STUDY ARTICLE 3
SONG 35 “De Do the Important Things”
How You Fit Make Decisions Wey Go Make Jehovah Happy?
“To fear Jehovah na the start of sense, and to know the Person Wey Holy Pass mean to understand.”—PROV. 9:10.
WETIN WE GO LEARN?
For this article, we go learn how we fit use the information wey we get, wetin Jehovah de think and deep sense to make better decision.
1. Wetin we need to do everyday?
EVERYDAY we need to make decisions. Some of them dey easy to make, like wetin we go chop for morning or which time we go sleep for night. But some other decisions no easy to make. Them fit affect our health, make us happy or sad, affect the people wey we love, or even our friendship with Jehovah. We want make we and our family gain from the decisions wey we de make. But the one wey dey important pass be say, we want make our decisions make Jehovah happy.—Rom. 12:1, 2.
2. Wetin we fit do to make better decisions?
2 You go fit make better decision if you (1) gather all the information wey you need to know about the matter, (2) try to know wetin Jehovah de think, and (3) think well about the different-different choice wey you get for the matter. For this article, we go discuss this three things wey we need to do to fit make better decisions and see how them fit help us train our mind to know the difference between wetin good and wetin bad.—Prov. 2:11.
GATHER ALL THE INFORMATION WEY YOU NEED
3. Which example fit help you understand why you need to gather all the information wey you need before you make decision?
3 The first thing wey you need to do to fit make better decision na to find out everything wey you need to know about the matter. Why e dey important? Just think-am say person go meet doctor because e get serious sickness. The doctor go just decide which treatment e go give the person when e never first check the person or ask-am question? No, e no go do like that. You too go fit make better decisions if you first gather all the information wey you need to know about the matter wey dey ground. How you fit do this one?
4. With wetin Proverbs 18:13 talk, how you fit make sure say you gather all the information wey you need to make better decision? (Still check the picture.)
4 You fit gather the information wey you need when you de ask questions. For example, make we talk say them invite you to one party. You go go? If you no really know the person wey de do the party or how e don plan to do the party, you go need to ask-am some questions like: “Where and when them go do the party? How many people go dey there? Who go make sure say everything go well for the party? Which kind people them invite to the party? Wetin them go do for the party? Them go share alcohol for the party?” The answers wey you go get go help you fit make better decision.—Read Proverbs 18:13.
Ask questions to fit get all the information wey you need (Check paragraph 4) a
5. Wetin you go do after you don gather the information wey you need to make decision?
5 After you don gather all the information wey you need, think about how e go affect your decision. For example, you find out say some people wey no de do wetin Jehovah want, go attend the party or you hear say them go share alcohol for the party, but nobody go dey there to make sure say people no drink too much. You think say this kind party no go turn to party wey people go de behave anyhow? (1 Pet. 4:3) Or what if the time for the party na the same time for your meeting or time for your preaching? When you don think about the information wey you gather, e go dey easy for you to make better decision. But something still dey wey you need to do. You know how you de see the situation, but how you think say Jehovah de see-am?—Prov. 2:6.
TRY TO KNOW WETIN JEHOVAH DE THINK
6. As e dey for James 1:5, why we need to pray make Jehovah help us?
6 Pray to Jehovah make e help you understand wetin e think about the matter. Jehovah don promise say e go give us sense to fit know if our decision go make-am happy. E de give us this kind sense because “[e] get open hand and e de give everybody. E no de disgrace person.”—Read James 1:5.
7. When you want make decision, how you fit know wetin Jehovah de think about the matter? Give example.
7 After you don pray make Jehovah direct you, try see how e answer your prayer. For example, if you lost as you de travel because you no know road to where you de go, you fit ask person wey de stay for the area make e help you. But you go waka comot before the person answer you? E clear say you no go do like that. You go sofri listen to the person as e de show you road. Na so e still be, after you don pray say make Jehovah give you sense to fit know how e de see the matter, try check if you fit see any law and advice for Bible wey fit help you for your situation. For example, before you decide whether you go go the party wey we don talk about before, you fit check wetin Bible talk about party wey people de behave anyhow, bad friends, and why e dey important to put God Kingdom as number one thing for our life, instead of wetin we want.—Matt. 6:33; Rom. 13:13; 1 Cor. 15:33.
8. Wetin you fit do to get information wey you need? (Still check the picture.)
8 Sometimes, you fit still need help to get information wey you need. Mature brother or sister fit give you better advice. But you go still gain well-well if you do your own research. You fit use Research Guide for Jehovah Witness and Bible Portions Wey Fit Help Christians to get information wey you need. Remember say wetin you want na to make decision wey go make Jehovah happy.
Try to know wetin Jehovah de think (See paragraph 8) b
9. How we fit dey sure say our decision go make Jehovah happy? (Ephesians 5:17)
9 How we fit dey sure say our decision go make Jehovah happy? The first thing be say, we need to know Jehovah well. Bible talk say: “To know the Person Wey Holy Pass mean to understand.” (Prov. 9:10) Na when we know Jehovah fine-fine character, wetin e get for mind, wetin e love and wetin e hate, then we fit talk say we understand the way Jehovah de think. Ask yourself say, ‘With wetin I know about Jehovah, which decision I fit make wey go make Jehovah happy?’—Read Ephesians 5:17.
10. Why e dey more important make we follow Bible advice than to make our family happy or follow our culture?
10 Sometimes, to fit make Jehovah happy, we go do some things wey no go make other people wey we love happy. For example, some papa and mama fit want make their daughter marry person wey get money well-well or person wey fit pay them big money for bride price, even though say the person no serious for Jehovah worship. Na true say them want make their daughter marry person wey fit care for-am, but who go help their daughter get better friendship with Jehovah? How Jehovah de see the matter? The answer dey Matthew 6:33. For there, Jesus talk say make we “continue to put the Kingdom . . . as the number one thing for [our] life.” The truth be say, we respect our papa and mama and people for our area, but wetin dey important pass na to make Jehovah happy.
THINK WELL ABOUT THE DIFFERENT-DIFFERENT CHOICE WEY YOU GET
11. As e dey for Philippians 1:9, 10, wetin go help us to fit check the different-different choice wey we get?
11 After you don check advice for Bible about the decision wey you want make, you need to take time think about the different-different choice wey you get. (Read Philippians 1:9, 10; check “full discernment” for study note, for nwtsty.) If you get deep sense, e go help you fit think about wetin fit happen if you follow any of the different choice wey you get. Some decisions dey easy to make. But no be every decision dey simple. Deep sense go help you fit make better decision even for matter wey no dey easy.
12-13. How deep sense go help you fit make better decision about which work you go do?
12 Think about this situation. You de look for work wey go help you fit take care of your family. Them call you to come work for two place. You check all the information wey you don gather like the kind work, the time wey you go de spend for work, time wey you go take reach work place, and other things. The two work na work wey Christian fit do. E fit be say you like one of the work pass the other one because you like that kind work or the money wey them go pay big pass the other one. But other things still dey wey you suppose check before you decide.
13 For example, any of the work go make you de miss meeting? Any of the work go make you no get time for your family to fit care for them and help them near Jehovah? If you ask yourself this kind questions, e go help you “make sure say [you] de choose the things wey dey important pass,” wey be your friendship with Jehovah and your family, instead of to de pursue money and property. Then you go fit make decision wey go make Jehovah happy.
14. How deep sense and love fit help us no do things wey go shake the faith of other people?
14 Deep sense go still help us think about how our decision go affect other people, so that we go fit run from anything wey “go shake the faith of other people.” (Phil. 1:10) This one dey important especially when we de make decision about the kind cloths wey we go wear and how we go care for our body. For example, we fit like one particular style of cloth or way to dress or hairstyle. But what if some people for congregation or other people no like-am? Deep sense go help us to fit respect the way them de feel. Love go make us de think about wetin go benefit “another person” and no de overdo things. (1 Cor. 10:23, 24, 32; 1 Tim. 2:9, 10) Then, we go fit make decision wey show say we love and care for other people.
15. Wetin you need to do before you make important decision?
15 If you de make one important decision, think about wetin you need to do to make the decision work. This na wetin Jesus advice us to do. (Luke 14:28) So think about the time, the things wey you need, and the power wey you go use to make the decision work. Sometimes, you fit need to talk to your family members to know wetin each person for family go need to do to fit make the decision succeed. Why e dey important make you do like that? This one fit make you see say you need to adjust some things for your decision, or even change-am to another one wey go better pass. And when you listen to ideas from your family members, e go make them ready to work with you to make the decision succeed.—Prov. 15:22.
MAKE DECISION WEY GO SUCCEED
16. Wetin fit help you make decision wey go succeed? (Still check the box “ How to Make Better Decision.”)
16 If you do all the things wey we don talk for this article, you go fit make better decision. If you don gather all the information wey you need and check advice from Bible, e go help you make decision wey go make Jehovah happy. Then you fit pray to Jehovah say make e help you make your decision succeed.
17. Wetin be the main thing wey go help you fit make good decisions?
17 Even if you don de make many decisions wey de succeed before, remember say the main thing wey go help you fit continue to make better decisions na to trust the sense wey come from Jehovah, no be your own sense. Because na only Jehovah fit help you understand matter well and give you the sense wey you need to fit make better decision. (Prov. 2:1-5) Jehovah fit help you make decision wey go make-am happy.—Ps. 23:2, 3.
SONG 28 Who Fit Be Your Friend Jehovah?
