FOR 1970, some people see one scroll for Ein Gedi, for Israel, near land for west side of the Dead Sea. (This people de study the way people de live for olden days. Them de call them archaeologist.) Fire don really burn the scroll. They see this scroll when them de dig the land wey one synagogue be dey. When people destroy that village some time after 500 C.E., they burn that synagogue. Because the condition of the scroll really dey bad, they no fit read wetin dey inside. The scroll fit even scatter if person try to open-am. But, one machine help so that they fit see wetin dey inside the scroll. And they still use one new computer program to read wetin dey inside.

Wetin they see after they use machine check the scroll? Na Bible text dey inside the scroll. Wetin dey inside get some verses for the beginning of the Bible book of Leviticus. Part of the things for inside this verses, na the name of God for Hebrew wey they write with the four Hebrew letter wey them de call Tetragrammaton. They find out say the scroll fit old reach between 50 C.E. and 400 C.E. This one show say na this scroll be the oldest Hebrew Scriptures wey they don see after the Dead Sea Scroll (or, Qumran manuscripts). One man wey e name na Gil Zohar talk for one newspaper say before they see the scroll for Ein Gedi, about 1,000 years dey between the Dead Sea Scroll (from about 100 B.C.E.) and the second oldest manuscript wey them de call Aleppo Codex (from about 930 C.E.). Experts for this matter talk say, wetin dey inside the Ein Gedi scroll show say the writing for the Torah (or, the first five books for Bible) “no change even as thousand of years don pass, and as people copy-am, their mistakes no change the text.”