1. For some years now, which things don change for some lands?

FOR many-many years, most people for the world get religion wey them dey. But for some years now, things don de really change. More people no get religion and the number de increase. The truth be say, for some countries, most people de talk say they no dey any religion. *​—Matt. 24:12.

2. Wetin be some reasons why plenty people no dey any religion?

² Why plenty-plenty people de talk say they no dey any religion? * For some of them, them de think more about enjoyment for life or their problems. (Luke 8:14) Some other people dey religion before, but now they no believe say God dey. Other people believe say God dey but they feel say religion na old-fashion thing, e no fit help people for this our time, e no agree with science, and sense no dey inside. This people fit hear friends, teachers, or people for television de talk say life for this earth just appear by chance. But they no de too hear better reasons to believe say God dey. For other people, they no like the leaders for religion because this leaders de always want money and control more people. For some lands, people no dey free to worship God because of the laws wey government make.

3. Wetin we go learn for this topic?

³ Jesus command us make we “make disciples of people for the  whole world.” (Matt. 28:19) If people no dey any religion, how we fit help them make they learn to love God and become disciples of Christ? The place wey person grow up go affect the way e go behave when e hear our message. For example, the way people from Europe go behave fit dey different from the way people from Asia go behave when we preach to them. Why? For Europe, many people know something about Bible. They don hear say na God make everything. But for Asia, most people know only small thing about Bible or they no even know anything at all. They fit no believe say na God make everything. If person no dey any religion, no matter the place wey e come from or the things wey e believe, we fit still help the person make e learn to love God. For this topic, we go learn how we fit help this kind person.

4. Why we fit believe say people go fit change?

⁴ Believe Say They Fit Change. Every year, some people de become Jehovah Witness and they no dey any religion before. Many of them already get fine character before, and they really hate the lie-lie for religion. Before, some of them de live bad life and many get bad character wey they need to abandon. We fit dey sure say we go see “people wey the condition of their heart dey good for everlasting life” because Jehovah go help us.​—Acts 13:48; 1 Tim. 2:3, 4.

5. Many times, wetin de make people listen to our message?

⁵ Dey Kind and Know How to Talk. Many times, no be wetin we talk de make people listen to our message. Instead, them de listen because of the way we talk-am. They like-am when we dey kind, when we talk to them with sense, and we really get interest for them. We no go force them make they listen to the thing wey we talk. Instead, we go try to understand the reasons why they no dey any religion. For example, we learn say some of them no de like to talk about religion with stranger. Other people feel say no be fine thing for person to ask another person the thing wey e think about God. And, shame de catch other people if person see them de read Bible, especially if na Jehovah Witness de read Bible with them. No matter the reason, we go try make we understand the way this people de feel.​—2 Tim. 2:24, ftn.

6. How apostle Paul show say e fit change the way e de talk with people, and how we fit follow e example?

⁶ Wetin we fit do if e be like say person no like-am when we use word like “Bible,” “creation,” “God,” or “religion”? We fit do like apostle Paul and change the way we de talk with them. When Paul de talk to Jew people, e reason with them from Bible. But, when e talk with Greek philosophers for Areopagus, e no talk say e de quote from Bible. (Acts 17:2, 3, 22-31) How we fit do like Paul? If you meet person and e no accept the Bible, when you de reason with the person, no talk say you de quote verse from Bible. This one fit be the best thing wey you fit do. Person fit no like-am make other people de see say e de read Bible with you. If you notice-am, make you try show the person the Bible for another way so that people no go quick notice-am say wuna de read Bible. Maybe you fit use things like phone show the person.

7. If we want be like Paul, which thing we fit need to do as 1 Corinthians 9:20-23 talk?

⁷ Try to Understand and Listen. We must try to understand why the people wey we meet de think the way them de think. (Prov. 20:5) Make we see the example of apostle Paul again. Paul grow among Jew people. But the truth be say, when e de preach to people of the nations that time, e change how e de preach. Na so because this people know only small things about Jehovah and Bible, or they no even know anything at all. For the same way, we need to feel for people for our  territory and try to understand them. For us to do this one well, we fit need to do research or ask other people with experience for congregation.​—Read 1 Corinthians 9:20-23.

8. Wetin be one way wey we fit start discussion with people about Bible?

⁸ The thing wey we want na to find who “dey ready to listen.” (Matt. 10:11) For us to do this one well, we must ask people wetin they think and then listen to them well. For example, one brother for England de ask people make they talk wetin they think about how person fit dey happy for marriage, how to train children, or how to endure if people no treat us well. After the brother don listen to the things wey they talk, e go say, “Wetin you think about this advice wey they write almost 2,000 years ago?” Then, e go show them Bible verse for e phone wey e don already prepare, and e no go use the word “Bible.”

9. If people no de like to talk about God, wetin be one way wey we fit help them?

⁹ How we fit help people make they learn to love God if they no de like to talk about God? Make the thing wey we go discuss with them be wetin concern them. For example, the things for nature de surprise many of them. So we fit talk something like this: “You fit don know say, many times wey science people make new things, na things for nature they copy. For example, to make microphone, the people study the way ear de work; and to make camera, they study the way eye de work. Wetin de come your mind when you think of nature? You go say nature appear by e self, na person make-am, or na another thing?” After we don listen to the person well, we fit ask say: “When engineers learn the way ear and eye de work, we fit de wonder the kind person wey them de learn from. I like something wey one olden days writer talk. E say: ‘Who make ear no go fit hear? Who form eye no go fit see? . . . Na this Person de give sense to people!’ Some science people agree with the thing wey this writer talk.” (Ps. 94:9, 10) Then we fit show one video from jw.org^® under “Interviews and Experiences” for “Viewpoints on the Origin of Life.” (Check under PUBLICATIONS > VIDEOS.) Or we fit give them one of this brochure Was Life Created? or The Origin of Life​—Five Questions Worth Asking.

10. If person no want talk about God, wetin be another way wey we fit start to talk with the person?

¹⁰ Most people today want better future. But many of them de fear say one day this world no go dey again or people no go fit live inside again. One traveling overseer for Norway talk say many  times, some people de like to talk about the condition of this world even if they no want talk about God. After this brother don greet people, e go talk say: “Wetin you think about the hope wey we get for better future? You go talk say na politicians, science people, or another person go fit give us the best hope?” After the brother don listen to the person well, e go read or quote one Bible verse about better future. When some people see the thing wey Bible promise about the earth, say e go last forever and good people go live for inside forever, them de surprise.​—Ps. 37:29; Eccl. 1:4.

11. Why e good make we try different-different way to start discussion, and how we fit imitate Paul as Romans 1:14-16 talk?

¹¹ Na fine thing if we de use different-different way to start discussion with people wey we meet. Why? Because people dey different. Something wey one person like, another person fit no like-am. Some people ready to talk about God or the Bible, but other people go ready to listen if you first talk about other things. No matter the situation, make we use the chance to talk to different kind of people. (Read Romans 1:14-16.) Make we remember say, if people love the right thing, na Jehovah de make the truth grow for their heart.​—1 Cor. 3:6, 7.

12. Wetin we fit do to preach to people from Asia countries if they never think-am whether Creator dey?

¹² For the whole world, many publishers de meet people from different-different country for Asia. And for some of this place, government don stop somethings wey religion de do. For some countries for Asia, plenty people never really think-am well whether Creator dey or e no dey. Some of them like to learn new things, and they go accept-am when you tell them say you want study Bible with them. But because other people no get interest to learn new idea, they no go agree the first time. How we fit help them? Some publishers with experience don succeed when they start with ordinary discussion, and show people say they care about them. And then, if e dey okay, the publishers go talk how their own life start to better when they begin follow something wey Bible talk.

13. Wetin go fit help people get interest for Bible? (Check picture for front cover.)

¹³ Plenty people de first get interest for the message when they see how the sense for Bible don help people. (Eccl. 7:12) One sister for New York de visit some people wey their language na Mandarin language. The sister talk say: “I de try to show people say I care about them, and I de listen to them. If I see say they just come from another country, I fit ask them say: ‘How you de adjust for this new place? You don see work? The people for the area de treat you well?’” Sometimes, this one de help the sister to begin talk about one thing wey Bible teach. If the situation dey okay, the sister go still talk say: “Wetin you think say dey important pass any other thing if person want get better friendship with people? I fit show you one proverb for Bible? The proverb say: ‘To start fight be like when person open way for plenty water to pour come out. Before the quarrel burst come out, make you comot.’ You think say this advice go fit help us get better friendship with people?” (Prov. 17:14) If people want learn more, this kind discussion go help us see them and open way for another visit.

14. How one brother for Asia de help people if they no believe say God dey?

¹⁴ What if person tell us say e no believe say God dey? One brother don get plenty experience as e de preach to this kind people for Asia. The brother talk say: “The truth be say, when person for here talk say, ‘I no believe say God dey,’ the person mean say e no get belief for the gods wey people for the area de worship. So I de normally de gree say most gods no dey real and na man  make them. Many times, I de read Jeremiah 16:20. That verse talk say: ‘Person go fit make gods for e self when they no really be gods?’ Then I go ask: ‘How we go fit know which god be real one and which god man make?’ I go listen to the person well, and then I go read Isaiah 41:23. That verse talk say: ‘Tell us wetin go happen for future, so that we fit know say wuna be gods.’ After that one, I go show the person one example about something wey Jehovah talk say e go happen and e happen.”

15. Wetin we fit learn from the example of one brother for East Asia?

¹⁵ See the thing wey one brother for East Asia de do when e go for return visit. E talk say: “I de show them different-different examples about the sense for inside Bible, which prophecy for Bible don happen, and the laws wey the universe de follow. After that one, I go show them why all this one show say the Creator dey real and e get sense. When person don begin think say God dey, I go begin show the person the thing wey Bible talk about Jehovah.”

16. From wetin we read for Hebrews 11:6, why Bible students need to get faith for God and for Bible, and how we fit help them get-am?

¹⁶ Person wey we de conduct study with fit believe say God no dey. When we de conduct the study, we must always de help the person make e faith de strong more-more say God dey. (Read Hebrews 11:6.) And we need to help the person make e faith for Bible de strong more. This one fit mean say we go repeat some Bible truth many times. Each time wey we de study with the person, we fit need to talk about wetin prove say Bible na Word of God. Part of the things wey we go talk fit be short discussion about how the thing wey Bible talk don happen. Or, how the Bible dey correct when e talk about science or history, and how the Bible de help us for our life everyday.

17. How our love fit affect people?

¹⁷ We de help people to be disciples of Christ when we show them love, whether them dey for any religion or they no dey. (1 Cor. 13:1) The main thing wey we want do as we de teach them, na to show them say God love us. We go still show them say we need to love God too because na the thing wey e want. Every year, thousands of people de baptize because they don learn to love God. Before, this people get only small interest for religion or they no even get-am at all. So make you believe say they fit change. Show love to different-different kind of people and show say you care about them. Listen to them. Try to understand why them de think the way them de think. Make you use your example teach them to be disciples of Christ.