1. How Jehovah de feel when one of e sheep come back?

AS WE learn for the article before this one, Jehovah talk say e be like good shepherd wey love e sheep and de care for them one by one. And e de find anyone wey don lost. When Israel people leave Jehovah, e tell them say: “Make wuna come back to me, and I go come back to wuna.” We know say Jehovah still de feel like this today because e talk say e “no de change.” (Mal. 3:6, 7) Jesus talk say Jehovah and the angels de really happy even if na one servant of Jehovah wey lost, come back to Jehovah.​—Luke 15:10, 32.

2. Wetin we go learn for this article?

² Make we talk about three story wey Jesus use teach important lesson about how we fit help people wey don stop to preach and go meeting. We go learn about some character wey we need to get, so that we fit help this kind people come back to Jehovah. And we go see why e good to do our best to help people wey their faith don weak.

3-4. Why the woman for this story for Luke 15:8-10, sofri find the coin wey lost?

³ We need to do our best to find people wey want come back to Jehovah. For the book of Luke, Jesus talk the story of one woman wey lost one coin wey get value. Them de call this coin drachma coin. The important part of this story na wetin the woman do to find the coin.​—Read Luke 15:8-10.

⁴ Jesus talk how this woman feel when e see this drachma coin wey get value. For Jesus time, when woman for Israel de marry, sometimes e mama go give-am one set of ten drachma coins. E fit be say this coin dey special to this woman because na part of the set wey e mama give-am. The woman feel say the coin don fall for ground. So e on lamp and check ground but e no see anything. E fit be say the light from the lamp no bright reach for this woman to see the small silver coin. At  last, e sofri sweep the whole house. For the dust wey e gather from wetin e sweep, the silver coin just dey there de shine because of the light from the lamp. As the woman see-am, e mind just come down! E call e friends and neighbors and tell them the good news.

5. Why we need to work hard to find people wey don stop to preach and go meeting?

⁵ As we see from this story wey Jesus talk, person need to work hard to find something wey lost. Na the same thing we need to do for people wey don stop to preach and go meeting. We go work hard to find them. Many years fit don pass since they stop to worship Jehovah with us. They fit don move go place wey the brothers for there no know them. But now we dey sure say some of them want really come back to Jehovah. They want serve Jehovah again with e people but they need our help.

6. How everybody for congregation fit join find people wey don stop to preach and go meeting?

⁶ Who fit join for this work to find people wey don stop to preach and go meeting? All of us, whether we be elders, pioneers, publishers, or we get this kind people for our family. You get friend or family member wey don stop to preach and go meeting? You don meet this kind person when you de preach from house to house or for open place? Explain to the person say, if e go like make they visit-am, you go dey happy to give e phone number or address to the elders for your congregation.

7. Wetin you learn from the thing wey Brother Thomas talk?

⁷ Na elders get the main work to find people wey want come back to Jehovah. How they fit do-am? See wetin one elder wey e name na Thomas * talk. Thomas de live for Spain and e don help pass 40 people come back to Jehovah. E talk say: “I go first ask different brothers and sisters whether they know where inactive person de stay. Or I go ask them whether they remember anybody wey don stop to go meeting. Plenty people for congregation de really like to help because e de make them feel say them dey part of this work. After, when I visit inactive brother or sister, I de ask about their children and other people for their family. Some of this people first de bring their children come meeting, and this children fit don be publisher before. We fit still help them come back to Jehovah.”

8. For the story wey dey Luke 15:17-24, how the papa treat e pikin wey don repent?

⁸ Which fine-fine character we must get if we want help people wey want come back to Jehovah? Make we talk some things wey we fit learn from the story wey Jesus talk about the son wey comot for house. (Read Luke 15:17-24.) Jesus explain say after the pikin don see say sense no dey for wetin e do, e decide say e go go back to e papa house. The papa run go hug the pikin with love, to show say the love wey e get for the pikin never die. The bad thing wey the pikin do really worry e conscience and e feel say e papa no suppose treat-am like pikin again. The papa really feel for the pikin as the pikin de talk how e de feel. Then the papa do some things to show the pikin say e really like as e come back. The papa still show say e no go treat the pikin as slave but as pikin wey e love. To prove-am say e don accept the pikin, the papa arrange big party and fine cloth for this pikin wey don repent.

9. Which character we must get if we want help people wey want come back to Jehovah? (Check the box “ How We Fit Help People Wey Want Come Back to Jehovah?”)

 ⁹ Jehovah be like the papa for that story. E love brothers and sisters wey don stop to preach and go meeting, and e want make they come back. If we de do like Jehovah, we fit help them come back. This one mean say we must dey patient, de feel for them, and show them love. Why we suppose show this fine-fine character, and how we fit do-am?

10. Why we need to dey patient if we want help person come back to Jehovah?

¹⁰ We need to dey patient because e de take time before person fit come back to Jehovah. Many people wey first stop to preach and go meeting talk say, elders and other people for congregation visit them plenty times before they start to go meeting again. One sister from Asia wey e name na Nancy, talk say: “One sister wey be my dear friend for congregation really help me. E love me like say I be e senior sister. E remind me of the good things wey we don do together before. E go just dey patient de listen as I de talk how I de feel. And e no de fail to advice me. E prove-am say e be better friend wey ready to help me anytime wey I need help.”

11. If we want help person wey de vex for wetin they do-am, why we need to get feeling?

¹¹ When person de vex, e fit de feel pain like say e get wound. When we show say we get feeling for this kind person, e go be like medicine wey fit make the person well. Some people stop to come meeting because of wetin person for congregation do them. And even though say plenty years don pass,  e still de hard them to comot-am for mind. And this one fit make-am hard them to come back. Some fit de feel say they no treat them well. They fit need person wey go listen to them and understand how them de feel. (Jas. 1:19) María wey dey inactive for sometime talk say, “That time, I need person wey go listen to me, comfort me, give me good advice and help me.”

12. Give example wey show how the love wey Jehovah get be like rope.

¹² Bible talk say the love wey Jehovah get for e people just be like rope. How the love wey God get be like rope? Think of this example: Make we talk say person fall inside big river wey the water cold and de carry person. As the person de go down, somebody from inside one boat throw something wey the person fit hold so that e no go go down. Na true say the person go happy for this thing wey they give-am, but e need more help to fit survive. E need to comot from the water. So, the people wey dey inside the boat need to throw rope wey they go use drag the person enter inside the boat. Jehovah talk wetin e do when Israel people stop to worship-am. E talk say: ‘I de draw them with rope of love.’ (Hos. 11:4) Na the same thing Jehovah de do today for people wey don stop to preach and go meeting, wey plenty worry-worry and problem de press them down. E want make they know say e love them, and e want draw them come e side. And Jehovah fit use you to help them know say e love them.

13. How Pablo experience show say our love fit help people come back to Jehovah?

¹³ E dey important make we continue to tell this dear brothers and sisters say  Jehovah love them, and show say we love them too. Pablo wey we talk about for the article before this one, stop to preach and go meeting for more than 30 years. E talk say: “One morning, as I de comot for house, I meet one old sister. The way e talk to me show me say e love me and care about me. I start to cry like small pikin. I tell-am say e be like say na Jehovah send-am make e come talk to me. Na there I decide say I go come back to Jehovah.”

14. As the story for Luke 15:4, 5 talk, wetin the shepherd do when e see the sheep?

¹⁴ We need to continue de help and encourage people wey want come back to Jehovah, after we don see them. Like the pikin for the story wey Jesus talk about, they fit get deep pain for their heart wey go take time to heal. And because of the things wey they don experience for this wicked world, their faith fit don weak. We need to help them make their faith for Jehovah strong again. For the story of the sheep wey lost, Jesus talk how the shepherd put the sheep for e shoulder, and carry-am go join the other sheep them. The shepherd don already do big work and spend plenty time to find the sheep. But e see say the sheep no get power to waka go join the other sheep them. So e carry the sheep for shoulder go back.​—Read Luke 15:4, 5.

15. How we fit help weak people wey want come back to Jehovah? (Check the box “ Brochure Wey We Fit Use Help Them.”)

¹⁵ Because of problem wey some inactive people de face, e fit hard them to come back to Jehovah. So we go need to do big work and spend plenty time to help them. But with help from Jehovah spirit, Bible,  and the things wey our organization de produce, we fit help them make their faith strong again. (Rom. 15:1) How we fit do-am? One elder wey don do this work many times talk say, “Plenty people wey don stop to preach and go meeting need Bible study after they don decide say they want come back to Jehovah.” * So if they tell you say make you study with inactive person and you fit, you go accept the work? The elder still talk say, “Publisher wey go study with inactive person need to be better friend, wey the person fit trust and tell-am wetin dey e mind.”

16. How we know say the angels go help us?

¹⁶ Plenty experience dey wey show say angels de help us find people wey want really come back to Jehovah. (Rev. 14:6) For example, one brother for Ecuador wey e name na Silvio, really beg Jehovah for prayer to help-am come back. As e still de pray, the bell for e door ring. Two elders dey e door. For this visit, they really happy as they start to give this brother the help wey e need.

17. Wetin we go gain if we help people wey their faith don weak?

¹⁷ We go really get joy when we help people wey their faith don weak come back to Jehovah. One pioneer wey e name na Salvador, de do e best to help this kind people. E talk say: “When I think how Jehovah don save one of e dear sheep from this wicked world and say I don fit join Jehovah do this work, sometimes, I de happy sotey water de comot for my eye.”​—Acts 20:35.

18. If you don stop to preach and go meeting, wetin you fit dey sure of?

¹⁸ If you don stop to preach and go meeting, make you know say Jehovah still love you. E want make you come back. You go need to do some things to fit come back. But just like the papa for the story wey Jesus talk, Jehovah de wait for you to come back, e go really happy to welcome you back to the place wey you suppose dey.