1. Why e good make we prepare before bad thing happen?

 IF WE prepare for something before e happen, e fit save our life. For example, when bad thing like heavy rain or war happen, people wey prepare, fit survive and help other people. One organization for Europe wey de help people wey bad things happen to, talk say: “If we prepare well before bad thing happen, this one fit save our life.”

2. Why we suppose prepare now for great tribulation? (Matthew 24:44)

² “Great tribulation” go start when people no expect. (Matt. 24:21) But e no go surprise us. When Jesus dey this earth, e tell e disciples say make them ready for that day. (Read Matthew 24:44.) If we prepare now, we go fit endure things wey go happen that time and we go fit help other people to endure.—Luke 21:36.

3. How strong love, to de endure and to de show pity, go help us ready for great tribulation?

³ Make we talk about three better character wey go help us ready for great tribulation. Wetin we go do if they tell us to start to preach judgement message, and people de attack us? (Rev. 16:21) To fit obey Jehovah, we go need to endure and trust say, Jehovah go protect us. Wetin we go do if our brothers and sisters lose their property? (Hab. 3:17, 18) To show say we pity them, we go help them. Wetin we go do if we need to live together with our brothers and sisters for sometime when different-different nations join hand attack us? (Ezek. 38:10-12) We go need strong love to fit stay together that time.

4. How Bible show say we need to continue to de endure, de show pity and get strong love more-more?

⁴ Bible de encourage us make we continue to show pity, de endure and get strong love more-more. Luke 21:19 talk say: “Na when wuna endure, wuna go save wuna life.” Colossians 3:12 talk say: ‘Make wuna get deep. . . feeling [or show pity]’  for one another. And 1 Thessalonians 4:9, 10 talk say: “God don already teach wuna to love each other. . . . But we de beg wuna make wuna continue to do-am more-more.” Them write this Bible verse them to Christians wey don already de endure, de show pity and get strong love for each other. But they need to continue to show-am more-more. We too need to continue to show this better-better character more-more. To fit do this one, make we see how Christians for apostles time show this better-better character. Then we go see how we fit copy their example and show say we don ready for great tribulation.

5. Wetin help Christians for apostles time to fit continue to endure?

⁵ Christians for apostles time endure plenty problem. (Heb. 10:36) Them no only face the problems wey people for their time de face, but them still face other problems because them be Christians. Leaders for Jew people religion, government for Rome and their family members suffer them because them de worship Jehovah. (Matt. 10:21) And for inside congregation, them still need to make sure say lie-lie teaching from people wey want scatter the congregation no affect them. (Acts 20:29, 30) Even with all this one, them continue to endure. (Rev. 2:3) Wetin help them? Them think deep about the example of servants of Jehovah like Job, wey endure serious problems. (Jas. 5:10, 11) Another thing be say them pray make Jehovah help them to fit endure. (Acts 4:29-31) And them put mind for the blessings wey them go enjoy if them endure reach the end.—Acts 5:41.

6. Wetin you learn from the example of Sister Merita?

⁶ We too go fit endure when we de take time to study and think deep about example of people for Bible and our book them wey endure. Na this one help Sister Merita for Albania to fit endure when e family de suffer-am because e de worship Jehovah. E talk say: “When I study wetin happen to Job for Bible, e really encourage me. Job suffer well-well. Even though say e no know say na Satan de make-am suffer, e talk say: ‘I no go ever leave God till I die!’ (Job 27:5) When I compare my problems with wetin Job face, I see say my problems no reach anything. One thing wey make my own better pass Job own be say I know say na Satan de cause my problem.”

7. Even if you no de face serious problem now, wetin you still need to de do?

⁷ Another thing wey go help us fit endure na when we de pray to Jehovah every time, and de tell-am everything wey de worry us. (Phil. 4:6; 1 Thess. 5:17) E fit be say you no de face serious problem now. But you de pray to Jehovah when person make you vex or when you no know wetin to do? If you de always pray to Jehovah when you de face small-small problem now, e go easy for you to fit pray when you get serious problem for future. Then you go trust say Jehovah know the best way and the best time to help you.—Ps. 27:1, 3.

8. How the example of Sister Mira show say when we de endure problem now, e go help us fit endure for future? (James 1:2-4) (Still check the picture.)

⁸ If we de endure problems wey we de face now, e go help us to fit endure problems wey we go face for great tribulation. (Rom. 5:3) Why we talk like that? Plenty of our brothers and sisters don see say if them endure problem, e de help them fit endure the one wey go come later. When Jehovah help them to fit endure problem, e de make their faith strong say Jehovah always ready to help them. And because them put faith for Jehovah, this one de help them fit endure any problem wey  them face. (Read James 1:2-4.) Sister Mira for Albania wey be pioneer don see say this one na true. E talk say sometimes, e de feel say nobody problem reach e own. But when e think about how Jehovah don support-am for 20 years now, e tell e self say: ‘Continue to hold Jehovah tight. No stop to worship Jehovah now after e don help you endure all the problem wey you don face.’ You too fit think deep about how Jehovah don help you endure problems before. Always get-am for mind say anytime wey you endure problem, Jehovah de see-am and e go bless you. (Matt. 5:10-12) Then when great tribulation start, you go don learn how to endure and ready to continue to endure.

9. How the congregation for Antioch wey dey Syria show say them feel for their brothers and ready to help them?

⁹ Make we see wetin happen when the brothers for Judea face serious hunger. When the congregation for Antioch wey dey Syria hear about their problem, they really feel for them. But them no only feel for the brothers and sisters for Judea, them do something to help them. Each of them “decide say they go contribute as their hand reach, and send wetin them get to the brothers wey de stay for Judea.” (Acts 11:27-30) Even though say Judea far from Antioch, the brothers and sisters for Antioch still decide say them go do something to help them.—1 John 3:17, 18.

10. How we fit show say we de feel for our brothers and sisters wey bad things happen to? (Still check the picture.)

¹⁰ Today, we too fit show say we de feel for our brothers and sisters and ready to help them when we hear say some bad thing happen to them. How we fit do this one? We fit ask elders if we fit join the people wey de help the brothers, we fit contribute money for worldwide work, or we fit pray for them. b (Prov. 17:17) For example, for 2020, e pass 950 Disaster Relief Committee, wey our organization form for the whole world to help our brothers and sisters wey need help because of coronavirus. We really thank everybody wey work with the relief committees to help our brothers and sisters. Because them de really feel for their brothers and sisters, them give things like clothes, food and other things, use Bible encourage them, and sometimes, repair their house or build new house and Kingdom Hall for them.—Compare 2 Corinthians 8:1-4.

11. How we de honor Jehovah when we de feel for people, and help them?

¹¹ When we help our brothers and sisters when bad thing happen to them, other people de see-am. For example, for 2019, heavy breeze and rain wey them call Hurricane Dorian scatter one Kingdom Hall for Bahamas. When our brothers de build the Kingdom Hall again, them tell one contractor wey no be Jehovah Witness say make e tell them how much some of the work wey them go do, go cost. But e tell them say: “I go like to give wuna . . . the machines, the people wey go do the work, and the things wey wuna need, for free. . . . I want help wuna. I really like the way wuna de help wuna people.” Many people for this world no know Jehovah, but many of them de see wetin Jehovah people de do to help other people. E de make us happy to know say when we de feel for our brothers and help them, e fit make other people want know more about Jehovah, our God wey de really show mercy.—Eph. 2:4.

12. If we de feel for our brothers and sisters and de help them now, how this one fit help us ready for great tribulation? (Revelation 13:16, 17)

 ¹² For great tribulation, we go need to de feel for our brothers and sisters and ready to help them. Why? Because Bible tell us say people wey no de support governments for this Satan world, go face plenty problem now and for great tribulation. (Read Revelation 13:16, 17.) For great tribulation our brothers and sisters fit need our help to get the things wey them need. So make we de help our brothers and sisters, so that when Jesus Christ our King come to destroy this Satan world, e go fit allow us enter the Kingdom.—Matt. 25:34-40.

13. As we see for Romans 15:7, wetin help Christians for apostles time to fit continue to show love to each other?

¹³ Everybody for the apostles time know say the Christians that time really love each other. But you think say e easy for them to love each other? Make we talk about the kind people wey dey for the congregation for Rome. Some of them na Jew people wey de obey the Law wey Jehovah give Moses, but the rest na people wey come from other country and wey get different-different way wey them de do things. Some na slave and some no be slave and some of them even get slaves wey de work for them. Even with all this one, how them take continue to show love to each other? Apostle Paul advice them say make them “welcome each other.” (Read Romans 15:7.) Wetin this one mean? The word wey apostle Paul use wey them translate as “welcome” mean to welcome people with good heart and treat them well. You fit do this one when you allow them come your house or make them your friends. For example, when Onesimus wey be slave to Philemon run comot from Philemon house, apostle Paul tell Philemon how to welcome-am back. E tell-am say make e welcome-am back with good heart. (Philem. 17) Another example na Priscilla and Aquila wey welcome Apollos. When them see say Apollos no know plenty things about the things wey Jesus teach, them make-am their friend and help-am. (Acts 18:26) The Christians for apostles time show love to each other even though say them come from different-different country and the way them de do things different.

14. How Sister Anna and e husband show love to brothers and sisters for their new congregation?

¹⁴ We too go fit show love to our brothers and sisters when we make them our friends and de spend time with them. This one go make them show us love. (2 Cor. 6:11-13) Make we see the example of Sister Anna and e husband. Small time after them go West Africa to serve as missionary, coronavirus start. Because of this one, them no fit meet the brothers and sisters for their new congregation, face to face, so e no easy for them to know the brothers. Wetin them do to fit show them love? Them use video call to talk with the brothers and sisters and tell them say they really want know them and be their friends. This one really touch them, so them start to call and send message to Sister Anna and e husband. Why them try to know the brothers and sisters for their new congregation? Sister Anna talk say, “I no go ever forget the love wey brothers and sisters show me and my family, when things good and when e bad for us. Their example de move me to show love to other people.”

15. Wetin you learn from the example of Sister Vanessa? (Still check the picture.)

¹⁵ For plenty of us, brothers and sisters for our congregation come from different-different  place and de do things for different-different way. We go fit continue to love them if we de put mind for their better-better character. One sister for New Zealand wey e name na Vanessa talk say, before, e de hard-am to make friend with some brothers and sisters for congregation. But e decide say instead to run from people wey e no like their character, e go spend more time with them. This one help Sister Vanessa see wetin make Jehovah love this brothers and sisters. E talk say: “Since my husband start to serve as circuit overseer, we de spend time with plenty brothers and sisters wey get different-different character, and e dey easy now for me to spend time with them. This one don make me love brothers and sisters from different-different place. Jehovah love them too because e don allow people wey come from different-different place to come worship-am.” When we de see people the way Jehovah de see them, we de show say we love them.—2 Cor. 8:24.

16. For great tribulation, why we go need to love our brothers and sisters? (Still check the picture.)

¹⁶ Another character wey go help us for great tribulation na love. How Jehovah go protect us when great tribulation start? Make we see wetin Jehovah tell Israel people wey dey Babylon when enemy attack Babylon. E talk say: “My people, make wuna enter wuna inner room and close door. Make wuna hide wuna self small until God vex finish.” (Isa. 26:20) E fit be say, we too go need to follow wetin this verse talk, for great tribulation. The “inner room” for this Bible verse fit mean our different-different congregation. Jehovah don promise us say e go protect us for great tribulation if we continue to serve-am together with our brothers and sisters. So we need to do our best now to get strong love for them. This na one of the things wey go help us to fit survive the great tribulation.

17. Wetin we go fit do if we prepare now for great tribulation?

¹⁷ Things go really hard for everybody for great tribulation. (Zeph. 1:14, 15) Things no go easy even for people wey de serve Jehovah. But if we prepare now, we go fit dey calm that time and even fit help other people. We go fit endure any problem wey we go face. When our brothers and sisters de suffer, we go do our best to help them or give them wetin them need because we de feel for them and we ready to help them. And if we love our brothers and sisters now, we go fit show them love for great tribulation. Then Jehovah go bless us and put us for paradise wey we no go get any problem again.—Isa. 65:17.