1. Wetin you learn wey make you happy when Jehovah Witness start to study Bible with you?

 YOU remember one of the first things wey you learn when you start to study Bible? E fit don surprise you when you hear say God get name. E fit be say you happy when you learn say God no de punish people for inside hellfire. And e go don make you happy when you learn say your people wey don die, go come back to life and wuna go enjoy life together forever for paradise.

2. As you de study Bible more-more, wetin you do to show say your love for Jehovah de grow? (Ephesians 5:1, 2)

² As you de study Bible more-more, your love for Jehovah continue to grow. The love wey you get for Jehovah, make you start to do wetin you de learn. The things wey you de learn from Bible help you make better decision. You change your character and start to do wetin good for Jehovah eye because you want make-am happy. Just as pikin de copy better example from e papa and mama, na so you take copy your Papa for heaven.—Read Ephesians 5:1, 2.

3. Which questions we fit ask ourself?

³ We fit ask ourself say: ‘I love Jehovah now pass the way I love-am when I start to worship-am? Since the time wey I baptize, I de think and do things like Jehovah, especially the way I de show love to brothers and sisters? If you see say your love for Jehovah and our brothers and sisters no strong  reach the way e be before, no let-am too worry you. This kind thing don happen to brothers and sisters for apostles time. Jesus no leave them, and e no go leave you. (Rev. 2:4, 7) E know say we go fit love Jehovah and our brothers and sisters again, the way we love them when we start to worship Jehovah.

4. Wetin we go talk about for this article?

⁴ For this article, we go talk about how we go fit make our love for Jehovah and our brothers and sisters continue to grow. We go still talk about some good things wey fit happen when we continue to love Jehovah and our brothers and sisters more-more.

5-6. Which problem apostle Paul face, but wetin help-am continue to worship Jehovah?

⁵ Apostle Paul really happy to worship Jehovah, even though say things no easy for-am. Plenty times, apostle Paul travel go far-far place, and that time, to travel no easy at all. Sometimes, the ship wey e enter fit sink and e fit meet thief for road. And e still get the time wey people wey dey against the preaching work beat-am. (2 Cor. 11:23-27) And some brothers for congregation show say them no value the good things wey apostle Paul de do to help them.—2 Cor. 10:10; Phil. 4:15.

⁶ Wetin help apostle Paul to fit continue to do Jehovah work? Apostle Paul learn about Jehovah from e personal study and the things wey happen to-am. And e believe with all e heart say Jehovah love-am. (Rom. 8:38, 39; Eph. 2:4, 5) This one make-am love Jehovah well-well. And e show this love as e ‘help the holy ones and continue to help them.’—Heb. 6:10.

7. Wetin be one way wey we fit make our love for Jehovah grow?

⁷ We go fit make our love for Jehovah grow when we de take time to really study Bible. When you de read Bible, try see wetin the place de teach you about Jehovah. Ask yourself say: ‘How this place wey I read show say Jehovah love me? Wetin I learn for this verse wey fit help me love Jehovah more-more?’

8. How prayer fit help us make our love for Jehovah continue to grow?

⁸ Another way wey we fit make our love for Jehovah grow, na to de tell Jehovah everything wey dey our mind, everytime. (Ps. 25:4, 5) And Jehovah go answer our prayer. (1 John 3:21, 22) Sister Khanh for Asia talk say: “Before, I love Jehovah because of wetin I learn, but as I come de see how e de answer my prayer, this one make my love for-am grow well-well. And e move me to de do wetin go make-am happy.” b

9. How Timothy show say e love for brothers and sisters de grow?

⁹ Some years after apostle Paul become Christian, e meet one better young man wey e name na Timothy. Timothy love Jehovah and people. Na this one make apostle Paul tell brothers for Philippi say: “I no get another person with good heart like Timothy wey go use all e heart care for . . . wuna.” (Phil. 2:20) For here, apostle Paul no de talk say Timothy sabi arrange congregation matter or say e sabi give talk, but e de talk say Timothy really love brothers and sisters for congregation, well-well. Na this one make the congregations wey Timothy  visit, de always like make e visit them again.—1 Cor. 4:17.

10. How Sister Anna and e husband show their love for brothers and sisters?

¹⁰ Make we self de look for how we fit help our brothers and sisters to show say we love them. (Heb. 13:16) See the example of Sister Anna, wey we talk about for the article before this one. After strong breeze blow for their area, them visit one family wey be Jehovah Witness and see say the breeze don scatter their roof. This one make all their cloth dirty. Sister Anna talk say: “We carry all their cloth go wash, we iron them, fold them and return-am to them. For our mind, na just small thing we do for them. But this thing wey we do, make us be tight friends reach today.” Because Sister Anna and e husband love brothers and sisters, this one move them to help them.—1 John 3:17, 18.

11. (a) When we show love to people, how this one de make them feel? (b) As e dey Proverbs 19:17, wetin Jehovah go do for us when we show love to our brothers and sisters?

¹¹ When we do good to people and show say we love them, them go see-am say we de do our best to copy Jehovah. And them go value wetin we do for them, pass as we think. Sister Khanh wey we talk about before, still de remember people wey help-am when e dey young. E talk say: “I thank Jehovah for all the sisters wey carry me go preaching when I dey young. Them come carry me for house, buy food for me, and still go drop me for house. Na now I know say no be small work them do. And them do-am because them love me.” Sister Khanh talk say: “I wish say I go fit pay them back for all the good things wey them do for me, but I no know where all of them dey now. But Jehovah know where them dey and e go bless them for me.” Wetin  Sister Khanh talk na true. Na true say no be everybody go remember to thank us for wetin we do for them. But Jehovah de see everything wey we de do for our brothers and sisters, even wetin we think say e small. E value them and e go pay us back.—Read Proverbs 19:17.

12. How brothers fit show their love for brothers and sisters for congregation? (Still check the picture.)

¹² If you be brother, how you fit show love for brothers and sisters and do things to help them? One young brother wey e name na Jordan ask one elder wetin e fit do to help brothers and sisters more for congregation. The elder thank-am for the good work wey e don de do and e tell-am some things wey e fit still do. For example, e advice-am say, make e de quick reach Kingdom Hall to fit greet brothers and sisters, de answer question for meetings, de preach with e field service group everytime and e fit still think about other things wey e fit do. When Brother Jordan do wetin the elder advice-am, e learn how to do many things and e love for the brothers and sisters grow more-more. E learn say, no be when person be ministerial servant e go start to help brothers and sisters, instead e go just continue to help them.—1 Tim. 3:8-10, 13.

13. How love move Brother Christian to be elder again?

¹³ If you don be elder or ministerial servant before, remember say Jehovah never forget the work wey you don do and e know say na love move you to do-am. (1 Cor. 15:58) And e de still see the love wey you de show now. One brother wey e name na Christian talk say e pain-am well-well when them remove-am as elder. E talk say: “I decide say whether I be elder or I no be elder, I go continue to serve Jehovah because I love-am.” After sometime, they make-am elder again. Brother Christian  talk say, “I be de fear to be elder again. But I decide say, if Jehovah don show me pity and allow me to serve as elder again, I go do-am because I love-am and I love my brothers and sisters.”

14. Wetin you learn from wetin Sister Elena for Georgia talk?

¹⁴ Jehovah people de show say them get love for their neighbors. (Matt. 22:37-39) Sister Elena for Georgia talk say, “Before, the only reason why I de preach na because I love Jehovah. But as my love for Jehovah de grow, na so my love for people de grow. I try to think about the problem wey them fit de face and wetin them go like to talk about. The more I think about them, the more I want help them.”—Rom. 10:13-15.

15-16. As them show-am for the picture, who de gain when we show love to our brothers and sisters?

¹⁵ No be only our brothers and sisters de gain when we show love to them. When coronavirus start, Brother Paolo and e wife help many old sisters learn how to use their phone preach. E first hard one sister to use phone preach, but later, e sabi-am. This one help-am to fit invite plenty people for e family to attend Memorial. Sixty people for e family use phone connect for Memorial. The sister and all the people wey e invite gain from wetin Brother Paolo and e wife do. Later, the sister write letter to Brother Paolo say: “Thank you as you take time teach old  people like us. I no go ever forget Jehovah love for us and how you no tire to help us.”

¹⁶ This kind experience teach Brother Paolo better lesson. E help-am see say love dey important pass anything wey we know or wey we fit do. E talk say: “Before, I be circuit overseer. Now, I see say, the brothers and sisters fit no remember the talks wey I give before, but them de still remember the things wey I do to help them.”

17. Who go still gain when we show love to other people?

¹⁷ When we show love to other people, we self de gain for way wey we no expect. Brother Jonathan for New Zealand agree with this one. One hot Saturday afternoon, e see one brother wey be pioneer wey de preach alone. Brother Jonathan decide say e go de preach with that brother every Saturday afternoon. That time, e no know wetin e go gain because e help the pioneer. Brother Jonathan talk say, “To talk true, that time, I no like to de go preaching. But as I de see how the pioneer de teach and the better results wey e de get from preaching, I start to de enjoy preaching. Another thing be say, the brother come be my good friend and e help me to like preaching and to near Jehovah more-more.”

18. Wetin Jehovah want make we do?

¹⁸ Jehovah want make our love for-am and for other people, continue to de grow. As we don learn, we fit make our love for Jehovah strong more-more when we de read Bible and think deep about wetin we de read and when we de pray to Jehovah everytime. We fit make our love for our brothers and sisters grow when we see say them need help and we help them. As our love de grow, we go de near Jehovah and our brothers and sisters more-more. And we go fit be their friend forever.