AS ISRAEL people de prepare to cross River Jordan and enter the land wey God don promise them, some people come visit them. This people na women and they no come from Israel. They invite the men to come enjoy with them for one party. Person fit think say this one na special chance to enjoy. To make new friends, to dance and eat better food go really sweet! But the kind life wey the women de live and their culture no be how the Law of God direct Israel people to live their life. But some of the men for Israel fit de think for their mind say: ‘We go dey careful, their lifestyle no fit affect us.’

 So wetin come happen after? Bible tell us say: “The people start to do things about sex wey God hate with the daughters of Moab.” The truth be say, the women want make the men of Israel worship other gods. And the men do wetin the women want! No wonder “Jehovah really vex for Israel people.”​—Num. 25:1-3.

Israel people break the Law of God for two ways: They bow down to idols, and they do things about sex wey God hate. Thousands of people die because they no obey God. (Ex. 20:4, 5, 14; Deut. 13:6-9) This thing wey they do really dey sad. Why? Na because of the time wey they do-am. Na just small time remain, they for cross River Jordan and enter Promise Land. If to say the men no break the Law of God, all those plenty people no for die.​—Num. 25:5, 9.

Apostle Paul write about the things wey happen, e say: “This things happen to them as example, and they write-am so that they go be as warning for us wey we de live for the time wey the end of this world don reach.” (1 Cor. 10:7-11) We know say Satan go really glad as some Israel people put hand for serious sin, and they no come qualify again to enter the Promise Land. So e dey important make we put this warning for heart, as we know say Satan go still like to stop us so that we no go enter Paradise!

Today, Satan de target Christians. E de use things wey e don use catch many people before. As we talk for up, Satan use sex wey God hate to catch Israel people. For our time, things about sex wey God hate na still bad trap wey Satan de use. One thing wey Satan fit use to make us fall for this trap na pornography, and this one de really work.

Today, person fit de watch pornography and another person no go know say e de watch-am. Many-many years ago, if person want watch pornography, e go need to go watch-am for film house or go buy-am for bookshop where them de sell that kind thing. That time, maybe many people no go that kind place because them de shame say people go see them. But now, if person get Internet, e fit watch pornography for work place or even inside motor. And for many lands, man or woman fit watch pornography for their house.

No be only that one. Phones, tablet or laptop don make-am easy for people to fit watch pornography. As people de waka for street or de move from one place to another place for bus or train, they fit use things like phone to watch things wey concern sex wey God hate.

Pornography de cause trouble for many people today pass before because e don dey easy for person to watch pornography and another person no go know. Plenty people wey them de watch pornography de scatter their marriage, their self-respect and their conscience. The one wey bad pass be say, they fit spoil their friendship with God. The truth be say, pornography de cause trouble for anybody wey e de watch-am. Many times, pornography de make people to really feel pain. Sometimes, the wound fit de heal small-small, but the mark no de finish.

But make we know say Jehovah de give us wetin go protect us from this trap wey Satan de use. If we want make Jehovah protect us, we must do the thing wey the men of Israel no do. We go “obey everything” wey Jehovah talk. (Ex. 19:5) We need to know say God hate pornography. Why we talk so?

Just think about the laws wey God give Israel people that time, e dey different from the laws of any other nation. The laws wey God give Israel people be like wall. This laws separate Israel people so that they no go do the bad things wey other nations de do. (Deut. 4:6-8) The laws make one important truth dey clear, say: Jehovah hate corrupt things about sex.

Jehovah talk the bad-bad things wey the nations around Israel people de do, and e warn Israel people say: “Make wuna no ever do the things wey the people for Canaan de do, the  place wey I go take wuna go. . . . The land no clean, and I go punish the land for e sin.” The things wey Canaan people de do really dey bad sotey for the eye of the holy God of Israel, the land wey them de live dey corrupt and e no clean.​—Lev. 18:3, 25.

Even though say Jehovah punish Canaan people, other people continue to do things about sex wey God hate. After more than 1,500 years, Paul describe people of the nations. Christians de live among them that time. Paul talk say people of the nations “no de care again about wetin good or bad.” The truth be say, “they no get shame for the bad things wey them de do. Them de do all kind of things wey no clean and they always want do more.” (Eph. 4:17-19) Na so e still be today, many people no get shame for the bad thing wey them de do. Make we do everything wey we fit do as true worshippers of God, so that we no go look the corrupt things about sex wey people of this world de do.

Pornography na serious bad thing, e no show respect for God at all. God make people for e image. E give us sense to know wetin good and wetin bad. With good sense, God put boundary for things wey concern sex. E want make sex be only for husband and wife, make they use-am enjoy theirself. (Gen. 1:26-28; Prov. 5:18, 19) Some people de produce pornography or de support other people make them de watch-am. Wetin this people really de do? They no care at all about the laws wey God give. Yes, this kind people no de respect Jehovah. As this people de produce or support pornography, God go judge them because they no care about e laws.​—Rom. 1:24-27.

Some people decide to read or watch pornography even as they know say na bad thing. They fit feel say na something wey they fit use relax and enjoy theirself, and e no go cause any trouble. But the truth be say, them de support the people wey the laws of God no mean anything to them at all. E fit be say no be wetin they get for mind when they first start to watch pornography. But, Bible make-am dey clear say make worshippers of Jehovah really hate pornography. Bible encourage us say: “All of wuna wey love Jehovah, make wuna hate wetin bad.”​—Ps. 97:10.

Some people no want look pornography, but  e fit hard for them. Why? Na because we no dey perfect. E fit be serious struggle for us to fight dirty things about sex wey our body want. And because we no dey perfect, our heart fit deceive us to believe say no be bad thing to watch pornography. (Jer. 17:9) But many people don win this fight as they become Christian. As you know this one, e go make you dey sure say you self fit win the fight. See how Bible fit protect you so that you no go fall for the trap of Satan wey be pornography.

As we don talk-am before, plenty Israel people enter serious trouble because they allow bad things wey their body want to grow for their heart. The same thing fit happen to us today. James wey be the half brother of Jesus, describe the danger like this, say: “Temptation de come for each person when the thing wey e body want don deceive the person sotey e become trap for the person. Then, when the thing wey e body want don mature, the result na sin.” (Jas. 1:14, 15) If person allow bad thing to grow for e heart, as time de go, e dey possible say the person go sin. So we must remove things about sex wey God hate from our mind, and make we no continue to think about them.

If you notice say dirty things about sex no want comot for your mind, do something quick-quick. Jesus talk say: “If your hand or your leg de make you fall, cut-am make e comot and troway-am. . . . And, if your eye de make you fall, drag-am make e comot and troway-am.” (Matt. 18:8, 9) The thing wey Jesus talk mean say we go really cut part of our body comot? No! Jesus use this example to help us understand say we really need to check ourself and know why we de think bad things, and then remove-am quick-quick. So how this advice go fit help us for things wey concern pornography?

If you jam pornography, no just think for your mind say, ‘E no fit affect me.’ Quick-quick, turn your face comot. Off the television quick-quick. And if na phone, tablet or computer, make you off-am quick-quick. Put your mind for clean thing. If you do like this, e go help you control the things wey you de think for your mind, instead of the things to control you.

What if you don stop to watch pornography, but sometimes the picture still de come back to your mind? The truth be say, things about pornography fit remain for your mind for long time. This things fit come your mind anytime. When e happen, you fit want do something wey no dey clean, like to rub and play with your sex organ make e de sweet you. So make you know say that kind things fit come back to your mind, and make you dey ready to fight them.

Make your heart strong more-more say you go continue to think and do the things wey God want. Be like apostle Paul as e dey ready to “train [e] body and treat-am like slave.” (1 Cor. 9:27) No allow your mind to think about dirty things sotey e begin control you. Bible talk say: ‘Change the kind person wey you be as you de change the way you de think, so that you fit prove to yourself say you de do wetin good, wetin God accept and wetin God really want.’ (Rom. 12:2) Remember say: Na when we de think the way God want and do wetin e want, we go really get joy and our mind go come down, this one better pass to do wetin our body want.

Try to put different-different Bible verse for your head. Then anytime wey bad thing come your mind, make you force yourself to think about the Bible verse them. Different-different Bible verse like, Psalm 119:37; Isaiah 52:11; Matthew 5:28; Ephesians 5:3; Colossians 3:5; and 1 Thessalonians 4:4-8 fit help you to understand the thing wey Jehovah want make you do, and see pornography the way e de see-am.

Wetin you go do if you feel say you no fit stop to think or look dirty things about sex? Make you try imitate Jesus well. Jesus na our number one example. (1 Pet. 2:21) After Jesus baptize finish, Satan continue to tempt Jesus. Wetin Jesus do? Jesus continue to reject the temptation. E quote some scriptures when e de reject the temptation wey Satan bring. Jesus talk say: “Comot for here, Satan!” and Satan leave Jesus. So, just as Jesus no stop to reject Satan, make you too no stop. (Matt. 4:1-11) Satan and this world wey e de control go continue to make you like to think dirty things about sex, but make you no tire to reject them. You fit win the fight against pornography. Jehovah go help you win your enemy.

Continue to pray and ask Jehovah say make e help you. Paul talk say: ‘Tell God everything wey you want; then the peace wey God de give wey e pass anything wey person fit understand, go protect wuna heart and how wuna de think through Jesus Christ.’ (Phil. 4:6, 7) God go give you peace of mind to help you fight wetin bad. If you come near Jehovah, e ‘go come near you.’​—Jas. 4:8.

When our friendship with Jehovah really dey strong, this one go protect us from the traps wey Satan de use. Jesus talk say: “[Satan] the person wey e de control this world de come, and e no fit do me anything.” (John 14:30) Why Jesus really dey sure say Satan no fit do anything? Jesus don explain before say: “The One wey send me dey with me; e no leave me make I dey alone, because I de always do wetin e want.” (John 8:29) Like Jesus, if you try to do the things wey Jehovah want, you fit dey sure say Jehovah no go abandon you. No ever put hand for anything wey concern pornography, and you no go enter the trap wey Satan don set.