1-2. (a) Which warning Jesus give im disciples? (b) Why Jesus disciples run leave-am? (Still check the picture.)

 JESUS tell im disciples say: “The spirit ready, but body weak.” a (Matt. 26:41b) This thing wey Jesus talk, show say e know say we no dey perfect and say we fit make mistake. But wetin e talk still be warning for us say, make we no think say we go fit do the correct thing all the time. Some hours before Jesus talk this things, im disciples don promise say them no go ever leave-am. (Matt. 26:35) Them get better thing for mind. But them no know say if problem come, them fit no get the power to do the correct thing. So Jesus warn them say: “Make una continue to watch and continue to pray so that una no go fall for temptation.”—Matt. 26:41a.

² But the disciples no do wetin Jesus say make them do. When them come arrest Jesus, im disciples do wetin them promise or them run leave-am? Because them no ready for wetin happen, them do wetin them don promise say them no go do—them run leave Jesus.—Matt. 26:56.

3. (a) Why e no good to de think say we go always dey strong to do wetin correct? (b) Wetin we go talk about for this article?

³ Make we no think say we go always dey strong to do wetin correct. Na true say we don make up our mind say we no go do anything wey go make Jehovah no happy. But make we remember say we no dey perfect and say we fit make mistake.  (Rom. 5:12; 7:​21-23) Some things wey we no expect fit happen wey go make-am hard for us to fit do wetin correct for Jehovah eye. To fit continue to do wetin go make Jehovah and Jesus happy, we need to follow Jesus warning say make we always ready to run from temptation. For this article, we go learn how we fit do this one. We go first talk about things wey we need to ready to run from. Then, we go talk about how we fit run from things wey fit make us sin. And the last one wey we go talk about na how we go continue to run from things wey fit make us sin.

KNOW YOUR WEAK POINT

4-5. Why we need to ready to run from even sin wey no too serious?

⁴ Na true say some sin no dey serious reach other sin, but even the ones wey be like say them no dey serious fit spoil our friendship with Jehovah. And them fit even make us commit serious sin.

⁵ All of us de face temptation. But everybody get weak point wey the temptation de strong for-am pass. For example, somebody fit de do im best make e no put hand for sex wey no clean. But another person own fit be make e no put hand for wetin no clean for Jehovah eye, like to de rub im private part make e sweet-am, or to de look picture or film of naked people. And another person own fit be to de fear people, to de carry shoulder up, to de quick vex, or other bad things. James talk say, “Each person de face test when the thing wey e want, don de tempt-am and de hungry-am.”—Jas. 1:14.

6. Wetin be the truth wey we need to tell ourself?

⁶ You know your weak point? We de put ourself for danger if we no know our weak point, or if we de tell ourself say nothing fit make us fall for temptation. (1 John 1:8) Apostle Paul talk say even elders fit fall for temptation if them no dey careful. (Gal. 6:1) We must tell ourself the truth for this matter and know our weak point.—2 Cor. 13:5.

7. To fit fight temptation and win, which area we need to protect pass? Give example.

⁷ When you don know your weak point, wetin you suppose do? Do your best to run from any temptation wey you fit quick fall put! See one example wey fit help us understand-am well. For Bible time them de fence city round and put gate. And na the gate dey weak pass, so na the gate them de  protect pass. Na so e still be for us, we need to work hard so that we go strong for area wey be our weak point.—1 Cor. 9:27.

HOW TO FIGHT TEMPTATION AND WIN

8-9. How the young man wey Proverbs chapter 7 talk about for fit run from serious sin? (Proverbs 7:8, 9, 13, 14, 21)

⁸ How we fit fight temptation and win? Make we see wetin we fit learn from the young man wey Proverbs chapter 7 talk about. The young man sleep with one woman wey like sex wey no clean. Verse 22 tell us say the young man run follow the woman at once. But other verse before verse 22, show say e don do other things wey lead-am small-small to commit that sin.

⁹ Make we see the things wey the young man do wey make-am fall for that sin. First, for evening, e “pass the street wey near where the woman de stay.” Then, e waka go the woman house. (Read Proverbs 7:8, 9.) The next thing be say when e see the woman, e no waka leave-am. Instead e allow the woman kiss-am, and e listen to the woman as e de tell-am about the communion sacrifice wey e do, so that the young man no go see-am as bad person. (Read Proverbs 7:​13, 14, 21.) If to say the young man no do all this things, e for fit fight this temptation and win.

10. Today, how person fit make the same mistake wey the young man for Proverbs make?

¹⁰ The story of this young man, na example of wetin fit happen to any servant of Jehovah for this our time. E fit commit serious sin, and later feel say everything just happen at once or say e no expect-am. But if e take time think-am, e go see say e don make some foolish decision wey make-am commit the sin. Some of this things fit be bad friends wey e de follow, to de go where no good for servant of Jehovah even for Internet, or to de use things wey no good for servant of Jehovah enjoy imself, like book, film, and music wey no good. E fit still be say e no de pray again, read Bible, go meeting, or no de preach again. Just like the young man wey Proverbs talk about, the temptation no come at once, but na im bad decisions cause the temptation and make-am fall for the sin.

11. Wetin we go do so that we no go sin?

¹¹ Wetin this story teach us? E teach us say no be only the sin we go run from, but we go still run from things wey fit make us sin. Na so Solomon talk after e explain wetin happen to the young man and the woman wey like sex wey no clean. Solomon advice us say: “Make you no waka enter im road.” (Prov. 7:25) E still talk say: “Make you stay far from-am well-well; no go near where them de pass enter im house.” (Prov. 5:3, 8) So, to fit fight temptation and win, we must stay far from things and situations wey fit make us sin. b This one mean say, even though say some things no bad for servant of Jehovah, we go stay far from them if them go cause temptation for us and make us sin.—Matt. 5:​29, 30.

12. Which decision Job make, and how this one help-am make e no fall for temptation? (Job 31:1)

¹² To fit stay far from the things wey fit make us sin, we need to make serious decision say we no go ever near things wey fit tempt us. Na wetin Job do be that. E “make agreement with [im] eye” say e no go ever look other women and think wetin no clean for im mind. (Read Job 31:1.) This decision help Job no sleep with woman wey no be im wife. We too  fit make decision wey go help us stay far from anything wey fit make us sin.

13. Why we need to dey careful about the things wey we de think? (Still check the picture.)

¹³ Another thing be say we need to dey careful about the things wey we de think. (Ex. 20:17) Some people believe say e no bad for person to de imagine say e de do wetin no good and de enjoy-am for im mind, as far as say e no do-am for real life. But person wey de think like this de deceive imself. Because as e continue to think about the bad thing, e go de hungry-am more-more to do-am. This one mean say the person de set trap for imself, and e go still need to work hard make e no fall put. Na true say sometimes bad things fit come our mind. But wetin go help us na to comot them from our mind quick-quick, and use good ones replace them. If we do like this, e go help us make we no allow the bad things wey come our mind to grow. Because if them grow, them fit hard us to fight and even make us sin.—Phil. 4:8; Col. 3:2; Jas. 1:​13-15.

14. Which other thing fit help us fight temptation and win?

¹⁴ Which other thing fit help us fight temptation and win? We need to believe with all our heart say we go always gain if we obey Jehovah law. Sometimes, e fit hard us to de think and want make things go the way Jehovah want. But when we do our best to do things the way Jehovah want, we go really happy.

15. If we love wetin good for Jehovah eye, how that one fit help us fight temptation and win?

¹⁵ We need to train ourself to love wetin good for Jehovah eye. If we “hate bad thing and like good thing,” e go help us fit ready to do wetin correct and stay far from things wey fit make us sin. (Amos 5:15) If we love wetin good for Jehovah eye, e go help us fit hold Jehovah tight when we face temptation wey we no expect.

16. How the things wey we de do as we de worship Jehovah fit help us fight temptation and win? (Still check the picture.)

¹⁶ How we fit train ourself to love wetin  good for Jehovah eye? We fit do this one when we de do things wey go make our love for Jehovah strong more. When we dey with our brothers and sisters for meeting or de preach with them, e no go dey easy for bad things to tempt us. But e de help us more-more to fit do wetin go make Jehovah happy. (Matt. 28:​19, 20; Heb. 10:​24, 25) Another thing be say when we de read and study Bible, and think deep about wetin we learn, e go help us love wetin good and hate wetin bad more-more. (Josh. 1:8; Ps. 1:2, 3; 119:​97, 101) Jesus tell im disciple say: “Continue to pray so that una no go fall for temptation.” (Matt. 26:41) When we de pray to our Papa for heaven, we de give-am the chance to help us, and this one still de help us fit continue to do wetin go make-am happy.—Jas. 4:8.

ALWAYS READY TO FIGHT TEMPTATION

17. Which weak point Peter get?

¹⁷ E dey possible for us to stop some of the things wey our body de push us to do kpatakpata. But we fit need to continue to struggle with some other ones for long time. Make we see apostle Peter example. Na because e fear people, make-am deny Jesus three times. (Matt. 26:​69-75) When Peter use strong mind preach about Jesus for front of the Sanhedrin, e just be like say e no de fear people again. (Acts 5:​27-29) But after some years, e stop to chop with Christians wey no be Jew, because “e de fear” wetin Christians wey be Jew go think about-am. (Gal. 2:​11, 12) This time, Peter fear people again. E fit be say this fear no ever comot from Peter body finish.

18. After we think say we don succeed to fight our weak point and win, wetin fit still happen, and wetin we need to do?

¹⁸ Like Peter, e fit be say we go need to continue to struggle with our weak point wey we think say we no get again. For example, one brother talk say: “I be de look film and picture of naked people, but I come stop-am for ten years, this one make me feel say I no get the problem again. I no know say the problem de hide for corner de wait for the correct time wey e go come out again.” The better thing be say our brother continue to do im best to fight im weak point. E see say e go need to  work hard everyday to fight this weak point, and e fit be say e go continue to do this one for the rest of im life for this Satan world. Now e dey careful so that e go dey far from anything wey go make-am look film and picture of naked people. Im wife and elders for congregation de really help-am.

19. Wetin we go do so that our weak point wey we never succeed to win, no go make us sin?

¹⁹ Wetin we go do so that our weak point wey we never succeed to win, no go make us sin? We must follow Jesus advice wey talk say: “Make una continue to de watch.” This one mean say we go always ready to fight our weak point even when we think say we dey strong, and continue to stay far from things wey fit make the weak point strong. (1 Cor. 10:12) Continue to do things wey don help you succeed to win your weak point. Proverbs 28:14 talk say: “Person wey de always watch well go de happy.”—2 Pet. 3:14.

HOW WE DE GAIN WHEN WE ALWAYS READY TO FIGHT TEMPTATION

20-21. (a) Wetin we go gain if we continue to always ready to fight temptation? (b) If we do our part, wetin Jehovah go do for us? (2 Corinthians 4:7)

²⁰ We dey sure say if we do our best to always fight temptation, we go really gain. When person sin, e fit happy for only “short time,” but when we do wetin Jehovah want, e go make us always happy. (Heb. 11:25; Ps. 19:8) Because the way e make us na to de do wetin e want. (Gen. 1:27) When we de do wetin Jehovah want, our conscience no go de worry us and we go get the hope to live forever.—1 Tim. 6:12; 2 Tim. 1:3; Jude 20, 21.

²¹ True-true, our “body weak.” But this one no mean say we no get wetin we fit do about our weak point. Jehovah always ready to give us the power wey we need. (Read 2 Corinthians 4:7.) But know say the kind power wey Jehovah de give us na power wey pass our normal power. But first, we need to use our power wey be the normal power to fight temptation everyday. When we don do our part, we dey sure say Jehovah go give us the power wey pass normal power when we need-am. (1 Cor. 10:13) True-true, Jehovah go fit help us fight temptation and win.