1. Wetin fit happen when some people de try to show say they better pass other people?

FOR the world today, plenty people de always try to show say they better pass other people, and e no concern them how this one de affect people. For example, business man fit want succeed pass other business people. And so, e fit do things wey go affect other people for bad way. If two teams de play ball, the player for one of the team fit open eye injure another player for the other team so that they go fit win the game. Student fit cheat so that e go pass exam and get admission for one big university. As Christians, we know say this kind things no good. Bible talk say this things na part of “wetin body want.” (Gal. 5:19-21) But, e dey possible say some brothers and sisters no know say them de try to show say they better pass other people, and them de make people to do the same thing? This one na important question because if people for congregation de try to show say they better pass other people, then the congregation no go dey as one.

2. Wetin we go talk about for this topic?

² For this topic, we go talk about different-different character wey fit make us want show say we better pass our brothers. We go still talk about the examples of faithful servants of Jehovah for Bible wey no try to show say they better pass other people. Make we first talk about how we fit check the reason why we de do something.

3. Which questions we suppose to ask ourself?

³ E good make we de always check the reason why we de do something. We fit ask ourself say: ‘Na only when I think say  I better pass another person I dey happy with myself? I de work hard because I want be the best or at least, I want better pass one brother or sister for congregation? Or I de work hard because I really want give Jehovah my best?’ Why e good make we ask this questions? See wetin Bible talk.

4. Why e no good make we de compare ourself with other people, as e dey for Galatians 6:3, 4?

⁴ Bible tell us say make we no compare ourself with other people. (Read Galatians 6:3, 4.) Why? One reason na say, if we think say we better pass our brother, we fit begin dey proud. But, if we compare ourself with other brothers wey we feel say they better pass us, this one fit make our condition tire us. If we compare ourself for any of the two ways, we no go reason well. (Rom. 12:3) One sister wey e name na Katerina * for Greece, talk say: “I be de compare myself with people wey I feel say they fine pass me, they sabi preach well pass me, and they sabi make friends pass me. Because of this one, I begin feel say I dey useless.” We must remember say Jehovah draw us come e side because we dey ready to love Jehovah and to listen to e Son, no be because we fine, our grammar clear, or we dey popular.—John 6:44; 1 Cor. 1:26-31.

5. Wetin you learn from the story of Brother Hyun?

⁵ Another question wey we fit ask ourself na say, ‘Brothers de see me as person wey de make peace with people, or many times, I de get problem with people?’ Make we see the example of one brother wey e name na Hyun, for South Korea. This brother be de think say some people wey de direct the work for congregation de try to do like say them dey important pass-am. E talk say, “I be de talk bad about this brothers, and plenty times, I no de agree with the things wey they talk.” Wetin be the result? The brother talk say, “The way I de think make the congregation no dey as one again.” Some of the friends wey this brother get, help the brother to know e problem. Hyun change the things wey e need to change, and today, e de do e work well as elder. If we see say the way we de think fit scatter congregation instead of to make congregation dey as one, we must change quick-quick.

6. As e dey for Galatians 5:26, which bad character them, fit make us want de show say we better pass other people?

⁶ Read Galatians 5:26. Which bad character them, fit make person de try to show say e better pass other people? One of them na when person dey proud. Proud person de think about only e self. Another bad character na jealousy. When person de jealous another person, no be only say e want the thing wey the other person get. But e still want make the person no get that thing at all. So if person de jealous another person, this one mean say e hate that person. True-true, we really need to run far from this bad character them!

7. Which example show why e bad to dey proud and de jealous?

⁷ This two bad character wey we talk about, be like dirty for inside fuel wey aeroplane de use. The plane fit start to fly, but the dirty for the fuel fit block the pipes wey the fuel de pass. This one go make the engine stop to work just before the plane land, and then the plane go crash. For the same way, person fit serve Jehovah for some time. But if the person dey proud or e de jealous, e go crash! (Prov. 16:18) The person go stop to serve Jehovah and  cause problem for e self and other people. But, how we fit protect ourself make we no dey proud and de jealous?

8. Wetin fit help us make we no dey proud?

⁸ When we follow the advice wey Paul give the brothers for Philippi, this one go help us make we no dey proud. Paul write say: “Make wuna no do anything because of quarrel or because wuna dey proud. But make wuna dey humble and de think say other people better pass wuna.” (Phil. 2:3) If we de see other people say they better pass us, we no go try to show say we better pass them for the things wey they get and wey they sabi do pass us. Instead, we go dey happy for them. And this one na so, especially if them de use the things wey they sabi do to praise Jehovah and do e work. And if brother or sister wey sabi plenty things de follow Paul advice, the brother or the sister go see the good character them wey e like about us. Because of this one, all of us go make peace dey for congregation and everybody go dey as one.

9. Wetin fit help us make we no jealous brother or sister for congregation?

⁹ When we know say e get some things wey we no fit do well, this one go help us make we no jealous other people. When we know say e get where we fit do reach, we no go try to show say we better pass other people. Instead, we go see how we fit learn from people wey sabi do some things pass us. For example, make we talk say one brother for congregation sabi give better public talk. We fit ask the brother how e de prepare e talk. If sister for congregation sabi cook well, we fit ask the sister make e tell us some things wey fit help us to sabi cook too. And if one young brother for congregation de struggle to make friends, e fit ask for advice from person wey sabi make friends. When we de do this things, we no go de jealous people, and the things wey we sabi do go de better.

10. Which problem Gideon face?

¹⁰ Think about wetin happen to Gideon wey come from the tribe of Manasseh, and  the men wey come from the tribe of Ephraim. Jehovah help Gideon and e 300 men to win war. And this one for don make them dey proud. The men of Ephraim go meet Gideon, but no be to praise Gideon, na to quarrel. Maybe they vex because from beginning, Gideon no invite them to join fight enemies of God. The thing wey really concern them pass na say, people suppose respect their tribe. But they forget say, the thing wey dey important pass na say Gideon help to honor the name of Jehovah and protect E people.—Judg. 8:1.

11. How Gideon answer the men of Ephraim?

¹¹ Gideon sofri tell the men of Ephraim say: “Wetin I don do wey reach wetin wuna do?” Then e give them one example of how Jehovah don bless them. Because of this one, “their mind come down.” (Judg. 8:2, 3) Gideon dey ready to humble e self so that peace go continue to dey among servants of God.

12. Wetin we learn from the example of Ephraim people and the example of Gideon?

¹² Wetin we fit learn from this story? From the example of Ephraim people, we learn say the thing wey we suppose de think more about, no be how to protect our own name, but na how to honor Jehovah. Family heads and elders fit learn something from Gideon. If person vex because of the thing wey we do, make we try to understand why the person vex. And we fit praise the person for the thing wey e do well. If we want do this one, we go need to dey humble, especially if e clear say na the other person fault. But to make peace with our brother dey more important pass to prove say we dey right.

13. Which problem Hannah face, and how e handle-am?

¹³ Think about the example of Hannah. E marry one Levite wey e name na Elkanah, and this man really love Hannah. But Elkanah get another wife wey e name na Peninnah. Elkanah love Hannah pass the way e love Peninnah. “Peninnah get children, but Hannah no get children.” Because of this one, Peninnah de laugh Hannah “everytime so that e go vex.” How Hannah feel? E no happy at all! Bible talk say: “E go de cry and e no go chop.” (1 Sam. 1:2, 6, 7) But, no place for Bible tell us say Hannah try to do Peninnah back for any way. Instead, Hannah tell Jehovah how e de really feel and trust say Jehovah go correct things. Peninnah change the way e de treat Hannah? Bible no talk anything about that one. But we know say Hannah get peace of mind again and the peace continue. Bible talk say: “E face show say e no dey sad again.”—1 Sam. 1:10, 18.

14. Wetin we learn from the example of Hannah?

¹⁴ Wetin we fit learn from the example of Hannah? If person de try to show say e  better pass you for something, remember say you fit control the situation. No allow that one make you try to show say you better pass the person. Instead of you to do the person back, try make peace with the person. (Rom. 12:17-21) Even if the person no change, you go get your peace of mind.

15. How Apollos and Paul resemble?

¹⁵ For the last example, see wetin we fit learn from the disciple wey e name na Apollos and from apostle Paul. The two of them know Bible well no be small. People really know them say they sabi teach well. And the two of them don help to make plenty disciples. But the two of them no jealous each other.

16. Which kind person Apollos be?

¹⁶ “They born” Apollos for “Alexandria.” This place dey popular that time because plenty people de go school for there. Apollos really sabi give talk well and “e know God Word well.” (Acts 18:24) When Apollos go serve for Corinth, some brothers for the congregation show say they like Apollos pass other brothers, and even Paul too. (1 Cor. 1:12, 13) Apollos support that kind character wey de scatter congregation? We no fit ever think say e do something like that. The truth be say, after Apollos comot from Corinth, Paul encourage Apollos to go back. (1 Cor. 16:12) Paul no go fit ever do like that if e be feel say Apollos de scatter the congregation. True-true, Apollos use the things wey e know for good way. E use-am preach the good news and to make e brothers dey strong. We fit still dey sure say Apollos dey humble. For example, when Aquila and Priscilla “explain the things about God for the correct way to Apollos,” no place for Bible talk say e vex.—Acts 18:24-28.

17. Wetin Paul do to make peace dey?

 ¹⁷ Apostle Paul know the good work wey Apollos do. But even if people go feel say Apollos better pass Paul, Paul no worry about that one. When we read the thing wey Paul write to the congregation for Corinth, we go see say e dey humble, e know where e suppose do reach, and e de think well. Paul no like-am when people talk say “I de follow Paul.” Instead, e direct their mind to Jehovah and Jesus.—1 Cor. 3:3-6.

18. With wetin dey for 1 Corinthians 4:6, 7, wetin we learn from the example of Apollos and Paul?

¹⁸ Wetin we fit learn from the example of Apollos and Paul? We fit work hard for Jehovah and we fit help plenty people grow reach to baptize. But we know say we fit do the things wey we de do, only because Jehovah de help us. From the example of Apollos and Paul, we still learn say the more Jehovah de use us for congregation, the more we get chance to make peace dey for congregation. We really dey happy when elders and ministerial servants de help us to dey as one and to make peace dey among us. Them de do this one when all the advice wey them de give de come from Bible. They no de try to dey important, but them de help everybody for congregation to obey Jesus and follow e example.—Read 1 Corinthians 4:6, 7.

19. Wetin each of us fit do? (Still check the box “ No Make Your Brothers De Feel Say They Better Pass Each Other.”)

¹⁹ Each of us get something wey God don use bless us wey we sabi do. We fit use this gift to help other people. (1 Pet. 4:10) We fit de feel say the thing wey we de do dey small. But no forget say na plenty small-small thread de hold cloth together. So anything wey you fit do de help the whole congregation dey as one. Make we continue to work hard so that we no go ever try to show say we better pass other people. And make all of us do our best to always make peace dey for congregation and make congregation dey as one.—Eph. 4:3.