1. Wetin be one reason why Jehovah give us the gift of marriage?

 JEHOVAH na “the happy God,” and e want make all of us dey happy too. (1 Tim. 1:11) E don give us plenty gifts wey fit make us enjoy life. (Jas. 1:17) One of this gifts na the gift of marriage. When man and woman marry, them promise say them go love, respect, and value each other. True-true, when husband and wife continue to make their love strong, e fit really make them happy.—Prov. 5:18.

 2. Wetin de happen for many marriage today?

² E pain us to know say many husband and wife for this our time don forget the promise wey them make the day wey them marry. Because of this one, many of them no de happy for their marriage. One report from the World Health Organization talk say many husband de beat their wife, de talk to them for way wey go pain them reach bone, and them de do other things wey de make their wife dey sad. Some husbands de pretend say them love their wife and dey kind to them for public, but when them dey house, them de show their wife pepper. And another thing wey de make some wife no happy for their marriage, na when their husband de look picture or film of naked people.

 3. Wetin de make some husband treat their wife for bad way?

³ Wetin de make some husband treat their wife for bad way? E fit be say na so their papa treat their mama. So when them grow, them fit de think say na normal way to treat their wife be that. Other men de treat their wife for bad way because na so them de do for their area or culture. This men de feel say them go need to dey harsh so that their wife go know say na them be the “oga” for the house. Other men no learn how to control theirself when them de vex. And because some men de always look picture or film of naked people, them no de see women and sex for the correct way. Apart from this one, some reports show say the things wey COVID-19 cause, don make many husband start to treat  their wife for bad way. But the truth be say, all this one no be reason for husband to treat im wife for bad way.

 4. Wetin husband wey be servant of Jehovah go need to dey careful of, and why?

⁴ Husband wey be servant of Jehovah go dey careful make e no de see women the way people for the world de see them. a Why? One reason be say, na wetin person de think de affect the way e de behave. Apostle Paul warn anointed Christians for Rome make them “stop to allow this world to mold” them. (Rom. 12:1, 2) When Paul write this letter to the Christians for Rome, e dey clear say the people for the congregation don be Christians for many years. But, wetin Paul talk show say some people for the congregation still de allow the things wey the world de do and the way the world de think to affect them. Na im make Paul encourage them to change how them de think and behave. This advice still concern husbands wey de serve Jehovah today. E pain us to know say some of them don allow the way the world de think to affect them and make them to treat their wife for bad way. b How Jehovah want make husband de treat im wife? We see the answer for the Bible verse wey them take the topic of this article from.

 5. As e dey for 1 Peter 3:7, how husband suppose treat im wife?

⁵ Read 1 Peter 3:7. Jehovah command husbands make them honor their wife. To honor person mean to treat the person with respect. Husband wey honor im wife go show-am love and treat-am for kind way. For this article, we go talk about how husband fit honor im wife. But make we first talk about the kind behavior wey no de show love and respect for wife.

NO DO ANY BAD THING WEY GO MAKE YOUR WIFE NO HAPPY

 6. How Jehovah de feel about men wey de beat their wife? (Colossians 3:19)

⁶ Make husband no de beat im wife. Jehovah hate anybody wey like fight-fight. (Ps. 11:5) Jehovah really hate-am when husband de beat im wife. (Mal. 2:16; read Colossians 3:19.) As e dey for 1 Peter 3:7, if husband no treat im wife well, this one go affect im friendship with God. In fact, Jehovah fit no even listen to im prayer.

 7. As e dey for Ephesians 4:​31, 32, how husband no suppose de talk to im wife? (Still check “Word Wey We Explain.”)

⁷ Make husband no de shout for im wife or talk to-am for way wey go pain-am. Some husbands de shout for their wife and talk things wey de really pain their wife. But Bible talk say Jehovah hate “vex, hot temper, shout-shout, and curse-curse.” c (Read Ephesians 4:​31, 32.) Jehovah de hear everything. The way husband de talk to im wife when them dey alone really matter to Jehovah. Husband wey de talk to im wife for harsh way de scatter im marriage and spoil im friendship with God.—Jas. 1:26.

 8. How Jehovah de feel when person de look picture or film of naked people, and why?

⁸ Make husband no de look picture or film of naked people. How Jehovah de feel when person de look picture or film of naked people? E hate-am. So husband wey de look picture or film of naked people de spoil im friendship with Jehovah, and e no de show respect for im  wife. d Jehovah want make husband show say e hold im wife tight for the things wey e de think and do. Jesus talk say any man wey continue to de look another woman sotey e want sleep with-am, don already sleep with-am “for im heart.” e—Matt. 5:​28, 29.

 9. Why Jehovah hate-am when husband de force im wife to do things wey go make im wife conscience judge-am when them de sleep with each other?

⁹ Make husband no de force their wife to do things wey go make the wife conscience judge-am when them de sleep with each other. Some husband de force their wife to do some things wey go make the wife feel bad or wey go make im conscience judge-am when them de sleep with each other. Jehovah hate this kind behavior. Why? Because this behavior de show say the man de think only about imself, and e no de care about how im wife de feel. E want make husbands love their wife and respect how their wife de feel, and make them de carry their wife like egg. (Eph. 5:​28, 29) What if husband wey de serve Jehovah don already de treat im wife for bad way, and de look picture or film of naked people? How e fit change?

HOW HUSBANDS FIT STOP TO DO THINGS WEY NO DE SHOW HONOR TO THEIR WIFE

10. How husband fit gain from Jesus example?

¹⁰ Wetin fit help husband stop to treat im wife for bad way? Make e try im best to copy the example of Jesus. Na true say Jesus no marry, but how e treat im disciples na better example for how husband suppose treat im wife. (Eph. 5:25) For example, make we see wetin husband fit learn from the way Jesus treat im apostles and from the way e talk to them.

11. How Jesus treat im apostles?

¹¹ Jesus always dey kind and treat im apostles with respect. E no ever dey harsh to them. Na true say na im be their Lord and Master, but e no use im power to make them feel say e better pass them or make them de fear-am. Instead, e do the work wey slave suppose do to care for them. (John 13:​12-17) E tell im disciples say: “Learn from me, because I dey gentle and de carry body down, and una go dey strong again.” (Matt. 11:​28-30) Notice say Jesus dey gentle. Person wey dey gentle no be weak person. Instead, e get the power to fit control imself. When e de vex, e go dey calm and still de control how e de feel.

12. How Jesus talk to other people?

¹² Jesus de comfort and encourage other people with wetin e de talk. E no dey harsh when e de talk to im disciples. (Luke 8:​47, 48) Even when people wey hate-am try to make-am vex, “e no curse them back.” (1 Pet. 2:​21-23) Sometimes, Jesus go just dey quiet instead make e talk for harsh way. (Matt. 27:​12-14) This one na better example for husbands wey de serve Jehovah!

13. As e dey for Matthew 19:​4-6, how husband fit “dey tight with im wife”? (Still check the picture)

¹³ Jesus tell husbands make them no leave their wife. E talk wetin Jehovah talk when e say husband “go dey tight with im wife.” (Read Matthew 19:​4-6.) The Greek word wey them use for “tight” for this verse, mean “to gum” something together. So, the love wey husband and wife get for each other suppose strong well-well like say them use super glue gum them together. If one of them do something wey bad for the marriage, na the two of them go suffer. Husband wey really dey close to im wife no go put hand for dirty things like to de look  picture or film of naked people. E go quick-quick comot im eyes from “things wey dey useless.” (Ps. 119:37) Like Job, e go just be like say e make agreement with im eye say e no go look any other woman apart from im wife and e no go de think wetin no clean.—Job 31:1.

14. Which things husband wey de treat im wife for bad way need to do to fit repair im friendship with Jehovah and with im wife?

¹⁴ Husband wey de beat im wife, or talk to-am for way wey de pain-am, need to do some things to fit repair im friendship with Jehovah and with im wife. Wetin be this things wey e must do? Number one, e must understand say e get serious problem. Jehovah de see everything wey e de do and de hear everything wey e de talk. (Ps. 44:21; Eccl. 12:14; Heb. 4:13) Number two, e go stop to de treat im wife for bad way and change the way e de behave. (Prov. 28:13) Number three, e go beg im wife and Jehovah make them forgive-am. (Acts 3:19) Make e still beg Jehovah to give-am the mind to change and help-am to control how e de think, wetin e de talk, and the things wey e de do. (Ps. 51:​10-12; 2 Cor. 10:5; Phil. 2:13) Number four, e go try im best to do wetin e de pray about, hate any kind of fight-fight and stop to de use words wey de pain. (Ps. 97:10) Number five, e go need to quick go meet the elders for congregation make them help-am. (Jas. 5:​14-16) Number six, e go get plan wey go help-am make e no do all this kind things again. Husband wey de look picture or film of naked people go still follow this six things wey we don talk for this paragraph. Jehovah go give-am the help wey e need to fit change. (Ps. 37:5) But the husband no go only stop to do things wey no go make im wife happy, e go still start to de do things wey go show say e de honor im wife. How e fit do this one?

HOW TO HONOR YOUR WIFE

15. How husband fit show say e love im wife?

¹⁵ Do things wey go show say you love your wife. Some brothers wey de really enjoy their marriage de make sure say them de do something everyday to show their wife say them really love them. (1 John 3:18) Husband fit show say e love im wife with some simple-simple  things like to de hold im hand or to de hug-am. E fit send short message to-am and tell-am say “Honey, I de think about you” or ask-am say “How your day de go?” E fit write how e really love im wife reach for card or letter and give-am. When husband de do this things wey we don talk, e de honor im wife and make their marriage strong.

16. Why e good make husband de praise im wife?

¹⁶ Always tell your wife say e dey special to you. Husband wey de honor im wife de talk wetin go make im heart sweet, and de always tell-am why e value-am. One way e de do this one, na to always de thank im wife for all the things wey e de do to support-am. (Col. 3:15) When husband de praise im wife from im heart, e go make im wife happy well-well. When husband de always tell im wife wetin e love about-am, e go make the wife mind come down, the wife go feel-am say im husband love-am, and say im husband de honor-am.—Prov. 31:28.

17. How husband fit show respect for im wife?

¹⁷ Dey kind and de show your wife respect. Husband wey really love im wife de value-am and de carry-am like egg. E de see im wife as beautiful gift from Jehovah. (Prov. 18:22; 31:10) Because of this one, e de treat im wife for kind way and de show-am respect, even when e de sleep with im wife. E no go force im wife to do things wey go make im wife feel bad or wey go make im wife conscience de judge-am when e de sleep with im wife. f Even the man go try im best make e no do anything wey fit make im own conscience de judge-am.—Acts 24:16.

18. Wetin husband go make up im mind to do? (Still check the box “ Four Things Wey Husband Fit Do to Show Respect for Im Wife.”)

¹⁸ Husbands, you fit dey sure say Jehovah value everything wey you de do to honor your wife with wetin you de talk and do. Make up your mind to continue to honor your wife. How? No do anything wey bad wey no go make your wife happy, dey kind to your wife, de show-am respect, and do things wey show say you really love-am. If you do like this, you de show say you love and value your wife. When you honor your wife, you de protect the friendship wey dey important pass—your friendship with Jehovah.—Ps. 25:14.