1. Wetin Jehovah don do for you?

HOW you become servant of Jehovah? Maybe you first hear “the good news” from your papa and mama, from your workmate or schoolmate, or when Jehovah Witness people come preach to you for your house. (Mark 13:10) Then, somebody spend plenty time and power to study Bible with you. As wuna de study, you come love Jehovah and you learn say e love you too. Jehovah draw you come e organization. And now, because you don be disciple of Jesus Christ, you get the hope to live forever. (John 6:44) True-true, you de thank Jehovah say e use person teach you the truth and e accept you as one of e servant.

2. Wetin we go talk about for this article?

² Now wey we don know the truth, we get the honor to help people join us for the road to life. E fit dey easy for us to preach from house to house. But, e fit hard us to ask people whether they go like make we study Bible with them. And e fit hard us too to study Bible with people. You de feel like that? If na so, maybe some things wey this article talk about fit help you. We go talk about wetin de move us to help people become disciples. We go still talk about how we fit handle problems wey fit make us no want study Bible with people. Make we first talk about why we must preach to people and still teach them the good news.

3. Why we de preach?

³ When Jesus dey earth, e give e followers work and the work get two parts. Number one, e say make they preach  the good news of the Kingdom, and e show them how they go do-am. (Matt. 10:7; Luke 8:1) For example, Jesus tell e disciples wetin they go do when people listen to the Kingdom message and wetin they go do when people no listen. (Luke 9:2-5) And Jesus talk say e disciples go preach to plenty people and for plenty place, when e talk for Bible say they go preach “so that people for the whole world go hear.” (Matt. 24:14; Acts 1:8) Whether people listen to the message or they no listen, Jesus command e disciples say make they tell people about God’s Kingdom and the things wey the Kingdom go do.

4. As e dey for Matthew 28:18-20, wetin we must do apart from to preach about the Kingdom?

⁴ Wetin be the second part of the command wey Jesus give e disciples? E tell e disciples make they teach people to obey all the things wey e don command. Some people fit talk say, the command wey Jesus give to preach and teach na only for the first-first Christians. But, this one na true? No. The thing wey Jesus talk show say this important work go continue reach our time. Bible talk say “until the ending part of the time.” (Read Matthew 28:18-20.) E fit be say Jesus give that command when e appear to more than 500 of e disciples. (1 Cor. 15:6) And for the vision wey Jesus show John, Jesus make-am clear say e want make all e disciples help people learn about Jehovah.—Rev. 22:17.

5. For 1 Corinthians 3:6-9, wetin Paul use to show how to preach and to teach connect with each other?

⁵ The thing wey apostle Paul talk for Bible show say, the work wey we get to make disciples, be like the work wey person de do to care for the things wey e plant. This one show say we must do pass just to plant seeds. Paul remind the brothers for Corinth say: “I plant, Apollos put water . . . Wuna be like farm wey them de work and na God get the farm.” (Read 1 Corinthians 3:6-9.) “Na God get the farm” wey we de work for inside. So, we de plant the seeds when we preach to people and we de put water for the seeds when we de teach people. (John 4:35) But we know say na God de make the seeds to grow.

6. When we de teach people, wetin we must help them make they do?

⁶ We de find people wey “the condition of their heart dey good for everlasting life.” (Acts 13:48) If we want make this kind people become disciples, we must help them to (1) understand, (2) accept, and (3) do the things wey them de learn from Bible. (John 17:3; Col. 2:6, 7; 1 Thess. 2:13) All of us fit help Bible students if we de show them love and de welcome them when they come meeting. (John 13:35) The person wey de study with the student fit still need to spend plenty time and power to help the student change “strong things” wey e believe or de do. (2 Cor. 10:4, 5) We fit spend plenty months to help person change this kind things for e life. But as time de go, the person fit qualify to baptize. Your time and power no go be waste.

7. Wetin de move us to preach and make disciples?

⁷ Why we de preach and de make disciples? Number one, na because we love Jehovah. When you de do your best to obey the command to preach and make disciples, you de show say you love God. (1 John 5:3) Think-am: You de preach from house to house because you love  Jehovah. That command dey easy for you to obey? Maybe e no easy for you. When you want knock the door the first time to preach, fear catch you? True-true, you go don fear! But you know say Jesus want make you do this work, so you obey the command. And maybe after you preach for some time, e don dey easy for you pass before. But now, what about to study Bible with person? When you think-am, fear de catch you? Maybe. But when you tell Jehovah to help you get strong heart to ask person whether e go like to study Bible, Jehovah go help you to want make disciples.

8. As e dey for Mark 6:34, which other thing fit move us to teach people?

⁸ The love wey we get for people de make us teach them the truth. For example, one time dey wey Jesus and e disciples over tire because they don really preach. They need place wey they go rest, but crowd of plenty people see them. Jesus pity for the people, so e start to teach them “many things.” (Read Mark 6:34.) Jesus work hard that time, even though say e don tire. Why? Jesus know how the people go don de feel. E want help them because e see say them de really suffer and they need hope. Today, people dey that kind condition even if e be like say them dey happy and life de go well for them. They be like sheep wey don lost and wey no get shepherd to guide them. Apostle Paul talk say this kind people no know God and they no get hope. (Eph. 2:12) Them de pass the “road” wey Bible talk say na people wey God go destroy dey for the road! (Matt. 7:13) When we think about how the people for our territory really need God for their life, the love and the pity wey we get go move us to help them. And the best way wey we fit help them, na to tell them say we want study Bible with them.

9. As e dey for Philippians 2:13, how Jehovah fit help you?

⁹ E fit be say you no want start Bible study with person because you know say you go need to spend plenty time to prepare for the study, and to study with the person. If na so e be for you, tell Jehovah about the matter. Tell Jehovah make e move you to want find person wey you fit study Bible with. (Read Philippians 2:13.) Apostle John tell us say God go answer prayer if the prayer agree with wetin E want. (1 John 5:14, 15) So you fit dey sure say Jehovah go make-am hungry you to teach people Bible.

10-11. Wetin fit make us no want study Bible with people?

¹⁰ We no de play with the work wey we get to teach people Bible, even if we de face problems and this problems fit make us no do plenty for the work, as we for like to do. Make we talk about some of this problems and how we fit handle them.

¹¹ We fit feel say our condition no de make us do plenty. For example, some publishers don old or them de sick. Na so your own condition be? If na so, think about one lesson wey we don learn from the COVID-19 wey de affect the whole world. We don see say we fit use phone or computer study Bible with people well. So you fit start Bible study and de study with person from your house. And this one fit dey more easy for you. Another gain dey. Some people want study Bible, but they no dey for house the time wey our brothers de go preach. But they fit dey around for early morning or for night. You fit study with person for  this kind time? Jesus teach Nicodemus for night, and na this time dey okay for Nicodemus pass.—John 3:1, 2.

12. Which things make us believe say we fit sabi teach well?

¹² We fit no believe ourself say we fit study Bible with person. Maybe we de feel say we suppose know more things or sabi teach more before we fit study with person. If na so you de feel, make we talk about three things wey fit help you believe say you fit study with person. Number one, Jehovah de see you as person wey fit teach people. (2 Cor. 3:5) Number two, God give Jesus “all the power for heaven and for earth,” so Jesus don command you to teach. (Matt. 28:18) And number three, you fit trust say other people go help you. Jehovah teach Jesus the things wey e go talk and Jesus follow everything. You fit do like that too. (John 8:28; 12:49) Apart from that one, you fit tell your field service group overseer, correct pioneer, or publisher with experience to help you start and conduct Bible study. One way wey you fit learn to be better teacher na to dey with this kind publishers when them de study Bible with person.

13. Why we need to dey ready to teach for different ways?

¹³ E fit no dey easy for us to use new style and new things. The way we de study Bible with people now don change. The Enjoy Life Now and Forever! book, na the main book wey we de use study Bible with people. When we want use this book, we suppose prepare for the study. And the way we go prepare and study with people go different from how we de do-am before. We no de read plenty paragraphs and we de discuss more with the student. When we de teach, we de use more videos and other things like our JW Library^®. If you no know how to use this things, tell person make e help you learn how to use them. E de hard for person to change the way e don de do things and learn new ways. But Jehovah and other people go make-am more easy for you to learn the new things, and you go even enjoy to study with people more. As one pioneer talk, “both the teacher and the student de enjoy” this style wey we don de use study.

14. Wetin we suppose remember when we de preach for territory wey plenty people no de listen to our message, and how 1 Corinthians 3:6, 7 de encourage us?

¹⁴ We fit de preach for territory wey e dey hard to start Bible study. People fit no get interest for our message or they fit even dey against-am. Wetin fit help us continue to believe say this kind people go fit listen to the message? Remember say, the condition of people fit change quick-quick for this world wey trouble plenty, and people wey no get interest fit see after say they need God for their life. (Matt. 5:3) Some people no de always collect our book before, but after, they accept Bible study. We still know say Jehovah na the Master of the harvest. (Matt. 9:38) E want make we continue to plant and de put water for wetin we plant. But na e work to make the thing wey we plant to grow. (1 Cor. 3:6, 7) Make we remember say, even if we no de study with any person now, Jehovah de reward us because we de try our best to help people, no be because of how many publication we place or how many people we de study Bible with. This one de really cool our heart! *

15. How Jehovah de feel when person accept Bible study and obey wetin e de learn?

¹⁵ Jehovah de glad when person accept the truth for Bible and tell other people about wetin e learn. (Prov. 23:15, 16) Jehovah go really dey happy as e de see the way we de do the preaching work today! For example, even with the COVID-19 for 2020 service year, we conduct 7,705,765 and help 241,994 people to give their life to Jehovah and baptize. And this new disciples go study with people and make more disciples. (Luke 6:40) True-true, Jehovah de glad when we de make disciples.

16. Which better plan we fit get?

¹⁶ To make disciples na hard work, but Jehovah go help us for the work wey be, to teach new ones make they love our Papa for heaven. We fit plan to start and study Bible with at least one person? If we de use every better chance wey we see, to ask people wey we meet whether they go like to study Bible, the result fit surprise us. We fit dey sure say Jehovah go bless our hard work.

17. How we go feel if we fit study Bible with person?

¹⁷ Na big honor we get to preach and teach the truth to people! This work de give us real joy! Apostle Paul help plenty people for Thessalonica to be disciple, and e talk how e feel. E talk say: “Wetin be our hope or joy or crown of happiness for front of our Lord Jesus? To talk true, no be wuna? True-true, na wuna be our glory and joy.” (1 Thess. 2:19, 20; Acts 17:1-4) Plenty people today don feel like that too. One sister and e husband don help plenty people to baptize. The sister name na Stéphanie. E talk say, “The thing wey de give person joy pass na to help people give their life to Jehovah.”