Paul talk say: “I don die because of law for things about law, so that I fit dey alive for God.”—Gal. 2:19.

The thing wey Paul write about connect with the main thing wey e de tell the congregations for Galatia, wey be one of the place wey Rome de rule. Some people for there de talk lies to deceive some Christians. This people de teach say for God to save person, the person go need to obey the Law of Moses, especially the thing wey e talk about circumcision. But Paul know say God no put-am as law again say Christians must circumcise. The way Paul reason with them dey powerful, and Paul show say the things wey the people de teach na lie. E still make the faith of the brothers dey strong for the sacrifice of Jesus Christ.—Gal. 2:4; 5:2.

Bible make-am clear say when person die, the person no know anything, or things around no fit affect the person. (Eccl. 9:5) When Paul talk say: “I don die because of law,” Paul mean say the Law of Moses no fit affect e life. But Paul dey sure say because of the faith wey e get for the sacrifice of Jesus, e don “dey alive for God.”

Paul condition change “because of the law.” How this one happen? Paul just explain say “God fit see person as righteous person only if e get faith for Jesus Christ, no be because e de follow law.” (Gal. 2:16) The truth be say, the Law don do one very important thing. Paul explain to the brothers for Galatia say: “They add-am to make sin show, until the pikin wey them don promise about go come.” (Gal. 3:19) True-true, the Law make-am clear say people wey sin dey their body no go fit obey the Law well, and say they need one last sacrifice wey dey perfect. So the Law help people to see say na Jesus be the “the pikin” wey Bible talk about. When person show say e get faith for Jesus Christ, God fit see the person as righteous person. (Gal. 3:24) God see Paul as righteous person because the Law don make Paul to accept and put faith for Jesus. So Paul ‘die for things about law’ and e come “dey alive for God.” Na God come de control Paul, no be the Law.

Paul still talk this kind thing for the letter wey e write go give the brothers for Rome. E say: “My brothers, the body of Christ don make wuna dey free from the Law . . . We no dey under the Law again, because we don free from the thing wey hold us.” (Rom. 7:4, 6) This Bible verse and Galatians 2:19, show say Paul no de talk say e go die as sinner because e be dey under the Law. Instead, e de talk about freedom. Paul and other people like Paul no dey under the Law again. The faith wey they get for the sacrifice of Jesus don free them.