1. Why we fit talk say na Jehovah get everything? (Check the first picture.)

NA JEHOVAH get everything! Na e “get heaven, even the heaven wey e high pass, and the earth with everything for inside.” (Deut. 10:14; Rev. 4:11) Because Jehovah give everybody life, na e get everybody. (Ps. 100:3) But among all the people wey they don live for this world, Jehovah don choose some people as e property for some special way.

2. Which people Jehovah talk for Bible say they be e own for special way?

² For example, Psalm 135 talk say servants of Jehovah for Israel that time na “e special property.” (Ps. 135:4) The book of Hosea don still talk-am before say Jehovah go choose some people as e own, even though they no come from Israel. (Hos. 2:23) Wetin Hosea talk happen when Jehovah begin choose people wey they no be Jew to rule with Christ for heaven. (Acts 10:45; Rom. 9:23-26) Bible talk say this people wey Jehovah choose na “holy nation.” They be “special people” for Jehovah for special way. E anoint them with holy spirit make they live for heaven. (1 Pet. 2:9, 10) But what about the many servants of God today wey their hope na to live for this earth? Jehovah still talk say they be e “people”  and “people wey [e] choose.”​—Isa. 65:22.

3. (a) Today, which people Jehovah really value as e people? (b) Wetin we go talk about for this topic?

³ The “little flock” na people wey they get hope to go heaven. The “other sheep” na people wey they get hope to live for this earth. Today, this two group na the “one group of sheep” wey Jehovah really value as e people. (Luke 12:32; John 10:16) For this reason, we want show Jehovah say we really glad as e choose us make we be e people. For this topic, we go talk about some things wey we fit do to thank Jehovah as e value us for special way.

4. Wetin be one way we fit thank Jehovah as e give us chance make we be e people, and wetin show say Jesus do the same thing?

⁴ Before we baptize, we use all our heart give Jehovah our life. We use this one tell Jehovah thank you. And when we baptize, we show everybody say na Jehovah get us. E still show say na Jehovah we don accept to obey. (Heb. 12:9) Na so e still be for Jesus when e baptize. E just dey like e de tell Jehovah say: “O my God, e de sweet me to do wetin you want.” (Ps. 40:7, 8, ftn.) Israel people for Bible time don already promise to serve only Jehovah. But even though say they born Jesus as pikin for Israel, e still give e life to Jehovah and use-am do wetin Jehovah want.

5, 6. (a) How Jehovah feel when Jesus baptize? (b) Even as Jehovah get everything, which example show say when we give Jehovah our life, e de value-am?

⁵ How Jehovah feel when Jesus baptize? Bible talk say: “After they baptize Jesus finish, e no waste time come out of the water and see! heaven open, and e see the spirit of God as e de come down like dove ontop e body. Look! One voice still talk from heaven say: ‘Na my Son be this, the one wey I love. E de make me happy.’” (Matt. 3:16, 17) Since Jesus na Son of God, e show say already na Jehovah get Jesus. But Jehovah still glad when e see how Jesus ready to use e life do wetin e Father want. Na so e still be with us. When we give Jehovah our life, e go dey happy with us and e go bless us.​—Ps. 149:4.

⁶ For example, imagine say one man give e daughter biscuit. Then the daughter take from the biscuit give e papa. No be the papa get the biscuit wey e give the pikin? How they fit dash person something wey be e own? Papa wey e love e pikin no go think about that kind question. Instead, e go happy for the gift because the pikin use the biscuit tell e papa say, ‘I love you.’ True-true, this papa go value the biscuit. Na so e be with Jehovah. E de really happy when we promise for prayer say, na e be the only Person wey we go use all our life serve.​—Ex. 34:14.

7. When people use all their heart serve Jehovah, how the book of Malachi don help us understand the way Jehovah de feel about them?

⁷ Read Malachi 3:16. If you never give Jehovah your life and baptize, make you think about how important e dey. From the time wey you begin grow inside belle, na Jehovah get you and everybody for this world. But when you give Jehovah your life and accept say na e be your King, just think how e go feel. E go really dey happy. (Prov. 23:15) When people serve Jehovah with all their heart, e no de forget them. And e de write their name inside e “book to remember” them.

8, 9. Wetin Jehovah want make people wey their name dey inside e book do?

 ⁸ If we want make our name remain inside the book wey Jehovah write our name to remember us, we must do something. Malachi talk say we must ‘fear Jehovah and think deep about e name.’ If we worship any person or anything apart from Jehovah, e go remove our name from e book.​—Ex. 32:33; Ps. 69:28.

⁹ Na just one time we go promise to use our life serve Jehovah and we baptize. But if we want continue to remain as people wey God don choose, we go continue to do wetin Jehovah want now, and even forever.​—1 Pet. 4:1, 2.

10. Wetin go show-am clear say person wey e de serve God dey different from person wey e no de serve God?

¹⁰ For the topic before this one, we talk about Cain, Solomon and Israel people. All of them claim say them de worship Jehovah, but they no hold Jehovah tight. Their example show-am clear say people wey they really support Jehovah must like good thing and hate bad thing. (Rom. 12:9) After Malachi talk about the “book to remember” people, Jehovah still talk about “how righteous person dey different from wicked person. And how person wey e de serve God dey different from person wey e no de serve God.”​—Mal. 3:18.

11. Why other people must see-am clear say we really de serve Jehovah?

¹¹ Other ways still dey wey we fit thank Jehovah as e choose us make we be e people. Everybody must see say we de really serve Jehovah. (1 Tim. 4:15; Matt. 5:16) So e good make you ask yourself say: ‘Other people de see-am clear say I really hold Jehovah tight? I ready to make people know say I be Jehovah Witness?’ If after Jehovah don choose us as e people, how you think say e go feel if we de shame to tell other people say na e get us? E no go happy at all!​—Ps. 119:46; read Mark 8:38.

12, 13. Wetin some brothers and sisters don do wey e make-am hard for people to see say they be Jehovah Witness?

¹² But some brothers and sisters don  begin follow “the spirit of this world.” Because of this one, e no de show clear say them dey different from people wey they no de serve Jehovah. (1 Cor. 2:12) This spirit de make people do wetin their body want. (Eph. 2:3) For example, they don give us plenty advice about the way we de dress and the kind hairstyle wey we de do. Even with that one, some people still de wear tight cloth and cloth wey e de show their body. Some de even wear-am go our meeting. And the hairstyle wey some de do, de make people wonder if they really be Christian. (1 Tim. 2:9, 10) Na e make when them dey with other people, e fit hard to know whether they be Jehovah Witness or them de follow the world.​—Jas. 4:4.

¹³ Other ways still dey wey some brothers and sisters never really show-am clear say they no de follow the spirit of this world. The way some de dance and de behave when them dey party no good for Christians. Their picture and the kind things wey them de write for Internet de show say them de follow the spirit of this world. E fit be say they never put hand for serious sin and they still dey congregation. But they fit be bad example for brothers and sisters wey them de try to get good character.​—Read 1 Peter 2:11, 12.

14. Wetin we must do if we want protect the special friendship wey we get with Jehovah?

¹⁴ The world de make people ‘show the things wey they get,’ de do ‘wetin their body want,’ and de follow ‘the things wey their eye like.’ (1 John 2:16) But because na Jehovah get us, Bible talk say make we “no put hand for things wey God no like and things wey people for this world want.” E still say make we de “live with good sense, de do wetin correct and de hold God tight, even as we dey inside this world.” (Titus 2:12) Make the things wey we de talk, the way we de eat and drink, our dressing, and the way we de work, show say we dey different. True-true, make everything for our life show say na Jehovah get us.​—Read 1 Corinthians 10:31, 32.

15. Why e good make we de show our brothers and sisters love and treat them with good-heart?

¹⁵ The way we treat our brothers and sisters go show how we really value our special friendship with Jehovah. Na Jehovah get them too. If we de always remember this one, we go de show them love and treat them with good-heart. (1 Thess. 5:15) Jesus tell e disciples say: “Na this one go make everybody know say wuna be my disciples, if wuna love wunaself.”​—John 13:35.

16. Which example from the Law of Moses fit help us know how Jehovah value e people?

¹⁶ One example from the Law of Moses fit help us understand how we suppose de treat our brothers and sisters. For the temple, some things dey wey e be say na only when them de worship Jehovah them de use them. The Law really explain how they go care for this things. And if person no follow wetin the Law talk, they go kill the person. (Num. 1:50, 51) E clear say Jehovah really value this things, even though say they no be human being. What about people wey Jehovah don choose as e own and them de do wetin e want? The truth be say, Jehovah value them pass this things for the temple! Jehovah tell e people how e value them, when e say: “Anybody wey e de touch wuna de touch my eye.”​—Zech. 2:8.

17. Wetin Jehovah “de put e mind de listen” to?

¹⁷ The book of Malachi tell us say Jehovah “de put e mind de listen” as e people de do things with each other. (Mal. 3:16) True-true, Jehovah “know who be e own.” (2 Tim. 2:19) Everything wey we de do and talk, Jehovah know-am finish. (Heb. 4:13) When we no treat our brothers and sisters with good-heart, Jehovah de notice-am. When we de care, get open hand, de forgive and get good-heart for our brothers and sisters, we dey sure say Jehovah de see-am too.​—Heb. 13:16; 1 Pet. 4:8, 9.

18. Wetin we fit do to thank Jehovah as e choose us make we be e people?

¹⁸ We really want thank Jehovah as e choose us make we be e people. We know say as we give Jehovah our life, na the best decision wey we make. Na true say for this world, we dey “among bad people wey them de sin.” But we still want make people see say we “dey clean,” and make they “no talk bad about” us. And we go still de “shine like light for the world.” (Phil. 2:15) We don decide say we no go do anything wey Jehovah hate. (Jas. 4:7) We love our brothers and sisters and de respect them because na Jehovah get them too.​—Rom. 12:10.

19. How Jehovah de bless e people?

¹⁹ Bible don promise us say: “Jehovah no go leave e people.” (Ps. 94:14) This promise no go ever fail. No matter wetin happen, Jehovah go always dey with us. Even if we die, Jehovah no go forget us. (Rom. 8:38, 39) “If we dey alive, na Jehovah we de live for, and if we die, we die for Jehovah. So whether we dey alive or we die, na Jehovah get us.” (Rom. 14:8) E de hungry us to see the time wey Jehovah go resurrect all e friends wey they don die. (Matt. 22:32) Even now, we de enjoy many good things from Jehovah. Bible say: “The people wey their God na Jehovah go dey happy, the people wey God don choose as e property.”​—Ps. 33:12.