We believe say Jesus become High Priest the time wey e baptize for 29 C.E. Wetin make us know this one? When Jesus baptize, e give e self to God ‘to do wetin God want.’ This one mean say, Jesus ready to give e life as sacrifice. (Gal. 1:4; Heb. 10:​5-10) To do wetin Jehovah want be like altar, the place wey them de do sacrifice. When Jesus die, this one just be like say e sacrifice e life for altar. The altar don dey since when Jesus baptize. The arrangement to worship Jehovah for correct way, wey dey possible because of the sacrifice of Jesus, just be like the temple. So the temple go don dey from the time wey Jesus baptize. Just as the altar dey important for the temple, to do wetin Jehovah want dey important for the arrangement wey e don make to worship-am for correct way.​—Matt. 3:16, 17; Heb. 5:4-6.

Just the way the temple need high priest, the arrangement to worship Jehovah for the correct way still need high priest. So God anoint Jesus as High Priest “with holy spirit and power.” (Acts 10:37, 38; Mark 1:9-11) But, how we fit dey sure say Jehovah don make Jesus to be High Priest before e die and come back to life? The example of Aaron and other people wey serve as high priest after Aaron, go help us answer this question.

The Law wey Jehovah give Moses talk say na only the high priest go fit enter the Most Holy for the tabernacle, and after, the Most Holy for the temple. Na curtain separate the Holy from the Most Holy. The high priest de pass the curtain only for the day wey e de do sacrifice for the sin of the people. (Heb. 9:​1-3, 6, 7) Before Aaron and other people wey serve as high priest after Aaron “pass the curtain,” Jehovah don already choose them as high priest. For the same way, before Jesus die and go back to heaven, Jehovah go don choose Jesus as High Priest for the temple, or the arrangement wey E don make to worship-am for correct way. Na after Jesus die e “pass the curtain. This curtain de represent e flesh.” (Heb. 10:20) Because of this one, apostle Paul talk say Jesus de “come as high priest.” And then e say Jesus “follow inside the tent wey perfect and wey great pass, and wey them no make with hand” and e enter “heaven.”​—Heb. 9:11, 24.

No difference between the time wey they sign the new agreement and when e start to work. Why we talk like that? Jesus do wetin stamp the new agreement when e go back to heaven and tell e Father to accept the sacrifice wey e do. Na this things still make the agreement start to work. Wetin be this things wey Jesus do?

Number one, Jesus go meet Jehovah. Number two, Jesus tell Jehovah to accept the sacrifice wey e do. And number three, Jehovah accept the sacrifice. The new agreement no start to work until after Jesus don do this things.

Bible no tell us the time wey Jehovah accept the value of the sacrifice of Jesus. So, we no know the time wey they stamp the new agreement and when e start to work. But we know say Jesus go back to heaven ten days before Pentecost. (Acts 1:3) Na during that short time Jesus give the value of e sacrifice to Jehovah, and Jehovah accept-am. (Heb. 9:12) This one really show clear for Pentecost 33 C.E. (Acts 2:1-4, 32, 33) So the new agreement don start to work that time.

So wetin we don talk be say, they stamp the new agreement and e start to work after Jehovah accept the value of the sacrifice of Jesus. Then the agreement start to work with Jesus as High Priest and the person between God and man.​—Heb. 7:25; 8:1-3, 6; 9:13-15.