1-2. Who be Zadok? (1 Chronicles 12:​22, 26-28)

 JUST think about one big crowd wey pass 340,000 men. Them gather together to make David king for Israel. For three days, the men stay for the hills wey plenty rock dey for near Hebron. Them de talk, de laugh, and de sing praise to Jehovah. (1 Chron. 12:39) One young man wey im name na Zadok dey among them. E for no easy for plenty people to know say e dey there. But Jehovah see-am for there and e want make we know say Zadok dey there. (Read 1 Chronicles 12:​22, 26-28.) Who be Zadok?

² Zadok na priest and e work with High Priest Abiathar. Jehovah give Zadok sense and make-am fit de understand wetin E want. (2 Sam. 15:27) People de go meet Zadok make e advice them when them need help. Another thing be say Zadok get strong mind. For this article, we go talk about how Zadok show say e get strong mind.

3. (a) Why servants of Jehovah need to get strong mind? (b) Wetin we go talk about for this article?

³ For this last days, Satan de try more-more to spoil our friendship with Jehovah. (1 Pet. 5:8) We need to get strong mind as we de wait for the time wey Jehovah go destroy Satan and this wicked world wey e de control. (Ps. 31:24) Now make we talk about three ways wey we fit copy Zadok example.

SUPPORT GOD KINGDOM

4. Why Jehovah people need strong mind to fit support God Kingdom? (Still check the picture.)

⁴ As servants of Jehovah, we de use all our heart support God Kingdom. But many times, we need strong mind to fit do-am. (Matt. 6:33) For example, for this wicked world, we  need strong mind to fit live the way Jehovah want and to preach the good news. (1 Thess. 2:2) Another thing be say, people de support different side for politics and this one de make them hate each other more-more. So we need strong mind so that we no go support any side. (John 18:36) Many of Jehovah people don lose their job, them don beat some of them, or put some for prison because them no gree put hand for politics or support war.

5. Why Zadok need strong mind to fit support David?

⁵ Zadok no only go Hebron to celebrate as them de make David king. But e carry im weapon go there and e ready to fight. (1 Chron. 12:38) E ready to follow David go war to fight Israel enemy. Even though say Zadok never fight plenty war, e really get strong mind.

6. How David take show Zadok better example wey e go follow? (Psalm 138:3)

⁶ Wetin help Zadok wey be priest to fit get strong mind? E know plenty people wey de strong and wey get strong mind. And e really gain from their example. For example, because David get strong mind and na strong warrior, na im de lead Israel people go war. This one make all Israel people want make e be their king. (1 Chron. 11:1, 2) Another thing be say David trust Jehovah to fit fight im enemy them. (Ps. 28:7; read Psalm 138:3.) Zadok still learn from other people like, Jehoiada and im pikin wey be Benaiah, and other 22 chief from im tribe wey support David. (1 Chron. 11:​22-25; 12:​26-28) All this people make up their mind say them go make David king and protect-am.

7. (a) Which example of people for this our time fit help us get strong mind? (b) Wetin you learn from Brother Nsilu story as e dey for the video?

⁷ When we think about how other people don use strong mind hold Jehovah and im Kingdom tight, this one de help us get strong  mind too. When Jesus dey this earth, e use all im mind reject politics for this world. (Matt. 4:​8-11; John 6:​14, 15) Jesus always trust Jehovah say e go help-am get strong mind to do wetin correct. For this our time, we get plenty example of brothers and sisters wey no gree join army or support politics. We de encourage you to read their story for jw.org. a

HELP BROTHERS AND SISTERS

8. Which kind time elders need strong mind to fit help their brothers and sisters?

⁸ Jehovah people love to help each other. (2 Cor. 8:4) But sometimes, we need strong mind to fit do-am. For example, when war start, the elders wey dey the area wey them de fight war know say them need to encourage brothers and sisters, support them, give them things wey them need to continue to hold Jehovah tight, and other things wey them fit need to survive. Because elders love brothers and sisters, them de risk their own life to give them wetin them need. (John 15:​12, 13) When elders help brothers and sisters like this, e de show say them de follow Zadok example.

9. As e dey for 2 Samuel 15:​27-29, wetin David say make Zadok do? (Still check the picture.)

⁹ E get one time wey David life dey for danger. Im pikin Absalom, don make up im mind to kill David so that e go become king. (2 Sam. 15:​12, 13) David need to run comot from Jerusalem quick-quick! E tell im servants say: “Make una get up make we run comot, because nobody among us go fit escape from Absalom hand.” (2 Sam. 15:14) As all of them de comot, David come reason say somebody go need to stay for Jerusalem wey go de tell-am wetin Absalom de plan. So David tell Zadok and other priest say make them stay for Jerusalem, so that them go de tell-am wetin Absalom de plan. (Read 2 Samuel 15: 27-29.) Them need to dey careful well-well. This work wey David give them no be easy one. Because if Absalom catch them, their own don finish. Absalom na wicked man, na only wetin e want dey im mind and e don even turn against im papa. Just think wetin Absalom go do to them if to say e catch them as them de work for David!

10. How Zadok and the other people protect David life?

¹⁰ David tell Zadok and Hushai wey still be David better friend, say make them help-am fit do wetin e plan. (2 Sam. 15:​32-37) Them follow David plan. Hushai pretend say e de support Absalom and this one make Absalom trust-am well-well. Na im make Hushai fit give Absalom advice wey help David ready before Absalom go attack them. Then, Hushai tell Zadok and Abiathar wetin Absalom de plan. (2 Sam. 17:​8-16) The two of them send people to tell David Absalom plan. (2 Sam. 17:17) Jehovah help Zadok and other priest to fit do their best to protect David life.—2 Sam. 17:​21, 22.

11. How we fit show say we get strong mind like Zadok when we de help our brothers and sisters?

¹¹ If them give you the work to care for our brothers and sisters when serious bad thing de happen, how you fit show say you get strong mind like Zadok? (1) Do things the way Jehovah organization say make you do-am. When serious bad thing de happen, e dey important make we de obey wetin Jehovah organization talk, so that all of us go dey together as one. Follow direction from the branch office wey de care for una. (Heb. 13:17) Make elders de always check the things wey branch office don write about how to prepare before disaster happen, and wetin to do when e happen. (1 Cor. 14:​33, 40) (2) Get strong mind but make you dey careful. (Prov. 22:3) Use sense do things. As you de help brothers and sisters, no put your life for danger anyhow. (3) Trust Jehovah  with all your heart. Remember say Jehovah no want make bad thing happen to you and other brothers and sisters. So e go fit protect you as you de help brothers and sisters.

12-13. Wetin you learn from Brother Victor and Brother Vincent story? (Still check the picture.)

¹² Make we talk about two brothers for Ukraine wey de carry food and water to our brothers and sisters for there. Their name na Victor b and Vincent. Brother Victor talk say: “We de go look for food for everywhere and many times, we de hear as people de shoot gun near where we dey. One brother donate food for brothers and sisters from the ones wey e don keep. The food wey the brother donate really help the brothers and sisters get wetin them go chop for some time. As we de load the food for inside our motor, one bomb fall for around 20 meters (66 ft) from where we dey, but e no blast. I pray the whole day to Jehovah say make e give me strong mind to fit continue to help my brothers and sisters.”

¹³ Brother Vincent talk say: “We really need strong mind to fit do this work. The first time wey I join do the work, I drive for 12 hours. And I pray to Jehovah for the whole day.” Brother Vincent show say e get strong mind, but e dey careful as e de do this work. E still talk say: “I continue to beg Jehovah say make e give me sense and help me no do pass myself. Na only the road wey government say make we pass I follow. The way brothers and sisters de work together for this time wey war dey, really make my faith strong. Brothers and sisters remove things wey block road, help us gather the food and other things wey our brothers and sisters need, and load them for inside motor. Them still arrange wetin me and Brother Victor go chop, and where we go sleep.”

CONTINUE TO HOLD JEHOVAH TIGHT

14. How e de make us feel if person wey we love leave Jehovah?

¹⁴ One of the things wey de pain us pass na when our family member or our tight friend leave Jehovah. (Ps. 78:40; Prov. 24:10) The more we love the person, the more e go pain us say this kind thing happen. If this kind thing happen to you, make you know say Zadok example go fit help you continue to hold Jehovah tight.

15. Why Zadok need strong mind to fit continue to hold Jehovah tight? (1 Kings 1:​5-8)

¹⁵ Zadok continue to hold Jehovah tight even when im friend wey be Abiathar choose to turn against David. This one happen small time before David die. When David don old and don near when e go die, im son Adonijah try to become king instead of Solomon wey Jehovah choose. (1 Chron. 22:9, 10) Abiathar come support Adonijah. (Read 1 Kings 1:​5-8.) As Abiathar do this one, e show say e don turn against David and Jehovah. This one go don really pain Zadok and make-am no happy! E pass 40 years wey Zadok and Abiathar work together as priest. (2 Sam. 8:17) Them care for “the Ark of the true God” together. (2 Sam. 15:29) The two of them support David as king and them don do plenty things together for Jehovah work.—2 Sam. 19:​11-14.

16. Wetin fit don help Zadok continue to hold Jehovah tight?

¹⁶ Zadok continue to hold Jehovah tight even when im friend Abiathar choose to leave Jehovah. David know say e go fit always trust Zadok. When David hear about Adonijah  plan, e send Zadok, Nathan, and Benaiah to anoint Solomon as king. (1 Ki. 1:​32-34) Zadok go don gain from the example of Nathan and other people wey hold Jehovah tight and support King David. (1 Ki. 1:​38, 39) When Solomon become king, e put Zadok as high priest to replace Abiathar.—1 Ki. 2:35.

17. How you fit copy Zadok example if person wey you love stop to worship Jehovah?

¹⁷ How we fit copy Zadok example? If person wey you love stop to worship Jehovah, show say na Jehovah you love pass. (Josh. 24:15) Jehovah go give you the power wey you need to fit do the correct thing. Always pray to Jehovah and continue to do things with brothers and sisters wey hold Jehovah tight. Jehovah love you and e go bless you as you hold-am tight.—2 Sam. 22:26.

18. Wetin you learn from Brother Mark and Sister Susan story?

¹⁸ See the example of Brother Mark and im wife Susan, wey their two daughters wey don grow stop to worship Jehovah. Brother Mark talk say: “From the time wey you born your children, you love them well-well. You ready to do anything make no bad thing happen to them. So if them choose to leave the truth, e de pain well-well. But Jehovah de help us fit endure. E don help us to fit encourage each other. When I dey weak, my wife go encourage me, and when my wife dey weak, I go encourage-am.” Sister Susan talk say: “We for no fit bear-am if to say Jehovah no give us the power wey we need. Wetin happen really pain me, I come de blame myself say na my fault. So I pray to Jehovah and tell-am how I de feel. After some time, I meet one sister wey I never see for many years, e put hand for my shoulder, look me for eye and tell me say: ‘Susan, remember say no be your fault!’ Jehovah don help me fit continue to de happy as I de worship-am.”

19. Wetin you don make up your mind to do?

¹⁹ Jehovah want make all im servants get strong mind like Zadok. (2 Tim. 1:7) But Jehovah no want make we do-am by ourself. E want make we trust-am. So when something happen and you see say you need strong mind, pray to Jehovah make e help you. You fit trust Jehovah say e go help you fit get strong mind like Zadok!—1 Pet. 5:10.