Question Wey Some People Don Ask
Who be the “woman” wey Isaiah 60:1 talk about, and how e “get up” and “show light”?
Isaiah 60:1 talk say: “Get up, woman, show light, because your light don come. Jehovah glory de shine ontop you.” Other verse for Bible show say the “woman” na Zion or Jerusalem, wey be capital of Judah that time. a (Isa. 60:14; 62:1, 2) Jerusalem represent all Israel. Wetin Isaiah talk fit make us ask this two question: Number one, which time, and how Jerusalem “get up” and “show light”? Number two, na for this our time wetin Isaiah talk de happen pass how e happen for Bible time?
Which time, and how Jerusalem “get up” and “show light”? When them destroy Jerusalem and the temple, them carry Israel people go Babylon as slave and them stay there for 70 years. But after Media and the Persia people win Babylon, Israel people wey dey all the area wey Babylon people be de rule, get the chance to go back to Jerusalem to worship Jehovah well again. (Ezra 1:1-4) From 537 B.C.E., some people from the 12 tribe of Israel go back to Jerusalem. (Isa. 60:4) Them start to make sacrifice to Jehovah, celebrate the different-different festival, and build the temple again. (Ezra 3:1-4, 7-11; 6:16-22) That time, Jehovah glory start to shine again ontop Jerusalem or ontop Jehovah people. Then them start to shine and show light to other nations wey no de serve Jehovah.
But no be everything wey Isaiah talk happen to Jerusalem that time. Most of Israel people no continue to obey Jehovah. (Neh. 13:27; Mal. 1:6-8; 2:13, 14; Matt. 15:7-9) Later, them even reject Jesus Christ wey be the Messiah. (Matt. 27:1, 2) Them later destroy Jerusalem and the temple again for 70 C.E.
Jehovah don talk before say na so e go happen. (Dan. 9:24-27) This one show say Jehovah no get-am for mind say everything wey Isaiah write for Isaiah chapter 60, go happen to Jerusalem.
Na for this our time wetin Isaiah talk de happen pass how e happen for Bible time? Yes, but this one de happen to another woman wey Bible call, “the Jerusalem for up.” Apostle Paul talk about the woman say: “Na our mama.” (Gal. 4:26) Jerusalem for up na the part of Jehovah organization wey dey heaven, and all the angels wey de worship Jehovah for heaven dey part of-am. The “children” of the woman na Jesus and the 144,000 wey go rule with Jesus for heaven. Apostle Paul dey among them. Bible call all the anointed Christians together say, them be “holy nation” or “Israel of God.”—1 Pet. 2:9; Gal. 6:16.
How the Jerusalem for up “get up” and “show light”? E de use the anointed Christians wey still dey this earth to do this one. See some things wey happen to them, wey be like the one wey Isaiah chapter 60 talk about.
After the last apostle die, anointed Christians dey for darkness because lie-lie teaching spread enter inside congregation just as Jesus don talk. Because of this one, them need to “get up.” (Matt. 13:37-43) That time, them become slave to Babylon the Great wey be all lie-lie religion for the whole world. Anointed Christians continue to be slave until “the last days of the world,” wey start from 1914. (Matt. 13:39, 40) For 1919, anointed Christians comot from Babylon the Great and start to shine and show light to the whole world as them de use all their mind preach the good news about God Kingdom. b Since that time, people from all nations don see the light, even anointed ones wey still remain for this earth wey Bible call kings for Isaiah 60:3, don still see the light.—Rev. 5:9, 10.
For future, anointed Christians go shine the light from Jehovah to people pass the way them de do-am now. How? When them die for this earth, them go go heaven and be part of “New Jerusalem” wey be the 144,000 wey go rule as king and priest with Jesus.—Rev. 14:1; 21:1, 2, 24; 22:3-5.
The New Jerusalem get important work to do so that wetin dey Isaiah 60:1 go happen. (Compare Isaiah 60:1, 3, 5, 11, 19, 20 with Revelation 21:2, 9-11, 22-26.) Just as Jerusalem for Judah be the place wey Israel government be dey that time, na so New Jerusalem and Jesus Christ go become the government for the new world. Wetin e mean for New Jerusalem to “come down from heaven from God”? E mean say all the anointed go care for people for this earth after them don go heaven. People wey de worship Jehovah for the whole world ‘go use their light waka.’ Them no go sin again and them no go die. (Rev. 21:3, 4, 24) For the end, “everything go dey new” just as Isaiah and other prophets don talk. (Acts 3:21) When Jesus become King, things start to dey new, and e go continue go reach the end of the One Thousand Year Wey Jesus Go Rule.
a Why the New World Translation Bible, use “woman” instead of “Zion” or “Jerusalem” for Isaiah 60:1? This na because the Hebrew word for “get up” and “show light,” show say e de talk about woman. And na this woman the “you” wey dey the verse de talk about. And as them use the word “woman,” e go help person wey de read-am to know say no be real person the verse de talk about.
b For 1919, anointed Christians start to worship Jehovah well again, just as Bible talk-am for Ezekiel 37:1-14 and Revelation 11:7-12. Prophet Ezekiel talk say all anointed Christians go start to worship Jehovah well again after them don be slave to Babylon the Great for long time. Revelation show say them go put one small group of anointed brothers wey de direct Jehovah organization for prison for short time, so them no go dey free to serve Jehovah. But later, them go dey free again to worship Jehovah. For 1919, Jesus appoint them as “faithful and discreet slave.”—Matt. 24:45; check Pure Worship of Jehovah—Restored At Last!, page 118. (For English.)
