This Bible verse them mention nine Bible character: “The fruit wey the spirit de produce na love, joy, peace, patience, kindness, goodness, faith, to dey gentle, self-control.” But make we no think say na only this fine-fine character the spirit of God go fit help us get.

See wetin apostle Paul write for the verse them before this one. E say “wetin body want” na sex wey bad, dirty things, behavior wey de bring shame, to worship idol, to do things with demons, to hate people, to cause trouble, to jealous, to vex anyhow, to cause argument, to divide people, to form groups inside religion, to envy people, to dey drunk, to do party wey people no de fit control theirself, “and things like this.” (Gal. 5:19-21) See how Paul end the thing wey e talk, e say: “Things like this.” This one mean say e no talk everything wey dey among “wetin body want,” like the ones for Colossians 3:5. Na so Paul still do for Galatians 5:22, 23. After e mention the good character them, e talk say: “No law dey against things like this.” So no be say, Paul try to write all the fine-fine character wey the holy spirit fit help us get.

We go understand this verse well when we compare-am with wetin Paul write to the congregation for Ephesus. E say: “The fruit wey light de produce na everything wey be the truth, goodness and righteousness.” (Eph. 5: 8, 9) Goodness, righteousness, and truth na part of “the fruit wey light de produce,” but na still part of “the fruit wey the spirit de produce.”

Na so Paul still do when e tell Timothy to “de do righteous things, worship God from the heart, get faith, get love, de endure and dey gentle.” This one na six better character. (1 Tim. 6:11) Na only three character (faith, love, and to dey gentle) Paul talk about as part of “the fruit wey holy spirit de produce.” But, Timothy know say e go need holy spirit to help-am get this other fine characters wey be: to do righteous things, to worship God from the heart, and to endure.​—Compare Colossians 3:12; 2 Peter 1:5-7.

So, Galatians 5:22, 23 no talk all the character wey we need to get as Christians. The spirit of God go fit help us to get the nine character wey we talk about for the beginning of this topic. This character them na “the fruit wey holy spirit de produce.” But other fine-fine character dey wey we need to get to be mature Christians. And Bible still talk say make we “wear the new character. Na God make-am the way e want, and the character agree with wetin really dey right and faithful.”​—Eph. 4:24.