JESUS talk say: “The things to harvest plenty, but people wey they go do the work no plenty. So, make wuna beg the Master of the harvest make e send people go harvest e farm.” (Luke 10:2) This thing wey Jesus talk about 2,000 years ago, really show wetin de happen for Myanmar for this our time. Why e dey like that? Myanmar get around 4,200 publishers wey them de preach the good news. But the country get 55 million people.

But Jehovah, “the Master of the harvest,” don touch the heart of many brothers and sisters from different-different country make they go help preach for Myanmar. Na for Southeast Asia this country dey. Wetin make them leave their country? Wetin help them fit leave their country? And which blessing them de enjoy? Make we see-am.

Kazuhiro na one pioneer for Japan. Some years ago, this brother faint because e get epilepsy. When they take the brother go hospital, doctor talk say make e no drive motor for two years. The thing wey doctor talk surprise Kazuhiro. So e ask e self say, ‘How I go fit continue with my pioneer work wey I really like?’ Kazuhiro pray and beg Jehovah for help so that e go fit continue to preach as pioneer.

Kazuhiro talk say: “After one month, my friend wey e de serve for Myanmar hear about my condition. E call me and tell me say: ‘For Myanmar, any place wey person want go, na bus e go use. So if you come this place, you fit continue as pioneer and you no go need car.’ Then I go ask my doctor if my condition fit allow me go stay for Myanmar. E tell me say: ‘As we de talk so, one brain doctor from Myanmar de visit Japan. I go arrange make you and the doctor see. If your sickness worry you again, e go fit help you.’ I no expect wetin my doctor tell me. So, I believe say Jehovah answer my prayer.”

Kazuhiro and e wife decide say them go go Myanmar. So, Kazuhiro no waste time, e send mail to Myanmar branch office. E tell them say they go like to serve as pioneer for that country. Just after five days, the branch office tell them say: “Make wuna come, we need more pioneers!” Kazuhiro and e wife, wey e  name na Mari, sell the two car wey they get. After, they give them visa and Kazuhiro and e wife pay for their plane ticket. Today, them dey happy as them de serve with one sign-language group, for one city wey the name na Mandalay. Kazuhiro talk say: “Because of this thing wey e happen for our life, we feel say our faith for wetin Bible talk for Psalm 37:5 don strong more-more. E talk say: ‘Trust Jehovah, put everything for e hand, and e go help you.’”

For 2014, they arrange special convention for Myanmar. So, plenty brothers and sisters from different-different country come the convention. One of them na Monique from United States. This sister dey around 35 years and e talk say: “When I go back after the convention, I pray make Jehovah help me make I know the next thing wey I go do for my life. I tell my papa and mama wetin I plan to do for Jehovah. Me and my family feel say e good make I go Myanmar again. But e no just easy make I go like that. So, I pray plenty times before I make my final decision.” Why e take Monique some time to decide?

E talk say: “Jesus tell e disciples make they ‘calculate the cost.’ Na e make I ask myself say: ‘I get money wey I go use go another country? I go fit support myself for there, make I no spend plenty time de do other work?’” E still talk say: “Then I just notice say I no get enough money wey e go fit take me go another country.” So, wetin help Monique make e fit travel go another country?​—Luke 14:28.

E talk say: “One day, my oga for work call me. I begin fear say e go sack me from work. But instead, e thank me for my fine work. And e tell me say e don arrange make they give me bonus. The money wey they give me na just the correct amount wey I need!”

Monique don de serve for Myanmar since December 2014. How e de feel to preach for another country wey they need more publishers? E talk say: “E sweet me say I come here.” E still say: “I get three Bible student and one of them dey 67 years. E de always smile and hug me when e de greet me. When e learn say the name of God na Jehovah, e begin cry. E tell me say: ‘Na the first time for my life wey I learn say the name of God na Jehovah. You really young pass me, but you don teach me something wey e dey important pass anything wey I don ever know.’ Me self begin cry too. When you meet people like this, e de give you joy to preach for place wey they need more publishers.” And Jehovah don bless Monique to attend the School for Kingdom Evangelizers.

Another thing wey e make some brothers come stay Myanmar, na the story wey they read for our 2013 Yearbook about this country. One sister wey e dey around 30 years don de live for Southeast Asia before e pack go Myanmar. E name na Li. This sister get work wey e de do. But because of the thing wey e read for the Yearbook, e begin think how e go pack go Myanmar go de preach. The sister talk say: “For 2014, I attend one convention for Yangon. Na for there I see one husband and wife wey they leave their country come de preach for Myanmar. For there, na Chinese people them de preach to. Since I sabi Chinese language, I pack go Myanmar and I begin support the Chinese group. I arrange with Monique, so we pack go Mandalay for Myanmar. Jehovah bless us. We see part-time work as teacher for the same school, and we see house wey e near the school. Even though say the weather hot and I never master plenty things for the area, I still de enjoy my preaching for here. Life no easy for people for Myanmar. But they sabi talk to person with respect, and they ready to hear the good news. I really dey happy the way Jehovah de make the work grow fast-fast. I get strong belief say na Jehovah want make I come Mandalay.”

Some of this brothers and sisters don see say prayer get power. Jumpei and e wife, Nao, na one example. Two of them dey around 35 years. Them dey sign-language congregation for Japan before they pack go Myanmar. Wetin make them pack go Myanmar go de preach? Jumpei talk say: “Me and my wife don always get-am for mind to go stay another country wey they need more publishers to preach. One brother wey e dey the same congregation with us for Japan pack go Myanmar. Even though say we no save plenty money, for May 2010 we self pack go Myanmar. The brothers and sisters for Myanmar really welcome us!” How Jumpei feel as e de use sign-language preach for Myanmar? E talk say: “Plenty people want learn the truth. The deaf people wey we de preach to de happy when we show them sign-language video. We happy say we decide to come serve Jehovah for here!”

So, how Jumpei and Nao de manage their money? Jumpei talk say: “After three years, we don use almost all the money wey we save. The money wey we get no dey enough for us to pay our rent for the next year. So me and my wife begin beg Jehovah make e help us. Wetin happen surprise us! The branch office send us letter say they like make we serve as temporary special pioneers. We trust say Jehovah go help us, and true-true, e no leave us. E de give us all the support wey we need.” Jumpei and e wife just attend School for Kingdom Evangelizers.

Simone na one brother from Italy, and e dey around 45 years. E wife Anna, wey e come from New Zealand, don pass 35 years. Wetin make the two of them pack go Myanmar? Anna talk say: “Na the 2013 Yearbook wey e talk about Myanmar!” Simone talk say: “Na big blessing say we come Myanmar. Life for here dey simple, and I de get more time to work for Jehovah. Jehovah de help person wey e pack go place wey they need more publishers. This one de make person happy.” (Ps. 121:5) Anna talk say: “I never happy like this for my life before. We de live simple life. I de spend more time with my husband, and we don near each other pass before. We don get friends wey we value. And the way people de listen to the message de surprise us!” Why Anna talk like that?

Anna talk say: “I preach to one university student for market one day. And I arrange with the girl make we fit see again. The next time wey we meet, the girl come with e friend. Another time, e come with some people. And after, e come with more people. Now I de study with five of them.” Simone talk say: “People wey we de meet for preaching de behave well and they want learn. Plenty of them de listen to our message. We no de even fit visit everybody.”

But wetin brothers and sisters do before they fit decide say them de go Myanmar go stay? Mizuho na one sister from Japan. E say: “Me and my husband, Sachio,  want serve for country wey they no too get publishers. This kind thing don dey our mind since. But, na which place we go go? After we read our 2013 Yearbook about Myanmar, wetin we read touch our heart. So we begin think whether we fit serve for Myanmar.” Sachio talk say: “The main city for Myanmar na Yangon. So we decide say make we use one full week go see how the place dey. After we don see the place, we just know say na here we go come.”

Rodney and e wife, Jane, come from Australia. Two of them dey around 50 years. They get one son wey e name na Jordan, and one daughter wey e name na Danica. The four of them don dey for Myanmar since 2010. Rodney talk say: “We really like the way people for here want learn about God. I go talk with all my heart say make other family go serve for place wey e dey like Myanmar.” Why Rodney talk like that? E say: “E don really help our family near Jehovah no be small! Phone, car, work, and other things de take plenty young people their time. But our children de use their time learn new words wey they go use for preaching. Them de learn how they go fit talk with person wey e no too sabi Bible. They still de learn how to answer question for meeting with the language of the congregation wey we dey. Another thing be say, them de put all their heart for other things about Jehovah.”

One brother wey e name na Oliver, come from United States. E don nearly reach 40 years. E talk why e go advice make other people go this kind place. E talk say: “Even though say the condition for here dey different from my former place, I don gain plenty things. As I pack comot from my place, e don help me de trust Jehovah more-more no matter the condition wey I dey. Me and the people wey we dey together for here never meet before. But because we get the same belief, e don really help us dey as one. Na only among servants of Jehovah this kind thing fit happen.” Oliver and e wife, Anna, de use all their heart help Chinese people learn about Jehovah.

Trazel na one sister wey e dey 52 years. E come from Australia, and e don dey Myanmar since 2004. E say: “If person fit go serve for place wey they need more publishers, I go advice the person make e go. I don see say, if na wetin you really want do, Jehovah go help you do-am. I no ever believe say I go fit live this kind life. The life sweet and e de make person happy. I no ever dream of this kind life.”

This brothers and sisters wey they pack go Myanmar don talk plenty better things. Make this things touch your heart so that you fit go help people for place wey we need publishers. True-true, this brothers and sisters de talk say, “Abeg, make wuna come Myanmar come help us!”