people wey come our meeting for the first time, and people wey e don tey wey them attend meeting. We want make them happy as them dey with us.—Rom. 12:13.

16. Why e good make we preach more for Memorial time?

¹⁶ You fit do more for Jehovah service for Memorial time? This na one way to show say you value everything wey Jehovah and Jesus don do for you. The more we preach, the more we go see say Jehovah de help us, and we go fit trust-am more. (1 Cor. 3:9) Another thing be say, try to do Memorial Bible reading wey them put for Learn From Bible Everyday or follow the program wey them put for Our Christian Life and Preaching—Meeting Workbook. You fit even decide to use this verse them for your personal Bible study.

17. Wetin de make Jehovah happy? (Still check the box “ How You Fit Show Say You Value the Love Wey Jehovah Show Us?”)

¹⁷ Your condition fit no allow you do everything wey we don talk about for this article. But remember say, Jehovah no de compare wetin you de do with wetin other people de do. E de see your heart and e value wetin you fit do. E de happy well-well when e see say you de use all your heart show say you value the gift wey e give you as e allow make e son die for you.—1 Sam. 16:7; Mark 12:​41-44.

18. Why we suppose thank Jehovah and Jesus?

¹⁸ Because Jesus die for us, Jehovah fit forgive our sins, we fit get better friendship with Jehovah, and still get the hope to live forever. Make we continue to show say we value the love wey Jehovah show us, because na love move-am to give us this blessings. (1 John 4:19) And make we de always show say we value wetin Jesus do for us as e love us sotey e die for us!—John 15:13.