True-true, Jehovah want make husband and wife dey happy, make them dey tight, and make their friendship with each other continue. (Matt. 19:4-6) If you go like to marry, how you fit see better person marry? Because na Jehovah make us, e know wetin we need to do so that we fit dey happy when we don marry. So if you follow the things wey e don give us to guide us, you go really dey happy. Make we talk about some of this things.

Number one, we need to understand this thing about ourself: “The heart de deceive pass any other thing, and e hard to control.” (Jer. 17:9) When two people wey want marry meet each other and start to date, they fit quick start to get strong feeling for each other. When that one happen, e go hard for them to make better decision. If the main thing wey make two people want marry na because of how them de feel for each other, many times, the ending no de sweet. (Prov. 28:26) Because of this one, e no go make sense for two people to tell each other about the way them de really feel for each other, or to begin promise each other before they really know each other.

Proverbs 22:3 talk say: “When person get sense, e go see danger and hide. But when person no get sense e go just de go and go suffer the danger.” Which danger dey when person de use Internet website de find who e want marry? The sad thing be say, some people don meet person wey they no know for Internet, they start to date the person, and after, they see say the person don deceive them. Another thing na say, lie-lie people de hide who they be for Internet so that they fit deceive people wey no get experience and thief their money from them. Sometimes, this lie-lie people claim say they be Jehovah Witness.

See another danger wey dey. Some of this kind website for Internet de use formula for maths to help people know who they suppose date. But, nothing show say this kind way de really work. Sense no dey to put our trust for formula wey man bring to make decision for important thing, like to find better husband or wife. Formula for maths no go fit ever better reach Bible.—Prov. 1:7; 3:5-7.

One thing wey fit guide us dey for Proverbs 14:15. E talk say: “When person no get experience, e de believe everything wey people talk. But wise  person de think well before e do something.” Before you decide whether person go be better husband or wife for you, you need to know the person well. But this one fit hard for you to do if na Internet wuna de meet. Even if wuna de see information about each other for Internet, and wuna de spend plenty time together de talk for Internet, you go fit really talk say you know the person? Some people think say they don see the person wey they really love. But, the thing wey they learn about the person shock them when they meet the person face-to-face.

Bible for book of Psalm talk say: “I no de make friend with people wey de deceive other people. And I no de near people wey de hide who they be.” (Ps. 26:4) Plenty people de feel say na normal thing to give lie-lie information about theirself for Internet so that people go like them. They fit hide their real character or their real character fit no really show when them de send message to people for Internet. Na true say some people fit talk say they be Jehovah Witness, but they don baptize? Their friendship with Jehovah really dey tight? People respect them for their congregation? Or their example no good or they even be “bad friends”? (1 Cor. 15:33; 2 Tim. 2:20, 21) If they marry for their condition, e agree with wetin Bible talk? You need to know the answer to this questions. But e fit hard for you to know the answer if you no talk to other servants of Jehovah wey know the person well. (Prov. 15:22) And the truth na say, person wey hold Jehovah tight no go even want think of to join e self with person wey no de serve Jehovah.—2 Cor. 6:14; 1 Cor. 7:39.

Because danger dey when person de use Internet websites de find who e want marry, other better way dey to find person and to really know the person wey you want marry. Where you fit meet person wey you fit marry? When we don fit de meet together, we fit know other people face-to-face for our congregation meetings, assemblies, conventions, and other occasion.

When we no fit gather together just as e be now for this COVID-19, we de do our congregation meetings for Internet. And for there, we fit know other Jehovah Witness people wey never marry. You fit see how them de handle part for meeting and hear them de show their faith when them de comment. (1 Tim. 6:11, 12) Wuna fit still talk with each other for break out room after meeting. When wuna de do get-together for Internet with other Jehovah Witness people, you fit see how this person wey you like de treat other people. This one fit help you see the kind person wey e be. (1 Pet. 3:4) As time de go, and as you de know the person well, you fit see if wuna get the same plans for life and if the two of wuna match.

When people wey never marry allow Bible to guide them as them de find who they go marry, they get more chance to enjoy their marriage. E just be like wetin Bible talk for the book of Proverbs when e say: “When person see better wife, e don see better thing, and e don get favor from Jehovah.”—Prov. 18:22.