PEOPLE wey de dig olden days things for ground don see plenty blocks wey them use build Babylon. Them see say this blocks na blocks wey them bake. Robert Koldewey wey be one of the people wey de dig old things for ground talk say them de make this kind blocks for big fire wey dey “outside the town where good clay and where things wey them de use set fire . . . plenty.”

Another thing wey them see show say government people for Babylon be de use this kind big fire do wicked things. Professor Paul-Alain Beaulieu wey study the way Assyria people de do things, talk say, “Plenty books wey talk about Babylon people show say Babylon king de command e people say anybody wey disobey-am, them go throw-am for the big fire.” For example, one book wey them write for the time wey King Nebuchadnezzar de rule, talk say: “Destroy them, burn them, roast them, . . . throw them inside fire make them die and make their smoke go up.”

This one de make us remember wetin dey Daniel chapter 3. For there, we read say King Nebuchadnezzar use gold make one big image for one place wey them de call Dura wey dey outside the city of Babylon. When King Nebuchadnezzar say make everybody bow down for the image, Shadrach, Meshach, and Abednego no gree bow down. This one make the king vex and talk say make them make the big fire hot seven times pass as e dey before and throw this three people inside. But Jehovah use e angel save them make the fire no kill them.—Dan. 3:1-6, 19-28.

The things wey them write ontop the blocks wey them see where Babylon dey before, still show say wetin Bible talk correct. For many of the blocks, them write different things to praise the king. One example of wetin them write na: “The palace wey me, the Great King build . . . Me, Nebuchadnezzar, King of Babylon . . . Make my pikin them rule for here forever.” This thing wey they write for the blocks just be like wetin Daniel 4:30 talk, where Nebuchadnezzar boast say: ‘No be this Babylon the Great I build by myself for the house of the king, by my own power for my own praise?’